Num 6 | XteSC | STEP | Allah Yahwehdi Musa tep pepu.

Numbers 6

Ware neng do yuma, ‘Neda, mali kunange yuma tapnedi, Allah Yahweh tepapu, er pelpu donedi, pio teleppu kunkamne,’ tenepmenge neng yuma tep, “Ukunkamenge,” peipu upu

1 Allah Yahwehdi Musa tep pepu.

2 “Ange-angepu pio talepra kunkamnunge,” peipman upuda, Musa kandi, sun Israel nesala damai bena pepkurume. Ada, ukupmantoda, nimi do, nerapu do, pedina upu deiki di, “Allah er pelpu talepra donkamne,” pepre ngeboda, tek sisi er angeboda, Nasar ^{▼▼Nasar – Aupuda, deiyonge butene kurure. Tenpu ngeda, ‘Nasar’ ngeda, er deiyo, ‘Tali keca tapra, bokra telepai derina’ tenen, perami. Ton ngeda, ‘Neser’ ngeda, er deiyoda, ‘Allah erngepu kunkamrenge’ tenen, perami.} peramnup ngebo cadi, yuk tali keca cap, mali keca yuma cap, tapnedi Allah Yahweh erngepu kunkamenge. Allah Yahweh, er pel don ngebo ketenepra kunkamrure. 3 Nimi do, nerapu do, anesalada, ‘Allah erngepu kunkamne,’ tenen, tali keca cap, mali keca cap tapkamenge. Tonda, anggur me cap, yuk yala yu me yuma capda, men jenkamenge. Tonda, anggur tapu du di ketekemdiramenge yu me dinin, er si anggur cuka cap, yuk yala du di ketkemdiramenge cuka yu me capda, men jenkamenge. Tonda, anggur du ukupu dakmangenge pe, men di dakra deiamengepa, gelal semrenge peda, men jenkamenge. 4 Autopu, anggur co deiki di doropra ketkemdinung me do, er anggur co, yal bolongnange do, anggur co du bol koptapmengedi, bol deikinge jeramengnge do, uda, anggur co du deiki di ketkemdinung keca yala-yala yuma, pio men jenkamnunge.

5 Apedina upu penge nesalada, “Mali keca cap, yuk tali keca cap, yuma tapnedi, Allah erngepu kunkamepe. Allah er pelpu donkamepe,” pepra pedina upu deiki di pepra, keteneipmenge taru yumada, er angebo do, aner do, giso potong pe, nimida bana potong peda, pio men tounkamenge. Sun anengda, tali keca yuma tapmengedi, Allah er tepapu kunkameng taru yumada, pio telep kupra kunkamenge. Mali keca yuma tapmengedi, pio telep lengna nengpu kunkamenge. Tonda, er gispal dona tep, sun giso potong pe, bana potong peda taprepa, lyompu kunkamrure. Ada, angebo er pedi pedina upu peiamya deiki di, upu sengna utopu kunkamrura tep tamkamrure. Sun pedina upu deiki di, ‘Ataru neitamai yuma, Allah erngepu kunkamne,’ peramenga utopu, ataru neitamai yumada, angepu kunkamenge. Ataru neitamai yuma di men tapkamenge. 6 Er angebodi, er pedina upu deiki di, ‘Ataru neitamai yuma, Allah erngepu kunkamne,’ peramra utopu, ataru neitamai yumada, angepu kunkamre. Ataru neitamai yumada, depmare ngebo, er nong damai men yakankamrure.

7 Tonda, angebo er nai do, er nin do, tonda er kayapu neng ada, ner do, nimi do, depmangai peda, men diryankamrure. Depmange nesala sun nong damai yaryopda, er pe nong tep, mali kupra derdarure. Cadi, er nong deikipu mali kupra deipdarur tenena tep, depmange nesala nong damai pio men yakankamrure. Tonda, sun aNasaret nengda, pedina upu deiki di, ‘Neda tali-tali keca yuma tapnedi, Allah erngepu pio kunkamne,’ tenenung neng kununga tep petenkemna kecada, sun giso potong deiki akurure. Atep, angeda pio men tounkamenge. 8 “Allah erngepu kunkamna cadi, pio lek ngebo kunkamne,” pepra, pedina upu deiki di peiamange taru yumada, Allah er mawa nengpu, Nasar nengpu kunkamenge. Tonda, malinge yuma tapra, pio lek kupra kunkamenge.

9 Atep, ukupmantoda, “Allah erngepu kunkamne,” pepra, pedina upu peiamre Nasar ngeboda, er mangkau di bandenkap, er damaida dato-dato di yuk ngebo ton menmena deprepa, Nasar ngebodi adepmare ngebo er nong damai beryopda, adeiki di, er konum mali kweipdarepa, Allahdi, ‘Angeda mali,’ tenerure. Atep, aNasar ngebodi, ‘Allah erngepu kunkamne’ tenen, er giso potongda, pio men touramunge peda, konum mali kupmare. Ukupra cadi, mali kweipdare dingeda, atumi di nukra dakunmarepane, ue yoneitam bari tumi ton konum kupre pangeda, er giso potong toupkamre. Er giso potong toupya deiki di, er nong yumada, kange di tamupra telep kunkamre. Ukuprepa, Allahdi, ‘Ukutaru konum telep kurure,’ tenenkamre. 10 Ukuamyanen, ue banbari tumi konum kepyopda, er angeboda adipapu yal ma, ma butene do, agum dingeda, be ma utopu ma, er sida, Tekukur ma butene do doupra, Allah karerbana tep, Imam ngebo er kunmaryaida, Allah cap, nimi cap, antamdana tep, lyom opkal bol di dodin tenda ati buplan damaipu dubankamrure.

11 Aimam ngebodi, ma tenpu ngeda doroprapredi, angebo er mali kuamrenge, ‘Allahdi kaukepredi, gum kupra deipkamre’ tenena tep, doupra, Allah tep karepkamre. Ton tenpu ngeda, ‘Allah er gisal dona tep, ama popra, mesba deiki uku dongoprepa, Allahdi ange epre dingeda, angebo er mali kupmare ngeda, gum kupra derinkamre. Ada, mangkau di, konum depmare ngebo damai benmaua deiki di, mali kweipdanmau ngeda, gum kupra deipkamre. Ukupre tumi dipapu, angebo erda, kange di tamupra, “Neda Allah erngepu kunkamne, pio lek ngebo kunkamne,” pepra, pedina upu deiki di, konum pepyopda, atumi dipapu dipra dorkunkamre taru yumada, er giso potongda, pio men tounkamrure.

12 Tonda, er angeboda, atumi di nukra, dorkunkamre taru neitamaida, kange di tamupra, ‘Allah erngepu kunkamne’ tenen, ketenepra kunkamrure. Tonda, men di “Ukupra taru neitamaida, Allah erngepu kunkamne,” pepra, pedina upu deiki di peiamudi, nukra dakuramu dinin, mankau di, depmau ngebo damai beu taruda, konum mali kupka deiki di, ataru yuma konum bisiamrura cadi, kange di tamupra telep kupmare tumi tenepredi, men nukbankamre. Men di pepu ngeda, konum gawal dakmare. Aneitam taru, mali kuamrenge daemna cap, yo pununa cap tep nengeda, kange di tamupra telep kupmare tumi di gonga keprapredi, ‘Ataru neitamai yumada, Allah erngepu kunkamne,” pepra, pedina upu deiki di, pepyopda, atumi di dipra nukbankamre. Tonda, atumi dipapu, sundi keteng tamun tenpu konum nenmare jem domba bisam doupra, Allah tep kareryakankamrure. Ange karepkameng ngeda, ‘Allahdi ne mali kuamsi keca yumada, gum kupra deipkamner’ tenen, adomba dopra, Allah tep karepkamenge.

13 Uda, sun Nasar nengda, ange-ange ton kupkamnunge. Ada, Ukupmantoda, er angebodi, “Ukupra taru neitamaida, Allah erngepu kunkamne,” pepra, pedina upu peipmare taru konum gawal dakre pangeda, Allah cap, nimi cap antamdana tep, opkal bol di dodin tenda ati deipinge damai, akati wengban bisi buplan damaida, bena tekamenge. Abuplan damaida, Allah Yahweh, er si eremna tep, telep karen keca ton karepkamenge. Sundi Allah tep karepkameng ngeda, ake. Ada, ‘Ne men di pepsitopu, mali keca cap, tali-tali keca cap, tapsidi, Allah erngepu kuramsi taruda, konum gawal dakre,’ tenena tep karepkamenge. Erdi Allah tep karepkamre ngeda, ake.

14 ANasar ngebo doupra benge taruda, apeiamre yapi keca wenerida ake. Tenpu ngeda, keteng tamun tenpu deiki di konum nepu jem domba bisam, er bol pio telepngepu doupra, kareryakankamre. Angeda popra, Allah gisal dona tep, mesba deiki di, uku dongonkamenge. Tonda, er angebo mali kuamrenge kau kemna tep nengeda, ner domba bisam, nong pio telepngepu, keteng tamun tenpu konum nepu domba bisam tenpungepu doupra, kareryakankamrure. Angeda utopu, angebo er mali kuamrenge daepropredi, Allah cap, er cap, telep kupra antamna tep nengeda, aner domba bisam doupra, kareryakankamrure.

15 Tonda, ayapi keca doupra, yakare taru dipapu, nena gum roti dapmengedi dopra, tapu di wipi alen, er si keranjang di kipra deipmarenge cap, tonda roti kwaneng er si kue, ada tepung pio telepnge cap, minyak saitun cap, tapakra dapmange cap, tonda nong pio meteknge dinin, gat kue dapmange ngeda, minyak saitun dopra, akue bol deiki likra deipmange nge cap dopra, ange-ange yuma duyakankamrure. Tonda, Allahdi, “Sun mali kweipdarum keca gum kupra derina tep nengeda, gandum utopu yal keca cap, yuk jen keca cap, jen me yala yuk-yuknge cap, ange yumada, ne gisal dona tep, kareryakankamnerume,” upepra deiputopu, akeca ton doupra, duyakankamnunge.

16 Uda, aNasar ngebodi, akeca yuma doupra yana karepmare pangeda, imam ngebodi akeca-keca yuma doupra, Allah damai karenkamrure. Menmena doupra karepkamre ngeda, angebo er mali kupmarenge gum kupra derina tep, karepkamre. Ange konum karepyopda, butene karekamre ngeda, mesba deiki di uku dongopkamrenge karepkamrure. 17 Ange karepmare dingeda, imam ngebodi, ‘Allah cap, angebo cap, kange di tamupra telep kupra antapra kunkamreng’ tenenange tep, jem domba bisam karepkamrure. Ange karepmare taru dipapu, keranjang alen di kipmarenge, ada roti kwaneng nena gumnge cap, yambul kue kipmarenge cap, imam ngebodi, Allah tep karerbankamrure. Tonda, Allahdi, “Sun mali kweipdarum keca gum kupra derina tep nengeda, gandum utopu dinin, yuk yal keca cap, yuk jen keca cap, jen me yala yuk-yuknge cap, ange yumada, ne gisal dona tep, kareryakankamnerume,” upepra deiputopu, akeca ton doupra, Allah tep karepkamrure.

18 Imam ngebodi, Allah tep bena, akeca-keca yuma konum karepmare pangeda, ‘Allah erngepu kunkamne,’ pepra, pedina upu deiki di konum peiami neng, sun Nasar nengda, Allah cap, nimi cap antamna tep, opkal bol di dodina ati buplan damai dipapu, sun potong yuma tounkamnunge. Atoupmenge potong, er mali kuamre ngeda, Allah cap antapra telep kuna tep, yapi keca popra, mesba deiki uku dongopmengaipu, aneng sun giso potong peda, acapu uku dongomkamnunge. 19 Ange konum kupmengopda, jem domba bisam popmare ngeda, er yane doupra ila panci pumbon bupu me di konum gapmange nge cap, tonda, “Allah erngepu kunkamne,” pepra, pedina upu peipmare ngebodi, nena gum roti kwaneng tenpu cap, ila kue tenpu cap, tonda kue yambulnge tenpu cap, kipra deipmare keranjang alen neitamai di keteneipmangai, Imam ngebodi doronkamrure. Sun Nasar neng, sun giso potong konum toupmange pangeda, imam ngebodi, aroti kwaneng keca wenerida, sun buru tang deiki deiprepa, doupkamnunge.

20 Imam ngebodi adopropre kecada, ‘Akeca yumada, Allah ernge cadi, er tep karekune’ tenen, ketenepra doupredi, Allah er urasin dam tara bena, erepra deipredi peteremkamrure. Apel dopredi, akwapmare jen kecada, lengna telep jen kecapu kurura tep, ajen kecada, imam neng sunpu jenkamnunge. Tonda, domba bisam er taram cap, yan capda, yuma dopra imam neng sunpu karenkamrume,” peiamutopu adipapu dopra, imam neng karenkamrume. Ange konum kupropmum pangeda, Allah ati pel donkamne peiamre ngeboda, anggur mepu dopra jenkamrure.

21 Ne Allahdi pepsene. “Ange-ange yuma ukunkamrume,” pepra deipmasen ngeda, ada sun Nasar neng tep pepne. Sundi apeipsi keca yumada, adipapu talepra kunkamnunge. Ada, sundi, “Ukuprap taru neitamai yumada, mali keca cap, tali-tali keca cap yumada, tapnedi Allah erngepu kunkamne. Pio telep lek ngebo kunkamne,” pepra, pedina upu deiki di penge nengda, akeca yuma adipapu kunkamenga tep pepsene. Sundi alap pepmasen keca yuma talepra kunkamnunge. Dinino, apedina upu peiamenge nengdi, “Allah Yahweh tep, ukupra-ukupra kupkamne. Tonda er karena tep, ukupra-ukupra duyanedi, karenkamne,” pemenge ngeda, tali men petamkamnunge. Aupu apepmengetopu kukamnunge. Tonda, nedi “Akeca karepkamnenunge,” pepsingepu, akecapu duyakankamnenunge. Sun pe kange dipapu, ‘Akeca ton tapakra karepkamne,’ tenepmengedi, pepmengopda, ange peda telepe pua. Dinin, angeda sun kange ja. Yuk keca ton akapyopda, telepe. Akeca men kapyopda, tapakra men karenkamnunge.

Allahdi, er si eremna ati pumbon pel dona deiyo neng tep, pepu upu

22 Allah, er si Yahwehdi ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:15). Ibrani upu deiki di huruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH angepu sengnunge. Dinino, Allahdi Musa tep, “Gume, ne sida Yahweh kunerure. Asi Yahweh kael keprumdi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Angepu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai ake,’ tenenkamrume. Allah er si Yahweh penada telepe pua. Tonda lap pena upu nomor 49 dirume.} Musa tep aupu pepra deipu. 23 “Kandi ne peipkuken upuda, Harun cap, er nyapu yuma cap tep, upeprume. Ne Allahdi Israel nesala tep ‘Telep kupra deipkamne’ tenen, penkamrum upuda pepkukene. Sun Harun cap, er nyapu yuma capda, Israel nesala damai bengedi, telep kuna upupu bena pedikamnunge. Aupuda upenkamenge.” Allahdi Musa tep pepu.

24 “Sun Israel nesala tep, Allah er si Yahwehdi upeipmasere. Allahdi pio men tapkamsere. Sun damai kuredi, ‘Ne nyapu tep, akeca-keca telep kupra deipkamne’ tenen, telep kupra melimkamsere. Ada, Allahdi, ‘Ne nyapu tep ikin kuprur’ tenen, pio kalekra diseredi, pio makupra kunkamsere. 25 Tonda Allahdi sun tep, sun damai kuredi, telep kupra melimserepa, sun kun keca yuma teleppu kunkamre. Tonda, Sun mali kuprum keca tep, adipapu wenepseredi, ikin keca sun nong deiki deipsetu dinin, er kange dipapu bicau teneseredi, makunkamsere.

26 Tonda, Allah sun damai kuredi, sun tep pio bicau tenepra melimseredi, kange dungdongona keca kareserepa, sun kun keca yuma pio teleppu kunkamre. Sun cap, Allah cap, yuk neng cap, telep kupra kikiman kunkamrume. Tonda, ‘Sun kwar-kwar kuna gum di, kange deipra telep kupra kunkamrum’ tenen, Allahdi sun tep melipserepa, sun kange dipru yuma dim pepra teleppu kunkamrume.” Allahdi Musa tep upepudi, aupu ton pepu. “Israel nesala damai tep aupu pepkamrume,” pepu.

27 Tonda Allahdi er si eremna ati pumbon pel don neng tep pepu. “Arup pepmantopu, sundi, Israel nesala tep, ne si sun deiki derinkamrume. Ukupkamrumnya deiyoda, ake. Ada, nedi, sun nai bo Allah pio kunkamne. Sunda, ne nyapu pio kungedi, ne sipu eremkamnenge. Ukupra kikiman kuramepyanen, nedi sun kun keca yuma tep, pio telep kupra derinkamsene. Nedi sun tep pio melimsenedi akeca-keca yuma talipu karenkamsene.” Allahdi pepu.

Allahdi aupu peipupa, Musadi bena sun Israel nesala yuma tep, lap pepu.