Pro 1 | XteSC | STEP | Aupuda Israel mutu nesala talepra kuramu ila nimi deiyo ngebo Daud, er mi Raja Salomodi ila kael kemna upu deiki di pepu.

Proverbs 1

Raja Salomodi, ‘Israel nesala yumada ila mambul keca kael kepmengedi, dumsisipu kunkameng’ tenen, pepu upu

1 Aupuda Israel mutu nesala talepra kuramu ila nimi deiyo ngebo Daud, er mi Raja Salomodi ila kael kemna upu deiki di pepu.

2 Apepkusen upu deiyoda ake. Ware nesala do yumadi, tek sisi ila kael kemna keca kael kepnedi, ‘Tek sisi telep kuna ngeda ake,’ tenena cap, tonda nong bol deikingepu gum dinin, mambul upu nong neitamaingepu kael kemna cap tep, aupu yuma pepkusene. Ada, tali lupra kuna gum dinin, ‘Mali kupnup’ tenen, moupra tenengedi, dumsisipu kupra kuna kael kemna tep, aupuda pepkusene.

3 Tonda, apepkusen upu kael kepmumnyopda, tali-tali men kunkamrume. Sundi, ‘E, dumsisi kuna ngeda ake, nimidi kuramengtopu telep kupra upu bongdinada ake.’ Tonda, ‘Ne kabo, tenena gum dipapu, dipru wilimdana gum di, nesala yuma cap kikiman telep kunada ake’ tenen, kael kemkamrume. Apepkusen upu moupra kael kepmumnyopda, sun yumada, tali lupra kuna gum dinin, ‘Mali kupnup’ tenen, moupra tenerumudi, kalengdankamrume. Tonda, ‘Dumsisipu kuna deiyo kecada ake’ tenen, betapra kael kemrumudi, telep kupra kunkamrume.

4 Nimi ton yambul walwal kunge nesaladi, apepkusen upu moupra kael kepmengopda, sun peda ila kael kemna deiyo keca moupra tenenkamenge. Tonda, kaber nesala peda, aupu moupra gekepmengedi, tali-tali men kunkamenge. Ange gum dinin, tali lupra kuna gum di, ‘Mangkau di mali kupnup’ tenen, moupra tenengedi, dumsisipu kunkamenge.

5 Ware nesala do yuma, ila kael kemna deiyo keca konum kael keami nesala peda, aupu gekepmengopda, ila kael kemna deiyo keca ton, tapakra kael kepbankamenge. Ange utopu, nong bol deikingepu gum dinin, nong neitamainge konum kael keami neng peda, aupu gekepmengedi, ‘E, telep ban bisida ake,’ tenepmengedi, dumsisipu kupbankamenge. 6 Apepkusen upu yumada, ila di kael kepmumnyopda, domon upu ikin weiknge cap, ukupmanto upu cap, deiyonge akaptua peda, moupra kael kemkamrume. Tonda, ila kael keami nengdi, domona upu penge upu cap, inipra penge upu capda, ‘E, aupu deiyoda ake’ tenen, ila di kael kemkamrume.

7 Ila mambul upu pepkusen ngeda ake. ‘Ila kael kemna deiyo keca, moupra tenepnedi, teleppu kunkamne’ tenen, putare nesalada, menmena nun nai bo Allah, er si Yahweh ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda lap pena upu nomor 49 dirume.} tep, ‘Erda ila mambul ngebo’ tenen, kware kuprepa, er sipu eremengedi, er amutarapu kununge. Dinino, kange douna gum di, pio walwal kunge nesalada, dumsisi kun keca yuma tep, ‘Nun songe,’ tenenunge. Sundi ila kael kemna deiyo keca cap, tonda tali lupra kuna gum dinin, ‘Mali kupnup’ tenen, moupra tenengedi, dumsisipu kunange tep, ‘Nun songe,’ tenenunge. Ada pio walwalpu kunge nesala tep pepne.

Kaber nesaladi, ‘Moupra gekepmengedi, teleppu kunkameng’ tenen, pepu upu

8 Ne nyapu yumada, sun nai yapudi peteremsenge upu yumada, moupra gekemumdi, talenkamrume. Ange utopu, sun nin yapudi pesenge upu yuma peda, moupra gekemumdi, pio men tamkamrume. Aupu yumada, talepra kunkamrume. 9 Ada sun nai yapu cap, sun nin yapu cap, sundi penge upu moupra gekemumnyopda, pio teleppu kunkamrume. Ukupmantoda, nimidi, urasin pio telep keca dopra, ‘Nun ila nimi deiyo ngebo tep nimi yumadi gudinkamep’ tenen, er giso deiki deriramenge. Ange utopu, nimidi pio kunumna weik keca dopra, rantai tapke utopu keca ketenepra deipmengedi, mambul neng sun kum dam garangamengtopu, sun nai yapu cap, sun nin yapu capdi, pesenge upu yuma tep, moupra gekenkameng nyapuda, pio telep kudinkamsere.

10 Uo, ne mio, mali kun kecapu talepra kunung nengdi, ‘Ami er dipru gidopepa, mali kunkamre’ tenen, kan damai yana namdokenge pangeda, sun upu pio men gekenkamrume. 11 Ukupmantoda, amali kunge nengdi, upenkamkenge.

“Kanda nun melipseo. Kan cap, nun cap nun yumadi, yuk neng tali popra tapembankamepe. Tonda, mali men kupmangedi, mangkau kange doupra daembankameng neng tep, nun inipmapya di, aneng yakangepa potamkamepe.

12 Nimi depmengepa, tu palipmengedi, sun nong yuma dopra atu pumbon dongoramengtopu, tali daembange nesala poptapra tapmepepa, gum kunkamenge. Ukutaruda, sun aneng tupa teleppu kunung dinin, nundi anesala poptapmepepa, tu palipmengopda, denung neng wengbanungaipu bena kunkamenge. 13 Nun adipapu yuk neng sun ati bepedi, co bo kunumna weika di kunumnung ila mambul kecapu, upula dopropkamepe. Yuk neng talenung keca upula dopropmepyopda, nun pe ati tamupra yana derinkamepe. Urasin pio telep keca weika di dopropmepya deiki di, nun ati yana deipmepepa, amenda taru nun ati dekpepkamre.

14 Ukunkamepa tep nengeda, kanda nun melipsemempa, kan cap, nun cap, kikiman upula keca weika di dopdaro, nun ati deipbaramepyane, amenda taru akeca-keca yuma weik kupyopda, nun yumadi kikiman utopu akeca bokra doronkamepe,” pepra, amali kun keca talepra kunge nengdi, kan tep upepra namkamkenge.

15 Uo, ne mio, mali kuna nengdi upepra namkamkeng dinino, kanda sun aneng cap melipra embana pio gume. Sun mali nengdi embankameng bisida, kikiman men embankamrume. Kanda tenpu yan dipapu men embankamrume. Sun anengdi penge upu gekepmemdi, sun cap melipra dombana pio gume. 16 Ada tali tep men pepkene. Deiyoda, sun anengda, ‘Mali kecapu talepra kunkamep’ tenen, menmena di sepdaro mali kun keca tep erbanunge. Ange utopu, sun anengdi, moupra tenena gum dipapu, yuk nesala tep yu kuprepa, portamnunge. Tali kange deipra ati men bungnung dinin, ‘Nimi ton popmepepa’ tenen, sepra erbanunge.

17 Ukupmanto ngeda, pepkukene. Ma weika di bulupra amupmengedi dinmangepapu, nimidi, ‘Ama tomopkupe’ tenen, ma tomon keca katuaipu derinung do? Gume, sun katuai dipapu, ma tomon keca deipmange taru, ma yumadi adeipmange keca konum epmengopda, akeca pumbon men wengnunge. Ada kange douna gum kecada ukunung dinin, sun mali kecapu talepra kunung nesaladi, angetopu kununge. 18 Ada tali tep men pepkene. Amali kunge nengdi, ‘Yuk nesala mangkau kange doupra embangepa, dato-dato di aneng poptapkamepe’ tenen, inimnunge. Dinino, sun amali kunung nengda, sun pe tepapu pena pepra deridanunge. ‘Yuk neng popkupe,’ tenenung dinin, sun pedi sun pe tepapu podidanunge. Angeda, sun pe nengpu tamupra yourure.

19 Ange utopu, ware nesala do yuma, ‘Nun putaserur kecada, yuk neng sun nong popmepedi, sun talenung kecada puto di dalupra upula doronkamepe’ tenen, kunge nesala yumada, amali kun keca kununga deiki di depkamenge. Depkamenga deiyoda, upula donunga deiki di, sun nongpu kunumdanunge.

“Ila kael kemna deiyo keca tep, ‘Nun songe’ tenen, tamna gume,” pepu upu

20 Ukupmanto upu deiki di pepkusene. Ila kael kemna deiyo kecada, ner utopu kurure. Anerda, ila kael keamu ner cadi, nimi embange bisi neitamai di, ila upu deiki di, “Sunda, ‘Kange mun keca nun damai yakankamser’ tenen, sun kange moupso,” perure. Nimi ati arum ila di doramya neitamai, nimi bulupmengepa, ‘Upu penkameng’ tenen, ketenepra deipipa, go kupka neitamai yana tekredi, ila upu deiki di, “Ne upu pepkusen ngeda, sun kange moupra gekepneso,” perure. 21 Tonda, nimi weika di embanung bisi neitamai tekredi, upu ila di perure. Tonda, nimi ati arum doramidi ongopgenepra wiami gel beilya bisi buplan damai yana tekra, ila upu deiki di, “Sun kange moupso,” pepra, awenemna upu perure.

22 Uo, sunda walwal nesalapu kurume. Kange douna gum di, pio walwal deiki dipu kumum keca, pio mali weik kumum keca tepapu, kange deipra kurume. Ware taru ton cap, amali kun keca tep kange deipra kunkamrum do? Sun nyek-nyek pemum nesalada, ware kuprap taru di ton cap, tali kange deipra nyek-nyek tupa penkamrum do? Sun kael kemna deiyo keca tep, ‘Nun songe’ tenen, walwal kange doupra kumum nesalada, ware kuprap taru di ton cap, walwal kun kecapu kurtamkamrum do? Ange utopu, dan taru ne pesene upu tep, moupra gekepmumdi kael kepkamrum do?

23 Nedi sun tep, “Angeda mali kupmarume,” pepra wenemsisi ngeda, men gekemnerume. Nedi, sun tep, “Angeda mali kumum ngeda tapso,” pepra, wenemamsisinge konum gekemnetum teptoda, nedi sun tep bicau tenepra, ila kael keamsa deiki di, ne dipru neitamai tenenun keca yuma lap pemsetenepa, konum kael keamtume. Dinin, ne pesene upu yumada, pio men gekerume.

24 Dinino, nedi sun tep upupsisi taruda, sun yumadi ne tep, ‘Nun songe’ tenen, tamnerume. ‘Anesala melimkamne’ tenen, ne buru bepekra sun tep karepterepsisi dinin, sun yumadi, ‘Nun songe’ tenen, ne tep kaukemamnerume. 25 Nedi sun tep, “Telep kupra kuna ngeda ake, telep kupra ban bisida ake,” pepra lap peramsisi dinin, ne peramsisi upu yuma tep, kaukemnapu kuramrume. Sundi, ‘Anerda wenemna upu peserur ngeda, nun songe’ tenen, yanitamnapu kuramrume.

26 Ne peramsisi upu yuma yanitamnapu kuramneruma tep nengeda, ukutaruda ila ikin keca, sun nong deiki yarepa, kange mun kange doupra kunkamrum taruda, nedi sun tep ‘Dakwapye’ tenen, autunkamsene. Kange mun keca sun damai yaryopda, nedi, “Konum peramsisi dinino, walito ikin kunmasere,” pepnedi, nyek-nyek penkamsene. 27 Ukupmantoda, ila kumanya cap, perenglang pena cap, kulman cap, dato-dato di yakaramretopu, amenda taru ila ikin keca, sun nong deiki yankamsere. Tonda, kumanya puto pung pepra yaredi, menmena buta dopra adipapu dubaramretopu, kange mun keca sun damai yaryopda, nedi autunkamsene. Aikin keca sun damai yarepa, doropmumdi kange mun kange doupra bukmum taruda, dipru pu jeserepa, pio men kupmanto kunkamrume. Ataruda, nedi sun tep, “Gume ne peramsisi upu men gekeramruma menengada, ikin keca doroprume,” pepra, autunkamsene.

28 Amenda taru, ikin keca weik sun damai yaryopda, sundi ne tep, “Uo, nun melipra lyepseo,” pepra moronkamnerum dinino, neda, “Akunmana cadi, melipkusene,” men penkamsene. Sundi moropkamnerum upu tep, gekepnedi tamupra men pepkamsene. Tonda, sundi ne tep, ‘Uo, nunda ila kael kemna deiyo keca putaserura cadi, dopra kael keptepe’ tenen, epra embenkamnerum dinin, pio men epkamnerume.

29 Ada tali tep gume. Deiyoda ake. Sundi, ‘Ila kael kemna deiyo kecada, tali upu cadi, nun songe’ tenen, mangkau kange douamruma, menenga deiki di kupkamrume. Tonda, sun yumadi, ‘Nun nai bo Allah Yahweh, erda ila mambul ngebo’ tenen, er tep kwar men kuramrumdi, er si men eremamrume. Atep nengeda, sun mali kuramruma menenga tep kupkamsere. 30 Nedi sun tep, “Telep kuna ngeda ake, dumsisi bana tep, telep bisida ake,” pepra lap peramsisi dinin, ne peramsisi upu yuma, kaukemnapu kuramrume. Sundi, ‘Aila kael kemna deiyo keca lap pena nerdi, wenemna upu peserur ngeda, nun songe’ tenen, yanitamnapu kuramrume. Atep nengeda, sun mali kuramruma menenga kupkamsere.

31 Ange tep nengeda, sun pedi kuramruma menengada, ikin keca doropkamrume. Tonda sun pedi, ‘Ukupra mali kunkamepe. Mawa di mali kun kecapu talepra kunkamepe’ tenen, mali pelpu doramruma deiki di, menenga doropkamrume. Ange deiyoda tali tep gume. Sun pedi sun pe tepapu, mali kudidarume.

32 Angeda tali tep men pepsene. Telep kun keca yuma tep, moupra men tenengedi, walwal di mali kun kecapu talepra kunkameng nesala yumada, sun pedi mali kunga deiki di, popdana utopu kunkamenge. Sun pedi sun pe tepapu, mali kunga deiki di podankamenge. Ange utopu, sun pio walwalpu kunge nesalada, akeca-keca yuma kael kemna gum di, ‘Ila kael kemna deiyo kecada nun songe. Aupuda tali upu tep, dakwapye’ tenen, kunge nesala yumada, sun walwal di kunga deiki di popdankamenge. Sun mali kunge keca menenga di, sun pe nongpu mali kudidankamenge.

33 Dinino, nedi ila kael kemna deiyo keca tep lap pesene upu, moupra gekenge nesala yumada, pio gam kungedi teleppu kunkamenge. Ada, sundi, ‘Uo, wareto ikin keca di nun damai yarepa, kange mun kange doupra kunkamep do?’ tenena gum dipapu, tali kange deipra, pio teleppu kunkamenge. Anesalada, kware men kunkameng dinin, kange deipmengedi dimpeprappu kunkamenge.