Numbers 5

Mali susu jeramre ngeboda, “Ukunkamrure,” pepu upu

1Allah Yahwehdi, Musa tep pepu. 2Musa kandi apeipne upu yumada, sun Israel nesala damai bena pepkurume. Ada, sun Israel nesala mali kot susu, sun bol deikida, ila mambul susu jeramre neng do, mali susu jeramredi, yapun cap, yapi cap embaramre mali susu jeramre nesala do, tonda nimi depmare ngebo, er bol bepmare ngebo do, sun aneng yumada, Israel nesala sun keana tep, dodin tenda ati dopra kuramumnyai di gopra, yuk karenai bura tara dokotepmumpa, kunkamrure. Ada, ‘Amali kecada, kip neng, sun nong deiki sakrorur’ tenena tep, tupa nong telep keamre Israel nesala cap, asusu jeramre nesala cap, wisipra men kunkamenge. 3Sun autopu susu jeramre nesala cap, mali keca bena nesala cap tep nengeda, “Sun yuma, nimi pe, nerapu peda, adipapu yukaipu bena kunkamrume,” penkamrume. Deiyoda, ake. Adeiki di, ne Allah cap, sun cap kikiman kunmapyai, ‘Mali kupra deipsenung’ tenen, sun autopu mali keca kwamre nesala cap, konum den nesala sun bol bepmare nesala capda, adipapu enepkotepmumpa, bura tarapu wengbankamenge. Allahdi peipu.

4Israel nesala yumadi, Allah er pepra deipu upu gekepidi, apeipka utopu kupra, yuk nimi tep, aila mali susu jeramu ngebodi yuk neng tep, benepmanto nesala cap, dena neng sun bol bena nesala capda, enepra bura tara yukai donoki. Ada, Allah erdi peipmautopu, akeca kwamu nesala nimi pe, nerapu peda, bura tara donokipa, yuk karenaipu bena kurami.

Ton ngebodi, yuk ngebo tep, mali kuprepa, amenda lepsisikra kupkamrenge tep, pepu upu

5Allah Yahwehdi Musa tep pepu. 6Ange-ange yuma kuna tep nengeda, Allah Yahwehdi Israel nesala tep, “Ukunkamrume,” pepra deipu. Ukupmantoda, sun kan-kan neitamai di, tenpu ngebodi do, tenpu nerdi do, ne peipsi upu men gekepredi, er kabo damai tep, mali kupyopda, er angebo do, aner do, adipapu mali konum kupmare. Cadi, nedi anesala mali kupmengenge tep, wenepkamne ja. 7Menmenada, er angebo adipapu, er mali kupmare keca tep, “Ne mali kupmane,” pepra jenek pepredi, tonda, ‘Ne mali kupmana cadi, ne mali kupman ngeda, yo punupkune’ tenen, er kabo damai doupra karerbenkure dingeda, ware keca do yuma, mali kweipmare keca nong cap, tonda tapakra dua puluh persen ton (20%) tapakra duberedi, er kabo tep karenkamrure.

8Dinino, er damai mali kwamre ngebo konum depmarepa, er tep tamupra men karepmanto kupyopda, erdi angebo tep, meneng damai men kareptue. Tonda, ange utopu, er mali kweipmare ngebo, erdi deiamre nyapu pe, uda, angebo er tamna neng peda, gam men kuramenge pangeda, amali kuamrenge yo pununa tep nengeda, mali kupmarya deiyo ngebodi, Allah er damaipu, ayo pununa tep, karepkure keca doupra, kareryakankamrure. Angeda, imam neng, sun jena tep, yana karenkamrure. Amali kuamrenge tep, yo pununa kecada, doupra yarenge tep pepne. Tonda, sun mali kupmumdi, ‘Allahdi nun mali kunup keca kaukepseredi, lyepsetu’ tenen, domba bisam doupra, ne Allah tep kareryakanerumu nge cap, nedi pepsinge utopungepu doupra, sun imam neng damai tapakra yana kareryankamrure. 9Israel yala nesaladi, Allah Yahweh gispal dona tep karenung keca yala-yala yuma dorona nengda, Allah si eremna ati talepra pel donung neng, sun damai dubangepa, sun aimam neng dipapu akeca yuma doronkamnunge. Akaren keca yumada, sun ngepu kurura tepa.

10Ada, nimidi Allah tep ketenepra kareryakanung kecada, Ware Israel nesaladi do, sundi karenkamnenge keca yala-yala yumada, Allah ernge pua kurure. Dinino, akeca yumada, nimidi Imam neng, Allah ati talepra pel dona neng tep, kareryakankamnunge. Akeca yumada, sun imam neng dipapu doronkamnunge. Ange yumada, sun nge pua.

Nimi domi ner dinin, erdi yuk ngebo cap, kikiman mali kuprengopda, sun wenemna tep nengeda, “Ukunkamrume,” pepu upu

11Allah Yahwehdi Musa tep, “Israel nesala damai bememdi upepkurume,” peipu. 12“Ange-ange yumada, ukunkamrume,” pepra deipne ngeda, kandi sun Israel nesala damai bena pepkurume. Aupuda ake. Nimi domre ner dinin, er akengebo tep, iniptaprapredi, nimi yuk ngebo cap, tonpa kuramredi, mali kemdongoramrengopda, tek sisi aner, er domre ngebo tep, konum mali kemderirure. 13Ada, aner cap, yuk tali ngebo cap, kikiman maprengedi, mali kemdongoramrenge nge tep pepne. Anerda tek sisi konum mali kweipdanamre dinin, erdi er domre ngebo tep, men lap perure. Tonda, aner cap, yuk ngebo cap kikiman mali kuprei taruda, yuk tali dakuramre neng ton, men dinunge dinin, tek sisi konum mali kupra derirdarurunge.

14Tonda, amali kuramre ner, er domre ngebo, er dipru neitamai di, ‘Uo, ne domsi nerda, yuk ngebo cap mali kuprei,’ tupa tenepredi, aner tep dipru wilimdoramyopda, angebodi er domu ner dopredi, Allah karena tep imam deiyo ngebo damai dubenkamrure. Ange utopu, ton ngeboda, er domre ner mali men kupmare, tonda er betapra men kael kepmare dinino, erda, ‘Uo, ne nerda, yuk ngebo cap kurur do? Erda konum mali kweipdanmar do?’ tenen, angepu mali kange doupra tupa-tupa tenemre dingeda, erdi er domre ner doupra, Allah karena tep imam deiyo ngebo damai dubenkamrure. 15Angebodi er ner doupra, Allah cap, nimi cap antamna tep, opkal bol di keana dodin tenda ati talepra pel dona neng, sun damai duyakankurure. Imam deiyo ngebo damai dubenkure taruda, apel donkamrure. Ada, ‘Allahdi ne ner mali kupmarenge tep, kau kepredi, gum kupra deiptue’ tenen, Allah karena keca ton, duyakankamrure. Doupra yakankamre kecada ake, gandum du dopra taikmengedi, sikke utopu derinung keca, er si terigu gandum 2.2 liter ketenepra duyakankamrure. Atepung ngeda, minyak saitun mokon cap, tonda siltong telep peramre keca er si kemenyan cap, kapul men taplakra deipmangengepu, doupra kareryakankamrure. Deiyoda, angebodi gandum keca dopra, Allah tep karepkamre ngeda, er ner mali kupmarengepu, kange di tamupra tenenapapu, ‘Mali kupmamume,’ pepkamrenge tep kurure. Ange deiyoda, anerdi pio mali kupmare keca, kange di tamupra tenenange tep kurure.

16Amali kupmare ner, er domre ngebodi ange yuma konum kupre pangeda, Allah Yahweh cap, nimi cap antamna ati pumbon pel dona deiyo ngebodi, aner tep, “Kanda, Allah damai yana tekurume. Ukupra yana tekmem dingeda, kan urasin dopra, Allah er bungamre tara kepkurume,” penkamre. 17Allah er si eremna ati pel dona deiyo ngebodi, me mau er si mangkok tu di dopra, dopmengedi, ketenemdinung nge, dopropredi, amau pum bonda, mali keca yambulanun ton, pio men kwamre mepu gwepra, amau pumbon kidinkamrure. Ukupyopda, Allah si eremne ati asonai di, sikke sangamre tu bute yambulanun dopra, ame mau pumbon yumdongonkamrure. 18Ukupyopda, adipapu aner er potong deikida, er buru di mali kupra deipkurure. Ukupredi, arup keteneipmare me dopra, aner giso deiki dingdinkamrure. Tonda, aner er nengedi, siknimna upu pepmarya tep, aner mali kupmarenge tep kunumna doupra, yakanmare tepungda, er ner buru deiki deiprepa, dounkamrure. Dinin, imam ngeboda, pio su me mau gwepra er pe buru di dounkamrenge deiki di wiprepa, aner damai ikin keca yakankamre. Ada, aner er mali kuamre dipapu, ‘Ne mali men kwamsi,’ pepra, iniptamya tep, wiprepa aner damai ikin keca yakankamre.

19Ame mau konum doupra tekyopda, Imam ngebodi, adipapu aner tep upenkamrure. “Ne tek sisi pepkene, kanda tek sisi upu pepkurem do? Mok upu pepkurem do? Kanda, nimi yuk neng cap ton, tonpa men antapra mapmareruma deiki di, pio mali weik men kweipdanmumpa, ayu me jepmemyopda, pio ikin keca kan damai men yakankamkere. Ada, tek sisi yuk nimi cap kikiman men mapmumdi, mali men kweipdamum dingeda, akarekuken su me jepmemya peda, asu me deiki di men wipkamkera cadi, ila kange mung keca kan nong deiki men yakankamkere.

20Dinino, kan nenge konum domkeua cadi, erda kan deiyo ngebo kurure. Er amutara utopu kuramum taru neitamai dinin, kanda inipmumdi, nimi yuk neng cap tonpa kikiman konum mamumnyopda, kan dipapu kan pe nong tep, konum pio mali kweipdamume. Tonda, angebodi kan cap kikiman mapreruma cadi, er pe nong tep, konum mali kweipdau. 21– 22Ataruda, imam ngebodi aner tep, upepkamre. “Kanda, upepkurume. ‘Nedi tek sisi mali kupmasi dinin, iniptapsi. Ukutaruda, nedi, ‘Gume, lap men pepkune,’ tenepnedi, mok upu deiki dipapu pepkune,’ tenepnedi, mok upu pepne pangeda, Allahdi ame jepkuna deiki di, wipdongopnetupa, kange mun keca ne nong deiki deipnetue. Ada telepe pua. Atep nengeda, nedi mok upu pepnyopda, Allahdi ne tep nengeda, tek sisi wipdongopnetupa, ila kange mun keca weik, ne nong deiki deipnetue.’ Angeda kan pedi upepkurume.” Imam deiyo ngebodi aner tep pepkamre.

Tonda, imam ngebodi aner tep upepkamre. “Kanda, mok upu pepmemdi, ayu me jepmemnyopda, Allah Yahwehdi wipdongopkerepa, kan tamna nesala yumadi kan tep, ‘Gume, anerda pio mali weik kurure. Ware nesala do yuma, anerdi mali weik kuramutopu kupmepyopda, Allahdi adipapu poptapsetue,’ penkamenge. Tonda, akununga neitamai di kanda wina deiyo keca dopropkamrume. Ada, asu me jepmemnyopda, ange deiki wipdongopkere pangeda, kan mundu weika di nepkeredi, pu jepkamkere. Tonda, kan nong neitamai mi douamremaida, mali weik kukerepa, sakyopda, kandi nyapu ton pio men deipmanto kunkamreme.” Imam deiyo ngebodi aner tep upepkamre.

Upepre pangeda, anerdi adipapu pepkamre. “Yo apepmaneremtopu kupneryopda, telepe pua. Nedi mok upu deiki di, pepnyopda, kandi ataru pepmanerem upu yumada, tek sisi kupkamnere. Allahdi ne wenemna tep, wipdongopnerepa, ila kange mun keca ne nong deiki yana kupneryopda, telepe pua. Amin, Amin.” Anerdi aupu adipapu pepkamre.

23Ukupredi, anerdi pepmare upu yumada, Imam ngebodi gekepredi, awidongona tep deiyo upu yumada, potong nulnul peramre sapi bol deiki di sekra derinkamre. Ukupre dingeda, imam ngebodi su me di gwepra keteneipmare ngeda doupra, sapi bol deiki widongona upu sekmarenge me kuprepa, ame sakredi, asu me mau pumbon wekamre. 24Awidongona upu sapi bol deiki me kuprepa, asu me mau pumbon konum wekre pangeda, imam ngebodi, ‘Mali kupkamre do, gum do?’ tenen, widongona yu meda dopra, aner tep, “Jepkurume,” peprepa, anerdi ame dopra jepre taruda, aner er mundu neitamai wekamre. Konum wekyopda, aner tek sisi mali kupmarepapu, mok upu deiki di, “Ne men kupmasi,” pepra, iniptapmaryopda, ayu me di, er nong yuma wekrepa, ila pu weik jenkamre. Dinin, anerdi mok upu men pepyopda, pu men jenkamre dinin, teleppu tupa kunkamrure.

25Ataruda, aner er nenge bodi, ‘Ne ner cap, yuk ngebo cap kikiman mapmareng do, gum do?’ tenen, aner tep dipru wilipdongopudi, yu weik tenepunge yo pununa tep, ‘Allah karepkun’ tenen, arup taru tepung dopra duyana karepmau ngeda, aner er buru di doupmare ngeda, imam ngebodi ka di ton tamupra doprapredi, ‘Allah karepkun’ tenen, peten kemna tep, Allah er urasin dam tara bena ereipkamre. Angeda, Allah Yahweh tep, er damai bena konum petenkemna tep, ereipyopda, atepung uku dongona tep, mesba konum keteneipra deipya damaipu dubankamre. 26Duberedi, atepung neitamaida Imam ngebodi, tenpu buru di metakanun wilipra dopropyopda, ‘Allah tep konum karepmangunge tupa tenenkare tenen, dopropnedi Allah tep karepkune,’ tenepredi, akeca dopra, ketenepra deiamengai mesba deikipu duberedi, uku dongoprepa, uku di atepung yuma jepropkamre. Ukupre taruda, widongona tep su me dopra keteneipmaungeda, aner kareprepa, anerdi su me adipapu jepkamre.

27Imam ngebodi, su me dopra aner tep karepyopda, aner adipapu jepkamre. Konum jepyopda, akonuma. Aner er domemeu ngebodi, aner konum dopka cadi, aner inipudi, nimi yuk neng cap tonpa kikiman konum mapyopda, er dipapu er pe nong tep, konum pio mali kweipdapu. Yuk ngebo cap kikiman mapreia deiki di, er pe nong tep, konum mali kweipdapu. Atep nengeda, anerdi asu me konum jepyopda, Allahdi ame jepkurya deiki di, aner tep wipdongoprepa, kange mun keca er nong deiki deipkamre. Ada, er tamna nesala yumadi er tep, ‘Gume, anerda pio mali weik kurure. Ware nesala do yuma, anerdi mali weik kuramutopu kupmepyopda, Allah adipapu poptapsetue,’ penkamemenge. Tonda, amutu nesala yumadi aner tep, ‘Gume, aner er si konum pio mali kupke,’ tenenapu kunkamenge. Tonda aner er mundu weika di nepredi, pu jepkamkere. Tonda, er nong neitamai mi douamreaida, er mundu pumbon gelal sepre pangeda, adeiki di mali weik kuprepa, sakyopda, anerdi nyapu ton pio men deipmanto kunkamre. 28Dinino, ukupmantoda, aner cap, yuk ngebo cap ton, tek sisi kikiman tonpa men antapra mapreiyopda, mali men kunkamre. Er kuna deiki di mali men kweipdaua cadi, asu me jenkamra deiki di widongona ngeda, aner er damai men yankamre. Tonda, er dakunkamre taru yumada, nyape ton pio derinkamre.

29Atep, amem upu yuma pepmaken yumada, moupra tenenkamrume. Ukupmantoda, ware ngebo do, er ner tep, ‘Yuk ngebo cap ton antamreidi, kikiman mapreia deiki di, er pe nong tep mali kweipdanmar do?’ tenena deiki di, er ner tep, mali kange doupra dipru wilimredi, aner tep mali upu pemyopda, angebodi er ner doupra, Allah damai dubena deipkamre. Ange utopu, ware deiyo keca tep do? Tenpu ngebodi, er ner tep, ‘Yuk ngebo tep mun perur do? Gum do?’ tenepredi, dipru wilimredi, ‘Anerda ne songe,’ konum tenepyopda, er ner dopra duberedi, Allah er si eremna ati damai deipkamre. Konum ukupyopda, Imam ngebodi, arup lap pepmasentopu kupkamre. Ne Allahdi, “Ukupkurume,” pepra deipmasentopu kupra, aner er tepapu imam nengdi apel yuma tek sisi pio donkameng ja! Tenpunge peda tamna gume. 30Ange utopu ton, ware ngebo do yuma, yuk neng cap antamdana gum dinin, yuk deiyo tep, er domre ner tep, mali kange doupredi, aner tep dipru wilimdongoramre pangeda, er ner dopredi, Allah Yahweh er damai dubena deipkamrure. Allah damaipu bukyopda, imam deiyo ngebodi, arup ne Allahdi, “Ukupkamrume,” pepmasentopu apelpu donkamrure. Tenpunge peda tamna pio gume. 31Aner domre ngeboda, er ner tek sisi mali kupyopda, aner deiki di ikin keca weik yakankamre. Dinino, aner er domre ngeboda, ikin keca er nong deiki men yakankamrure. Erda, mali kuna gum tep nengeda, er damai ikin kecada pio men yakankamre. Dinino, er nerda, mali kupmarenge tep, er dipapu iniptapyopda, ikin kecada menmena er damai yakarepa doronkamre.