Phili 1 | XteSC | STEP | Nun kayapu telepe. Nun butene Paulus cap, Timotius capdi, asurat sekeipseneme. Nun buteneda, Yesus Kristusdi nun dipru talerserya deiki di, er amutara kunemedi, er upupu gekepra, er pelpu donume. Asuratda, sun Filipi mutu kurumudi, Yesus Kristus tep teka teneprumdi, erpu talepra, dumsisipu kumum nesala cap, uda Allah upu peteremna neng sun melimna tep dirpetena deiyo neng cap, Allah upu ati pel melimna neng cap, sun yuma tep, aupu sekeipseneme.

Philippians 1

Paulusdi, ‘Telepe’ pena tep, pepu upu

1 Nun kayapu telepe. Nun butene Paulus cap, Timotius capdi, asurat sekeipseneme. Nun buteneda, Yesus Kristusdi nun dipru talerserya deiki di, er amutara kunemedi, er upupu gekepra, er pelpu donume. Asuratda, sun Filipi mutu kurumudi, Yesus Kristus tep teka teneprumdi, erpu talepra, dumsisipu kumum nesala cap, uda Allah upu peteremna neng sun melimna tep dirpetena deiyo neng cap, Allah upu ati pel melimna neng ^{▼▼Allah upu ati pel melimna neng sekmupkada, sun Bahasa Indonesia upu deiki di, ‘Majelis’ penunge.} cap, sun yuma tep, aupu sekeipseneme.

2 Nun nai bo Allah cap, nun Deiyo Ngebo Yesus Kristus cap, sun butene di, sun Filipi mutu teka tenerum nesala tep, bicau teneserengedi, sun kange dipapu, mambul pel dona deiyo keca melipra kareserenge keca cap, tonda, ‘Yu tenedana gum di, kange deipra teleppu kikiman kunkameng’ tenen, kareserenge deiyo keca cap, kareserunge. ‘Ange yumada, tupa-tupa weika di tapakra karenkamsereng’ tenen, nedi sun Filipi mutu kurum nesala tep, Allah morosenune.

Paulusdi Filipi mutu nesala tenena tep, “Ne nai Allah telepe,” pepra moropu upu

3 Ne Paulusdi sun yuma tep, tenesene taru yumada, nedi sun tep, “Ne nai Allah telepe,” pepra morosenune. 4 Nedi sun yuma tep, Allah morosenun taru yumada, ila di kange deipra, sun tep Allah morosenune. 5 Ada mesum tep gume. Deiyoda, teka teneprum taru di gonga kepra, adinen dipdongopra, aneitam taru cap, ukutaru cap, nedi Allah er kai telep upu, nimi lyemna upu peterep embana tep nengeda, pio telep kupra melimamnerume. Atep, sun tep tenepsenedi, ila di kange deipra, Allah morosenune.

6 Tonda tek sisi ne kaele, sun dipru neitamai di, telep pel gonga kepra pel dore ngeboda, ada Allah er pua. Allahdi pio apelpu dopbaramseredi, meliamseryanen, amenda taru gawal dakamsere. Ada, Yesus Kristusdi nimi upu bongdina tep, yankamre tarupu, Allahdi sun dipru neitamai telep pel dosere ngeda, gawal dakamsera tep, pepsene. Ange yumada, ne tek sisi kaele cadi, ila di kange deipra, nedi sun tep Allah morosenune.

7 Nedi sun tep bicau tenesenuna tep, arup asurat deiki pepmasen upuda, telepe pua. Uda, ne kaele, ateng koupra wenemna ati dongopneipane, akune taru, Allah er kai telep upu, nimi lyemna upu tep peteremne taru peda, Allahdi melimnerure. Utopu, mali nengdi balila deipra, Allah upu tep, “Aupuda tali upu pua,” penengepane, nedi, “Gume, deiyo ake,” pepra, lelepra peteremnun taru peda, Allahdi pio bicau teneneredi melimnerure. Allahdi ne tep ukuneretopu, sun peda utopu, sun mambul pel dona deiyo keca tep, sun tep pio bicau tenepra, er kange dipapu melipra kareserura cadi, ne ila di kange derisenune. Allahdi sun tep melimserur ngeda, konum kael keamsisi. Atep, ‘Allahdi sun dipruai pel dosere ngeda, telep kupra gawal dakamsere,’ tenesenunada telepe pua.

8 Ne tali men pepsene. Allah dineredi, nun kune keca yumada, er kaele. Yesus Kristusdi nun yuma tep, ‘Ne nyapu’ tenen, pio bicaue teneseretopu, ne peda sun Filipi mutu nesala yuma tep, dipru karenerepa, pio bicau tenesenune. Tonda, ‘Filipi mutu nesala cap, ne cap kikiman kutepe’ tenen, putanerure.

9 Utenepra, Allah morosenun ngeda, pepkusene. Ada, ‘Sun ila kaele kemna deiki di, nong bol deikingepu gum dinin, sun dipru neitamai kure keca yuma, pio moupra tenedamumdi, sun bicau tenepra makudankamrum kecada, weik kupbankamre’ tenen, Allah morosenune. 10 ‘Ukunkamrume’ tenen, Allah morosenunada, deiyoda ake. Ada, tek sisi telep kun keca, ‘Pio telepnge ake’ tenen, moupra tenemumdi, telep ngepu wepra kunkamrume. Ukumum dingeda, ‘Mali kuna gum di, dumsisipu kunkamruma’ tenen, Allah morosenune. Ukupra pio teleppu dakuramrumupane, yuk nesala yumadi sun tep, ‘Sun mali kunung kecada ake’ tenen, men pepmanto kunkamenge. Ukuramrumyanen, aneitamai taru yuma cap, Kristusdi tuai nesala yuma upu bongdina tep, sirya yankamre taru cap, ‘Utopu teleppu kunkamruma’ tenen, Allah morosenune.

11 Ataru neitamai yumada, sun cap, Yesus Kristus cap, dipru dukdongopra kikiman kurumupane, Kristus er puto deiki di melimserepa, pio dumsisipu kuramrumyane, ‘Telep kun keca du weik moupkamsere’ tenen, Allah morosenune. Dumsisipu kurumupane, du weik moupsere pangeda, nesala yuma epsengedi, “Allah erda pio telepe,” pepra, er si eremengepa, Allah er si ton cap tapakra ila kupkamre. Ukupyopda, ‘Nesala weika di, er si kael kepmengedi, er sipu eremkamenge’ tenen, Allah morosenune.

“Ne pel dopra kune keca yumada, Yesus Kristus er si eremna tep kunune,” pepu upu

12 Uda, ne weit yapu utopu kurum nesalada, ‘Aupu kaele kepkuruma’ tenen, pepkusene. Ada, sun yuk nengdi ateng koupra, wenemna ati dongopneipa, acapu kunune. Ukunun dinino, wenemna ati kunya peda, Allah er kai telep upu, nimi lyemna upu tupa lap penepa, adeiki di nimi weik ton cap, aupu gekepmengopda, teka tenepmengedi, teka tenena neng tapakmengedi, weik kupbanunge. 13 Nimi weik ton cap, aupu gekeramnei dingeda, Roma mutu ila nimi deiyo ngebo Kaisar, er ila ati kalengna tep jen talen neng cap, uda er ati pel don neng cap, yuk nesala yuma cap, konum katuai kael keamnei. Konum katuai kaele kepnei ngeda, ada yuk nengdi, wenemna ati dongopneiyada, mesum tep gume. Ada, ‘Paulusdi, Kristus tep teka tenepudi, Yesus er nimi lyemna upu peteremrura tep, ateng koupra, wenemna ati dongopmemei’ tenen, konum kael keamnei.

14 Amutu talena deiyo nengdi, wenemna ati dongopneipa, yuk nengdi lap perami pangeda, amutu-mutu kungedi, nun deiyo ngebo Yesus tep, teka teneramipa, weite-du utopu kunup nengda, konum gekepya deiki di, sun dipru kwa dipu. Dipru kwa dipupa, menop taruda, Allah er upu yambul puto di peteremami dinin, ukutaruda, wenemna ati dongopneinge konum gekepya cadi, amutu teka tenena nengdi, pio kika deiprap, kwar dangna pio gum dipapu, Allah er upu puto weika di peteremnunge.

15 Uda, ton neng dingeda, Kristus er upu peteremnung dinin, ne tep dipru wilipneidi, ‘Er upu gekenge nesalada, Paulus er tapra, nun tara kepropsetenge’ tenen, mawa di, Yesus er upu peteremnunge. Yuk neng dingeda, ange utopu gum dinin, mawa di tenena gum, ‘Teleppu kikiman kunkamep’ tenen, kwar-kwar tenena gum di, Yesus Kristus er upu telep kupra peteremnunge. 16 Sundi ne tep, kange derinenung nesalada, bicau tenenenunga deiki di, Kristus er upu dopra, katuai di peteremnunge. Anesalada, sun kaele. Ada, mali nengdi Paulus dopra, wenemna ati dongopi ngeda, tali tep gume. Ada, ‘Allahdi Paulus tep teneamemeutopu, Allah er kai telep upu, nimi lyemna upu peteremna cap, Allah upu yanina nesala tep, “Deiyo ake,” pepra, upu sengna cap tep nengeda, Paulus dopra, wenemna ati dongopye’ tenen, konum kael keami. Kael kepya tep, bicau tenena deiki di, ‘Nimi yumadi Kristus tep kael kepkameng’ tenen, er upu peteremnunge.

17 Ukunung dinin, yuk nengdi ne tep dipru wilipneidi, ‘Paulusda, nun songe,’ tenenenung nesalapuda, ‘Nesala yuma nun tarapu kepsengedi, nun tepapu ila neng tenenkamsenge’ tenen, Kristus er upu peteremnunge. Anengda, tali lupra peteremna gum, sundi, ‘Paulusda rantai tapu di, ateng kouprapidi, wenemna ati dongomipa, akati tupa kure taruda, nundi Kristus upu peterepmepepa, amutu talena deiyo nengdi, Paulus er nong deiki, ikin keca weik ton cap derinkamemenge’ tenen, mawa dipu peteremnunge.

18 Ukunung dinino, ne kangeda, ‘Dakwapye, angeda mambule,’ men tenenune. Ne kangeda, ila mambul ngeda, ada, Kristus er upu peteremnunga pua. Uda, telep kange doupra peterepmenge nge pe, dipru wilipnedi, mawa di peterepmenge nge peda, uda, wareto kupra kunge do yuma, Kristus er upu peteremnunge. Ila mambul kecada apua. Atep, aneng-aneng yumadi, Kristus tep peteremnunga cadi, ne ila di kange deipne. Teka, ukutaru kange deipmantopu, ila di kange deipra tupa kunkamne.

19 Ada tali tep gume. Sundi ne tep, Allah moronerumnge cap, Yesus Kristus er Sambaladi melimnerenge cap deiki di, aikin keca kupnerenge yumada, ne kange dipru wisinerya deiki di, telep kudinkamnera tep, ne kange deipne pepsene. 20 ‘Ukuptene’ tenen, ne pio putanerepa, ‘Tek sisi ukunkamne’ tenen, kange deipra, tupa tenenun kecada, pepkusene.

Ada, ne pepkamne upu cap, ne kunkamne keca yuma cap deiki di, ‘Mali kupneya deiki di, ali men dakamne’ tenen, pio putanerepa tenenune. Ali kuna gum dinin, pumun taru ne kuramsi keca yuma deiki di, Kristus er si ereiamsa utopu, ukutaru peda kwar dangna gum di, balila kupnedi, ‘Ne kunkamne keca yuma deiki di, Kristus er si eremkamne,’ pio tenenune. Ada, ne gam kuna di do, dena di do, adeiki di Kristus er pedi, er si ereipkamre. ‘Ne gam kuna pe, dena peda, telepe pua,’ tenenune.

21 Ada mesum tep men pepsene. Gume, ne kangeda, ne gam kune taru yumada, Kristus er puto kareneredi, er melimnerya deiki di, ne kune keca yuma deiki di, Kristus er sipu eremkamne. Ange utopu, ne depnyopda, Kristus cap, ne cap antapra kikiman kunkamnema cadi, ange peda telepe pua. Ada ne tep tapangdona tep, ‘Ange yumada telepe pua,’ tenenune. 22 Dinino, dena gum, ne nong gam kupra tuai mutu neitamai tupa gam kuramnyopda, telep pel dopnepane, du weik telep kupra moupkamre. Dinino, gam kuna do, dena do, dan nge weptene do? Ne kangeda, dena pe, gam kuna peda, telepe pua cadi, ne ikine kupnerepa, men weptenya tep, tenpungepu men wepra peptene.

23 Ne gam kuna pe, dena peda telepe cadi, ne kange tenimtonapu kunune. Pio ila telep ngeda, ‘Ne deptenepa, tuai mutu tapra, Kristus cap antapra, nun kikiman kunkamteneme’ tenen, putanerure. 24 Dinino, nedi sun tep, ‘Petereptenya deiki di, anesala tupa melimtene’ tenen, tek sisi putanmanerpa, tenenuna tep nengeda, ‘Ne Paulus tupa gam kutenepa, aneng cap kikiman kutepepa, nedi melimsetene. Sun tep nengeda, angeda ila telepnge,’ tenenune.

25 Angeda konum teka tenepsa cadi, sun Filipi mutu nesala melimna tep nengeda, ‘Ne gam kune tarupu, melipsetene,’ konum tenipsa tep, ne cap kikiman kunkamepe. Atep, tek sisi telep ngeda, apua. Ukunkamna deiyoda, ‘Sun teka teneprumnge yumada, sun dipru neitamai wisipra, telep kupbaredi, ila kange deiprap kunkamruma’ tenen, melimsenedi ne cap kikiman tupa kunkamepe. 26 Tonda, wenemna ati pumbon di, loptapnengepa, nedi tamupra, sun Filipi nesala damai yanepa, sun cap, Yesus Kristus cap, dipru dukdongopra, kikiman kumepya deiki di, ila di kange deipra kunkamrume. Atep nengeda, ne cap kikiman tupa kunkamepe, tenepne.

27 Dinino, ataru-ataru yumada, apepmasen utopu do, yuk kupkamserenge do, wareto kupkamser do yuma, ila mambul tenenkamrum kecada pepkusene. Ada, ‘Kristus er kai telep upu, nimi lyemna upu peseretopu, pio moupra gekepmepedi, aupupu telep-telep kupra, dumsisipu kunkamepe,’ tenenkamrume. Ukuprum pangeda, ne diryasetene taru pe, diryakana gum di, gekenapu kusetene taru peda, ne kael kemkamsene. Ada, ‘Sun Filipi mutu nesalada, sun kange dipru cap, sambala cap, amsepu kuprap, pio dimpeprappu kunkamenge’ tenen, kael kepkamsene. Tonda, sun nongda yuk-yuk kurum dinin, tenpu kange doupra, tenpu ngebo utopu keprap, Yesus er kai telep upu pel dona tep, pio pe deipra, palepra kikiman pel donkamrume.

28 Ukupra kunkamrum taru yumada, yuk nengdi, ‘Anengda nun songe’ tenen, yaninapu kunkamsenge. Ukunkamseng dinin, anesala tep, kware pio men kunkamrume. Kware pio men kumumya deiki di, sun yanisenge neng tep, peten kemdinkamrume. Teka tenena gum nengdi kael kepkameng kecada ake. Ada, teka tenenge nesalada, Allahdi lyepra dopropkamre dinino, sun teka tenena gum nesalapuda gume. ‘Uo, Allahdi wenepra poptapkamsere’ tenen, kael kemkamenge. Ada sun mali nengdi kael kepkameng nge tep pepsene. 29 Allahdi sun tep, ‘Teka tenepnetenge’ tenen, bicau teneramseudi, er kange dipapu, go tali karepseupa, teka teneprume.

Ange tep nengeda, sun yuma, tenpu kange doupra, Yesus Kristus er upu tep, pe deipra pel palepra donkamrume. Tonda, go karepseupa, teka tenepruma utopu, Allahdi, ‘Ne nyapuda, Kristus teka tenepmenga deiki di, yuk mali nengdi, sun nong deiki ikin keca weik derinkamenge,’ teneamseutopu, kunkamsenge.

Ange tep nengeda, ‘Yesus er kai telep upu pel dona tep, pio pe deipra, palepra kikiman pel donkamepe,’ pio tenenkamrume. Ange yumada, Yesus pel dopseua deiki di, teneserure. 30 Pumun taru, ne cap kikiman kuramupu taruda, mali nengdi ne nong deiki ikin keca deriramneipa, ikine kuramsada, sun ton epra kael keamnerume. Tonda, ukutaru peda, “Mali nengdi, Paulus tupa yanipmengepa, ikine kurure,” pengepa gekerume. Ange gekerumnya utopu, sun peda utopu, teka tenena gum nengdi, sun Filipi mutu nesala tep, sun nong deiki ikin keca derisenunge. Ukununga cadi, ne kaele, Allahdi, ‘Ne nyapu tep, ukunkamenge’ tenen, konum teneamseue. Ne Paulusdi pepsene.