Numbers 8

Allah er si eremna ati pumbon deipi lampu weica deiyo derina tep, pepu upu

1Allah er si Yahwehdi, Musa tep pepu.

2“Kandi, Harun tep bena pepkurume, ‘Upna laramre ngeda, yoneitam bari di, dopra keteneipmengopda, aupna er deiyoknge deikipu bena deipkurure. Ataruda, kandi telep kupra deipmempa, alampu upna urasin dam tara yumada, dirinepu kunkamrure,’ upepkamrume,” Allahdi pepu. 3Allahdi, Musa tep, “Upnada ukupra deipkurume,” pepra, deipu ngeda, Musadi Harun tep lap peipupa, Harundi Allah peiputopu kuprapudi, dopra deipu. Ada, upna deiyoinge deiki di, upna yoneitam bari laramre ngeda, bena dopra deipupa, upna deiyo urasin tara yumada, dirinepu kupu. 4Alampu upnada, deiki tarada weica yoneitam bari kwamu dinin, alampu amutara, deiyo dam tara di dipra, itara yumada, er nong deiki bunga kamo telep kuramretopu kupra, petupra deipidi, urasin telep gat keca emas di, taplakra dopi. Adopra deipinge dopra, aweica deiyo deiki deipupa, urasin telep kupu. Ange yumada, Allahdi Musa tep, “Kan bememdi, Harun tep pepmempa, aweica er urasin ukupra-ukupra dopkamrure,” peipmau ngeda, apeipmautopu kupra, Harundi dopra deipu.

Lewi yala neng wepra deipu taru tep, pepu upu

5Allah Yahwehdi, Musa tep pepu.

6Musa, Israel yala nesala neitamai dinin, akan-kan neitamai di, sun Lewi yala neng puda, wepropkurume. Ange deiyoda, ‘Sun Lewi yala nengda, Allah er mawangepu kunkamenge. Er ngepu kunkameng’ tenen, sun Lewi yala neng yuma wepropmumnyopda, sun mali keca yuma daemna tep, telep kupra derina pel dopmemdi, telep kweipkurume.

7Uda, sun Lewi yala neng, telep kupra derina tep nengeda, ukupkamrume. Sun bol deikida ukupkurume. Ada, kan buru di, pio telep yo me burupra, sun aneng bol deiki gege pepmempa, ame di aneng sun bol bepredi telep kupkurure. Apel ukupra dopmemnyopda, sun aneng nong bol deiki yuma potong akapyopda, ‘Sun potong yuma tep nengeda, silet di toupkurume,’ pepmempa, sun nong bol deiki yuma adipapu silet di toupropkununge. Tonda, sun kemnung opkal yuma tep nengeda, “Me kupkurume,’ pepmempa, mepu kupkununge. Adeiki di sun nong yumada, telep kupra deipkununge. 8Ange yuma konum kupmengopda, ‘Jem sapi bisam tenpu, ukupu kapul nenmarenge cap, roti jen keca dana tep, er si tepung cap, minyak me cap tapakra keteneipmange ngeda, ange doupra, yana kareryankurume,’ pepmempa, duyankununge. Tonda, ‘Jem sapi bisam ukupu nenmarenge tenpu ton tapakra kareryankurume,’ pepmempa, doupra yangopda, sun imam nengdi asapi bisam doupra bena popmengedi, sun aneng mali kuamenge nge yuma, gum kupra daemna tep, asapi bisam dopra, yana uku dongopkununge.

9Ukupmengopda, kandi sun Israel yala nesala yuma bulupra deipkurume. Bulupra wekmenge pangeda, kandi Lewi yala neng tep, ‘Sunda, Allah cap, nimi cap, antamna tep, opkal bol di dodina tenda ati urasin damaipu yana tekurume,’ pepmempa, sun Lewi yala neng yumada, ayana tekununge. 10Akati urasin damai dinin, ne Allah Yahweh damai utopu tekmenge pangeda, ataru dipapu, sun Israel yala nesala yumadi, Lewi yala neng sun giso deiki buru deipkununge. 11Sun Israel nengdi, sun Lewi yala neng, sun nong deiki buru deipmengopda, Harun, kandi sun Israel nesalada, ne Allah damai benbenepra peten keipkamnerume. Sun awekmangai di, ‘Lewi yala nengda, Allah er ati talepra pel donkameng neng kunkamenge’ tenen, kan buru erepmemdi, ‘Sun anengda Allah erngepu kunkamenga tep, wepra deipne,’ pepmempa, sun adipapu gekepkununge. Ukupmemnya deiki di, Lewi yala neng sunda, ne si eremna ati talepra pel dona deiyo neng kunkamenge. Sun anengda, ne Allah Yahweh tep, ne si eremna ati pumbon pel donkamenge. Sunda, ne mawa nengpu kunkamenge.

12Tonda, ataru dipapu, sun Lewi yala neng sun buru dopra, jem sapi bisam butene doupra, yana deipmangenge deiki, sun buru deipropmengopda, sun aneng mali kun keca daemna tep nengeda, imam ngebodi, tenpu sapi bisam dopra, yana popredi, uku dongonkamre. Tenpu sapi bisam dopra, yana popredi, ne Allah gispal dona tep, uku dongopkamre. Adeiki di, sun Lewi yala neng mali kuaminge ngeda, ne Allahdi daepropnedi, sun tep telep kweipne pangeda, anengdi, ne pel talepra donkamnunge. 13Apel-apel yuma konum kupmemnyopda, sun Lewi yala nengda, ne pel dona tep, yuk ketenepra deipkurume. Aneng konum keteneipmemnyopda, kan buru erepmemdi, upepkurume. ‘Sunda, Harun cap, er nyapu cap, tonpa pel donkamrume. Allah er tepapu pel donkamrume,’ pepmemdi, anengda ne tep wepra deipkurume.

14Aupuda, sun gekenai lap pepmemdi, keteneipmemnyopda, sun Lewi yala nengda, Israel nesala kan-kan di wilipra dopropmemdi, sun ayala neng tep, kandi, ‘Allah erngepu kunkameng’ tenen, telep kupra deipkurume. Ukupmemnya deiki di, sun anengda tek sisi, ne pel dona deiyo neng tep, ne mawa nengpu kunkamnunge. 15Musa, kandi sun Lewi yala neng tep nengeda, buru erepmemdi, ‘Sunda Allah er pel don nengpu kunkamrume,’ pepmemdi, ne Allah tep konum wepra deipmemnyopda, tonda ‘Lewi yala neng sun mali kun keca daemna tep, lap pepmaken pel yuma konum pel dopmem pangeda, sun aneng yumadi, ne Allah cap, nimi cap, antamna tep, opkal bol di dodina tenda ati pumbonpu talepra, pel donkamnenge. 16Angeda, tali men pepkene. Deiyoda, ne Allahdi sun aLewi yala neng tep nengeda, sun Israel nesala kununga neitamai di, konum wepra deipne. Tenpu Lewi yala ngebo peda men tapne. Sun yuma, ne mawa neng kunkamnunge. Sunda, Israel nesala, sun menmena weni derirameng nyapu yo pununa neng utopu kupra konum deipne. Atep, sun Lewi yala neng yumada, ne nyapu sisa kungedi, ne tepapu pel donkamnenunge.

17Ange peda, tali tep men pepsene. Deiyoda, ne Allahdi sun Mesir mutu nesala menmena weni deiyami nyapu yuma cap, sundi peirirami gam keca di weni deiaminge cap, popra tapsi. Apoptapsi taruda, sun Israel nesaladi, menmena weni deiami nyapu yuma cap, sundi peirami gam keca yala-yala yuma cap, menmena weni derirami gam keca yala yumada, men poptapsidi, ange yumada, ‘Ne pengepu kunkameng’ tenen, bokrapsidi, wepra deipsi. Ne penge sisapu keamsi. 18Ange utopu, ukutaruda, Israel nesaladi, sun menmena weni derinkameng nyapu yumada, sun yo pununa tep, nedi sun Lewi yala nesala konum wepra deipne. Israel nesaladi deipbankameng weni nyapu tapnedi, sun pununada, nedi Lewi yala neng tep, menmena weni nyapu deriramengtopu kupnedi, sun yukpu wepra deipne. Ukupnedi, sun anengda ne nyapu sisa keipne.

19Angepu gum dinin, tonda sun Lewi yala nengda, ne Allahdi dopra, sun imam neng, ada Harun cap, er nyapu cap, sun tep karepne. Ada, sun Lewi yala nengda, Israel nesala kan-kan kunge dinin, sun tepapu wepra deipne. Ada, ne Allah cap, nimi cap, antamna tep, opkal bol di domi tenda ati pumbonpu talepra pel donkamnenge. Tonda, sun dipapu Israel nesala mali kupmenge nge tep, ‘Allahdi wenepra poprur cadi, kaukeptudi, ange yuma gum kupra daeptue,’ tenepra, ne damai yangedi, moronkamnenge. Ukupnengopda, Israel nesala mankau di, ne si eremna ati meneng damai yangopda, adipapu poptapsetene dinin, ange gum di, kaukemkamne. Angeda, sun Lewi yala nengdi donkameng pel deiki di, Israel nesaladi mali kunkamenge ngeda, kaukepkamne ja. Sun wenemna tep, ila mambul pu dopra sun damai men deipkamne. Sunda wenepra men ponkamne. 20Ange tep nengeda, Musa cap, Harun cap, sun Israel yala nesala yuma capdi, sun Lewi yala nengda, ‘Allah erngepu kunkamnung’ tenen, Allah tep karepi. Akupi ngeda, Allah Yahwehdi Musa tep, “Ukupkamrume,” pepra deiamutopu, pel doprapidi aneng dopra Allah tep karepi.

21Ange utopu, sun Lewi yala nengda, Allahdi, “Ukupkamenge,” peiamutopu, sun mali kwamenge nge tep, daepra telep kudina tep, apelpu dopi. Ada, sun kenengami opkal yuma peda mepu kupi. Ange yuma konum kupropi pangeda, Harundi, ‘Allah erngepu kunkamenge. Sunda er si eremna ati pumbon pelpu donkamenge’ tenen, er buru erepudi, sun anengda, Allah karena tep karerbarameng keca utopu kupra, sun aneng ketenepra, Allah er damaipu karepu. Tonda, sun Lewi yala neng yumadi, mali kuraminge yo pununa tep, ‘Allahdi sun mali keca yuma kaukepredi, gum kupra deipyopda, sun tep pio telep kupra deipkamre’ tenen, gam keca poprapudi, Allah tep karepu.

22Ange tep nengeda, ataru di dipra dorkupbaramu taru yumada, Allah Yahwehdi Musa tep, ‘Sun Israel nesaladi, Lewi yala neng wepra deipmengepa, ne Allah cap, nimi cap antandana tep, ne si eremna ati pumbon cap, akati damai capda, ukupra pel dopkamnunge,’ peimu ngeda, apeiamutopu kupra pel dopbarami. Ukupra pel dopya deiki di Lewi yala neng yumada, Allah cap, nimi cap antamdana ati pel dona deiyo neng ketenepra deipi. Akati neitamai cap, akati damai cap pel dona tep, “Sunda ukupkurume,” pena deiyo nengda Harun cap, er nyapu cap sunpu kurami.

23Allah Yahwehdi Musa tep pepu. 24“Sun Lewi yala neng yuma gum dinin, sun pel dopmanto nengda, sun keteng tamun dua puluh lima (25) tahun itara kupre nengda, ne pel dona tep wepra deipmumpa, ne cap, nimi cap, antamdana ati pumbon neitamaipu, pel donkamnunge. 25Dinino, sun akati pumbon kuramengedi, pel doramengepane, keteng tamun lima puluh (50) tahun konum kupyopda, ton cap apel men donkamnunge, adipapu apel tapmengedi, talipu dakunkamenge. 26Ne Allah cap, nimi cap, antamna tep, opkal bol di tenda ati, ne si eremna ati pumbon pel konum tapmengopda, atapmenge neng sundi akati pumbon pio mambul pel ton cap wekra men pel donkamnunge. Dinino, sun Lewi yala nengpu sun kayapu yuk neng ton akati pumbon wekra pel donge pangeda, sundi anengpu melipra kunkamnunge. Angepu kunkamnunga tep, sun Lewi yala neng pel donada, angepu pel donkamnunge, pepne.” Allahdi Musa tep pepu.