Phili 3 | XteSC | STEP | Uda, ne weit yapu utopu nesalao, Yesus cap dukdongoprap kumumdi, ila di kange deiprap kunkamrume. Pumun taruda, apepkusen upu konum pemsisi dinin, ka di ton cap pepkusenada, ne ikin kuna gume. Tonda, ‘Mankau di mali keca teneprum’ tenen, upu sekrosene. Kange di aupupu gekeprumyopda, aupu moupra melimkamsera cadi, sun melimna tep aupu pepkusene.

Philippians 3

“Nun pe puto deiki di, men telep kudidankamepe,” pepu upu

1 Uda, ne weit yapu utopu nesalao, Yesus cap dukdongoprap kumumdi, ila di kange deiprap kunkamrume. Pumun taruda, apepkusen upu konum pemsisi dinin, ka di ton cap pepkusenada, ne ikin kuna gume. Tonda, ‘Mankau di mali keca teneprum’ tenen, upu sekrosene. Kange di aupupu gekeprumyopda, aupu moupra melimkamsera cadi, sun melimna tep aupu pepkusene.

2 Sun Yahudi yala nesala, mali kungedi, ‘Allahdi kange deipkamser’ tenen, “Nimi den bam bol deiki tarange sengkamrume,” pepra peteremenge nengda, yu pen kamdi pio yu kuprepa, upula dona cap, pangdana cap, mali kurameng utopu, aneng peda mali kununge. Ada, nun upu yanipsengedi, ‘Sun upu gekenge nesalada, nun upupu gekepra nun tara kepropsetenge’ tenen, mali upu pesenunge. Anesalada ukununga cadi, ‘Anengdi nun mali kupra deipsenung’ tenen, memdonkamrume. Anengda ukupra tenenunge. Ada, yuk nengdi, ‘Anesalada mali kun keca tapra, Allah er mawa nesala kununge, tenepkamseng’ tenen, peten kemdin keca tep, nimi den bam bol sengnunge.

3 Dinino, nunpuda tek sisi mali keca tapra, Allah er mawa nesala kunupe. Atep, ‘Sun Yahudi nesalada, mali kupra deipsenung’ tenen, memdonkamrume. Nunda, Allah er Lek Sambaladi, er puto kareserya deiki di, Allah er si eremnupe. Nun kange dipru telep kudina tep nengeda, nun pe puto cap, nun nong kuramepe keca cap deiki di, ‘Teleppu kudidankamepe,’ pio men tenenupe. Ange tenena gum di, ‘Yesus Kristus erda ila mambule’ tenen, ‘Erdi pel dopseua deiki dipapu, telep kudiserure,’ tenen, teka tenenupe. 4 Yuk nengdi, ‘Nun puto cap, nun nong cap kuramepya deiki di, telep kudidankamepe,’ tenenungtopu pio men tenenupe. Dinino, ange utopu teneptepe teptoda, ne peda weika di ton cap teneptene. Yuk nimidi, ‘Nun puto di kuramepe keca deiki di telep kudinkamepe,’ tali teneptenge dinin, sun Yahudi yala nesaladi, ‘Pio mambul kecada ake-ake,’ tenenge kecada, ne peda weika di utopu kuramsi. Atep nukeipkusene.

5 Uda, ne ila yalada, Israel yala nengdi deipneipa, ue ban bari tumi konum kupupa, ne den bam bol deiki tarange seknei. Ne yala sisada, Benyamin yala ngebo kununa cadi, Yahudi yala nengdi, perameng upu cap, kuramenge keca cap, mem keca yuma cap, ne weika di kael kepra kuramsi. Uda, Allahdi, “Ukunkamrume, ange ton men kunkamrume,” peamupa, Musadi sengamu mem upu tep nengeda, sun Farisi nengdi aupupu pio talepra dumsisipu kununga utopu, ne peda weika di telep kupra kuramsi. 6 Nedi akecapu teka teneramsidi, ‘Yuk nesaladi, tali teka tenenge keca, nong men kupkamre keca yuma gum kuptudi, nun tenenup ngepu ila kupkamre’ teneramsi. Uteneramsidi, Yesus kapul teka men tenepsi taruda, Yesus teka konum tenerami nesala tep, sun nong deiki ikin keca weik deriramsi.

Tonda, ‘Allahdi peamupa, Musadi sengamu mem upu talepra, dumsisipu dombapyopda, adeiki dipu Allahdi nun tep, telep neng tenepkamsere’ tenen, Yahudi yala nengdi kunge keca yumada, ne peda talepra dumsisipu kuramsi. Mali kun kecada tenpu pe ton men kuramsi.

7 Ayuma, ukupra kuramsi dinin, ware dumsisi kun keca do yuma, yuk nengdi, ‘Erda pio telep ngebo, tenepnetenge’ tenen, mem pel utopu pel doramsi keca yumada, ukutaru ne kangeda, ‘Ayumada tali keca pua,’ tenen, konum tamsi. Ukununada, ‘Yesus erpu teka tenepnedi, pio talepra kunkamne. Kristusdipu lyepkamnere. Erpuda ila mambule, yuk keca yumada pio gume’ tenen, kunune. 8 Apepmasen upupu gume. Tonda, telep-telep kupra kuramsi keca weik akwapneupane, Yesus teka tenepnedi, ‘Ne deiyo ngebo Yesus Kristus cap dukdongoprap kunkamneme,’ konum tenepne dingeda, ‘Men di tenemsi keca yumada, mali keca utopu kurura tep, dakwapye,’ tenenune. Ada, ne Deiyo Ngebo Yesus Kristus cap, dipru dukdongopra kunada, pio mambul atep pepsene.

Pumun taru di, ne dumsisi kuramsidi, ‘Akeca deiki, Allahdi telep kupra deipkamnere,’ teneramsi dinin, ukutaru ne kangeda, ‘Akeca yumada, bambama, sukulonga donongamenga utopu keca kurure,’ tenenune. Tonda, ‘Lyun keca utopu kurure,’ tenenune. Ukupra tenenuna deiyoda, ‘Ila mambul ngeda, Kristus erpu talepra, er cap dipru dukdongopra kunkamne’ tenen, pepne. 9 Musa sengamu upu talepra dombanedi, dumsisi kunya deiki di, Allahdi, ‘Angeboda telep ngebo kurure,’ men tenenkamnere.

Ange gum dinin, pio putanere ngeda, ada nedi Kristus tep teka tenenuna deiki dipapu, Allahdi, “Erda telep ngebo,” pepra deipkamnere. Angeda konuma. Yuk kun keca deiki di telep men kweipkamnere. Kristus tep, teka tenepmepya deiki dipu, Allahdi, er kange dipapu tali karena utopu, ‘Anengda dumsisi telep neng konum kununge,’ teneseredi, telep kudinkamsere.

10 ‘Uo, ange kuptene’ tenen, pio putanere ngeda, pepkusene. Ada, tek sisi Kristus cap dipru dukdongoprap kunedi, Allahdi Kristus gam bukra deipupa, ukuda Kristus puto weik kuretopu, ‘Ne peda utopu kutene’ tenen, putanerure. Tonda, Yesus er kange mun keca weik kuramnganen, nun mali kuna keca kunumna tep deputopu, ne peda ikine kupnetupane, konum deami nesala utopu kuptene. ‘Konum deami nesala utopu kuptene,’ pepmanada, deami nesaladi, mali kun keca yuma men putarepa, mali men kuramengtopu, ‘Ne peda mali keca men putapnetupa, mali men kupkamne’ tenen, putanerure. Ada Kristusdi, er puto weik karenerura deiki di, ‘Mali keca di ne dipru men gidonkamnere’ tenen, pepne. 11 Ukupra dapio kuramtenepane, sirya taruda, Kristusdi er tep teka tenena nesala yuma, deamengepane, kange di gam bukra deipseredi, im deiki bulupra deipkamseraida, ‘Ne peda dopra, im deikipu deipkamnere’ tenen, ila di putanerure.

“Yesusdi, ‘Paulus ukupkamre,’ tenepneu keca kuna tep, ketenemdinune,” Paulusdi pepu upu

12 Ne kayapu, apepmasen keca yumada, ‘Konuman gawal dakra kupsi’ tenen, men pepsene. Tonda, ‘Neda, pio mali kuna gum, dumsisi ngebo konum kunune’ tenen, men pepsene. Aputanere ngeda, kapul men kupman dinino, Kristusdi ne tep, ‘Angebo cap, ne cap dipru dukdongoprap kunemedi, dumsisipu kupra pio kunkamneme’ tenen, lyepra talepneudi, tupa talenerure. ‘Ukupkamre’ tenen, lyepra talepneutopu, ne pedi, ‘Kristus dukdongopnedi, dumsisipu kunkamne’ tenen, pio pe deipra, er pelpu palepra donune. 13 Ne weit yapu utopu nesalao, Yesus Kristusdi ne tep, ‘Dumsisipu kuprap, ukunkamre,’ tenepneu keca yuma, tek sisi kapul men gawal daksi dinino, tenpu mambul kunun kecada pepkusene. Ada, pumun kuramsi kecada, luprapsidi, ange tupa tenena gum dinin, amenda ne tep kupkamner keca cap, nedi kunkamne keca cap, apu tenepra kunune.

14 Sun sepra ban nengdi, peten kemdinai moupra dinmangedi, ‘Maton keca dopropkup’ tenen, puto di pio pe deipra, sepdaro barameng utopu kunune. Ada, Allahdi, ne tep, ‘Im deiki yaredi, maton utopu keca dopropkamre,’ tenepneudi, upupneue. Upupneudi, Yesus Kristus cap, ne cap dipru dukdongopneua cadi, er cap kikiman kunuma tep, apu tenepra, pio pe deipra, pel donune.

15 Nun kange dipru konum wisipseu nesala yumada, adipapu ne pepmasentopu, tenepra kunkamepe. Ukuprap apu teneramepyanen, ware keca do, tenpu keca peda, sun kange yuk tenepmumyopda, Allahdi akeca tep lepsikra peterepseredi, katuai keipkamsere. 16 Kange yuk tenepmumyopda, katuai lap penkamser dinino, ila mambul ngeda, nun konum kael kepra dumsisipu kunup kecada, ka tamupra tamna gum, akecapu pio talepra dombankamnupe. Kange di ton cap, tali-tali men kunkamnupe.

17 Ne penun upu cap, ne kune keca capda, teka tenepmengedi, domyakaramenge nesala cap, sun Filipi nesala cap, wisiprapmumdi, sun kurameng keca utopu kunkamrume. Tonda, “Ukunkamrume, ukunkamrume,” pepra peterepmupu kecapu, angepu talepra dombaramenge nesalada, moupra epmumdi, sun kuramengetopu, sun Filipi nesala peda utopu kunkamrume. 18 “Nun peterepmupu ngepu talepra, kunkamrume,” pepsene upuda, mesum tep men pepsene. Deiyoda ake. Pumun peramsisitopu, kange di ton cap engeprapnedi, aupu deiyoda ake pepsene. Ada, yuk neng weike, sun mali-mali kuramenga deiki di, ‘Kristus sengdin co deiki popi ngeda, tali kecapu,’ tenepra yanirtamna neng utopu kununge.

19 Anesala dangeda, sirya taruda, Allah ila di wenepra pio ponkamre. Popredi tapkamre. Anengda, sundi, ‘Akecada ila mambule,’ tenenung kecada, sun tali nong deiki putaramre keca cap, sun pe kange deridana keca cap, apua. Sundi mali-mali kupmenge keca deiki di, mali kange doupra, ali kuramtu dinin, amali kunge keca tep nengeda, sal nong-nong kamna cap, gemena cap, kununge. Sun kange dipru yumada, tali tuai keca deikipu derinunga tep pepsene.

20 Sunda ukunung dinin, nunpuda, nun mutu sisada im deiki tara pua. Nun yalada, im deiki neng kupra deipseupa kunupe. Tonda, nundi, nun nimi Lyemna Deiyo Ngeboda, ^{▼▼Lyemna Deiyo Ngebo Alkitab neitamaida, Lyemna Deiyo Ngebo sengnungada, ton taru Allah tenena tep sengnunge. Ton taruda, Yesus tenena tep sengnunge, dinin deiyoda, Yesus er depseua deiki di Allahdi lyemserure. Paulusdi Yesus tep aupu seku. Lap pena nomor 17 dirume.} ‘Dan taru im deiki di tuai mutu kwerepredi, nun dopra dubenkamser do?’ tenen, er tep kange deipra, pio kalekra dinapu kunupe. Doryankamser Lyemna Deiyo Ngeboda, yuk ngebo gume. Ada nun Ila Nimi Deiyo Ngebo, Yesus Kristus er pua.

21 Ware keca do yuma, Yesus er ila puto deiki di, akeca-keca yuma talepra, er amutarapu derirure. Aputo deiki dipapu, nun tali tuai nong tapseredi, nun dopra urasin pio yuknge kweipseredi, er pio telep im deiki nong kuretopu kuprap, ketekeipkamsere. Er pio telep kuretopu, nun peda pio telep kupra deipserepa, pio kunkamepe. Ne Paulusdi, sun Filipi nesala tep, pepsene.