Num 7 | XteSC | STEP | Musadi, Allah Yahweh cap, nimi cap antamdana tep, opkal bol di keana dodin tenda ati konum ketenepra deipudi, gawal daku taruda, akati cap, akati neitamai kapu keca cap, pel don keca yuma capda, nintong telep minyak me di, akeca deiki yuma likra derina tep, pel dopu. Tonda gam keca popra yangepa, uku dongona tep, ketenepra deipi keca, er si mesba deiki cap, amesba deiki derina keca yuma capda, telep minyak me di likra deipudi, apel yuma dopu. Apel dopunge deiyoda, ‘Akati cap, akeca-keca yuma capda, Allah erngepu pio kunkamre’ tenen, apel dopu.

Numbers 7

Israel nesala dinin, nimi deiyo neng kepra kurami nengdi, Allah tep karepi upu

1 Musadi, Allah Yahweh cap, nimi cap antamdana tep, opkal bol di keana dodin tenda ati konum ketenepra deipudi, gawal daku taruda, akati cap, akati neitamai kapu keca cap, pel don keca yuma capda, nintong telep minyak me di, akeca deiki yuma likra derina tep, pel dopu. Tonda gam keca popra yangepa, uku dongona tep, ketenepra deipi keca, er si mesba deiki cap, amesba deiki derina keca yuma capda, telep minyak me di likra deipudi, apel yuma dopu. Apel dopunge deiyoda, ‘Akati cap, akeca-keca yuma capda, Allah erngepu pio kunkamre’ tenen, apel dopu. 2 Ukupu pangeda, atumi neitamai dipapu, Israel nesala sun deiyo kepra taleami nengdi, Allah er gispal dona tep, telep karen keca ton duyana karepi. Adeiyo neng ada, sun co puna nengdi deriramipa, dadeidanen, yakaramitopu, ayala-ayala yuk-yuk tep, Israel nesala sun si seki nesala yuma tep nengeda, sun yo pununa tep, akarena keca doupra, Allah tep karepi.

3 Ukupi taruda, ‘Nun nai bo Allah epredi, kange deipkamre’ tenen, er damai duyana karepi. ‘Allah tep karepkup’ tenen, ketenepra deipi keca yumada, tapu di jem sapi koupdongopipa, asapi bisam di tu deiki embaramu keca, er si pedati, gipra duyai. Atu deiki embaramu keca pedatida, er ati arum utopu kemna tep nengeda, gat opkal di singipdongopi. Dinin, akeca er nong pumbonda, sun Allah tep karepkoi keca yuma douprapidi dongopipa, akeca pedati, ngangtan bari ketenepipa, asapi bisam denge dua belas di, apedati gipra duyau. Ada, sun Israel nesala talepra kurami deiyo neng dengeda, 12 dakurami dinin, yuk-yuk butene-butene kepra nukrapidi, sun karen keca kina tep, tu deiki embana tep keca pedati tenpu ngepu talepi. Atep, atu deiki embana tep keca pedatida, ngantan baripu ketenepi. Adeiyo neng 12 tep nengeda, jem sapi bisam tenpu nukra karepi. Allah tep karena keca cap, ajem sapi bisam 12 cap, apedati ngantan bari (6) cap yumada, ayala-ayala deiyo nengdi talepra kuramitopu, akeca yuma Allah er si eremna ati damai duyana deipi.

4 Ange yuma konum ukupi pangeda, Allah Yahwehdi Musa tep yana pepu.

5 “Ayana karepmang keca yumada, Musa kandi dopropkurume. Akecada, ne cap, nimi cap, antamdana tep, opkal bol di domi dodina tenda ati dopmanganen, akati pumbon pel donkameng taru cap, akati urupra, yukai embana taru doupra bana cap tep, yana karepmange. Atep, akeca yuma doropmem dingeda, kandi sun Lewi yala neng tep, sun damai bena karepkurume. Ada, sun Lewi yala neng dinin, ayala neitamaida, ayala yuk, ayala yuk tep, pel yuk-yuk bokrapsidi, ‘Ukupkamenge,’ pepra deipsitopu, ‘Apel yuk-yuk donkameng’ tenen, akeca yuma konum ketenepra deipruma tep, sun Lewi yala neng deikipu bena karepkurume.” Allahdi Musa tep pepu. 6 Upepu pangeda, Musadi atu deiki embana keca, er si pedati-pedati ngantan bari (6) cap, ajem sapi bisam 12 yuma capda, doprapudi, Allahdi peiputopu, Lewi yala neng tep, karepu. 7 Ukupra karepu. Ada, pedati butene cap, jem sapi dumbari capda, doprapudi sun Gerson yala neng tep, karepu. Ada, Allahdi, “Gerson yala nengdi apel donkamenge,” pepra deiputopu, Musadi akeca bokra, Gerson yala neng tep karepu.

8 Ange utopu dinin, yambul weik yala, sun Merari yala neng tep, pedati dumbari cap, jem sapi bisam ban bari capda, doprapudi Merari yala neng tep karepu. Ada, Allahdi, “Merari nengdi pel donkamenge,” pepra deiputopu, Musadi akeca bokra, Merari yala neng tep karepu. Sun Merari yala nengdi pel dorami taru yumada, sun deiyo kepra taleamu ngeboda, Harun er mi Itamardi, gonga keamupa, pel talepra dorami. 9 Dinino, Kehat yala nengda, sun Israel nesala ila deiyo nengdi, ayana karepi pedati-pedati cap, jem sapi bisam cap yumada, sun aneng tep ton, Musadi akeca bokra men karepu. Men karepu deiyoda, Allahdi peiputopu, Allah er si eremna ati pumbon derirami keca, Allah er mawa keca, pio telep lengnange yumada, sun ayala nengdipu talepra, pel donkamya tep, akecada men bokra karepu. Ada, sun ayala nengdi, bisi ban taruda, Allah si eremna ati pumbon kwamu lengna keca yumada, erepra sun morokyo deiki deipnedi, dubankamya tep, aneng tep nengeda, pedati cap, jem sapi cap, ton bokra men karepu.

10 Israel yala nesala tep, deiyo kepra taleami nengdi, Allah er gispal dona tep, yuk keca ton kareryai. Angeda, ‘Israel nesaladi gam keca yuma doupra yangepa, imam nengdi akeca poprapmengedi, uku dongonkameng’ tenen, dopra keteneiami keca, er si mesba, ange deikida, telep minyak me likra derina pel dona tumi kuna tep, bupra yana pio telep karen keca karepi. Apel don tumi kuna tep, ketenepra deipmange nge yuma doupra, mesba damai yana dopra deipi. Ange yuma kareryaiya deiyoda, ‘Amesbada, nun nai Allah, erngepu kunkamre’ tenen, karepi. 11 Ukupi pangeda, Allah Yahwehdi Musa tep, upepra deipu. “Kandi, sun aneng damai bememdi bena pepkurume. ‘Ada, sun dua belas yala neng tep, deiyo kepmengedi, talepra kunungtopu, tenpu tumi di dipra, dua belas kepkamre tumi yumada, adeiyo neng tenpu-tenpu di atumi-atumi yuk-yuk dinin, karen keca doupra kareryakaramengepa, mesba deiki telep minyak me likra derina pel doramemnyanen, yuma gawal dakamrume, peipmasere,’ pepra, sun aneng yuma gekenai bena pepkurume.” Allahdi pepu.

12 Sun yuk-yuk, ayala-ayala neng kunungtopu kupra kareryanami dinin, menmena ngebo, er nyapu cap, er gonga kemna cap, menmena doupra kareyankununge. Adinin aneitamaida, ton ngebo er gonga kemna yana karepmanganen, kange di, ton ngebo er gonga kemna yana karepmanga, utopu kupbanmanganen, sirya gawal dakamnunge. Atep, menmena kareryau ngeboda ake. Yehuda yala neng tep nengeda, Aminadab er mi Nasondi deiyo kepka tep, erdi gonga kepudi, yana karepu. 13 Nasondi karepu kecada ake. Urasin pio telep boun keca, kunumna weik keca er si perak di petupra deipi piring, er ikinda 1,5 kilo gram karepu. Tonda atelep keca perak dipapu ketkepi baskom ton dopra deiyamu mau, er ikinda 800 gram nge cap, doupra yana karepu. Aperak ikin nuki ngeda, ada men di Allah cap, nimi cap, antamna ati taleami deiyo nengdi, “Kunumna weik kecada, perak do, emas do, tenpu syikal, er ikinda, tek sisi ukupra duyakankamenge,” pepra, men di yana peiamingepu, angepu doupra yana karepi. Tonda apiring cap, abaskom cap keteneipunge go neitamaida, gandum taikmengepa, pio telep roti kwaneng deiyo keca, er sida tepung cap, minyak me capdi tapakra derinmange ngepu, dinikra deipi.

14 Tonda, gat kunumna weik keca, er si emas di piring ton keteneipinge ton, er ikinda 110 gram kepu ngeda, er go pumbonda, siltong telep keca, er sida dupa, dongopudi duyana karepu. 15 Tonda, jem sapi bisam ukupu nenmarenge tenpu cap, jem domba bisam tenpu cap, tonda jem domba mi keteng tamun tenpu mapmarenge cap, keteneipu. Agam keca yumada, ‘Allah gispal dopkun’ tenen, akeca yuma doupra karepupa, imam nengdi uku dongopi. 16 Tonda, ‘Ne mali kune keca, Allahdi kaukepredi, gum kupra deipkamner’ tenen, jem kambing bisam tenpu, ada, mali kun keca yuma men kwamunge, pio bol telepngepu doupra yana karepu. 17 Tonda, ‘Allahdi melimnerepa, ne cap, ne kunkamne keca cap yumada, teleppu kunkamre’ tenen, sapi bisam butene cap, jem domba bisam pamubari cap, jem kambing bisam pamubari cap, tonda, jem domba mi keteng tamun tenpu mapmangenge pamubari cap, ange-ange yuma doupra yana karepu. Ange-ange yumada, Aminadab er mi Nasondi yana karepu.

18 Ue tumi butenenge, Isakar yala neng tep kareryau ngeboda, Zuar er mi Netaneel, erda deiyo kepra, Isakar yala neng tep taleamu. Tumi butene ngeda, erdi gonga keprapudi, yana karepu. 19 Netaneeldi karepu kecada ake. Urasin telep boun keca, kunumna weik keca er si perak di petupra deipi piring, er ikinda 1,5 kilo gram karepu. Tonda atelep keca perak dipapu ketekepi baskom ton dopra deiyamu mau, er ikinda 800 gram nge cap, doupra yana karepu. Aperak ikin nuki ngeda, ada men di Allah cap, nimi cap, antamna ati taleami deiyo nengdi, “Kunumna weik kecada, perak do, emas do, tenpu syikal, er ikinda, tek sisi ukupra duyakankamenge,” pepra men di peiamingepu, angepu doupra yana karepi. Tonda apiring cap, abaskom cap keteneipunge go neitamaida, gandum taikmengepa, pio telep roti kwaneng deiyo keca, er sida tepung cap, minyak me capdi tapakra derinmange ngepu, dinikra deipu.

20 Tonda, gat kunumna weik keca, er si emas di piring ton keteneipinge ton, er ikinda 110 gram kepu ngeda, er go pumbonda, siltong telep keca, er sida dupa dongopudi duyana karepu. 21 Tonda, jem sapi bisam ukupu nenmarenge tenpu cap, jem domba bisam tenpu cap, tonda jem domba mi keteng tamun tenpu mapmarenge cap, keteneipu. Agam keca yumada, ‘Allah gispal dopkun’ tenen, akeca yuma doupra karepupa, imam nengdi uku dongopi. 22 Tonda, ‘Ne mali kune keca, Allahdi kaukepneredi, gum kupra deipkamner’ tenen, jem kambing bisam tenpu, ada, mali kun keca yuma men kwamunge, pio bol telepngepu doupra yana karepu. 23 Tonda, ‘Allahdi melimnerepa, ne cap, ne kunkamne keca cap yumada, teleppu kunkamre’ tenen, sapi bisam butene cap, jem domba bisam pamubari cap, jem kambing bisam pamubari cap, tonda, jem domba mi keteng tamun tenpu mapmangenge pamubari cap, ange-ange yuma doupra yana karepu. Ange-ange yumada, Zuar er mi Netaneldi yana karepu.

24 Uda, ue weneri tumida, Zebulun yala neng tep nengeda, Helon er mi Eliabdi deiyo kepka tep, erdi gonga keprapudi, yana karepu. 25 Eliabdi karepu kecada ake. Urasin pio telep boun keca, kunumna weik keca er si perak di petupra deipi piring, er ikinda 1,5 kilogram karepu. Tonda atelep keca perak dipapu ketkepi baskom ton dopra deiamu mau, er ikinda 800 gram nge cap, doupra yana karepu. Aperak ikin nuki ngeda, ada men di Allah cap, nimi cap antamna ati taleami deiyo nengdi, “Kunumna weik kecada, perak do, emas do, tenpu syikal, er ikinda, tek sisi ukupra duyakankamenge,” pepra men di peiamingepu, angepu doupra yana karepi. Tonda apiring cap, abaskom cap keteneipunge go neitamaida, gandum taikmengepa, pio telep roti kwaneng deiyo keca, er sida tepung cap, minyak me capdi tapakra derinmange ngepu, dinikra deipu.

26 Tonda, gat kunumna weik keca, er si emas di topropa, piring ton keteneipinge ton, er ikinda 110 gram kepu ngeda, er go pumbonda, siltong telep keca, er sida dupa dongopudi duyana karepu. 27 Tonda, jem sapi bisam ukupu nenmarenge tenpu cap, jem domba bisam tenpu cap, tonda jem domba mi keteng tamun tenpu mapmarenge cap, keteneipu. Agam keca yumada, ‘Allah gispal dopkun’ tenen, akeca yuma doupra karepupa, imam nengdi uku dongopi. 28 Tonda, ‘Ne mali kune keca, Allahdi kaukepneredi, gum kupra deipkamner’ tenen, jem kambing bisam tenpu, ada, mali kun keca yuma men kwamunge, pio bol telepngepu doupra yana karepu. 29 Tonda, ‘Allahdi melimnerepa, ne cap, ne kunkamne keca cap yumada, teleppu kunkamre’ tenen, sapi bisam butene cap, jem domba bisam pamubari cap, jem kambing bisam pamubari cap, tonda, jem domba mi keteng tamun tenpu mapmangenge pamubari cap, ange-ange yuma doupra yana karepu. Ange-ange yumada, Helon er mi Eliabdi yana karepu.

30 Ue, dumbari tumida, Ruben yala neng tep nengeda, Syedeur er mi Eliusurdi, deiyo kepka tep, erdi gonga keprapudi, yana karepu. 31 Eliusurdi karepu kecada ake. Urasin pio telep boun keca, kunumna weik keca er si perak di petupra deipi piring, er ikinda 1,5 kilo gram karepu. Tonda atelep keca perak dipapu ketekepi baskom ton dopra deiyamu mau, er ikinda 800 gram nge cap, doupra yana karepu. Aperak ikin nuki ngeda, ada men di Allah cap, nimi cap antamna ati taleami deiyo nengdi, “Kunumna weik kecada, perak do, emas do, tenpu syikal, er ikinda, tek sisi ukupra duyakankamenge,” pepra, men di peiamengpu, angepu doupra yana karepi. Tonda apiring cap, abaskom cap, keteneipunge go neitamaida, gandum taikmengepa, pio telep roti kwaneng deiyo keca, er sida tepung cap, minyak me capdi tapakra derinmange ngepu, diniktapu.

32 Tonda, gat kunumna weik keca, er si emas di piring ton keteneipinge ton, er ikinda 110 gram kepu ngeda, er go pumbonda, siltong telep keca, er sida dupa dongopudi duyana karepu. 33 Tonda, jem sapi bisam ukupu nemamunge tenpu cap, jem domba bisam tenpu cap, tonda jem domba mi keteng tamun tenpu deiki nemunge cap, keteneipu. Agam keca yumada, ‘Allah gispal dopkun’ tenen, akeca yuma doupra karepupa, imam nengdi uku dongopi. 34 Tonda, ‘Ne mali kune keca, Allahdi kaukepneredi, gum kupra deipkamner’ tenen, jem kambing bisam tenpu, ada, mali kun keca yuma men kwamunge, pio bol telepngepu doupra yana karepu. 35 Tonda, ‘Allahdi melimnerepa, ne cap, ne kunkamne keca cap yumada, teleppu kunkamre’ tenen, sapi bisam butene cap, jem domba bisam pamubari cap, jem kambing bisam pamubari cap, tonda, jem domba mi keteng tamun tenpu deiki mapmangenge pamubari cap, ange-ange yuma doupra yana karepu. Ange-ange yumada, Syedeur er mi Eliusurdi yana karepu.

36 Ue pamubari tumida, Simeon yala neng tep nengeda, Zurisadai er mi Selemiaeldi, deiyo kepka tep, erdi gonga keprapudi, yana karepu. 37 Selemiaeldi karepu kecada ake. Urasin pio telep boun keca, kunumna weik keca er si perak di petupra deipi piring, er ikinda 1,5 kilo gram karepu. Tonda atelep keca perak dipapu ketekepi baskom ton dopra deiyamu mau, er ikinda 800 gram nge cap, doupra yan karepu. Aperak ikin nuki ngeda, ada men di Allah cap, nimi cap antamna ati taleami deiyo nengdi, “Kunumna weik kecada, perak do, emas do, tenpu syikal, er ikinda, tek sisi ukupra duyakankamenge,” pepra men di peiamingepu, angepu doupra yana karepi. Tonda apiring cap, abaskom cap keteneipunge go neitamaida, gandum taikmengepa, pio telep roti kwaneng deiyo keca, er sida tepung cap, minyak me capdi tapakra derinmange ngepu, diniktapu.

38 Tonda, kunumna weik gat keca, er si emas di petupra piring ton keteneipinge ton, er ikinda 110 gram kepu ngeda, er go pumbonda, siltong telep keca, er sida dupa dongopudi duyana karepu. 39 Tonda, jem sapi bisam ukupu nenmarenge tenpu cap, jem domba bisam tenpu cap, tonda jem domba mi keteng tamun tenpu mapmarenge cap, keteneipu. Agam keca yumada, ‘Allah gispal dopkun’ tenen, akeca yuma doupra karepupa, imam nengdi uku dongopi. 40 Tonda, ‘Ne mali kune keca, Allahdi kaukepneredi, gum kupra deipkamner’ tenen, jem kambing bisam tenpu, ada, mali kun keca yuma men kwamunge, pio bol telepngepu doupra yana karepu. 41 Tonda, ‘Allahdi melimnerepa, ne cap, ne kunkamne keca cap yumada, teleppu kunkamre’ tenen, sapi bisam butene cap, jem domba bisam pamubari cap, jem kambing bisam pamubari cap, tonda, jem domba mi keteng tamun tenpu deiki mapmangenge pamubari cap, ange-ange yuma doupra, yana karepu. Ange-ange yumada, Syedeur er mi Selemiaeldi yana karepu.

42 Ue ngangtan tumida, Gad yala neng tep nengeda, Rehuel er mi Elyasapdi, deiyo kepka tep, erdi gonga keprapudi, yana karepu. 43 Elyasapdi karepu kecada ake. Urasin pio telep boun keca, kunumna weik keca er si perak di petupra deipi piring, er ikinda 1,5 kilo gram karepu. Tonda atelep keca perak dipapu ketkepi baskom ton dopra deiamu mau, er ikinda 800 gram nge cap, doupra yana karepu.

Aperak ikin nuki ngeda, ada men di Allah cap, nimi cap antamna ati taleami deiyo nengdi, “Kunumna weik kecada, perak do, emas do, tenpu syikal, er ikinda, tek sisi ukupra duyakankamenge,” pepra men di peiamingepu, angepu doupra yana karepi. Tonda apiring cap, abaskom cap keteneipunge go neitamaida, gandum taikmengepa, pio telep roti kwaneng deiyo keca, er sida tepung cap, minyak me capdi tapakra derinmange ngepu, diniktapu.

44 Tonda, kunumna weik gat keca, er si emas di petupra, piring ton keteneipinge ton, er ikinda 110 gram kepu ngeda, er go pumbonda, siltong telep keca, er sida dupa, dongopudi, duyana karepu. 45 Tonda, jem sapi bisam ukupu nenmarenge tenpu cap, jem domba bisam tenpu cap, tonda jem domba mi keteng tamun tenpu mapmarenge cap, keteneipu. Agam keca yumada, ‘Allah gispal dopkun’ tenen, akeca yuma doupra karepupa, imam nengdi uku dongopi. 46 Tonda, ‘Ne mali kune keca, Allahdi kau kepneredi, gum kupra deipkamner’ tenen, jem kambing bisam tenpu, ada, mali kun keca yuma men kwamunge, pio bol telepngepu doupra yana karepu. 47 Tonda, ‘Allahdi melimnerepa, ne cap, ne kunkamne keca cap yumada, teleppu kunkamre’ tenen, sapi bisam butene cap, jem domba bisam pamubari cap, jem kambing bisam pamubari cap, tonda, jem domba mi keteng tamun tenpu deiki mapmangenge pamubari cap, ange-ange yuma doupra yana karepu. Ange-ange yumada, Rehuel er mi Elyasapdi yana karepu.

48 Ue yoneitam bari tumida, Efraim yala neng tep nengeda, Amihut er mi Elisamadi, deiyo kepka tep, erdi gonga keprapudi, yana karepu. 49 Elisamadi karepu kecada ake. Urasin pio telep boun keca, kunumna weik keca er si perak di petupra deipi piring, er ikinda 1,5 kilo gram karepu. Tonda atelep keca perak dipapu ketekepi baskom ton dopra deiyamu mau, er ikinda 800 gram nge cap, doupra yana karepu. Aperak ikin nuki ngeda, ada men di Allah cap, nimi cap antamna ati taleami deiyo nengdi, “Kunumna weik kecada, perak do, emas do, tenpu syikal, er ikinda, tek sisi ukupra duyakankamenge,” pepra, men di peiamingepu, angepu doupra yana karepi. Tonda apiring cap, abaskom cap keteneipunge go neitamaida, gandum taikmengepa, pio telep roti kwaneng deiyo keca, er sida tepung cap, minyak me capdi tapakra derinmange ngepu, diniktapu. 50 Tonda, kunumna weik gat keca, er si emas di petupra, piring ton keteneipinge ton, er ikinda 110 gram kepu ngeda, er go pumbonda, siltong telep keca, er sida dupa dongopudi duyana karepu.

51 Tonda, jem sapi bisam ukupu nenmarenge tenpu cap, jem domba bisam tenpu cap, tonda jem domba mi keteng tamun tenpu deiki mapmarenge cap, keteneipu. Agam keca yumada, ‘Allah gispal dopkun’ tenen, akeca yuma doupra karepupa, imam nengdi uku dongopi. 52 Tonda, ‘Ne mali kune kecada, Allahdi kaukepneredi, gum kupra deipkamner’ tenen, jem kambing bisam tenpu, ada, mali kun keca yuma men kwamunge, pio bol telepngepu doupra yana karepu. 53 Tonda, ‘Allahdi melimnerepa, ne cap, ne kunkamne keca cap yumada, teleppu kunkamre’ tenen, sapi bisam butene cap, jem domba bisam pamubari cap, jem kambing bisam pamubari cap, tonda, jem domba mi keteng tamun tenpu mapmangenge pamubari cap, ange-ange yuma doupra yana karepu. Ange-ange yumada, Amihut er mi Elisamadi yana karepu. 54 Ue banbari tumida, Efraim yala neng cap, Manasye yala neng cap tep nengeda, Pedasyur er mi Gamalieldi, deiyo keprapudi, yana karepu.

55 Gamalieldi karepu kecada ake. Urasin pio telep boun keca, kunumna weik keca er si perak di petupra deipi piring, er ikinda 1,5 kilo gram karepu. Tonda, atelep keca perak dipapu ketekepi baskom ton dopra deiamu mau, er ikinda 800 gram nge cap, doupra yana karepu. Aperak ikin nuki ngeda, ada men di Allah cap, nimi cap, antamna tenda ati taleami deiyo nengdi, “Kunumna weik kecada, perak do, emas do, tenpu syikal, er ikinda, tek sisi ukupra duyakankamenge,” pepra, men di peiamingepu, angepu doupra yana karepi. Tonda apiring cap, abaskom cap keteneipunge go neitamaida, gandum taikmengepa, pio telep roti kwaneng deiyo keca, er sida tepung cap, minyak me capdi tapakra derinmange ngepu, diniktapu. 56 Tonda, kunumna weik gat keca, er si emas di topropa, piring ton keteneipinge ton, er ikinda 110 gram kepu ngeda, er go pumbonda, siltong telep keca, er sida dupa, dongopudi duyana karepu.

57 Tonda, jem sapi bisam ukupu nenmarenge tenpu cap, jem domba bisam tenpu cap, tonda jem domba mi keteng tamun tenpu mapmarenge cap, keteneipu. Agam keca yumada, ‘Allah gispal dopkun’ tenen, akeca yuma doupra karepupa, imam nengdi uku dongopi. 58 Tonda, ‘Ne mali kune keca, Allahdi kaukepneredi, gum kupra deipkamner’ tenen, jem kambing bisam tenpu, ada, mali kun keca yuma men kwamunge, pio bol telepngepu doupra yana karepu. 59 Tonda, ‘Allahdi melimnerepa, ne cap, ne kunkamne keca cap yumada, teleppu kunkamre’ tenen, sapi bisam butene cap, jem domba bisam pamubari cap, jem kambing bisam pamubari cap, tonda jem domba mi keteng tamun tenpu mapmangenge pamubari cap, ange-ange yuma doupra yana karepu. Ange-ange yumada, Pedasyur er mi Gamalieldi yana karepu.

60 Ue toupne tumida, Benyamin yala neng tep nengeda, Gideoni er mi Abidandi, deiyo ngebo keprapudi, yana karepu. 61 Abidandi karepu kecada ake. Urasin pio telep boun keca, kunumna weik keca, er si perak di petupra deipi piring, er ikinda 1,5 kilo gram karepu. Tonda, atelep keca perak dipapu ketekepi baskom ton dopra deiamu mau, er ikinda 800 gram nge cap, doupra yana karepu. Aperak ikin nuki ngeda, ada men di Allah cap, nimi cap, antamna tenda ati taleami deiyo nengdi, “Kunumna weik kecada, perak do, emas do, tenpu syikal, er ikinda, tek sisi ukupra duyakankamenge,” pepra, men di peiamingepu, angepu doupra yana karepi. Tonda apiring cap, abaskom cap, keteneipunge go neitamaida, gandum taikmengepa, pio telep roti kwaneng deiyo keca, er sida tepung cap, minyak me capdi tapakra derinmange ngepu, diniktapu. 62 Tonda, kunumna weik gat keca, er si emas di topropa, piring ton keteneipinge ton, er ikinda 110 gram kepu ngeda, er go pumbonda, siltong telep keca, er sida dupa, dongopudi duyana karepu.

63 Tonda, jem sapi bisam ukupu nenmarenge tenpu cap, jem domba bisam tenpu cap, tonda jem domba mi keteng tamun tenpu mapmarenge cap, keteneipu. Agam keca yumada, ‘Allah gispal dopkun’ tenen, akeca yuma doupra yana karepupa, imam nengdi uku dongopi. 64 Tonda, ‘Ne mali kune keca, Allahdi kaukepneredi, gum kupra deipkamner’ tenen, jem kambing bisam tenpu, ada, mali kun keca yuma men kwamunge, pio bol telepngepu douamungepu doupra yana karepu. 65 Tonda, ‘Allahdi melimnerepa, ne cap, ne kunkamne keca cap yumada, teleppu kunkamre’ tenen, sapi bisam butene cap, jem domba bisam pamubari cap, jem kambing bisam pamubari cap, tonda, jem domba mi keteng tamun tenpu mapmangenge pamubari cap, ange-ange yuma doupra yana karepu. Ange-ange yumada, Gideoni er mi Abidandi, yana karepu.

66 Ue dangol bari tumida, Dan yala neng tep nengeda, Amisyadai er mi Aheizerdi deiyo keprapudi, yana karepu. 67 Aheizerdi karepu kecada ake. Urasin pio telep boun keca, kunumna weik keca er si perak di petupra deipi piring, er ikinda 1,5 kilo gram karepu. Tonda atelep keca perak dipapu ketekepi baskom ton dopra deiamu mau, er ikinda 800 gram nge cap, doupra yana karepu. Aperak ikin nuki ngeda, ada men di Allah cap, nimi cap, antamna tenda ati taleami deiyo nengdi, “Kunumna weik kecada, perak do, emas do, tenpu syikal, er ikinda, tek sisi ukupra duyakankamenge,” pepra, men di peamingepu, angepu doupra yana karepi. Tonda apiring cap, abaskom cap, keteneipunge go neitamaida, gandum taikmengepa, pio telep roti kwaneng deiyo keca, er sida tepung cap, minyak me capdi tapakra derinmange ngepu, diniktapu.

68 Tonda, kunumna weik gat keca, er si emas di topropa, piring ton keteneipinge ton, er ikinda 110 gram kepu ngeda, er go pumbonda, siltong telep keca, er sida dupa, dongopudi duyana karepu. 69 Tonda, jem sapi bisam ukupu nenmarenge tenpu cap, jem domba bisam tenpu cap, tonda jem domba mi keteng tamun tenpu mapmarenge cap, keteneipu. Agam keca yumada, ‘Allah gispal dopkun’ tenen, akeca yuma doupra karepupa, imam nengdi uku dongopi. 70 Tonda, ‘Ne mali kune keca, Allahdi kau kepredi, gum kupra deipkamner’ tenen, jem kambing bisam tenpu, ada, mali kun keca yuma men kwamunge, pio bol telepngepu doupra yana karepu. 71 Tonda, ‘Allahdi melimnerepa, ne cap, ne kunkamne keca cap yumada, teleppu kunkamre’ tenen, sapi bisam butene cap, jem domba bisam pamubari cap, jem kambing bisam pamubari cap, tonda, jem domba mi keteng tamun tenpu deiki mapmangenge pamubari cap, ange-ange yuma doupra yana karepu. Ange-ange yumada, Amisyadai er mi Aheizerdi yana karepu.

72 Ue kumdam tumida, Asher yala neng tep nengeda, Okran er mi Pagieldi deiyo keprapudi, yana karepu. 73 Pagieldi karepu kecada ake. Urasin pio telep boun keca, kunumna weik keca er si perak di petupra deipi piring, er ikinda 1,5 kilo gram karepu. Tonda, atelep keca perak dipapu ketekepi baskom ton dopra deiamu mau, er ikinda 800 gram nge cap, doupra yana karepu. Aperak ikin nuki ngeda, ada men di Allah cap, nimi cap antamna ati taleami deiyo nengdi, “Kunumna weik kecada, perak do, emas do, tenpu syikal, er ikinda, tek sisi ukupra duyakankamenge,” pepra, men di peiamingepu, angepu doupra yana karepi. Tonda apiring cap, abaskom cap, keteneipunge go neitamaida, gandum taikmengepa, pio telep roti kwaneng deiyo keca, er sida tepung cap, minyak me capdi tapakra derinmange ngepu, dining kapu.

74 Tonda, kunumna weik gat keca, er si emas di petupra, piring ton keteneipinge ton, er ikinda 110 gram kepu ngeda, er go pumbonda, siltong telep keca, er sida ukupan, dongopudi duyana karepu. 75 Tonda, jem sapi bisam ukupu nenmarenge tenpu cap, jem domba bisam tenpu cap, tonda jem domba mi keteng tamun tenpu deiki mapmarenge cap, keteneipu. Agam keca yumada, ‘Allah gispal dopkun’ tenen, akeca yuma doupra karepupa, imam nengdi uku dongopi. 76 Tonda, ‘Ne mali kune keca, Allahdi kaukepneredi, gum kupra deipkamner’ tenen, jem kambing bisam tenpu, ada, mali kun keca yuma men kwamunge, pio bol telep douamungepu doupra yana karepu. 77 Tonda, ‘Allahdi melimnerepa, ne cap, ne kunkamne keca cap yumada, teleppu kunkamre’ tenen, sapi bisam butene cap, jem domba bisam pamubari cap, jem kambing bisam pamubari cap, tonda, jem domba mi keteng tamun tenpu deiki mapmangenge pamubari cap, ange-ange yuma doupra yana karepu. Ange-ange yumada, Okran er mi Pagieldi yana karepu.

78 Ue amoldam tumida, Naftali yala neng tep nengeda, Enan er mi Ahiradi deiyo keprapudi, yana karepu. 79 Ahiradi karepu kecada ake. Urasin pio telep boun keca, kunumna weik keca er si perak di petupra deipi piring, er ikinda 1,5 kilo gram karepu. Tonda, atelep keca perak dipapu ketekepi baskom ton dopra deiamu mau, er ikinda 800 gram nge cap, doupra yana karepu. Aperak ikin nuki ngeda, ada men di Allah cap, nimi cap antamna ati taleami deiyo nengdi, “Kunumna weik kecada, perak do, emas do, tenpu syikal, er ikinda, tek sisi ukupra duyakankamenge,” pepra, men di peiamingepu, angepu doupra yana karepi. Tonda apiring cap, abaskom cap keteneipunge go neitamaida, gandum taikmengepa, pio telep roti kwaneng deiyo keca, er sida tepung cap, minyak me cap di, tapakra derinmange ngepu, diniktapu.

80 Tonda, kunumna weik gat keca, er si emas di topropa, piring ton keteneipinge ton, er ikinda 110 gram kepu ngeda, er go pumbonda, siltong telep keca, er sida dupa dongopudi, duyana karepu. 81 Tonda, jem sapi bisam ukupu nenmarenge tenpu cap, jem domba bisam tenpu cap, tonda jem domba mi keteng tamun tenpu mapmarenge cap, keteneipu. Agam keca yumada, ‘Allah gispal dopkun’ tenen, akeca yuma doupra yana karepupa, imam nengdi uku dongopi. 82 Tonda, ‘Ne mali kune keca, Allahdi kaukepneredi, gum kupra deipkamner’ tenen, jem kambing bisam tenpu, ada, mali kun keca yuma men kwamunge, pio bol telep douamungepu doupra, yana karepu. 83 Tonda, ‘Allahdi melimnerepa, ne cap, ne kunkamne keca cap yumada, teleppu kunkamre’ tenen, sapi bisam butene cap, jem domba bisam pamubari cap, jem kambing bisam pamubari cap, tonda, jem domba mi keteng tamun tenpu deiki mapmangenge pamubari cap, ange-ange yuma doupra yana karepu. Ange-ange yumada, Enan er mi Ahiradi yana karepu.

84 Israel yala nesala yuma, sun ila nimi deiyo nengdi, ayala-ayala neng yuk-yuk di, atumi-atumi yuk-yuk doupra, kareryakarami dinin, sun dua belas yala deiyo kepra taleami nengdi, gonga keamipa, yapi keca popra, Israel nesala sun imam nengdi, uku dongoryakana tep, ketenepra deiami keca, er si mesba deiki, minyak me di likra deipnedi, pel don taru karena tep kecada, ayala keca bupra duyanamidi, karerami ngeda, ake.

Urasin pio telep kunumna weik keca, er si perak di keteneipi piring cap, perak di keteneipidi me dingdongon mau, er si baskom 12 cap, tonda, urasin pio telep kunumna weik keca, er si emas di keteneipi piring cap bupra duyanamidi karerami. 85 Perak di keteneipi piring yuk-yuk dinin, er ikinda, seratus tiga puluh syikal, ada 1,5 kilogram kwamu. Perak di keteneipi baskomda, yuk-yuk dinin, er ikinda, tujuh puluh syikal, ada 800 gram kwamu. Atep nengeda, apiring cap, abaskom dopra deiyaminge yuma cap, tapakra nuki ngeda, er ikinda, dua ribu empat ratus (2.400) syikal kwamu. Ada, aperak yuma nukrapipa, er ikinda 27.6 kilogram kwamu. Ada, men di Allah cap, nimi cap antamdana ati di deiyo nengdi, “Perak do, emas do, akeca er ikinda, ukupra-ukupra duyakankamrume,” pepra, men di peiamingepu nukrapidi, akeca er ikinda, kael kepi. 86 Tonda, kunumna weik gat keca emas di keneipinge neitamai go kwamgaida, ‘Uku dongopmepepa, uku jenkamre’ tenen, siltong telep keca er si dupa deipudi apiring yuma diniku. Tonda, ange emas di keteneipi piring ngeda, nukterepipa, yuk-yuk dinin er ikinda, 10 syikal kepu. Ada, er ikinda yuk-yuk ngeda, 110 gram kepu. Ange emas di keteneipi piring yuma dukdongopra deipunge, er ikinda seratus dua puluh syikal kupu. Ada 1,4 kilogram kupu.

87 Tonda, ‘Agam keca popra, uku dongopmenga deiki di, Allah tep karepkameng’ tenen, gam keca kareryakarami ngeda, jem sapi bisam 12 cap, jem kambing bisam 12 cap, domba mi bisam ukupu nenmarepa, keteng tamun tenpu deiki mapmarenge cap, gandum utopu yal keca cap, roti kwaneng cap kareryakarami. Tonda, ‘Allahdi nun mali keca kaukepseredi, gum kupra deipkamser’ tenen, jem kambing domba bisam 12 kareryakarami. 88 Ange utopu ton, ‘Allahdi melimserepa, nun cap, nun kunkamep keca cap yumada, teleppu kunkamre’ tenen, sapi bisam yuma nukrapidi, 24 kupu. Jem domba bisamda, enam puluh (60) kupu. Tonda, jem kambing bisamda, enam puluh (60) kupu. Tonda, domba bisam mi, ukupu nenmarepa, keteng tamun tenpu mapmarenge cap, kareryakarami. Ange-ange yumada, Allah er gispal dona tep, yapi keca popra, sun imam nengdi, uku dongoryakankameng’ tenena tep, ketenepra deiami keca, er si mesba tep, ‘Amesba ngeda, Allah erngepu kunkamre’ tenen, amesba deiki, minyak me di likra deipi dingeda, ataru dipapu, agam keca yuma doupra yana kareryakarami.

89 Uda, Allah Yahwehdi Musa tep, “Atumi-atumi deiki di, ne damai yamempa, nedi upu pepkamkene,” peiamutopu, atumi konum kupkopda Musada, Allah Yahweh cap, nimi cap, antamdana tep, opkal bol di domi dodina tenda ati pumbon wengbaramudi, Allah Yahweh cap, sun tonpa upu sisingamrei. Ataru yumada, Musadi Allah er nong men epu dinin, Allah Yahwehdi, upu pepu ngeda, Musa adipapu gekepu. Ada, Allah akati pumbon neitamai upu pediramnyaida, Allah er upu peiamupa, Musadi gekeramu. Aupu gekeramngaida, men taru Allahdi, “Angeda ukunkamrume, angeda pio men kunkamrume,” peprapudi, gel pala deiki sekra, Musa tep karepupa, Musadi agel butene doupra, kipra deiami peti co pumbon, ^{▼▼peti co – Apeti co ngeda, Indonesia upu deiki di Peti Perjanjian penunge. Aco peti ngeda, co di dopi dinin, er nong deiki yumada, kunumna weik keca, emas doupra palepra deipipa, urasin pio telep kupu. Aco peti pumbon deiami kecada, gel palange butene cap, Mesir mutu neitamai Harundi taleamu maca cap, Kanaan taraa dinin, katawai mutu neitamai embarami taru, im deiki di yakaramupa jerami jen keca, er si mana, metekanun ton doupra me mau pumbon kipi. Ange kael kemna tep Keluaran 39:35 dinkurume.} apeti deikida, malaikat urasin utopu kecada, er si Kerub ^{▼▼Kerub – Kerub perami ngeda, sun Israel nesaladi, ‘Malaikat er nong cap, urasin capda ukupra kurure,’ teneramitopu, emas di petupra butene Kerub deipidi, apeti deiki tara dana-dana, akeca butene deipi. Akerubda, ma pol utopu keca, er si sayap kwamu. Dana-dana tara di, sun Kerub butene ngeda, sun sayap neitamai tara benbeneprei. Akeca yuma tep nengeda, ‘Allah er pio telep dirine cap, er puto cap, aneitamai yakarure,’ tenerami.} butene petupra deiaminge deiki tara di, Allahdi pediramu upu peramupa Musadi gekeramu. Tonda, apeti co, er deiki tara buplan tep nengeda, Israel nesaladi, ‘Allahdi nun mali kunup keca tep, wenepseredi adipapu poptapsetu dinin, ange gum di, nun tep pio bicau teneseredi, nun mali kun keca daemseredi, telep kupra derirseruraida, ake,’ tenepra perami.