Obd | XteSC | STEP |

Obadiah

Allah Yahwehdi, nabi Obaja damai yaudi, Edom mutu deiki ikin keca amenda taru yana deipkamunge tep, pepu upu

1 Aupuda, ne nabi Obaja ken mapsa deiki di, Allah ^{▼▼Allah – Acada, Ibrani upu di, Allah er pe si sisa ‘Yahweh’ cap, tonda, ‘Adonay’ cap pepra sekya cadi, nundi aupu ‘Adonay’ deiyo ngeda jenek kupra sekmupu. ‘Yahweh’ kael kemna tep, lap pen upu nomor 49 dinkurume.} Yahwehdi yana lap pepneupa, gekepsi. Ada, Allahdi, akeca-keca yuma talepra, deiki tara erepra, pio puto weik deiyo ngebodi, aupu pepneu.

Neda Allah Yahweh, akeca keca yuma talepra, deiki tara erepra, ila puto weik kunun ngebodi, Edom ^{▼▼Edom – Edom mutuda, Laut Mati damai dinin, dapu tara di dipdongopra kwamu. Tonda, Araba tara adinin, keteng yakan tara kwamu. Atara mutu wilimdonai deiami ngeda, Laut Akaba kwamu. Sun Edom mutu neitamai kurami nesalada, Yakub er dubo Esaudi deiamupa, dadeipdanen yakarami nengdi deiami neng kurami. Sun Edom tara nesaladi, Israel tara nesala tep, ‘Nun songe,’ teneramidi, podanapu kurami. Atep, sun Israel nesala peda, sun Edom mutu neng tep, ‘Amutu nesalada, nun pio songe,’ teneramidi, podanapu kurami. Edom mutu nesaladi, Israel nesala tep, ‘Popkupe’ tenen, Babel tara neng cap wisipidi, porami. Atep nengeda, Allahdi, ‘Atara neng wenepkamne’ tenen, ila ikin keca dopra, sun nong deiki deipu.} mutu kunge nesala yuma tep, amenda taru kupkamre keca tep, upu lap pepkukene. Amenda taru sun damaida, ikin keca weik deipkamsine nge tep, ne Allah Yahwehdi konum upu pepra deipken ngeda ake. Tenpu ngebo ton wepra doproipsipa, sun kurum mutu dana-dana tara yuma konum beudi, angebodi pepu upuda ake. Ada, “Sun mutu yuk-yuk kurum nesala yumada, moupra gekepmumdi ketenepkurume. Nun yuma wisipmepedi, sun Edom mutu neitamai kunung nesala yuma tep, porbenkamape,” pepu. 2 Tonda, Allah Yahwehdi, sun Edom mutu nesala tep upepseue.

Ne Allah Yahwehdi, sun Edom nesala puto boun kupra deipkamsene. Yuk tara nesala yumada, puto karepnepa, sun tep bisbisa kapra popkamsenge. Tonda, mali kweipsenyopda, yuk mutu-mutu nesala yumadi, sun Edom tara neng tep epsengedi, yap-yap pepra, nalepsengedi, autunkamsenge. Sun yumadi, sun Edom tara neng tep, ‘Anengda, nun pio songe,’ penkamsenge.

3 Sun Edom mutu nesalada, ‘Nunda pio telep neng kunupe’ tenen, mok upu pedaruma deiki di, konum dipru erepra salnong-nong kamrume. Ada, sun ila ati arumda, ila gel mutu gon deiki dopra deiprumdi, puto kepra deiprume. Ukupra deiamruma tep nengeda, sundi, ‘Dyo, nunda, ware mutu nengdi nun tep popsengedi, nun mutu gon deiki kunupai di dopra, dutara ban mutu tu deiki deipsetenge do? Gume angeda men kupmanto,’ tenemumdi, pio salnong-nong kupra gemenapu kurume. 4 Tek sisi, seng-seng pena ma, ila lyom co dup, ati domredi, im neitamai lakra embaramre utopu, sun Edom mutu nesalada, yuk nengdi tali lupra men wekmanto mutu kurume. Tonda im alau tara kuru ingamre utopu, yuk mutu nesaladi tali lupra men yanmantoipu kurume. Ange ukurum dinin, tek sisi amenda taruda, ne Allah Yahwehdi, sun Edom tara kurum nesala dopra, amutara tuai tarapu dokotepkamsene.

5 Upula don neng do, nimi pona tep neng, yu neng do, lukunda neitamai sun ati yangedi, sun deiamum kecada, ‘Ange doropkupe,’ tenepmange ngepu doropmengedi, ton yuk kwamre kecada, sun putana gum tep tamsenunge. Ange utopu, sun anggur tapu du wa pepra kouamum ngeda, anggur du dangne pel don nengdi, anggur du dakmengopda, yambulanun ton dakmengedi, men tamsenunge. Angeda ukusenung dinino, sun Edom mutu nesala pona tep, amenda taru yankameng neng yangopda, sun tara nesala yumada, adipapu popra gawal dakamsenge. Tenpu ngebo peda ton men tapkamsenge.

6 Atep, uo sunda moupra tenipetepso! Sun apu bo Esaudi deipseupa, deipdanen yakarum nesala, sunda Edom yala neng kurume. Sun ponkamsenga tep yankameng yu nengdi, sundi mawa deiamrum bung keca yumada, ‘Dan do?’ tenen, epetepmengedi, epmengopda, akeca-keca yuma dalupra dopropmengedi, gawal dakamenge. Teka, sun Edom tara nesala, sun pona tep yankameng nengdi, sun bung keca yala-yala yuma, inipra mawa derirumnge peda, adipapu dalupra doropkamsenge.

7 Yuk-yuk mutu nengdi, sun Edom mutu neitamai kumum nesala tep, ‘Gume, nunda yana melipkamsepe. Atep, kikimanpu bena sun podan neng tep, nun cap kikiman porbenkamepe,’ pepra pedina upu deiki di pepsei nengda, tali upupu pertamsenunge. Sun amutu-amutu neng yumadi, sun Edom mutu kurum nesala yuma enepra donokamsenge. Sunda sun pe mutu dinin, pio sirikai, wilimdonaipu dokotepkamsenge.

Ukupsengepa, yuk nengdi poptapkamsenge. Uo, sun Edom mutu kurum nesala, sun kayapu neng sisa di, yuk mutu neng cap wisipmengedi, popkamsenge. Ada tali neng tep gume. Sun Edom nesala cap, sun kayapu neng cap, kikiman bukra, jen keca kikiman tonpa jerum nengdi, pena peipmasengepa sun youpkamsere.

Ukupseryopda, sun aneng-aneng yumadi, sun Edom mutu nesala tep, “Uo, dipetepkurume. Edom mutu nesaladi, ‘Nunda ila kael neng kunupe,’ tenedarami dinin, ukutaruda, sunda tek sisi walwal nesalapu kununge,” pepra, nalemkamsenge.

8 Allah Yahwehdi, aupu ton pepsere. “Ataruda, sun Edom mutu nesala tep, ne Allahdi wenepkamne. Amutu neitamai ila kael nesala yumada, gum kupra deipkamne. Teka, sun Edom tara neitamai, amutu-amutu deiki kunge nengdi, ila di kael kepra pel donge keca yumada, gum kupra deipnepa, akuramyai dila peda, men ton men akapkamre. Anesala yumada, gawal dakamne ja!

9 Uo, sunda bicaue! Edom mutu neitamai, ila ati arum domrumnge, mutu si Teman mutu peda, amutu neitamai nimi pona tep neng, sun jen talena neng yuma peda, kware pio weik kuprepa, men kupmanto kupkamenga cadi, nedi aneng yuma popra gawal dakamne. Atep nengeda, sun apu bo Esaudi deiamupa, dadeipdanen yakarami neng, Edom mutu kunung jen talena neng yuma cap, dakunge tali nesala yuma capda, mar podanaidi popmengepa, sun yuma depkamenge. Ne Allahdi pepsene.

Allahdi, “Edom mutu nesala, sundi mali-mali kuramrumnge tep, wenepkamsene,” pepu upu

10 Ne Allahdi, sun Edom nesala tep, upu ton cap pepsene. Sun apu bo Esaudi deiamupa, dadeipdanen yakaramyanen deipseipa, ukutaru kurum nesala, sun apu bo, Esau er weit bo sida Yakubda, erdi deiamupa deipdanen yakarami neng tep, sun Edom mutu neng, sun kayapu neng sisa dinin, sundi sun kayapu Yakub er yala nengdi deiami neng tep, pio balila deipra ikin kecapu sun nong deiki derirume.

Tonda, Yakub er yala neng weika di poramrume. Atep nengeda yuk mutu yu neng yangedi, sun Edom tara kurum nesala tep, mar pepra yap-yap pepkamsenge. Ukupsengopda, sun Edom tara nesalada, kange mun kange doupra ali weik dangkamrume. Tonda sirya tarada, ne Allahdi sun Edom mutu nesalada, pio gum kupra deipkamsene.

11 Pumun taruda, ila ati arum, Yerusalem mutu wengbana tep bisi buplan damaida, yuk karen mutu ^{▼▼karen mutu – Amutu pepu nengda, sun Babel mutu yu neng tep pepu. Sundi Yehuda tara yuma cap, ila ati arum kota Yerusalem cap, uruptaprapidi, Israel yala nesala weika di porami. Ataruda, sun Edom mutu nesaladi, Israel tara kurami neng tep, pio men meliami.} yu nengdi, yana dakra uruptapidi, abisi wekra, Yerusalem mutu kurami nesala popi taruda, sun Edom mutu nesalada, karenai dipapu tekra, asuru dipapu dirtamamrume.

Tonda Yerusalem mutu nesala, sun kunumna weik bung keca, mawa deiaminge yumada, sun yu nengdi dalupra doropidi, abung keca bongna tep pel donmai taruda, sun Edom nesalada, asuru dipapu epra tamrume. Atep, ne Allahdi sun tep tenepsisada, ‘Sun peda, ayu mali neng utopu nengpu kurume,’ tenepsisi. Ada, sun Edom tara kurum nesala, sundi sun apu bo Yakubdi deiamu nesala tep, men meliamrume.

12 Sun kayapu neng, sun Yehuda tara kurami nesala, ikin keca sun deiki yaupa doropi taruda, sun Edom tara kurum nesaladi, ‘Nun kangeda pio deipmepe. Ikin keca doropmeng ngeda, pio men tenenkamepe,’ teneamrumdi, sun tep yap-yap pepra auturamrume. Tonda, sun kayapu neng Yehuda tara neng, ikin keca doropi taruda, sundi, ‘Walito ikin keca doropmange’ tenen, kangeda pio men deiamtum dinin, sundi kange deiamrume.

Tonda, sun kayapu neng, sun Yehuda yala nesala, ikin keca dopropidi, kange mun kupkopda, sun Edom mutu nesaladi, ‘Nun damaida, ikin keca ton men kuserepa, doronupe. Sunpu ikin keca yumada, yarepa doronunge’ tenen, dipru erepra salnong-nong men kamamtum dinin, gemenapu kuramrume.

13 Tonda, sun Edom tara kurum nesalada, ne nyapu sisa Israel nesala, sun damai kange mun keca yaupa, dopropi taruda, sun ati buplan bisi men wekamtum dinin, sundi tali lupra wekrume. Tonda ne nyapu sisa kange mun keca doropidi, sun mali kange doupra kunmai taruda, sun Edom tara nesalada, sun kange deipra kumumdi, ila upu men pepmatum dinin, kange deipra, ‘Walito ponmange, sun keca yuma gum kupra deipmang adano,’ pepra kange deiprume. Tonda, Israel tara nesala, kange mun kupu taruda, sun Edom nesaladi, Yehuda tara nesala, sun bung keca ton, pio men dopromtum dinin, akecada weika di dalupra dopramrume.

14 Angepu gum dinin, Yehuda tara nesala, sun mar pon nengdi yana, warekmaipa, bura sakra, ‘Yuk mutu sepdaro benkup’ tenen, banmai nesala tep, sun Edom mutu nesaladi, bisi pirmanai tekamrumdi men pomtum dinin, anengda weika di poprume. Tonda, sun Edom mutu nesaladi, Yehuda tara nesala, sun kange mun kupmarepa, tupa gam kunmai nesalada, inipmai dinin, sun mar poryakan neng tep, aneng tomopra men karepmatum dinin, sundi gam tupa kunmai neng tomopra, sun podan neng tep kareprume.

Allahdi tuai nesala ban-ban yuma tep, upu bokeipredi wenepkamra tep, pepu upu

15 “Ange-ange yumada, men kupmatume,’ pepmasenada, tali tep men pepsene. Teka, ne Allah Yahwehdi, pio tek sisi upu pepsene. Tuai kunge nesala ban-ban yuma, upu bokeipnedi wenepkamne tumida, konum damai kupmare. Atep sun Edom mutu nesaladi, yuk mutu nesala tep mali weik kuramrum ngeda, sun akuramruma utopu, menenga keca peda wenepra karepsenepa, ila ikin keca doropkamrume. Ada, sundi mali kuamrum ngeda, sun pe giso deiki deipkamsene. Ila di wenepra popkamsena tep pepsene.

16 Uda, ukutaruda, sun Yehuda tara neng tep pepsene. Ange peda, tali tep men pepne. Deiyoda ake. Ne Allahda, ne pio telep lengna mutu deiki, ada ne si eremna ati kure mutu, Sion mutu dupai, ne nyapu sisa, sun Israel yala nesala dopra deipsisipa kurume. Amutu dupai kumumdi, sun mali kuramrum keca yuma tep, sun wenemna tep keca konum karepsisi.

Ukupmantoda, peten kemna tep, pio yu meda, karepsipa, sundi konum jeproprume. Dinino, ange utopu, ware mutu nesala do yuma, tuai mutu ban-ban yuma kunge nesaladi, sun peda ila kange mun keca wenepra karepkamne. Ukupmantoda, sun mali kunge keca tep, peten kemna tep yu meda, karepnepa, sundi ame jenkamenge. Ajenkameng meda, pio yu weiknge kurure. Atep, awenemna keca kure ngeda, pio men gopra benmanto kurure. Atep sun anesala yumada, pio ame jeramenganen, adipapu gawal dangnapu kunkamenge.

Angepu kuramenganen, ‘Aceida ake’ tenen, katuai peten kemna peda, gum dipapu gum kupra deipkamne. Ukupra deipnedi, anesala yumada, pio gawal dakeipkamne. Anesala sun mutu-mutu yumada, nimi pio men kunungai utopu, pio walang yopu kuprepa, dimbulung pepkamre ja!

17 Dinino, Sion mutu dupai kunkameng nesala kan-kan neitamaida, nimi yambulanun ton lyepropkamna cadi, ton tara nengda, gam tupa kunkamenge. Tonda, Sion mutuda, ne mawa mutu, pio telep lengna mutu kunkamre. Ukupra deipnyopda, Yakubdi deipupa, dadeipdanen yakarami nesala, sun podan nengdi amutu dalupra dopropidi, anesala enepra donokipa, bendopi dinin, amenda taruda, Yakub er tara nengdi, sun apu yapu enepra donoki neng, sun Edom tara neng tep, tamupra enepronkamenge. Ukupmengopda, sun Edom tara nengdi amutu tapra bendopkamenge. Ukupmengopda, Yakub er tara neng, sun nyapu sisadi, sun aypu yapu taleami mutupu, amutupu tamupra yana talepmengedi, pio acapu kunkamenge.

18 Ukunkameng taruda, sun ne nyapu sisa Israel nesala, Yakubdi deiamupa, dadeipdanen yakarami nengda, ila uku jeramredi, akeca-keca yuma jepra gawal dangamretopu kupkamenge. Ada, Esau yala nesaladi deiamipa dadeipdanen yakanung nengda, tali kolupu keca utopu kupmengepa, auku di jeproprepa, sunda pio gum kupkamenge.

Esau tara nesala yumada, ukupmanto wa kwemenga uku di jepra, gawal dangamre utopu kunkamenge. Esaudi deipupa deipdanen yakanung neng peda, pio men tapkamne. Ukudi jepra gawal dakamra cadi, tenpu ngebo peda gam tupa men kunkamre. Ange yumada ne Allah Yahwehdi konum pepmasena cadi, ange yumada tek sisi nong kupkamre!

19 Ange yuma konum kupyopda, ataruda, Yehuda mutu neitamai kunung nesala dinin, iknapi dam tara, (arah selatan tara) kunung nengdi, Edom tara mutu dopropmengedi kunkamenge. Tonda, keteng dangban tara mutu, ila Laut Tengah pirman mutu taleami nengda, Filistin neng kurami dinin, Israel yala nengdi, sun Filistin neng tep popra gawal dakmengedi, amutu tu talenkamenge.

Ukupmenge pangeda, ne nyapu sisa sun Israel nesalapu, iknapi dam tara mutu yumada, dopropmengedi kepropkamenge. Ada, Efraim mutu yuma dinin, dipdongopra ila ati arum Samaria mutu yuma peda, amutu tu yumada, sunpu dopropmengedi kepropmengopda, amutu talepra kunkamenge. Ukunkameng taruda, sun Benyamin yala nesalada, Gilead mutu talepra kunkamenge.

20 Israel yala nesala ateng koupra donokamipa, dapu tara (arah utara) mutu di bena pio karen mutu, Hala mutu dakuramyanen, tamupra yange dingeda, Fenisia mutu di dipdongopra, ila Laut Tengah pirman, Sarfat mutu yumada, sunpu yana amutu dopropmengedi, talepra kunkamenge. Ange utopu, sun Yerusalem mutu nesala yuma peda, ateng koupra dubenamipa, pio karen mutu, Sardis mutu dakuramyanen, tamupra yange dingeda, Yudea kwamu mutu dinin, iknapi dam tara dabena, sun pe mutu sisa dopropmengedi, ati arum dopra, Negeb mutu talepra kunkamenge.

21 Amutu bisbisa kapra dopropkameng deiyo nengdi, Yerusalem mutu tamupra welepkamenge. Esaudi deiamupa, dadeipdanen yakarami neng, Edom tara mutu kunung nesala tep, adeiyo nengdi porbenkamenge. Ukupkameng taruda, Yerusalem mutu nengdi, Edom tara neng yuma tep, bena popkamenge. Ukupkamenga tep nengeda, tek sisi ngeda, neda Allah Yahweh, amutu-amutu yumada, sun deiyo ngebo kepnedi, atara yuma talepra kunkamne.

Aupu yumada, Allahdi nabi Obaja tep, yana ken deiki di lap pepra deipu.