Pro 15 | XteSC | STEP | Nimi ton yu tenepra mali upu di upu pepra pangdange taruda, sun upu tamupra pepkumumnyopda, bouna dipu tapnenbamumdi, telep upupu tenepra penkamrume. Er tep tamupra pepkumumnyopda, deremna deiki di pio men penkamrume. Dipru bouna di tamupra pepmum pangeda, tulum kupmare ngebo peda telep kange dounkamre. Dinino, deremdanmange taru di tupa yu upupu tamupra pedamumnyopda, utopu yu upu pepdanen bamumpa, angepu weik kupbankamsere. Ada, menmena di gonga kepra yu penmare ngebo cap, tapakra penmare ngebo cap, yuk neng yuma peda gekenmamumdi, melipra deremdanapu kunkamrume. ‘Ukupserur’ tenen, nimi deremdan taruda, dipru bouna dipu telep upu penkamrume.

Proverbs 15

Ton nesaladi yuk nesala tep penge upu tep pepu

1 Nimi ton yu tenepra mali upu di upu pepra pangdange taruda, sun upu tamupra pepkumumnyopda, bouna dipu tapnenbamumdi, telep upupu tenepra penkamrume. Er tep tamupra pepkumumnyopda, deremna deiki di pio men penkamrume. Dipru bouna di tamupra pepmum pangeda, tulum kupmare ngebo peda telep kange dounkamre. Dinino, deremdanmange taru di tupa yu upupu tamupra pedamumnyopda, utopu yu upu pepdanen bamumpa, angepu weik kupbankamsere. Ada, menmena di gonga kepra yu penmare ngebo cap, tapakra penmare ngebo cap, yuk neng yuma peda gekenmamumdi, melipra deremdanapu kunkamrume. ‘Ukupserur’ tenen, nimi deremdan taruda, dipru bouna dipu telep upu penkamrume.

2 Nimi ton ila kael kemrur ngebodi perur upuda, nimi yumadi kange deipra gekepmengedi, ‘Uo, angebodi peserur upuda, pio telepe,’ tenengedi sun dipru gidorepa, sun peda, ‘Uo, nun peda akeca kael keptepe’ tenen, putarepa, ila di tapakra kael kepkamenge. Ila kael deiki di perur ngebo tep, yuk nesala yumadi er tep gispal donkamenge. Dinino, nimi ton walwal kange doupra kure ngebodi perur upuda, moupra men tenenmarya deiki di tali upupu perure. Erda, upu lyoma di perya deiki di mali upu weik penkamre. Ato ngeboda tali upu weik pertamrure.

3 Allah Yahweh erda, mutu-mutu yuma tupa-tupa dirura cadi, ware kun keca do yuma, mali kun keca pe, telep kun keca pe yumada, akeca yuma diredi kael kemserure. Tonda nimi kange neitamai tenepe keca yuma peda, epra kael kemserure. Telep kupra kunge nesala pe, mali kupra kunge nesala yuma peda, er dipapu sun damai akuredi, tupa-tupa pio diserure. Allah tep, tenpu keca peda men iniptepe.

4 Nimidi yuk neng tep, upu pepkunge taruda, bouna di tenipterepmengedi, telep upupu penkamenge. Ukupmenga deiki di yuk nesala sun kange telep kudinkamenge. Ukupmantoda pio telep co du mouprepa nimidi dakra karepmengepa jepmengedi, gam kuramengtopu kunkamre. Sun yumadi telep upu gekepmengedi, sun dipru puto kepra melimdangedi kunkamenge. Ukunkameng dinino, yuk nengdi yuk nesala tep tenena gum di, tali mok upu pertamnunge. Amok upu petamenga deiki di, mali kange doupmengedi, tek sisi aneng sun dipru gam kuna ngeda boun kupra derinunge.

5 Walwal kange doupra kunge nengda, sun nai yapudi wenemna upu cap, lepsisikra peteremna upu cap pengenge gekepmengedi, moupra men dombanunge. Yanitamnapu kununge. Dinino, nimi ton sun nai yapu do, yuk neng do, sundi pepmenge wenemna upu cap, lepsisikra peteremna upu cap moupra gekenung nengda, pio ila kael neng kunkamenge.

6 Nimi ton Allah upu moupra gekeredi, Allahdi peretopu kupra dumsisipu kure ngeboda, teleppu kunkamre. Ukupmanto ngeda ake. Nimidi sun ati bung keca weik deiamengepa weik kuramretopu, Allah upu moupra gekere ngeboda, isomka ngebo utopu kunkamre. Dinino, mali kecapu kurur ngebodi, ‘Bung keca weika di tapakra dopropnedi, deipnepa weik kupkamnere,’ tenerur dinin, er mali kurya deiki di, er cap, er nyapsilip cap sun damaida tumi-tumi yuma kange mun kecapu yakankamre.

7 Nimi ton ila kael kemna deiki di upu perur ngeboda, pio telep upupu perura cadi, ware nesala do yuma, er perur upu gekengedi, sun peda moupra kael kemnunge. Dinino, walwal kange doupra kunge nengda, sun kange dipru tenenung ngeda ange utopu men tenenunge. Walwal kupra kungepu tenengedi, tali kecapu pertamnunga cadi, ware nesala do yuma, sun penge upu gekengedi, sun peda walwal nengpu kunkamenge. Ukunga deiki di, yuk neng yuma tep, tapakra pio walwal kupra derinunge.

8 Allah Yahweh erda, mali kun nesaladi er tep, morona cap, ‘Nun mali kun keca daepseredi, kaukemkamser’ tenen, telep keca weika di karena cap, kunung keca yumada, er kange deipra men doronkamre. Allahdi aneng tep yu tenerure. Dinino, nimi ton Allahdi, “Ukunkamrume, angeda pio men kunkamrume,” pepra peseretopu gekepmengedi moupra kunge nesala yumada, er kange derirure. Sundi Allah tep karena keca pio telepnge men kwapmarya peda, sun anesaladi moropmenge ngeda, Allah gekepra dopropredi, sun tep kange derirure.

9 Nimi ton Allah Yahweh er kuretopu tenepra men kungedi, mali kun kecapu talepra kupbanung nengda, Allah Yahwehdi, ‘Ne songe,’ teneredi, aneng tep pio yu tenerure. Dinino, nimi ton, ‘Allah er kuretopu kutene’ tenen, pio pe deipra kael kemrur ngeboda, Allah erdi, ‘Ukupra kunkamenge,’ teneretopu kure ngebo tep nengeda, pio kange derirure. Atopu kunge nengda, Allahdi pio bicau tenerure.

10 Nimi ton mali kun kecapu kuredi, Allahdi, “Telep kun bisipu dombankamrume,” pepra peteremredi, “Angeda kunkamrume, angeda, pio men kunkamrume,” pepra pediserur upu moupra men gekenung nengda, amenda taru Allahdi sun damai ila kange mun wenemna keca karenkamre. Ange utopu, ware nesala do yuma, sun deiyo nengdi, “Moupra kunkamrume,” pepra penung upu men gekenung nesalada, amenda taru, Allahdi wenepra poprepa depkamenge.

11 Allah Yahwehda, akeca-keca yuma er konum kaele. Mali kupra kunung nesala depmengedi wengbankamengai kure keca yuma konum sikke buktapra gawal dangami keca pe, amenda taru gawal dangkameng keca peda, er konum kael kemrure. Ange tep ngeda tek sisi pepsene. Akeca-keca yuma konum kael keamnga cadi, nimi tuai mutu kunge neng yumadi mali kupra kungedi, sun dipru neitamai inimenge keca yumada tenpunge peda, Allah tep men iniptenge. Allah er dipapu akeca yuma konum kael kemrura cadi, ange yumada direpa katuaipu kurure.

12 Nimi ton, yuk neng cap, Allah er upu cap tep, ‘Ne songe,’ tenepra, mali upu perur ngeboda, yuk kael nengdi er tep, “Ukuna gume,” pepra lepsisingna upu pememenge taruda, angebodi sun kael neng tep yu tenerure. Ange utopu, ware ngebo do yuma, yuk nesala tep tali yap-yap pepredi, nyek-nyek perur ngebodi, yuk kael keami neng tep, “Sun ton melipra peterepneso,” pepra pio men moropkamre. Gume, sun pe kange erepdange nengdi, sun pe tep, ‘Nunda ila kael neng konum kunupe,’ tenenunge. Pio gemenapu kunung nesala cadi, sun pe kange neitamai tenenge kecapu talepra kunkamenge. Tonda, ‘Yuk nengdi penung upu yumada, nun dabale,’ tenenunge.

13 Nimi ton er dipru neitamai di kange deipre ngeboda, er urasin yuma yang-yang peredi kange deipra kurure. Dinino, kange mun kange doupra kure ngeboda, er dipru cap, er kange tenenange cap, pio ikin weik kurura cadi, ‘Uo’ tenen, puto bounpu kuredi, kange deipra men kunkamre. Ikinpu kunkamre.

14 Ukupmantoda, nimi ton telep kupra kure ngeboda, jen putankamre taruda, telep jen kecapu dopra jenkamre. Ukunkamre dinino, nimi ton er dipru neitamai pio walwalpu kure ngeboda, jen keca bambama doramengepa, lyuramre keca akapya peda, amali kecapu dopra jenkamre. Ange utopu, nimi ton ‘Kael kemna deiyo keca ila di kael keptene,’ tenepra, kael kemna deiyo keca tep erure. Angeboda tek sisi erdi tenepra eretopu weika di ton cap tapakra kael kepbankamre. Dinino, sun dipru cap, kange tenenange cap walwalpu kunge nengda, ‘Tali-tali upupu pepsetengepa gekeptepe’ tenen, putarepa aupu tepapu epra domembanunge. Ato nengda, pio walwalpu kunkamenge.

15 Nimi ton kan-kanpu kuramenge neng tep, yuk nengdi ikin keca weik sun nong deiki dopra derinunga cadi, sun anesala gam kunkameng taru, tumi-tumi yumada, ‘Uo, ware keca kuptepe do?’ tenen, putarepa ikin kangepu doupra kunkamenge. Ikin keca neitamaipu kunkamenge. Dinino, yuk nesala yumada, telep kange doupra kungedi pio yuk tenenunge. Sunda, ‘Gume, nun gam kunup taru yumada, pio teleppu kunupe,’ tenepra kange deipra pingpinga di kununge. Ukupmantoda, sun ila kailya jepkunga tep, kange deriramengtopu, kunkamenge.

16 Sun talepra kun keca yambulanunpu akapmar dinin, sundi, ‘Gume nun nai bo Allah Yahweh, er dipapu karenurure,’ tenepra tupa-tupa Allah tepapu kware tenepra kungedi, er tep kange deipra gispal donunge. Sun ukunge nesalada, pio teleppu kunkamenge. Dinino, yuk nengdi akeca-keca yuma kunupmengedi, bung keca weika di bulupra derinung dinin, kange deipra men kununge.

Anesalada, sundi tupa-tupa yuk neng tep deremnapu kununge. Ukunung taruda, sundi yuk nesala cap kikiman dukdongopra tenpu kange doupra pio men kunkamenge. Anesala sun putare ngeda, ‘Pio pedanapu kutepe,’ tenepra kunkamenge. Sun bung keca weik akaptua peda, sun dipru neitamaida, mali kange doupra kununge.

17 Pio telep ngeda, nimi ton tenpu lungna keca deiki malilya lukra deipdangedi, mokon jepmenga deiki di, ‘Pio telepe, ne kabo sisa, nun kikiman kunume,’ tenepra kununge. Dinino, yuk neng dingeda, bisam popra ila kailya kalepmengedi, jepmenga deiki di, ‘Nun cap kikiman jenmap neng, kikiman kunada nun pio dabale,’ tenedanunge. Bisam tu weik akaptua peda, akailya kikiman jepmenga deiki di, ‘Nun dabale,’ tenepmengopda, dipru wilidanapu kununge. Angeda pio malipu kurure.

18 Nimi ton tupa-tupa yu kecapu tenepra kurur ngeboda, atenerya deiki di menmena yu weleprepa, yuk neng cap pangdana cap, podana cappu kununge. Ukunung dinino, nimi ton dipru dakra bouna di kurur ngeboda, erdi ‘Yu upu pepnun’ tenen, moupra tenipterepnen baredi, telep upupu perur ngeboda, adeiki di er damai kunkameng nesala yuma peda, yuk neng cap kikiman dukdongopra pio teleppu kunkamenge.

19 Nimi ton tupa-tupa, ‘Pel puto di donada ne dabale,’ teneredi, pel telep kupra men dorur ngeboda, er gam kunkamre taru yumada, putanapu kurepa, kange mun kange doupra pio ikin weik kunkamre. Dinino, nimi ton dumsisipu kuredi, Allah er upupu gekepra dombarur ngeboda, pio teleppu kunkamre. Tonda, ila kange mun keca ton, er damai pio men yakankamre.

20 Nyapu yumadi telep kupra kungedi, ila kael kepbanung nyapu yuma tep, sun nai yapudi pio kange derinunge. Dinino, telep kupra men kungedi, mali-malipu kupbanung nyapu yumada, sun nin yapu dipru pu jerepa, anyapu tep ‘Nun songe,’ tenenunge.

21 Ware neng do yuma, tupa walwalpu kunung nengda, ‘Angepu kuptepe’ tenen, tupa-tupa putarepa, yuk nengdi awalwal kecapu kupbangepa, yuk nesala ikin kupyopda, ange epmengedi, kange derinkamenge. Sun walwal kecapu putare nesalada, ukununga deiki di, ila kange mun kun keca sun damai yakankamre.

Dinino, nimi ton kange moupra tenipterepmengedi, ‘Telep bisipu dombankamepe,’ tenenung nengda, tek sisi telep kecapu talepra kunkamenge. Ukupbankamenga deiki di, sun gam kunkameng taru yumada teleppu kunkamenge. Sun pel donkameng keca yuma peda, nong pio weik kupbankamre.

22 Tonda sun yumadi, ‘Ila mambul keca ton kupkamepe,’ tenepmumnyopda, kapul taru di moupra tenepmumdi, ila kael keami neng cap upu talepmumdi, “Ukupkamepe, ange telep do, mali do?” pepra upu sisikmumdi, aneng yumadi, upu ton melipra pepsengopda, amenda taru sundi kael kepmengopda, sundi, ‘Ange kunkamepe,’ tenepmamum pel dopmumnyopda, tek sisi nong kupkamre. Angeda men gum kupkamre.

Dinino, yuk nengdi ange utopu pio men kununge. Sun pel kapul men dopmenge taru di, ‘Angeda telep do, mali do,’ tenen, yuk neng cap upu talena gum dipapu, tali lupra pel dopbanunge. Ange yuma men tenipterepmengedi, talipu pel dopetepmenge nengda, sun tenenge keca tek sisi nong men kupkamre. Ange yumada gum kupkamre.

23 Nimi ton, ‘Upu pepkun’ tenen, tenepredi, upu penkure taruda, er tenepmaretopu menmena telep upupu peprepa, nimi yuma gekepmengedi, kange derinunge. Sun yumadi er tep, “E, nun kabo telepe,” penkamenge. Ange utopu, ware neng do yuma, ila kael deiki di, nimi melimna upu telep kupra peptengopda, sun upu pepmenge taru telep kupra pepmengepa, nimi yuma gekepmengedi kange derinkamenge.

24 Telep kupra kael kemnung nengda, sun dipru dumsisipu kuprepa, telep kupra kungedi, Allah er upupu moupra gekepmengedi kuramnganen, yuk taru depmengopda, tek sisi im deiki bengedi gam pio kunkamenge. Ange utopu, nimi ton aneng kungetopu dipru dumsisi telep kupra kunung nengda, nimi depmengedi banung bisida, tapra gam kuna bisipu bankamenge. Tuai mutu neitamai kunge taruda, sun nong denkameng dinin, depmenga peda, amenda taru ka tamupra gam bukmengedi pio gampu kunkamenge.

25 Nimi ton kange dipru erepra kurur ngeboda, er gam kunkamre taru pel donkamrenge cap, er kunkamrenge cap, er nerapu cap, er nyapsilip yuma cap tep, Allah Yahwehdi sun wenemna keca yuma gum kupra derinkamre. Dinino, dumsisi telep kupra kunge solu nerapuda, sun talepra kunkameng taru neitamai yumada, Allah Yahweh erdi melipra karenkamra deiki di, sun bung keca cap, sun nyapu cap tep, pio melipra kalengkamre. Sun kecada gum men kupbankamre.

26 Nimi ton yu kangepu tenepra, mali kecapu kupbanung nengda, Allah Yahweh ^{▼▼Yahweh – Allah er si, tek sisi ngeda, Yahweh kurure. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} erdi ‘Anengda ne songe,’ tenerure. Utenerur dinin, dumsisi telep kupra kunge nesaladi penge upu tep nengeda, Allahdi pio kange derirure.

27 Ware ngebo do, ‘Co bo weika di doproptenedi, isomka keptepe’ tenen, mok upu pepra upula dororur ngeboda, akeca-keca yuma ukupra dororya deiki di, er cap, er nyapsilip yuma cap tep, mali kudidarure. Er mali kurya deiki di, bung keca weik doronkamre dinin, ange deiki di er nyapsilip yuma mali kudirepa, ikin keca weik kunkamenge.

Ton nengda, ‘Upula dopropkamne’ tenen, mambul keca bokra karepmanto ngebo tep, mororbarure. ‘Angebo kange deipneredi, men karepnetu keca dinin, inipra karepkamner’ tenen, amorobarur ngebodi, telep keca dopra ila deiyo ngebo tep inipra karerbarure.

Ukurur dinino, Allahdi amali kurur ngebo tep, amenda sirya taru wenepra poptapkamre. Atep nengeda, ware ngebo do, ‘Aco boda inipra dorona ne songe,’ tenepredi, bena moropra men doror ngeboda, telep kupra gam pio kunkamre.

28 Dumsisi telep kupra kungedi, Allah er upu peseretopu, tupa-tupa moupra gekepmengedi, aupu talepra kunge nengda, sun pepkamang upu tep, kapul men pepmange taru di moupra tenipterepmengedi penunge. Anengda sun penge upu yuma teleppu kurure. Dinino, mali kun kecapu tupa talepra kunung nengda, sun pepkamange upu kapul taru di moupra tenena gum di, yu kuprepa, tali lupra adipapu mali upupu pertamnunge.

29 Nimi dipru dumsisipu kupra kunge nesaladi, Allah moropmenge pangeda, Allah Yahwehdi sun moromenge upu gekenkamre. Dinino, tupa mali-malipu kupbange nengdi, moronge ngeda, Allahdi men gekenkamre. Deiyoda, sundi Allah tep “Melipseo,” pepra moronung dinin, tupa malipu kupbanunga tep, Allah erda sun damai pio men kurura cadi, sun putarepa moronung kecada, pio men gekerure.

30 Nimi ton sun urasin yang-yang pepmengedi, kange deipra kunge nengda, nimi yuk neng yuma epmengedi, sun peda kange derinunge. Ange utopu, yuk nengdi nun makuna tep, telep upu dopra yuk karen mutu di, nun kori lap peryasengopda, aupu gekepmepedi, nun kange deipra kunkamepe.

31 Nimi ton wenemna upu cap, lepsisikra peteremna upu cap, penmangepa, gekepredi, ‘E, aupuda mambul kurur upu cadi, ne ton gekepnedi, talepra kunkamne,’ tenerur ngeboda, yuk ila kael keami neng cap, kikiman kuryopda, kange deipra kunkamre. Deiyoda, ila kael neng cap, er cap kikiman kuramenganen, sundi ila kael kemna keca pengepa, gekepyopda, amenda taru er peda ila kael kemna ngebo kupbankamre.

32 Nimi ton yuk nengdi wenepra peteremna upu cap, lepsisikra peteremna upu cap, pepmenge taru, sundi aupu moupra men gekengedi, melipra men dombanung nesalada, tek sisi sun pe tep men kalengdanunga cadi, ukununga deiki di sun pepu mali kudidanunge. Ukunung dinino, ware nesala do yuma, yuk nengdi wenepra peteremenge upu tep, kange deipmengedi, moupra gekenung nesalada, ila kael kemna deiyo keca ton weika di tapakra kael kepbankamenge.

33 Ware nesala do yuma, Allah Yahweh tep kware tenepra kungedi, er sipu eremnung nesala yumada, sun peteremna deiyo nengdi peteremengepa moupra gekepmenga deiki di, ila kael kemna keca ton cap tapakra kael kepbankamenge. Tonda, ware neng do yuma, sun dipru bouna dipu amutara kungepa, amenda taru yuk nesala yuma epmengedi, ‘E, anengda, teleppu kununga cadi, nun nimi deiyo neng kunkamseng’ tenen, aneng dopra ereipmengedi, gispal donkamenge.