Phili 4 | XteSC | STEP | Ne kayapu. Ne weit yapu utopu nesalao, pio bicau tenesenune. ‘Uo, kange di antaptepe’ tenen, pio tenesenune. Sun yuma tep, ne ila di kange deipsene. Yesusdi menenga keca karepkamnerenge deiyoda, sun tepa. Ada Yesus er kai telep upu peteremamsisipa, sunda teka teneramruma tep, menenga keca karenkamnere. Yesus er ila puto deiki di, nun tali nong dopra, er nong pio telep kuretopu, nun nong im deikingepu ketekeipkamsere. Ange tep nengeda, ne arup pepmasentopu, nun Deiyo Ngebo Yesus dipru dukdongopra kumumdi, dumsisipu kupra, dimpeprappu kunkamrume.

Philippians 4

1 Ne kayapu. Ne weit yapu utopu nesalao, pio bicau tenesenune. ‘Uo, kange di antaptepe’ tenen, pio tenesenune. Sun yuma tep, ne ila di kange deipsene. Yesusdi menenga keca karepkamnerenge deiyoda, sun tepa. Ada Yesus er kai telep upu peteremamsisipa, sunda teka teneramruma tep, menenga keca karenkamnere. Yesus er ila puto deiki di, nun tali nong dopra, er nong pio telep kuretopu, nun nong im deikingepu ketekeipkamsere. Ange tep nengeda, ne arup pepmasentopu, nun Deiyo Ngebo Yesus dipru dukdongopra kumumdi, dumsisipu kupra, dimpeprappu kunkamrume.

2 Uda, yuk upu ton pepkusene. Ada sun butene nerapu Eyodia cap, Sintike capda, Yesus cap dipru dukdongopra kupretengedi, ‘Ukunkamneme’ tenen, ‘Tenpu kangepu doupra, teleppu kunkamrenge’ tenen, pepsene. ‘Ukunkamreruma’ tenen, sun si Eyodia cap, Sintike cap, sun butene tep moropsene. 3 Tonda, asurat dopropkamrem ngebo, ne men tamnemumdi, pel kikimanpu pio doramnemu ngebo, ne kabo kan tep moropkukene. Ada, abutene nerapuda, Allah er kai telep upu, nimi lyemna upu pel dona tep, ne cap, sun capdi pio pe deipra, kikiman pel doramupua tep, kandi sun butene nerapu tep melimkamrume.

Ange utopu, ne kabo Kelemen cap, uda ne cap kikiman pel doramupu nesala yuma cap tep, makunapu kunkamrume. Apepmaken nesala yuma sun sida, Allahdi er buku, bol kopta Pio Gam Kunkameng Nesala tep, si sengamu buku neitamai di konum sekra deipseue. 4 Yesus cap dipru dukdongopra, kange deiprap kunkamrume. Apepsenetopu kange di ton cap pepkusene. Yesus cap dipru dukdongopra, kange deiprap kunkamrume. Kikiman kunkamrum taru yumada, kange deipra kunkamrume. 5 Sun dipru boun kuprap, yuk neng yuma tep bicau tenepra, kikiman telep kumum pangeda, adeiki di yuk neng yuma epsengedi, nun Deiyo Ngebo Yesusdi doryankamser taruda, ‘Konum damai kupmasere’ tenen, katuai kael kepkamsenge.

6 Yesusdi nun doryankamser taruda konum dam kupsera cadi, ware keca do yuma tep, kware kupserepa, ‘Uo, ware kunkamep do?’ tenen, tenimtonapu men kunkamrume. Kware kupserepa, tenimtona men kunkamrum dinin, amenda kupkamser keca neitamai yumada, Allah tep moronkamrume. Ada, Allah tep telepe peprap, sun putapsere keca yumada, katuai lap pepmumdi, Allah pio moronkamrume. 7 Allah pio mororamum pangeda, Allahdi kange telep doupmengedi dakra kuna keca karenkamsere. Kange dimpepra kuna deiyo keca kareserya deiki di, sun cap, Yesus Kristus cap, dipru dukdongopra kunkamrume. Ataru yumada, sun kwar dangna gum dipapu, tali kange doupra teleppu kunkamrume. Allahdi, ‘Kange telep doupkameng’ tenen, dipru dimpepra kuna tep karesere kecada, tali nimi kange dipapu men kael keptepe.

8 Telepe ne kayapu, asurat gawal dangna tep aupu pepkusene. Uda, ware telep keca do yuma, pio tek sisi mambul keca cap, gwalina gum di dumsisi kuna cap, mali keca pio gum mengne keca cap, nimi yumadi, ‘Ange tek sisi telepe,’ tenenge keca cap, apio telep keca yumapuda, tenenapu kunkamrume. Ware keca do yuma, akun keca tep nengeda, ‘Allahdi kange derirure,’ tenenup keca yumada, akecapu tenepra kunkamrume. Mali kun keca yala-yala yumada, men tenenkamrume. 9 Tonda, nedi peteremamsipa, teka tenepra dopropmum keca cap, nedi peamsisi upu cap, nedi telep kuramsipa diramnurum keca cap, ayuma tenepra dombanapu kunkamrume. Apepmasentopu, dumsisipu kuramum pangeda, kange doun keca kareserya Deiyo Ngebo, Allah cap sun kikiman dukdongopra kunkamrume.

Filipi nesaladi, Paulus tep kareami keca tep nengeda, Paulusdi, “Telepe,” pepu upu

10 Ukuda yuk upu ton pepkusene. Yesus cap dipru dukdongopra, kikiman kunedi ne kange deipne. Kange deipne deiyoda, sundi ne tep, ‘Uo, Paulus er putapre keca tep, ware kuprap di makuptepe do,’ teneramnerum dinin, tek sisi melipmanto taru go men kwamnga tep, men meliamnerume. Dinino, ukutaruda kange di ton cap, ‘Paulus makunkamepe,’ tenepneruma tep, ne kange deipsene. 11 “Kange deipsene,” pepmasenada, ‘Akeca-keca putanerya tep, upepnepa, karepkamneng’ tenen, men pepsene. Ange gume. Ware kun taru do yuma, akwapnere ngeda, weiknge do, meteknge do, akwapmanertopu, tali kange doupra kunune. Angeda konum kael keamsi.

12 Ware kun keca do yuma, akwapre keca pio gum kuprepa, pio putanerur taru pe, akwapre keca tupa weik kupnerepa, men putapnere taru peda, ne konum kuramsa tep, konum kael keamsi. Atep tali kange doupra kunune. Ware kun taru do yuma, tali kange douprap, kuna tep tenena deiyo kecada, konum kael keamsi. Jen keca weik akwaprepa, weika di jen taru pe, uda, jen keca gum kupredi, jen pio putapnerpa, mesumpu kune taru peda, konum kael keamsi. 13 Ware kun keca do yuma, Kristus cap dipru dukdongopra kunedi, er puto karenerya deiki di, akeca-keca yuma kuptene.

14 “Ukuptene,” pepsene dinin, ne ikin kupneu taru neitamai, sundi meliamnerumada telepe pua. 15 Angepu gume. Sun Filipi mutu kumum nesalada, sun kaele. Allah er kai telep upu ukupu gekepra teka tenepmum taruda, ‘Yuk mutu ton peterembenkun’ tenen, Makedonia mutu tapra, benkosi taruda, sun Filipi nesala cap, ne cap, nun pe nengpu melimdaramepu. Yuk mutu teka tenemi nesala yuma, tenpu pe men meliamnei. Sun Filipi mutu nesala dipu meliamnerume. 16 Tonda, Tesalonika mutu kuramsi taru, akeca-keca putaramneu taru neitamaida, ne makuna tep, sun Filipi mutu nesaladi ton taru ton, kange di ton taru ton, ne putaramneu keca dokotemamnerume.

17 Apepsen upuda, ada ‘Tupa-tupa karenkamnenge’ tenen, men pepsene. Ange gum dinin, ne kange deipnedi pepmasena deiyoda, sundi melipneruma cadi, amendada, ‘Allahdi maton dona utopu keca karenkamsere, kael kepkurum’ tenena tep pepsene. 18 Sundi dokotepnerumpa, weika di konum dopropsi. Angepu gum dinin, tonda sundi Epafroditus kareprumpa, erdi dopra duyaneu keca konum dopropsa tep, ne putapneu kecapu gum dinin, weika di ton cap dopropsi ngeda, konum mumupra akwapmanere. Nundi Allah karena tep, er kange derirur keca, gam keca popra karepmepedi, nintong telep keca uku dongopmepepa, nintong di Allah kuryai weleramre utopu, sun musum dipu karepnerum kecada, anintong telep keca utopu kurure. Sundi ukuramrumnya tep nengeda, Allahdi kange deriserure.

19 Tonda, nedi er si eremnun Allahda, erdi akeca-keca yuma, mambul keca, pio telep keca weike talepra kurya utopu, sun Yesus Kristus cap dipru dukdongopra, kikiman kumum pangeda, sun putapsere keca yuma pio karenkamsere. 20 Nesala ban-ban yumadi, ‘Nun nai Allah tep, erda ila mambule,’ tenepmengedi, ‘Er si ila di pio eremkameng’ tenen, Allah moronune. Angeda, ‘Tek sisi pio ukunkameng’ tenen, akonuma, Amin pepne.

Yuk neng tep, “Telepe,” pen upu

21 Yesus Kristus teka tenepra, er cap dipru dukdongopra kungedi, sun Filipi mutu dumsisi kupra kunge nesala yuma tep, “Paulusdi telepe pepra, deipmasere,” peipkamnerume. Tonda, Yesus teka tenepra, ne cap kikiman pel donup neng, nun weit yapu utopu nengdi, sun Filipi nesala tep, “Telepe,” pesenunge, peipsene. 22 Tonda, ne akunman mutu kungedi, Yesus teka tenepra dumsisipu kunge nesala yumadi, sun Filipi mutu nesala tep, “Telepe,” pesenunge, peipsene. Tonda, Roma mutu yuma talerya, ila nimi deiyo ngebo, Raja Kaisar ^{▼▼Kaisar – Roma mutu kurami nesala, sun ila deiyo ngebo. Lap pena nomor 41 dirume.}, er pel don neng cap, er ati neng cap kunung dinin, sun kan-kan di Yesus konum teka tenepi nengdi, sun Filipi mutu neng tep, “Telepe,” pesenunge, peipsene.

23 Nun Ila Deiyo Ngebo Yesus Kristus bicau teneseredi, tali melimsere keca kareserepa, sun cap, Kristus cap dipru dukdongopra kumumdi, sun kange dipru neitamai wisipra, pio kunkamsere taru yumada, ‘Sun sambala cap, Yesus cap dipru dukdongopra kunkamrume’ tenen, Allah morosenune ‘Apio ukupra kunkamser’ tenen, akonuma, “Amin,” pepne.

Telepe, ne Paulusdi konum pepsene.

Acapu deipsene.