Philippians 2

“Yesus Kristusdi, dipru bouna di kupra kuramutopu, sun peda kunkamrume,” pepu upu

1Ne kayapu, Kristus cap dipru dukdongopra, kikiman kumumya deiki di, sun ikin kusere taruda, sun kange dipru neitamai dipru kwa dipra, puto weik karerserure. Tonda, Kristusdi sun tep, bicau tenepra melimserya deiki di, sun dipru kwa dimserure. Tonda, Allah er Lek Sambala, sun dipruai kurya deiki di, sun kange dipru tenpu utopu kemdiserepa, bouna di kikiman kurume. Tonda, sun dipru neitamai di, bicau tenedamumdi, dipru dukdongopra kurume. Ukurumdi, bouna di telep kupra melimdarume. 2Teka, ne kaele, apepmasen keca yumada, tek sisi kuruma tep, ne kange mumupra derisenune. Ada, sun kange tenenada, tenpupu douprap, bicau tenedamumdi, sun kange dipru amsepu kuprap, ‘Nun pelda angepu kunkamepe’ tenen, tenpu pelpu tenepra kunkamrume. Ukupmum pangeda, tek sisi ne ila di kange deipkamsene.

3Ware kun keca do yuma, ‘Nepu ereipnetenge’ tenena cap, sal nong-nong kuna cap, gemepra ngangan kuna cap deiki di, pel men donkamrume. Angeda pio gum dinin, sun adipapu dipru boun kuprap, amutara utopu kumumdi, sundi yuk nesala yuma tep, ‘Gume ne kabo erpu ereiptenge. Neda yambul mambul dinin, erpuda ila mambule’ tenen, tenedankamrume. ‘Ila ngeboda ne pua,’ tenena gume. 4Sun yumadi, sun pe putana keca tepapu men tenenkamrume. Sun yuma adipapu yuk nesala yuma tep, ‘Anengda, sun peda mambule cadi, sun putaramre keca ton makunkamne,’ tenedankamrume.

5Yesus Kristus, er kange dipru teneramutopu, angepu tenepra kunkamrume. Erdi teneramngada, pepkusene.
6Yesusda, tek sisi Allah kuretopu kuramu dinino, ‘Allah utopu kununada, men tapkune. Angeda, ne mawa’ tenen, ‘Angepu talepra pio kunkamne,’ men teneramu.
7Ange men teneramu dinin, Allah utopu kuramnga deiyo ngeda, keana taru tep tamudi, tali pel melimna neng utopu kupra daudi, nimi nong cap, urasin cap utopu daudi, tuai mutu kwerepu.
8Nimi nong utopu daudi, dipru boun kupra, amngai kuramudi, er nai Allah er upupu gekepra kuramu. Ukupra dakuramuanen, er naidi teneamemeua utopu, mali nengdi popipa depu. Angeda, tali dena gume. Mali nengdi nimi pon keca pio malingepu wepra, sengdin co deiki deipra, popipa depu. Yesusdi, ‘Telepe dapopnenge,’ tenepke.
9Uteneramudi, ange yuma kupka tep, Allahdi Yesus dopra, akeca-keca yuma deiki tara konum erepra deipke. Erepra deipudi, ila mambul si karepupa, Yesus dopu.
Ware keca do yuma, er amngai tarapu kurure. Ila si dopkada, ‘Akeca-keca yuma talepredi, Ila Deiyo Ngebo kunkamre’ tenen, ila si karepupa dopu. Ware ila si do yuma, asi-asi yuma deiki tara, si pio telepngepu wepra dopu.
10Allahdi Yesus erepra deipupa, pio mambul si dopka deiyoda ake. Ada, im deiki kunge keca cap, tuai mutu yuma kunge nesala cap, tuai amutara kure keca yuma cap peda, uda ware gam kun keca do yuma, sirya taruda, ‘Yesus er si gekepmengedi, gutam tu dipdongopmengedi, er si erepmengepa, nedi ange yuma dopra, Yesus er amngaipu bulupra deipkamne,’ Allahdi teneamu. ‘Ukupkamne’ tenen, Allahdi Yesus erepra deipu.
11Tonda, ware mutu nesala do yuma, nesala ban-ban yuma, Yesus er si gekepmengedi, “Yesus Kristus erda, Ila Nimi Deiyo Ngebo, tek sisi Allah kurure,” pepra, katuai di pepkamenge. Upepkamenga deiki di, nun nai Allah, er si ila di ereipkamenge. ‘Allahda ila mambule,’ tenepkamenge. ‘Ukupkameng’ tenen, Allahdi Yesus erepra deipu.

Ne Paulusdi pepsene.

“Kuru im deiki ikredi, dirin kuramretopu, sun peda dirin nesala kunkamrume,” pepu upu

12– 13Ange tep nengeda, ne kayapu, pumun taru di diprap, adinen aneitam taru yuma, ne upu gekepra, telep kupra kumumnya utopu, pio kunkamrume. Tonda ne cap kikiman kuramupu taru pe, ukutaru nun yuk-yuk kunup taru peda, Allah er upupu gekepra, er upupu talepra dombaramrumtopu, apio kunkamrume. Allahdi, ‘Apel ukupra donkamenge’ tenen, telep-telep kupra teneamseutopu, ‘Akecapu putarepa, apelpu talepra donkamenge’ tenen, sun kange dipru neitamai melipra pel doserure. Ukupra sun dipru neitamai pel doserura cadi, ukupra pel doserya deiki di, sun pedi utopu, yuk-yuk tenepmumdi, ‘Allahdi lyepkamnerada, ila mambule,’ tenen, pio pe deipra, er puto melimserya deiki di, pel donkamrume. Tonda, ‘Ne puto gum ngebodi, mali kupnun’ tenen, kange pio moupkamrume, ne Paulusdi pepsene.

14Sun pel donkamrumnya cap, sun kunkamrumnya yuma cap neitamai di, kange dabal-dabal kuna cap, kange bongtoserepa, mali pena cap, deremdana cap gum dipapu, teleppu pel dopra kunkamrume. 15Ukupra kunkamrumnya deiyoda, pepkusene. Ada ukupmum pangeda, Allah er nyapu keipserepa kumumdi, mali kuna pio men kupmum pangeda, ‘Yuk nengdi, mali upu sun deiki men deipsetenge’ tenen, pepsene. Ukutaru kunge nesalada, pio mali keca talepra, mali kecapu tenepra, mali-mali kunung dinin, ne pepmasentopu dumsisipu kupmum pangeda, yuk neng, sun mali kunge kecada, men sakronkamsere. Im neitamai di kuru ikredi, dirine weik kuramra utopu, sundi Allah er gam kuna upu talepra, peteremna cap, er upu dombana cap kumum dingeda, ukutaru pio mali kunge nesala kan-kan neitamai di, dirin utopu kunkamrume.

16Aupu yuma pepmasentopu, Allah er gam kuna deiyo upu talepra, tek sisi moupra gekemumdi, teleppu kutum pangeda, ‘Ne talipu pel men doramsia tep, nong katuai kupkamre’ tenen, amendada, ne ila di kange deipkamsene. Ada, Kristusdi, nesala ban-ban yuma tep, upu bokredi, wenepra popkamre taruda, ne ila di kange deipkamsene. Ada ne pel doramsinge yumada, nong konum kupkamra tep, pepsene.

17Dinino, ne popnenga peda, telepe pua. Nedi sun yuma tep, telep kangepu doupra kunkamne. Sun peda utopu, ne tep telep kangepu doupra kunkamrume. Uda, ukupmanto upu pepkusene. Allah gispal dona tep, gam keca popra kareramepedi, ‘Pio telep kupkur’ tenen, sirya gawal dangna tep, akeca deiki, anggur telep me dikra deriramepe utopu keca ton pepkusene. Ada sundi Allah teka teneruma deiki di, er pelpu dorumada, Allah tep karepe keca utopu kurure. Mali nengdi popnengopda, ada Allah tep karenup keca deiki dingdongoramep anggur me utopu kurure. Ada, ‘Allah karena keca pio telep kupkur’ tenen, anggur telep me dikra, deriramep ngeda, ada ne popnengopda, ame utopu kuptene. 18Nedi sun yuma tep, telep kangepu doupra, kunkamne. Ada, sundi Allah teka teneruma deiki di, er pelpu dorume. Ange tep nengeda, Allah teka tenerumada konum telep kurur dinino, ‘Pio telep kupkamre’ tenen, gawal dangna tep, ne popnetenga peda, ne cap, sun cap kange deipdatepe.

Timotius cap, Epafroditus cap tep, pepu upu

19Nun Deiyo Ngebo Yesus Kristusdi, ‘Telepe, ukuprume,’ pepnetuopda, nedi, ‘Ukunkamne,’ tenenun keca lap pepkusene. Ada, ‘Timotiusda, sun Filipi nesala, sun mutu menmena dokotepkamsene. Timotius dopra, sun mutu dokotepnepa, erdi sun melipra dakuramreyanen, tamupra ne damai yankamnere.’ Yaredi, “Sun Filipi nesala kuramenge kecada, ake-ake,” pepra, lap pepnerpa gekepnedi, ‘Ne kange deipkamne,’ tenenune. 20Timotiusdi, ‘Sun Filipi nesalada, sun putare keca cap, sun kunkamenge keca yuma cap tep, tek sisi melimkamne’ tenen, putarepa pio tenerure. Timotiusdi sun melimna tep, pio teneseretopu, yuk neng ton men kununge. Er kure utopu neng, ne cap men kunupe, er tenpua. Er Timotiuspu ange utopu tenerure. Yuk neng ton gume.

21Ada mesum tep men pepsene. Sun yuk neng yumada, Yesus Kristus er pel tep, mambul kange doupra, ‘Pel donkamepe,’ men tenenunge. Sun yuk neng yumadi, tali keca, sun pe tenepmenge kecapu tenepra, kununga tep pepsene. 22Sun yuk neng ukunung dinino, Timotius puda, sun kaele, er pel doramnga deiki di, er kure keca konum katuai kupseue. Ada, tenpu telep midi er nai cap, pel telep kupra pel doramre utopu, Timotius cap, ne cap, kikiman pel doramnumu. Ada Allah er kai telep upu, nimi lyemna upu peterembana pel tep pepsene.

23Ange tep nengeda, amutu nengdi ne kupkamneng keca konum katuai kuprepa, kael kepnyopda, adipapu Timotius dopra, sun damai dokotepkamsene. ‘Ukupkamne’ tenen, putanerepa pio tenenuna tep, pepsene. 24Tonda, ne cap, nun Deiyo Ngebo Yesus cap, dipru dukdongopra kunemedi, tenenune. Ada Yesusdi ukupra tenepnetuopda, ne peda sun damai diryankamsene.

25‘Yankamne,’ tenenun dinin, tonda, ne kabo Epafroditusda sun damai tamupra dokotepkamsene. Sundi, ‘Epafroditusda, Paulus putapre keca tep, melipra kunkamre’ tenen, men di ne damai dokotepnerume. Epafroditusda, ne weit utopu kuredi, Yesus er kai telep upu, nimi lyemna upu tep, melipra kikiman pel doramnemu. Tonda, jen talen nengdi, ‘Aneng popkupe,’ tenepmenge neng tep, pio darapra porbisidarameng utopu, Epafroditus cap, ne cap nun kikiman di, pio pe deiprap, puto di Allah upu peterep embaramnemu. Ada, Yesus er upu tep, “Deiyo ake,” pepra, pio moupra jenek peteremamnume.

26Epafroditusdi sun tep, ‘Uo, ne kayapu’ tenen, bicau teneserure. Tonda, yuk nengdi, “Nun kayapu, Epafroditusda pu weik jenmare,” pepra lap peipipa, sun Filipi nesala gekeprume. Yuk nengdi, Epafroditus tep, ‘Pu jepkeu ngeda, Filipi nesala konum gekepye,’ pepipa Epafroditus gekepu. Gekepudi, ‘Uo ne kayapu neng mambul kange doupnenung’ tenen, er peda mambul kange dounmare. Atep Epafroditus dopra, sun damai dokotepkamasene. Ange tenenunada, telepe pua. Ne Paulusdi pepsene.

27Yuk nengdi, “Epafroditus pu weik jenmare,” pepi upuda, ada tali upu gume. Tek sisipu weik jeramupane, depmanto kuramu dinin, Allahdi er tep bicau tenepudi, melipra kwetepu. Tonda ne kangeda, Allahdi, ‘Ne mi Paulus ikin konum kunmar dinin, er kabo Epafroditus depyopda, ikin weik ton cap kupkamre,’ tenepneua cadi, Allahdi Epafroditus kwetepke. Allahdi Epafroditus er kwetepkada, ne tep bicau tenepneua dia. 28Epafroditusdi, ‘Ne pu jepneu ngeda, Filipi nesala gekepya cadi, uo’ tenen, mambul kange dounmare.

Ange tep nengeda, ne kange pio telep tenepnedi, Epafroditus sun mutu dokotepkamsene. Dokotepnepa, sun damai yarepa, antapmumyopda, sun kange deipkamrume. Tonda, erdi melimserepa, sun kange deipmumya deiki di, nedi sun tep, ‘Uo ne kayapu neng telep kunung do, gum do?’ teneramsidi, ikin kwamneu ngeda, kanam kupkamnere.

29Epafroditus yaryopda, sun Yesus cap dukdongopra kumum nesaladi, sun ila kange deiprap, buru kareprap, telepe peprap antamkamrume. Tonda yuma taru yumada, Epafroditus cap, er utopu neng cap tep, gispal donkamrume. Ada mesum tep gume. 30Sundi ne tep men melipmanto kuramneruma cadi, er dokotepnemumpa, ‘Kristus er pelpu dopkun’ tenen, Epafroditusdi ne meliamneua deiki di depmanto kupu. Kristus er pel dona tep, depmanto kupka cadi, ukutaruda erda sun damai yaryopda, er tep, ila kange deiprap, gispal donkamrume. Ne Paulusdi pepsene.