Asurat Pilemonda, Paulusdi, er kap Pilemon tep sekra dokotepu. Pilemonda, Kolose mutu kuramudi, Yesus er kai telep upu tep teka tenepu. Pilemonda, isomka ngebo kuramnga cadi, er pel don neng weik taleamu. Anengda, co bo deiki kunupudi, anesala taleamupa, er peiamu pel yuma, dorami. Asurat neitamai Paulusdi, nimi si, Onesimus, pepu ngeboda, pumun taru Pilemon er pel don ngebo kuramu. Ukuramu dinin, Onesimusdi, ‘Ne song’ tenen, Pilemon tapra, yuk mutu sepra bendopu. Bendopudi, dakuramnganen, Paulus damai bena Allah upu gekepudi, teka tenepu. Teka tenepudi, Paulus cap kikiman kuramreidi, Paulus tep, melimamu.

Uda, ataru neitamaida, tali pel don nengdi, sun deiyo neng tapra, yukai bendomi neng yumada, Roma mutu jen talen nengdi adipapu poptapi. Ukurami dinin, Paulusdi, utenepu. ‘Ne kabo Pilemon tep, moropnepa, gekeptudi, “Telepe,” peptuopda, er pel don ngebo Onesimus ka tamupra Pilemon damai dokotepnepa, beryopda, Pilemondi, Onesimus dopra, jen talen neng men karepkamre. Onesimusdi mali kupunge tep kaukeptudi, sun telep kupra kikiman kunkamrenge,’ tenepudi, asurat seku.

Philemon

Paulusdi, er kabo Pilemon tep, “Telepe,” pepra gonga kepra pepu upu

1Telepe, ne kabo, Pilemono, ne Paulusdi asurat sekra dokotepkene. Nedi Yesus Kristus upu peteremamsa tep, ateng koupra wenemna ati dongopneipa, akunune. Ne cap, nun weite utopu ngebo Timotius capdi, asurat sekeipkeneme. Kanda, nun kabo sisa tep, nun pel tonpua pel donup ngebo kuruma tep, kange deipra dipru karekenume.

2Asuratda kan cap, uda Yesus tep teka tenepka cadi, nun weit ner utopu ner Apfia cap, uda Arkipus cap tep, asurat sekneme. Arkipusda, jen talen neng pio piripra pel doramengtopu, erdi Yesus er upu peterembana tep, nun cap tonpua pel dorure. Tonda, Allah teka tenemidi, kan ati bulupra Allah upu gekeryakanung nesala cap, sun yuma tep, asurat sekeipseneme.

3Uda, ne mi Pilemono, nun nai bo Allah cap, nun Deiyo Ngebo Yesus Kristus cap, sun butene di, kan Pilemon cap, kan ati bulupra Allah tep si eremenge nesala cap tep, bicau teneserengedi, sun kange dipapu tali melimserenge keca cap, uda, nun putasere keca mesum dipu kareserenge keca cap, tonda, ‘Yuk neng cap yu tenedana gum di, kange deipra teleppu kikiman kunkameng’ tenen, kareserenge deiyo keca cap, kareserunge. ‘Ange yumada, tupa-tupa weika di tapakra karenkamsereng’ tenen, sun yuma tep Allah moronune.

Paulusdi telepe pena cap, Allah morona cap tep, pepu upu

4Yuma taru yuma, nedi Allah morone taru yumada, ‘Allahdi melimkamker’ tenen, kan Pilemon tep Allah morokenune. Ataru yumada, kan tep tenepkenedi, kan si pepra, Allah tep, “Telepe,” penune. 5Ukununa deiyoda, yuk nengdi kan tep lap penengepa, konum gekepra kael kemkenune. Allahdi weamu nesala, er nyapu yuma tep, kandi dipru karena cap, nun Deiyo Ngebo Yesus tep, weika di teka teneruma cap tep, “Telepe,” pepra, Allah moronune.

6Pilemon Allah tep teka tenemum keca, ‘Yuk neng tep pio peteremkamrem’ tenen, Allah morokenune. Ange deiyoda, ‘Ukupmem pangeda, Yesus Kristus cap dipru dukdongopra kikiman kupepa, akeca-keca yuma, telep keca kareserenge nge yumada, pio moupra kael kemkamrem’ tenen, Allah morokenune. 7Ne weit sisa utopu ngebo Pilemon, kandi ne dipru pio kwa dipnemumdi, kange deipra pio pingping kemdinerume. Ada tali tep gume. Deiyoda, kandi Allah er nyapu tep, sun dipru kwa diamumnge cap, sun ikin kuraminge tep, meliamumnge cap deiki di, aneng dipru kareamume. Ukumemnya deiki di, pingping kemdineruma cadi, ne kange deipkene.

Paulusdi Onesimus tep moropu upu

8Ange tep nengeda, kan cap, ne cap, Kristus cap, dipru dukdongopra neitamai kupedi, kika deipra, “Kan adipapu telep kun kecada ake,” pepra, “Kan adipapu ukupkurume,” pepra, dukdeipra balila di pepketene dinino, ange men pepkukene. 9Ange gum dinin, kanda Allah er nyapu yuma pio dipru karepra, telep keca ukumemnya kael kepkesa tep, bicau tenekenuna deiki, bouna di moropkene. Neda, konum wisi deipsi. Tonda, Yesus Kristus er kai telep upu, nimi lyemna upu peteremnuna tep, ateng koupra wenemna ati dongopneipa kunune. 10Ukununa cadi, ne mi utopu ngebo Onesimus tep, moropkene. Ateng koupra deiamneipa, wenemna ati kuramsi taru neitamai di, peteremsipa, Onesimus teka tenepka cadi, ne mi utopu kuramu. 11Pumun taruda, erdi kan tep tek sisi pel pukamkwa men doramkeupa, napra men du dopramum dinino, ukutaruda erdi ne cap, kan cap, nun butene tep, pel telep kupra doserya deiki di, du dopronume.

12Onesimus tep bicau tenenedi, ne pio dipru ngebo kunerur dinin, tamupra kan damai dokotepkene. 13Allah er kai telep upu, nimi lyemna upu peteremamsipa, wenemna ati dongopneipa, tupa kune taruda, kandi men yana melipnetuma cadi, kan yo pununa tep, ‘Onesimusdi melipnetupa, pio taleptene’ tenen, putaramneupa tenemsi. 14Ange putaramneupa tenemsi dinino, kandi ne tep, “Telepe,” kapul men pepnemem pangeda, tali lupra angebo men dopropkune. Nedi kan tep, utenepkesi. ‘Ada, ware telep kun keca do, erdi ne tep telep melimna keca do, ne pena deiki gum dinin, er pe tenena deiki dipapu melipnetue,’ tenepkesi. Ne dipapu puto di men pepketene. Kan kange dipapu melipnetumtoda angepu telepe tenepkamne.

15Ne walwal dinino, pumun taru Onesimus kan tapra ke benamkeua deiyoda, ‘Amenda taru tamupra yaredi, pio kikiman kunkamreruma tep kupu do, gum do?’ tenenune. Men di kan tapra bendopkeu dinin, ukutaruda, sun butene kikiman pio kunkamreruma cadi, angeda telepe pua, tenenune. 16Kikiman kunkamrerumada, pumun taru co bo deiki di Onesimus kunupra talepmumpa, kan pelpu tali doramutopu, ▼

▼Pumun taru co bo deiki kunumami nesalada, isomka nengdi, pio kankan kurami nesala tep, co bo deiki di kunuamipa, akankan kurami nesaladi, sun isomka nesala tep, sun pel talipu pel dorami. Tonda, lap pena upuda, nomor 36 dirume.

ukutaru angetopu men kunkamre. Angeda, yambul telep dinin, pio telep ngeda, ukutaru kan weit sisa utopu, kan dipru ngebo konum keipkere. Onesimusda, ne pio dipru karepra bicau tenenun dinino, ada yambul pua. Ukutaru kan dingeda, er tep, ila di kange deipra bicau tenenkamreme. Erda tali tuai ngebo dinino, tonda erdi nun Deiyo Ngebo tep konum teka tenepupa, Yesus dipru dukdongopseupa, tonpua kunupa cadi, kan weit sisa utopu, kan dipru ngebo kunkamkere.

17Ange tep nengeda, ne kabo Pilemono, kandi ne tep, ‘Angeboda, nun tonpua pel donume,’ tenepnemem dingeda, kandi ne tep, “Telepe,” pepra meliamnemumtopu, Onesimus kan damai yaryopda, er peda napropkamrume. 18Onesimusdi kan tep mali kupkeu do, kan keca cap, kan co bo cap, dopropu dinin, ka tamupra men karepkeunge tupa akapyopda, ne deikipu deipkamnerume. Nedi, akeca yuma karepkenedi, yo punupkamkene. 19Teka, ne Paulusdi ne pe buru dipapu asurat sekeipkenepa, dinkamrema cadi, teka tenepkurume. Gum kupkeu keca yumada, nedi yo punupkamkene. Nedi peterepkesipa, teka tenepmuma cadi, “Kan nong peda karepnetume,” pepketene dinino, ange men pepkukene.

20Ange men pepkene dinino, kan cap Allah dukdongopra, kikiman kupedi, ‘Ne weit utopu kuruma cadi, adeiki di melipnetue’ tenen, moropkene. Tonda, ‘Ne ikin kunere keca tep, makupnetua deiki di, ne dipru kwa dipnetue’ tenen, moropkene. 21Ne kaele, ne moropmaken upuda, kan tek sisi gekepra kunkamreme. Ange tep nengeda, ne kaele, asurat deiki katuai moropmaken kecapu gum dinin, ton tapakra telep kun keca ton cap melipra kunkamnereme.

22Pio putanere ngeda, kandi ne tep Allah moronememtopu, ‘Allah melipnerya deiki di, wenemna ati pumbon di loptapnetengepa, akati tapra kan damai tamupra yatene’ tenen, pio tupa tenenune. Atep, ‘Er yankamre do?’ tenen, kan nimi bo neng man ati keteneipkamnerume.

23Epafras, er peda Yesus Kristus pel doramupa, ateng koupra wenemna ati dongopipa, ne cap akunume. Erdi kan tep, “Telepe,” peipkere. 24Ange utopu, ne tonpua pel donup neng, Markus cap, Aristarkus cap, Demas cap, Lukas capdi, “Telepe,” peipmakenge.

25Telepe, ‘Nun Deiyo Ngebo Yesus Kristusdi, bicau teneseredi, er kange dipapu melimsere keca, weika di karenkamker’ tenen, Allah morokenune.

Ne Paulusdi pepkene.

Telepe, acapu deipne.