Pro 16 | XteSC | STEP | Nimidi sun dipru neitamai, ‘Ukunkamape, ukunkamepe’ tenen, upu sisikmengedi, “Tek sisi, angepu kunkamepe,” peptenge dinino, Allah Yahwehdi, ‘Tek sisi akecapu kunkamenge’ tenen, upu pepra deriserure. Tek sisi pio telep ngeda, Allah er dipapu, teneretopu, telep kweipkamsere.

Proverbs 16

Walwal di kunge nesala cap, moupra tenengedi, telep kunge nesala cap tep, pepu upu

1 Nimidi sun dipru neitamai, ‘Ukunkamape, ukunkamepe’ tenen, upu sisikmengedi, “Tek sisi, angepu kunkamepe,” peptenge dinino, Allah Yahwehdi, ‘Tek sisi akecapu kunkamenge’ tenen, upu pepra deriserure. Tek sisi pio telep ngeda, Allah er dipapu, teneretopu, telep kweipkamsere. 2 Nimi yuma, sun dipru neitamai di, ‘Nun kunup keca yumada, dumsisipu kunupe. Nun embape bisida teleppu kunupe,’ tenepra embanunge. Ukunung dinino, Allah Yahwehdi, nimi dipru neitamaipu diredi moupra kurpeteserure. Ada, ‘Nimi yuma sun kunge kecada, ware keca tenengedi, kunung do? Ware keca deiyo tep, apel donung do?’ tenen, kurpeteseredi, kael kemserure.

3 Ange tep, sundi, ‘Ukunkamepe,’ tenemum keca yumada, ‘Allah Yahweh er dipapu melimserya deiki di, telep kupra kupbankamepe,’ tenen, sun tenemum keca cap, kupbankamrum keca yuma cap, Allah er tepapu karenkamrume. Ukupmumnyopda, Allahdi melimserepa, sun tenepmumdi kupbankamrum keca yumada, nong telep kupra nong kunkamre. Sun kunkamrum keca yumada, ‘Gume, nun puto deiki dipapu kunkamepe,’ tenena pio gume.

4 Aupuda tali tep men pepsene. Allah Yahwehdi, ‘Ukunkamne, ukunkamne,’ tenepra kure keca yumada, menop taru di, ‘Angeda ukupkamne,’ teneamutopu akeca-keca yuma ketenepra deipka tep, ange yuma teleppu kurure. Ada mali kupra kunge nengdi kunkameng keca peda, Allahdi, ‘Ukupra mali kupbankameng’ tenen, konum ketenepra teneramu dinino, amenda sirya taruda, Allahdi amali kunge nesala tep, wenepra popredi, uku jen ban dokotepkamre.

5 Nimi yuma sun dipru erepra kungedi gemenunge nengda, Allah Yahwehdi, ‘Anengda ne dabale,’ tenerure. Ada tek sisi erdi sun aneng tep tenere ngeda, ton pio men lumdongonkamre. Nunda ange pio tek sisi kael kemnupe. Allahdi sun anesala tep, ‘Ne songe,’ tenepbaramyanen, gum kupra deipkamre. Tek sisi yuk taruda, anesala tep ila di wenepra poptapkamre.

6 Nimi ton telep kupra kungedi Allah tepapu tamna pio gum di, er tep kware tenepmengedi, teka tenepra teleppu kungopda, Allahdi sun mali kunge keca yuma kaukemdonkamre. Ange yumada, gum kupra derirure. Dinino, pio telepnge tupa tenenkamrum ngeda, ake. Ware nesala do yuma, tek sisi Allah tep kware tenepmengedi, er si erepra gispal doramenge nesala yumada, Allah er amutara teleppu kunkamenge. Ange utopu kunge nesala yumadi, ‘Mali kun keca tenpunge peda, men kunkamepe,’ tenepmengedi, pio teleppu kupbankamenge.

7 Sun nimi yumadi, telep kun kecapu talepra kunge pangeda, Allah Yahwehdi sun kunge keca tep, pio kange derinkamre. Allah Yahwehdi anesala tep kange deipre dingeda, erdi melimrepa, anesala sun podan neng yuma, ukupu kange tenenangepu punupra karepredi, anesala cap antapra deiprepa, teleppu kunkamenge. Menop taruda podanapu kurami dinin, amenda taru yumada, sun kayapu neng sisa utopu kupra kunkamenge. Sun gam kunkameng taru neitamai yumada, ton cap pio men podankamenge.

8 Atep telep ngeda, Allah Yahwehdi tenerurada ake. Ware nesala do yuma, bung keca weika di kunupra derina gum di, tali kankan kunge nesalapu kunkameng dinin, telep kun kecapu talepmengedi, Allah er upu moupra gekepmengopda, ‘Sunda pio teleppu kununge,’ tenerure. Yuk nesaladi, ‘Bung keca weika di doproptene,’ tenena cap, ‘Co bo weika di taleptene,’ tenena cap deiki di, mali kange doupra enunga cadi, anengdi sun yuk nesala tep, mok upu penunga deiki di, mali kupra derinunge. Anesala tep nengeda, Allah er kangeda, ‘Sunda pio malipu kununga cadi, ne songe,’ tenerure.

9 Nesala yuma sun dipru neitamai di, ‘Angeda ukupkamne,’ tenepra, yuk-yuk tenenung dinino, sun tek sisi kupkamenge nge yumada, Allah Yahweh er dipapu, “Telep bisida ace, tek sisi kupkamenge ngeda ake,” pepra ketenem dirure. Erdi teneretopu, kunkamenge. Yuk ton gume.

10 Allahdi sun ila nimi deiyo talepra kunung Raja neng tep utenerure. ‘Nedi sun tep, ne ila puto karepnepa, sun ila di kael kemnange moupra tenepmengedi, sun mutu neitamai kunge nesala yuma tep, telep kupra talenkamenge. Tonda, upu dumsisi kupra upu bongdinkamenge. Telep upu pepmengepa sun amutara kunge nesala aupu gekepmengedi, teleppu kunkamenge,’ tenerure.

Atep, sun ila nimi deiyo neng Raja nengda, Allah Yahwehdi er ila puto talepra kure ngeda, sun tep kareprepa dopropmenge dinin, upu bongdina taru mali upupu pepmengedi, sun amutara nesala tep, malipu kupmengopda, Allahdi pio mali kange dounkamre. Angeda pio ila mali weik kununga cadi, Allahdi aRaja neng tep, wenepkamre.

11 Nimidi, sun bung keca kunumna tep, ‘Ikin do, kanam do?’ tenen, eremteren keca deiki di erepterepmengedi, pio tek sisingepu kuprepa pepmengopda, Allah Yahwehdi sun tep kange derirure. Deiyoda, eremteren keca pio tek sisinge deiyo ngeboda, Allah erpu kurure. Atep eremteren keca dirpetenung dinin, mok upupu penge nengda, Allah ila di wenemkamre.

12 Dan mutu do yuma, amutu talepra kunkameng Raja neng yumadi, ‘Atalene mutu, keteng tamun weika di taleptene’ tenen, putaryopda, adipapu moupra talena cap, telep kupra upu pena cap, sun amutu tara kunge nesala telep kudina cappu kunkamenge. Ukupra dumsisipu kupbangedi, mok upu pena gum dipapu, amutu telep kupra talepmengopda, tenpu mutu di dipdongopra dorkunkamre keteng tamun tupa talenkamenge.

Dinino, ila nimi deiyo Raja nengdi sun talenge mutu yuma telep kupra men talepmengedi, mok upu weik pengopda, sun amutara kunge nesaladi aRaja neng tep yu kuprepa, tapmengedi bisipmengopda, sun pununa tep, ‘Yuk ngebo nun ila nimi deiyo ngebo kunkamser’ tenen, yuk ngebo wepra ereipkamenge. Atep nengeda, sun ila nimi deiyo neng, Raja neng yumadi, ‘Mok upu pena cap, nun amutara kunge nesala tep mali kudina cap, ikin keca sun nong deiki derina cap yumada, nun songe,’ tenenapu kunkamenge.

13 Tonda ware neng do yuma, sun ila nimi deiyo Raja neng tep, upu lap perbenge taru yumada, sundi kuramenge keca cap, lap penkameng upu yuma cap, mawa di mok upu pena gum dipapu, pio tek sisi upupu pepmengopda, sun Raja neng cap, yuk nimi deiyo neng cap, aupu gekengedi, kange derinkamenge. Sun ila nimi deiyo Raja neng cap, sun amutara dinin, yuk nimi deiyo neng cap yumada, tek sisi upu penge nesala tep, kange derinunge. Mok upu deiki di tali pertamnung nesala tep, ‘Nun songe,’ tenenunge.

14 Ila nimi deiyo ngebo Rajadi, er amutara kunge nesala tep, yu kuprepa deremna weik kuryopda, erdi wenemna upu perya deiki di, er jen talen nengdi, er amutara kunge nesala tep tali lupra poryakanunge. Atep nengeda, Raja neng amutara kunge nesala yumadi, ‘Gume, nun Raja ngebodi derepseredi, popserur’ tenen, kange moupra tenengedi, teleppu kununge. Sun ila kael keami nengdi, ‘Nun ila nimi deiyo ngebo derepseredi, popserur’ tenen, moupra tenenunge. Raja ngebodi mali kange doupra derepmanto keca yuma tep, pio beipra kununge. Akun kecada pio men kununge.

15 Dan taru do yuma, ila nimi deiyo neng, sun Raja neng kange deipmengedi, sun dipru boun kupyopda, sun amutara kunge nesala tep, telep kupra melimengepane, anesala yuma teleppu kunkamenge. Ukupmantoda, ila dou mamredi wa pepra kouamenge keca yuma koluramrepane, dua di mo doupra yarepa mo cepredi, wa pepra yal keca kouamenge nge telep kuramretopu, ila nimi deiyo ngebodi yuk ngebo tep kange deipyopda, angebo tep telep kudinkamre.

16 Ton nimidi, kunumna weik keca er sida emas cap, perak cap, ‘Akeca weika di doronkamep’ tenen, putarepa, pio pe deipra erterenung dinin, angeda yambul telepe pua. Ila telep ngeda, nimidi, ‘Uo, ila kael kemna deiyo keca weika di kael keptepedi, teleppu kunkamep’ tenen, pio putarepa, pe deipra dumsisi kun kecapu erterenunge. Angeda tek sisi ila telepnge kununge. Ange utopu, ‘Uo, ila kael kemna keca kael keptenedi, pio teleppu kunkamne’ tenen, akecapu ila di putare ngeboda, ila teleppu kurure. Dinin, ‘Uo, kunumna weik keca er si perak doproptenedi, isomka ngebo kunkamne’ tenen, putarepa ertererur ngeboda, telep men kurure.

17 Nimi ton mali kun keca yuma tapmengedi, telep kupra pio dumsisipu kunung nengda, amali kun keca ton cap pio men kunkamenge. Sundi, ‘Gume, ka di ton cap mali kupnup’ tenen, pio beimdonunge. Adumsisi kunge nesala kuramengtopu, ware ngebo do yuma, ‘Mali kun keca yuma tapnedi, dumsisipu kunkamne’ tenen, pio moupra kure ngeboda, er gam kunkamre taru neitamai yumada, teleppu kunkamre. Ikin keca er damai men yakankamra cadi, er pel donkamrenge cap, kunkamre keca yuma cap, telep kupra kupbanmaryanen, pio teleppu kunkamre.

18 Nimi ton er gam kure taru yuma, dipru erepra gemerur ngeboda, amenda yuk taru, Allahdi angebo tep weneprepa, saka poprepa kange mun weik kunkamre. Ange utopu, ware nesala do yuma, sun dipru kange erepra kunge nesalada, amenda taru Allahdi anesala yuma tep, wenepredi gum kupra deipkamre.

19 ‘Mali kupnun’ tenen, er gam kunkamre taru yumada dipru dakra kuredi, nimi kankan kunge nesala cap kikiman kure ngeboda, teleppu kurura cadi, Allah er kangeda, ‘Erda ila telepnge kurure,’ tenerure. Ton nengda, pio mali kupra gemenung nesala cap dukdongopra kungedi, asal nong-nong kunge nesaladi, dalupra upula dorameng keca bokra doronunge. Anesalada, isomka weik kunung dinin, Allah er kangeda, ‘Anesalada pio mali weik kununge,’ tenerura cadi, ato kunge nesala tep ila di wenemkamre.

20 Ware neng do yuma, sun deiyo nengdi, “Ukunkamrume, angeda men kunkamrume. Telep ngeda ake, mali ngeda ake,” pepra lepsisikra peteremna upu cap, wenemna upu cap pepmengepa, aupu moupra gekepmengedi kunge nengda pio teleppu kunkamenge. Sun kunkameng keca yuma peda, teleppu kupbankamenge. Ange utopu, ware nesala do yuma, ‘Allahdi telep kupra melimseredi, erdi pesere upu moupra gekepmepyopda, nun kunkamep keca yuma teleppu kunkamsere’ tenen, Allah tep teka tenepmengedi pio dumsisipu kungopda, amenda taru pio kange deipra teleppu kunkamenge.

21 Nimi yuma ila kael kemna deiyo keca weika di kael kepmengedi, teleppu kupbaramenganen, yuk nesaladi sun tep epmengedi, kael kepkamenge. Kael kepmengopda upenkamenge, “E, anesalada tek sisi ila kael keamidi ila mambul keca yuma tep, ‘Nong neitamainge deiyo ake’ tenen, kael kemna neng kununge,” pepra anesala tep gispal donkamenge. Ware ngebo do yuma, ‘Yuk neng tep mambul upu lap pepra peteremkamne,’ teneptuopda, er upu kapul men pepmare taru di, akeca-keca moupra tenepetepredi, ne penkamne upuda ake.

‘Aupu deiyoda ake’ tenen, konum moupra tenepyopda, amenda taru erdi yuk nesala tep peteremre taruda, ‘E, deiyo ake’ tenen, telep kupra kael kepbankamenge. Konum kael kepmengopda, sun anesala yumadi, aupu peteremna ngebo tep, “Nun kabo telepe, kanda pio telep kupra peteremasereme,” pepra, er tep gispal dopmengedi, kange deipra kunkamenge.

22 Ware nesala do yuma, pio moupra tenepetepmengedi, ‘Ange kupmepyopda, amenda taru ware kupkamser do? Kanam kupkamser do, ikin kupkamser do? Akupkamser ngeda telep do, mali do?’ tenen, moupra kununge. Ada, sun kun keca kapul men kupmange taruda, menmena di moupra tenipetepmengedi, telepngepu wepra kununge. Ange utopu kunge nesala sun kunge kecada, ukupmantoda, yo me bungna bukra embaramretopu kununge.

Dinino, dumsisi kupra kunge nesaladi, sun aupu men gekepmanto kungedi gel giso deipra kunung nesala tep, “Ukunkamrume, angeda pio men kunkamrume,” pepra wenemna upu weika di peptenga peda, sun giso gat deipra balila kununge nesala cadi, pio moupra men gekenkamenge. Aupuda men dombankamenge. Gekertamnapu kunkamenga cadi, aupu yumada, nong pio men kupkamre. Amali kure ngebo tep, “Ukuna pio meme,” pepra penge upu yumada, pio talipu kunkamre. Tek sisi nong men kupkamre.

23 Ware nesala do yuma, sun kange tenenange neitamai ton ila kael keami keca akapyopda, sundi yuk nesala tep lap pepra peteremkameng taru yumada, tek sisi pio telep upupu penkamenge. Ukupra moupra tenenange dopra peteremenga deiki di, sun upu gekenkameng nesala, aupu dopra dombankamenge. Moupra kael kepmengedi, ila kael kemengedi peteremna neng tep, “Uo, sundi peteremaseng wenemna upuda, pio tek sisingepu penmasenge,” pepra, kange deipmengedi, apeteremna neng tep gispal donkamenge.

24 Ukupmantoda, nimidi madu mong mokon purupra jepmengepa, tau peprepa, kange deriramengtopu, nimi yumadi telep upu pepmengepa, yuk nesala gekepmengedi kange derinunge. Atelep upu pepmengepa gekepmenga deiki di sun dipru puto kuprepa kange derinunge. Ukupmanto ngeda, nimi ton pu jerepa, nimi kwetena deiyo nengdi, obat tek sisinge karepmengepa, sunpu jeramre nesala jepmengepa yo pumbon yuma wekredi telep kupra kweteramretopu, telep upu penge nesaladi, sun penge upu deiki di yuk nesala tep, telep kemdinunge.

25 Uda nimi yumadi sun tenepmenge bisipu embangedi, ‘Gume, nun embanmap bisida telep bisi cadi, abisipu embankamepe. Nunda dumsisipu kunupe,’ tenepra embanunge. Dinino, abisi urasin telep bisi kuptua peda, sunda moupra men tenipterepmengedi, mali bisipu embangopda, tek sisi dena damaipu banunge. Tek sisi telep bisipu wepra men embankamenge. Amenda taru, sun embankameng bisi yumada, uku jen ban bisipu bankamenge. Atep, ‘Akunkamep kecada, telepnge do, malinge do?’ tenen, pio moupra tenipetemumdi bankamrume. Tali lupra embana meme.

26 Nimi ton ikin pel doramre ngebodi, jen putapyopda, jen putana deikipu kuredi tenerure. ‘Gume, ikin pel donmap dinino, nun pel doramepyanen, gawal dakmepe dingeda, amenda taru jen keca weika di kikiman jenkamepada telepe. Angeda, sun apel don nesaladi, ‘Jen keca putaramserepapu, pio pe deipra pel doramepyanen, gawal dakmepe dingeda, jen keca weika di jepkamep ja’ tenenunga cadi, atenena deiki di, pio piripra puto di pel donunge. Ada sun jen putanmarepapu, piripra pel donunga tep pepne.

27 Nimi ton pio yu kange doupra malipu kurur ngebodi, mali kun kecapu tenepra putarura cadi, er kayapu neng cap upu sisingnung taru yumada, mali kun keca tepapu upu sisingnunge. Mali kun kecapu nungdangedi, kange deridanunge.

Dinino, sun mali kun kecapu putarepa, mali upupu penge nengdi, sun kayapu neng damai tep, amali upu nukmengepa, yuk nesala gekepmengopda, malipu kudinunge. Ukupmanto ngeda, uku bu di akeca-keca yuma jeroramretopu, sun mali upu penunga deiki di, amali upu gekenkameng nesala yuma tep mali kudinunge.

28 Nimi ton, ‘Tumi-tumi yuma yu kange doupra, pedana cap, podana cap kunkamepe,’ tenengedi sun cap kikiman kunge nesala tep mali kudinmangepane, sun cap sun kikiman kunge neng tep, deremdana cap, podana cap kuramenganen, sun amali kuna deiyo nengdi, kange deipra kununge. Ukupra kunung nengda, ukupmanto upu ton pepkusene. Ada, nimidi mali yal keca koupmengepa, du yunge mouramretopu, kununge. Tonda, jen keca jepmengedi, kwal tali deiptapmangepa, dakuramarepanen, amenda taru tong weik peramretopu kununge.

Yuk upu ton pepkusene. Nimi butene neng, sun cap kikiman dukdongopra kuramretenge dinin, aneitamai di tenpu ngebodi, ‘Yuk neng gekepkameng’ tenen, er kabo tep, mali upu pepra embarepa, yuk neng aupu gekengedi, er kabo tep mali kange doupmengopda, amenda taru sun abutene neng peda, dipru wilipra bongdidankamrenge. Dipru wilipra bongdidarerunga deiki di, songe tenedarerunge. Dinino, akupkamre ngeda tali tep gume. Deiyoda, nimi tenpu ngebodi sun kikiman tenpu dukdongopra kuramrenge ngebo tep, minina upu pepra derirura deiki di bokra derirure. Men di, kange deipdanamrei dinin, amenda taru yumada, mali kange doudankamrenge.

29 Nimi ton yu tenepra mali kun kecapu putarepa kupbarur ngeboda, ‘E, nun cap yuk neng cap podanapu kupmepyopda, ada telepe pua,’ tenerure. Ukupra tenerur ngebodi, er kayapu sisa yuk neng cap tep, tupa-tupa mok upu peredi, aneng tep mali kudirure. Ukurya deiki di er kayapu neng yuma doupra pona damaipu derirbarure. Erdi mali kurya deiki di, er kayapu neng yuma tep mali kudirure. Aneng yuma, sun damai ikin keca weik yakankamre.

30 Nimi ton, sundi yuk neng tep, sun dipru neitamaida yu kecapu tenepmengedi, aneng tep mali kupkamape,’ tenenung dinin, ‘Angeda, yuk nengdi men kael kepkamseng’ tenen, urasin yang-yang penapu kununge. Tonda, anengda, sun mali tenenge keca katuai lap pena gum dinin, silep kunkunum pena cap, asuru ingdodana cap, nong urasin yuma nalamtamnapu kununge. Dinino, sun pe dipru neitamaida, pio mali kun kecapu tenepra inipra kununga cadi, yuk nesala yuma men kael kemnunge. Ukupra tenenunga deiki di, yuk nesala yuma tep mali kudinunge.

31 Nimi ton er mali kuramre keca yuma tapredi, telep kecapu talepra kupbankamre ngeboda, er gam kunkamre taruda, Allahdi er tep, go lyoma di karepkamre. Angeboda, Allah upu yuma gekepredi, aupu peretopu moupra taleredi dombarure. Ukurya deiki di kul potong pankamre. Yuk nesala yumadi, ato ngebo tep, ‘E, keteng tamun weika di gam kuramnganen, kul potong konum kupke.

Ada dumsisi kuramnga deiki di kurure’ tenen, kael kepmengedi er tep gispal donkamenge. Ukupmanto ngeda, ila nimi deiyo Raja nengdi, sun giso deiki urasin pio telep keca, er sida mahkota kemamengtopu, Allahdi dumsisi kupra kuramenge wisi neng tep, kul potong parerure.

32 Nong puto weik kure ngeboda yambul telep kurur dinin, ila telep ngeda pepkusene. Ware neng do yuma, yu weik kupmarepane, ‘Ne adipapu deremna upu men pepkune. Tapbanmanyanen, amenda taru boun upupu penkamane,’ tenerur ngeboda, ila telep kurure. Ware nesala do yuma, sundi, ‘Gume, nun dipapu ukunmankapmepedi, mali kupnup’ tenen, moupra tenipetepmengedi, sun pe tep kalengdanung nengda, pio telep kununge.

Tonda, ware puto weik ngebo do yuma, er dipapu yuk mutu kunge nesaladi dorami ila ati arum yuma uruptaptudi, amutu nesala yuma popbisiptua peda, angeda yambul telep kurure. Dinino, ila telep ngeda, ‘Mali kupnup’ tenen, moupra tenipetepmengedi, sun pedi, sun pe tep dipru moupra kalengdanung neng pua.

33 Ton neng dingeda, ‘Amenda kunkamep keca tenena tep nengeda, ange kunkamep do, ange tapra yuknge kunkamep do?’ tenen, ‘Ware kupkamep do?’ tenen, peten kemna keca er sida undi ^{▼▼undi – Aupu deiyoda, nun ataru kunup nesala yambul walwal kunup dinin, er lap pen upuda ake. Ada, pumun taruda, sun Israel yala nesala kankan dinin, imam nengdi, yambul keca dopra adeiki di si yuk-yuk seki. Ukupidi, ‘Nun wepra deipkup keca, tonda nundi kupkup kecada, Allahdi lap pepkuser’ tenen, Allah moropidi, akeca tu deiki siptapipa, Allahdi er pel dopka deiki di, tenpu si sekinge katuai kupu pangeda, sundi, ‘E, akonuma, Allahdi ange konum wepra deipmasera cadi, angepu kupkamepe, akecapu wepkupe,’ teneramidi, akeca er si undi dopra apel dorami.} deiki di kurpetenunge. Dinino, tek sisi kunkamrenge yumada, Allah Yahweh er dipapu, ‘Ukunkamenge,’ tenepra ketenem diramunge puda, tek sisi kunkamre.