Proverbs 14

1Pio ila kael nerapudi sun kunge kecada, sun pe ati neitamai kunge nesala yuma tep, melimengepa sun talepra pel donge nge yumada teleppu kurure. Dinino, walwalpu kunge nerapu yuma, pel telep kupra men donge nerapuda, mali kun kecapu talepra kungedi, sun gam kunge taru neitamai yumada, sun kikiman kunung nesala yuma cap, sun nyapu yuma cap, sun pe cap yuma tep, sun mali kununga deiki di, anesala yuma tep mali kupra deridanunge.

2Nimi yumada, Allahdi pere upu moupra gekengedi, telep kupra dumsisipu kunge nesalada, sun nai bo Allah Yahweh tep kwar tenengedi, er tepapu gispal dongedi er sipu eremnunge. Dinino, nimi ton dumsisi kupra men kuredi, tali mok upu cap, mawa di pen upu cap tali lupra pertamrur ngeboda, tek sisi Allah tep, ‘Ne songe,’ teneredi, Allah er si tep yaniredi, Allah tep ali dangdirure.

3Nimi ton walwal kange doupra kunge nesaladi, sun pe dipru eremdidanunge. Ukungedi, gemenapu kungedi, mali kun kecapu tenepra penung upu deiki di, yuk nesala gekepmengedi, yu kuprepa mali kange doupra deremdanapu kununge. Yu kuprepa sun mali upu penge neng wenemna tep ponunge. Dinino aneng popmanga deiyoda, sun pepu kurure. Dinino, ware neng do yuma, sundi penge upu yumada, moupra tenipetepmengedi, telep upupu penge nengda, ukununga deiki di tek sisi sun pedi sun pe tepapu melipra kalengdanunge.

4Dan mutu do yuma, nimidi bisam ati domenge dinin, bisam dopra akati pumbon men dongopmengopda, abisam ati urasin teleppu kunkamre. Dinino, bisam men kuramyopda, abisam popredi co bo ton kunupra men doronkamre. Co bo dorona gum tep, er putare keca men kunumkamre. Talipu kunkamre. Dinino, bisam weik peirur ngeboda, er bisam ati yumada, urasin mali kunkamre dinin, abisam dopra kunumkamre taruda, er putare keca yuma kunupredi, teleppu kunkamre. Nimi ton sapi bisam akamre ngeboda, asapi bisam puto di melipra ila wa peprepa, amenda taruda er jen keca nong weik kuprepa kipra jenkamre. Er ila wa pepra kouamya neitamai di, bongoredi nong kupyopda, er putare keca yala-yala yumada, kunupredi teleppu kunkamre.

5Nimi dumsisi kure ngeboda, tek sisipu kuredi, nimi upu lepsisikra bongdina taruda, er asuru di epmaretopu, tek sisi upupu lap perure. Dinino, yuk ngebo ton, yuk nengdi kupmange keca er asuru di men epmarya peda, tali minina upu cap, mok upu cap perur ngeboda, nimi upu lepsisikra bongdina taruda, pio tali upupu pertamrure.

6Nimi ton gemena deiki dipapu kunge nengda, ‘Uo, ila kael kemna deiyo keca ton kael keptenedi, ila kael ngebo kutene’ tenen, putaptua peda, ila kael ngebo tek sisi men kunkamre. Gemena deiki dipu kurura cadi, kael men kepkamre. Dinino, nimi ton akeca-keca keca yuma tep, ‘Deiyo dan do?’ tenen, moupra tenepterepredi, moupra tenerur ngeboda, ila kael kemna deiyo keca weika di ton cap tapakra ila di kael kepbankamre.

7Nimi ton mali kun kecapu talepra, walwal kange doupra kurur ngebo tep, ‘Ne kabo, ne cap kikiman kunkamneme,’ tenepra kuna gume. Tonda sun nerapu yumadi, ato neng tep, ‘E, angebo dopnetupa, kikiman kuteneme,’ tenena pio gume. Ada tali tep gume. Deiyoda, walwal kange doupra, malipu kure ngebodi, tek sisi ila kael kemna keca ton men peteremkamsere. Tonda er kure keca epmumdi, ‘Angeda ne ton kunkamne,’ tenepmumdi kael kepmumnyopda, pio malipu kunkamrume. Atep sun pio walwal kange doupra malipu kunge nesala cap kikiman pio men kunkamrume. Sundi penge upu peda pio men gekenkamrume.

8Nimi ton tek sisi ila kael keami nengda, sun kupkameng keca yuma tep, kapul taru di moupra tenipterepmengedi, bouna di kunung ngeda, tek sisi teleppu kununge. Dinino, walwal kange doupra malipu kunge nengda, sun kupkameng keca yuma kapul taru di moupra men tenimterenunge. ‘Angeda telep do, angeda mali do?’ tenena gum dipapu, tali lupra kupbangedi, telep men kununga cadi, sun mali kunge keca yuma deiki di, sun pedi sun pe tepapu, mok pedidangedi, mali kudidanunge. Walwal kange doupra mali kecapu kure ngeboda, mok kecapu talepra kunkamre.

9Ware neng do yuma, Allahdi, “Ukunkamrume, angeda pio men kunkamrume,” pepra deiamseu upu tep, ‘Nun songe,’ tenengedi, walwal kange doupra kunge nengda, malipu kununge. Sundi mali kunge keca yuma tep nengeda, ka di tamupra moupra men tenenunge. Anengda mali kupmengedi, ‘Akonum malipu kunup dinin, yuk neng sun gekenai ‘Nun mali kunmape,’ pepra katuai di pepmepedi, pio men tamkamepe. Tonda, nundi yuk neng tep, mali kupmepu ngeda, ange peda dakwapye. Lepsisikra dopmepedi, ka di tamupra telep men kweipkamepe. Ange peda dakwapye,’ pepra tali tamdongonunge.

Dinino, telep kupra kungedi, Allah er upu moupra gekepmengedi, teleppu kunge nesalada, moupra tenipetepmengedi, ‘Ware kupra kunkamep do? Ware kuptepya deiki di, yuk neng cap kikiman telep kupra kutepedi, kange deipra kunkamep do?’ tenen, tupa-tupa telep kecapu kununge. Ange utopu kunge nengdi, yuk nesala yuma tep, telep kun kecapu kudinkamenge.

10Ware neng do yuma, sun kange mun kun keca kupmarepa, sun dipru tenimtonapu kunmange nengda, sun pepu sun dipru neitamai kure keca tep kael kemdanunge. Yuk neng yumadi ton, ange pio men kael kemnunge. Ange utopu, ware neng do yuma, dipru telep deiki di kange deipra kunge nengda, sun pepu sun dipru neitamai kure keca tep kael kemdanunge. Tek sisi yuk neng ton men kael kemnunge. Ikin kange doupra kunge neng pe, kange deipra teleppu kunge neng peda, sun tenenmange nge yumada, sun pe dipru neitamaipu kurure. Yuk neng ton men teneptenge.

11Ton nengda, telep kupra kuna gum di, mali kun kecapu talepra kupbangedi, isomka neng konum kungedi, urasin pio telep ati dopmengedi, akati pumbon kunkameng dinino, amenda taru akati cap, anengdi kunge mali keca yuma capda, tek sisi gum kupkamre. Dinino, ton nengda, pio dumsisipu kupbangedi, tali opkal bol di ke dodin ati pumbonpu kunung dinin, sun cap, sun nerapu cap, sundi derikameng nyapu yuma cap, pio teleppu kupbankamenge. Anesalada tali kankan kunge nesala kunung dinin, sun men gum kupkamenge.

12Uda sun nimi yumadi utenenunge. ‘Gume, nun kunup keca cap, embanup bisi capda, dumsisi bisipu embanupe,’ tenepra embanunge. Dinino, tuai nesaladi mali kecapu talepra kunung nesalada, dena damai bisipu embanunge. Gwalin bisipu kurura cadi, sun abisipu embanunga deiki di, sirya tarada, uku jen ban bisi, derbana damaipu banunge.

13Nimi ton telep kupra kunmange taruda, kange deipra autupra kunmangepane, amenda taru ikin keca ton sun damai yaryopda, ka di tamupra engenapu kunkamenge. Ange utopu, kunge nengda, ila ikin keca ton sun damai akaptua peda, sun dipru neitamai telep keca ton tenepmengopda, kange deipra kununge.

14Nimi-nimi yumadi, Allah tep kware tenepra men kunung nesalada, Allahda tapmengedi, mali kecapu talepra kunung dinino, amenda sirya taruda, Allahdi anesala yuma tep, ila di wenepra poptapkamre. Sun mali kuramengtopu, wenemna keca karepkamre. Ange utopu, Allahdi, “Ukunkamrume, angeda pio men kunkamrume,” pepra deiamseu upu, moupra talepmengedi, dumsisi kun kecapu talepra kuramenge nesalada, amenda taruda, Allahdi anesala tep, menenga keca yamupra karenkamre. Telep keca weika di dopropmengopda, telep kupra pio gampu kunkamenge.

15Walwal kecapu tenepra kunung nesala yumada, yuk nengdi tali upu pertamengepa, moupra tenena gum di, apenmange upu yuma tali lupra teka tenepra gekenapu kununge. Dinino, dumsisipu kupra kuramenge nesalada, kange pio moupra tenepmengedi, ‘Ange kupkamne do, gum do? Ange konum kupnyopda, amenda taru, ware keca ne damai yakankamner do?’ tenen, moupra kununge. Anesalada, moupra tenena gum di, tali lupra mali kun keca pio men kununge.

16Ila di kael kemnung nengda, Allah tepapu kware tenepra kungedi, tupa-tupa er sipu eremengedi, mali kun keca cap, mali kunge neng cap kunungai yuma tapra, telep kun kecapu kunkamenge. Sundi, ‘Mali kupnup’ tenen, mali kun keca cap, mali kunge neng cap kunungai yuma, pio beimdonunge. Dinino, nimi ton walwalpu kurur ngeboda, moupra tenipterepredi upu men perura cadi, ‘Yuk taruda, ware kupkamner do?’ men tenerure. Balilapu kurura tep, er dipru neitamai menmena yu weleprepa, yuk neng tep, ila di deremredi, sun tep mali kudirure.

17Nimi ton menmena yu kecapu beleprepa, tupa-tupa yuk neng tep deremnapu kurur ngeboda, mali kun kecapu talepredi, tek sisi mali kun keca cap, walwal kun keca cappu, kunkamre. Ange utopu, erdi yuk neng tep, dina di mok upu pertamrur ngebo kurura tep, yuk neng yumadi, ‘Angeboda, nun songe,’ tenenunge.

18Nimi ton, ange yuma moupra tenengedi, men kunge nengda, sun kun keca yumada walwal dipu kupbankamenge. Dinino, pio dumsisi kupra kun kecapu talepra kuramre ngeboda, ila kael kemna deiyo keca yuma, weika di tapakra kael kepbankamre. Ukunkamra tep, amenda taruda, yuk neng epmengedi, ‘E, angebo tek sisi ila kael ngebo kurure,’ tenepmengedi, er tep gispal donkamenge.

19Amenda sirya taruda, mali kun ngebodi, telep kupra dumsisi kure ngebo, er damai yaryopda, er giso genepdongopredi, angebo tep gispal donkamre. Ange utopu, nimi yuk neng yuma tep tupa-tupa derepra, mali kudirur ngeboda, telep kupra kunge nesala, sun ati buplan damai bena bukredi, giso genepdongopra bungberedi, aneng tep gispal donkamre. Ange yumada, Allah er upu neitamai di peramseutopu kupkamre.

20Kan-kan kunge nesala yuma tep nengeda, sun kayapu kikiman meneng damai kunge nesala yumadi, ‘Anesalada ne kayapu sisa’ tenen, “Nun ati wekso. Kikiman jen jepmepedi, upu talenkamepe,” pepra men namdongonunge. Ange gum dinin, kankan kunge nesala sun meneng damai kunge nesaladi, “Sunda nun songe tep, nun damai di bendopso. Nun damai kuna gume,” pepra tamnunge. Dinino, isomka neng tep nengeda, akeca-keca yuma weik talenunga cadi, yuk neng yumadi, ‘Uo, aneng cap antapmepedi, kikiman upu sisikmepepa, nun kayapu neng kupsetenge’ tenen, kange deipra sun ati damai yakanunge.

21Ware nesala do yuma, sun meneng damai kunge nesala yuma tep, ‘Nun songe,’ tenepra tamnung nesalada, tek sisi pio mali kununge. Utenenunga deiki di mali kudidanunge. Dinino, ware neng do yuma, sun kange dipru yuma tali kankan kunge nesala tep, bicau tenepra, kange deipmengedi, telep kupra melimnung nengda, Allahdi anesala tep weika di melimredi, telep kudinkamre. Ukupyopda, anesala sun kunkameng keca yumada, teleppu kunkamre.

22Ware ngebo do yuma, telep kun keca yumada tamredi, ‘Mali kun kecapu talepra kutene,’ teneredi kure ngeboda, Allahdi angebo tep pio tapkamre. Dinino, ware neng do yuma, sundi, ‘Uo, ware telep kun kecapu taleptepedi, teleppu kunkamep do?’ tenen, kunge nesalada, yuk nesala yumadi sun tep, ‘E, anengda, pio telep neng kununge,’ tenepmengedi, aneng tep kange deipmengedi, bicau tenenkamenge. Bicau tenengedi, aneng tep pio melimnapu kunkamenge. Ange utopu, Allah erdi anesala tep pio kange deipredi, telep kupra melimbanapu kunkamre. Ataru neitamai pe, amenda sirya taru peda, Allahdi sun telep kunge nesala tep pio men tamkamre.

23Ware nesala do yuma, pel puto di pe deipra doramenge nesalada, tek sisi yuk taru jen keca nong weik kuprepa, kipra weika di kipra jenkamenge. Sunda teleppu kupbankamenge. Dinino, ware nesala do yuma, pel puto di men doramengedi, upupu tali-tali pertamnung nesalada, tek sisi sunda tali kan-kanpu kunkamenge. Deiyoda, pel tenpunge peda puto di men donunga tepa.

24Ila kael keami neng sundi ila kael kemna deiki di pel telep kupra dopbaramenganen, amenda doronkameng kecada pio weik kunkamra tep, yuk neng yumadi sun tep kange deipra gispal donkamenge. Dinino, walwal di malipu kunung nengda, ‘Uo, pio piripra telep kutepya deiki di, nun bung keca weik kupsetu,’ tenenung dinin, tek sisi nong men kunkamre. Walwal kange doupra kununga cadi, talipu kunkamenge. Atep nengeda, nimi yumadi awalwal kunge nesala kunkameng keca tep, moupra kael kemengedi, ‘Nun peda utopu kupserur’ tenen, beimdonkamenge.

25Nimi upu lepsisikra bongdin taruda, nimi tenpu ngebodi pio telep dumsisi upu doupra perura deiki di, yuk neng tep lyemdirure. Dinino, nimi upu lepsisikra bongdin taruda, ware ngebo do, dumsisi kuna gum di, mok upupu perur ngeboda, erdi amok upu cap, minina upu cap perura deiki di, er kayapu neng sisa yuma tep mali kudirure. Angeda pio mali kurure.

26Ware neng do yuma, sun nai bo Allah Yahweh tep, kwar tenepra kungedi, er sipu eremenge nesalada, dimpepra teleppu kunkamenge. Tonda, Allah Yahwehdi anesala tep, pio melipra kalengkamre. Ange utopu, aneng sun nyapsilip yumada, Allahdi melipra kalengredi, akeca-keca yuma yamupra sun tep karenkamre.

27Ware nesala do yuma, sundi Allah Yahweh tep kware tenepra, kange deipra er sipu eremengedi, er tep gispal donge nesala yumada, sunda pio gam kuna deiyo kecapu talepra kunkamenge. Ukupmanto ngeda, pio telep yo me bungna jepmengepa telep kuramretopu kununge. Sun yumada teleppu kupbankamenge. Allah Yahweh tepapu tupa kware tenepra kupbangedi, er sipu pio tep eremengopda, Allah er dipapu sun tep, kange deipra melimkamra cadi, anesala sun damaida, kange mun keca cap, dena deiyo keca cap, ton men kunkamre. Allahdi sun tep melipra pio kalengkamra tepa.

28Ila nimi deiyo ngebo Rajadi, er talere nesala yumada, nyapu weik deipdanen bangedi, sun kunge keca yuma weik kupbanga deiki di, pel telep kupra dopbangepa, yuk mutu nesala yuma epmengedi, “Uo, amutu talepra ila nimi deiyo ngeboda, pio telepe. Erdi talere nesala cap, er talere mutu yuma capda, pio telepe,” pepra, er tep gispal donkamenge.

Dinino, yuk ila nimi deiyo ngebo Raja, erdi talere nesala yuma depra, gum kuna cap, yuk mutu bura saka badona cap, kupkamenge. Ukupmengepa, yuk mutu nesala epmengedi, “Uo, aila nimi deiyo ngebo Rajada, er puto cap, er kun keca yuma cap gum kurura cadi, er amutara kunge nesala yumada, malipu kupbanunge. Deiyoda er dia,” penkamenge. Tonda, “Aila nimi deiyo ngebo Raja, erdi talerur keca cap, nesala cap, gum kupbankamengtopu, er peda gum kupkamre,” penkamenge.

29Ila kael keami nengdi, sun upu pepkunge dingeda, ‘Nun kayapu neng tep, ila upu di pendenkapmepedi, derepnup’ tenen, kapul penkunge taruda, sun pe sipyal moupra kalekdangedi, upu bouna dipu penunge. Dinino, walwal kange doupra malipu kunge nengda, ange utopu men kununge. Sunda, upu kapul penkunge taru, moupra tenena gum di, upu tali-talipu pertamenga deiki di, menmena yu weleprepa, sun kayapu neng tep, deremna cap, mali kudina cap, kununge.

30Nimi ton, dipru telep kupra kungedi, dimpeprappu kunge nengda, sun nong yuma peda, teleppu kungedi kange deipra gam kunkameng taruda, go weik kupkamre. Dinino, nimi ton tupa-tupa dipru tulum kurepa, sun kayapu neng tep, ‘Uo, sun talenge kecada, nedipu taleptene’ tenen, deremnung nengda, sun pedipapu podidanunga cadi, menmena denkamenge. Ukupmantoda, nimidi jen keca taliyai deipmangepa, menmena lyuramretopu, aneng sun dipru mali kupbarepa, menmena denkamenge.

31Ware ngebo do, tali kankan kunge nesala tep, sun nong deiki ikin keca weika di derirur ngeboda, akankan kunge nesala ketekepra deiamu deiyo ngebo, Allah tep, ‘Ne songe,’ tenena utopu kuredi, Allah tep yanirure. Dinino, ware ngebo do yuma, puto boun tep kange mun kange doupra kungedi, tali kankan kunge nesala tep, bicau teneredi, telep kupra melimrur ngeboda, akankan kunge nesala ketekepra deiamnga deiyo ngebo Allah tepapu, gispal dorure. Allahdi angebo tep kange derinkamre.

32Mali kun keca yala-yala yuma talepra kunung nesalada, sun pe meneng mali kunge keca deiki dipapu talepra deipredi podirure. Allahdi angebo er mali kurur keca kunumna tep, ila di wenepra poptapredi, gawal dakamre. Dinino, nimi ton tupa-tupa mali kun keca men kungedi, Allah er pere upu gekepra, talengedi angepu moupra dombanung nesalada, depkameng dinin, Allah sun damai akuredi, tupa-tupa melimrepa teleppu kunkamenge. Deiyoda, sundi telep kun kecapu kunung nesala tepa.

33Nimi-nimi yumadi ila kael kemna deiyo kecapu konum kael keami nengda, sun dipru neitamai ila kael kemna keca cap, telep kun keca cappu tenenunga tep, sun teleppu kunkamenge. Dinino, nimi yumadi, pio walwal kange doupra kunge nesala kan-kan di, sun kunge keca kapul kupmange taru di, ‘Angeda telep do, angeda malinge do?’ tenena gum dipapu, tali lupra malingepu kununge. Sunda moupra pio men tenenunge.

Atep, sun mali kun kecapu tupa-tupa kupbanung neng kan-kan di, tenpu ngebo peda ila kael kemna deiyo keca men kael kemnunge. Tonda, telep kun keca ton pio men tenimterengedi, ‘Ila mambul keca, er deiyo ngeda dan do?’ tenen, pio men tenimpetenunge. Walwal kangepu doupra kununge.

34Ware mutu do yuma, ila pala mutu talepra kungai yumada, amutu neitamai kunge nesala yumadi tupa-tupa Allah er upu peretopu gekengedi, aupupu talepra telep kupra kungopda, yuk pala mutu talepra kunge nesala yuma epmengedi, upenkamenge. “Uo, amutu nesalada pio teleppu kununge,” pepra gispal donkamenge.

Dinino, ware pala mutu do yumada, amutu neitamai kure ila nimi deiyo ngebo Raja cap, er amutara kunge nesala yuma capdi, pio malipu kupbangopda, yuk pala mutu nesala yuma epmengedi, upenkamenge. “Uo, amutu nesalada, telep kupra men kungedi, tupa malipu kununge,” pepra mali upu penkamenga deiki di, amali kunge mutu nesala yuma, sun si mali pepra deipmengepa, ali weik dangkamenge.

35Ila nimi deiyo ngebo Rajadi, er amutara telep kange douamengedi, er pel doramenge neng tep, kange deipredi, ‘Anengda telepe,’ tenerure. Dinino, er amutara pel melimna neng tep, “Apel donkamnerume,” pepra, pel kareramrenge men doramengopda, adeiki di, sun ila nimi deiyo ngebo Raja tep ali kudinunge. Ukupmengopda, aRaja ngebodi, er amutara neng yuma tep, pio yu kuprepa, ila di wenemrure.