Pro 18 | XteSC | STEP | Nimi ton, yuk nesala cap kikiman dukdongopra men kungedi, ‘Bokra yuk-yuk kunkamepe,’ tenepra kunung nesalada, sun pe tep, tupa-tupa, ‘Nun pe yuk kunkamepe,’ tenepra kununge. Anesalada, sun pe putare kecapu tenenunge. Tonda, sun pe tepapu moupra kalengdangedi kununge. Ange utopu kunung nengda, yuk neng sun teneramenge nge yuma tep, ‘Nun songe,’ tenengedi, yuk neng cap dukdongopra men kununge.

Proverbs 18

Nimidi penung upuda, puto weik kurur keca cadi, upu penkurum taruda, ‘Mali kupnup’ tenen, moupra tenenkamrume

1 Nimi ton, yuk nesala cap kikiman dukdongopra men kungedi, ‘Bokra yuk-yuk kunkamepe,’ tenepra kunung nesalada, sun pe tep, tupa-tupa, ‘Nun pe yuk kunkamepe,’ tenepra kununge. Anesalada, sun pe putare kecapu tenenunge. Tonda, sun pe tepapu moupra kalengdangedi kununge. Ange utopu kunung nengda, yuk neng sun teneramenge nge yuma tep, ‘Nun songe,’ tenengedi, yuk neng cap dukdongopra men kununge.

2 Nimi ton, walwal kange doupra, mali kun kecapu tenerur ngeboda, ila kael keami nengdi lap penge upu cap, tonda, “Telep kupra kunada ake,” pepra, penge upu cap, pio moupra men gekerure. Tonda, nimi yuk nengdi penge upu men teneredi, er pedi, ‘Ne konum kael keamsi keca lap penkusen ngeda ake. Nedi ukuptene, tenenun kecada ake,’ teneretopu tenepra kurura cadi, er pedi, ‘Ne kaele,’ tenenapu kurure. Dinino, angeboda, ila kael ngebo men kurure. Angeboda, pio tek sisi kael men kemkamre.

3 Nimi ton, pio tupa malipu kupbarur ngebodi, yuk nesala damai yana kuredi, tek sisi sika di gume, menmena anesala tep, mali kupra derirure. Ukuprepa, sun yuk mutu kunung nesala yumadi, angebo cap, er kikiman dukdongopra kunge nesala cap yuma tep, ‘Sun pio malipu kununga cadi, nun dabale,’ tenepra anesala tamkamenge. Ada, amali kun keca tep, “Yana ukupso,” perya deiki di, amutu nesala yuma mali kungepa, yuk mutu nesaladi, ‘Nun songe,’ tenengedi, tamkamenge. Konum tapmengedi, beimdomengopda, amali ngebo cap kikiman kunge nesaladi, ‘Uo, warya tep do?’ tenen, ali weik dangkamenge.

4 Nimi ton, Allah er upu neitamai di, “Angeda kunkamrume, angeda pio men kunkamrume,” pepra deriserur upu gekepra kungedi dumsisipu kunung nengda, teleppu kupra kunkamenge. Sun anesalada, telep upu penkamenga deiki di, yuk nesala yuma tep, bicau tenepra makunkamenge. Telep kupra makupmengopda, anesala sun damai telep kun keca yakankamre.

Ukupmantoda, nimidi me pio gumai embangepa, me ila di putanmarepa, mali kange doupra enmanganen, pio telep yo me bungna epra jepmengedi, tamupra gam bungnunge. Ange utopu, Allah upu peseretopu, telep upu pena ngebodi, upu peryopda, aupu gekenkameng nesala weika di melimrure. Yo me bungna pio tep bukra embaramrepa, nimidi ame gwepra jepmengepa, nong yuma telep kuramretopu kurure. Ada, angebodi yuk nesala yuma tep, bicau tenepra makurura tep pepsene.

5 Nimidi mali kupmengepa, yuk nengdi wenemna ati dubenge taruda, nimi upu bongdina deiyo ngebodi, ‘E, angeboda ne kabo sisa,’ tenepyopda, er mali kupu keca akapmarepapu, ‘Er kupmaretopu dipterepnedi upu dumsisi kupra bokeipkune,’ men tenerure. Ange gum dinin, ‘Ne kabo’ tenen, “Dakwapye,” pepredi, amali kupu ngebo lortamrure. Angeda, pio mali kurure.

Ange utopu, yuk nengda, mali men kunmai dinin, yuk nengdi minina upu deiki di, “Sun mali kupmange kecada ake, ake,” pepra, luludina upu sun nong deiki derinunge. Deiyo men kapmarepapu, upu bongdina deiyo ngeboda, mali kure ngebodi, “Teka, sun mali kupmarum ngeda ake,” pepra buru bupukra perya deiki di, anesala wenepmengopda, pio mali weik kurure. Allah er kangeda, ‘Nimi upu bongdina deiyo ngebodi, mali kunge nesala tali lortamamenge nge pe, telep kunge nesala dinin, deiyo men kwapmarepapu wenemamenge nge peda, ila mali weik kurure,’ tenerure.

6 Tonda, walwal kange doupra kure ngebodi, tupa-tupa mali upu weik peredi, amali upu lyoma di tali pertamya deiki di, tek sisi nimi tep deremna upu weik belerure. Ukupra kurya deiki di, er pere upu gekenung nesaladi, er wenemna tep weika di ponkamenge. Ada tali tep gume. Deiyoda, erdi perur upu yumada, mali upupu perura cadi, amutu nesaladi, er wenemna tep, co balana di er nong deiki ponkamenge.

7 Walwal ngebodi, mali-mali upu weik pertamrur ngeboda, ukupra kurya deiki di, er pe nongpu yawa podidarure. Er pe nongpu pena youdarure. Ada tali tep gume. Walwal kange doupra mali upu weik perur ngeboda, er sipyal pumbon di perepa, yuk neng gekepmengedi, ‘E, angebo perur upuda, nun dabale’ tenen, yu kuprepa, er tep wenepra ponkamenge. Tonda, aupu perya deiki di, ikin keca weik er damai yakankamre.

8 Ukupmantoda, nimidi telep jen keca bokra meteteka di sesekra, yuk neng tep bokra karepmengepa, sun yumadi jepmengopda, tau pepra telepe kuramretopu, mali kunge nesaladi yuk neng tep, minina upu penmangepa, yuk neng gekengedi, ‘Aupuda tek penmanga’ tenen, gekepra kange derinunge. Dinino, ukunungada pio mali weik kurure.

Deiyoda, nimi yumadi tali-tali upu pertamengepa, yuk nesala gekepmengopda, aupuda nimi dipru neitamai wekrepa pio kunkamre. Angeda men gum kupkamre. Tupa tenenapu kunkamenge. Atep nengeda, tali nimi dipapu pertamnung upuda, nimi pona tep upu penunge. Aupuda nimi podan keca utopu kurure.

9 Nimi deiyo nengdi, “Apel donkamrume,” pepra nimi yuk-yuk tep bokra karepmengepane, ton nengdi, ‘Gume pel donada, nun dabale. Apel men donkamepe’ tenen, tamenge nengda, ‘Nimi yuk neng tep, popmepedi, gum kupra deiptepe,’ teneramengtopu kununge. Tonda, ‘Telep bung keca, sikke buktapra, gum kuiptepe’ tenen, gawal dakra tamamengtopu kununge.

Ange utopu, ‘Pel donada, nun dabale,’ tenenge neng cap, ‘Telep keca sikke buktapra gum kuiptepe,’ tenenge neng cap, sunda kange tenenungada, utotopu kurure. Sunda weite-du utopu neng kununge.

10 Nimidi, ‘Yuk mutu nesaladi yana popsenung’ tenen, ila lyom gel ati wepra, akati pumbon inipra wengbaramengtopu, Allah Yahweh erda, ila puto weik ngebo kurure. Atep, er tep teka tenenge nesala, Allahdi pio melipra kalengkamre.

Ware nesala do yuma, sun mali kunge keca yuma tapmengedi, ukutaru telep kupra kungedi, “Allahdi, ‘Ukupra kunkamrume,’ pepra deriseretopu, angepu talepra dumsisipu kunkamepe,” pepra, angepu tenepra, telep kupra kunge nesaladi, Allah er damaipu bengepa, Allah erdi telep kupra melimkamra deiki di, sunda pio teleppu kunkamenge.

11 Allah tep teka tenepra kunge nesaladi ukupra kunkameng dinino, isomka neng sundi tenenkameng ngeda ake. Sundi utenenunge. ‘Gume, nun kunumna weik bung keca yala-yala yuma kunupra akapseua deiki di, pio teleppu kunkamepe. Ikin keca nun damai men yakankamsere,’ tenenunge. ‘Aisomka keca weika di talepra kupya deiki di, melipbaserepa kunkamepe,’ tenenunge.

Tonda, sundi, ‘Nimidi ila kota mutu kungedi, puto lyom gel beilya ongopgenepra wipmengepa, teleppu kuramengtopu, nunda ila isomka keca weik talepra kunupa cadi, kange mun keca ton nun damai pio men yakankamsere,’ tenenunge. Ukupra tenenung dinino, walwalpu kununge.

12 Nimi ton sun pe dipru eremengedi, sal nong-nong kungedi sun pedi tenepra, ‘Uo, nunda ila telep neng kunupe,’ tenepra kunga deiki di, tek sisi amenda yuk taruda sakamenge. Yuk nesala sun amutarapu kunkamenge. Dinino, nimi ton bouna di dipru dakra kurur ngeboda, teleppu kupbarepa, yuk nesala yuma epmengedi, er tep gispal donkamenge.

13 Ware nesala do yuma, nimidi penmange upu, kapul men gekepmange dipapu, akupmarenge tep, menmena di, “E, aupuda nun konum tenepmapa cadi, sunda ukunkamrume, ange ton men kunkamrume. Aupu deiyo ake,” pepra lap penung nengda, sun dipapu, akupmarenge tep, mali upu pedinunge.

Deiyoda, akupmange keca yuma nong neitamainge kapul men gekepmange taru dipu, ‘Ukupso, ukupso,’ penmanga tepa. Amenda taru yuk nengdi, aupu yuma moupra sisikmengedi, deiyo neitamainge ton lap pepmengopda, sun menmena taru tali lupra penmange nesalada, ali dangkamenge. Ada, upu nong neitamainge kapul penmange taru di, sun pedipapu mali upu penga deiki di ali dangkamenge.

14 Ware nesala do yuma, sun sambala puto kurepa kunge nesalada, sun ila kange mun pu jenmarya peda, sun sambala puto tupa kurura cadi, pu jenmaryanen, gum kupyopda, tupa kippu kunkamenge. Ila kange mun pu jenmara peda, gampu kunkamenge.

Dinino, ware nesala do yuma, mambul kange doupra, kware weik kungedi, dipru pu jererepa, engepra tenimtonapu kunge nesalada, sun sambala puto gum nesala cadi, sun kange cap, nong cap puto bounpu kunkamenge. Ila kange mun pu do, yuk ikin keca do, sun damai yaryopda, sun sambala puto gum kuprepa, tek sisi puto bounpu kunkamenge.

15 Nimi ila kael nengdi ukupra tenenunge. ‘Ukupu keca ton tapakra kael keptepe’ tenen, ila kael kemna deiyo keca tepapu putarepa, tupa-tupa weika di tapakra kael kepbanunge. Konum kael keami nesaladi, ‘Gume yuk telep kael kemna deiyo keca ton tapakra kael keptepe’ tenen, putarepa, tupa kael kepbanapu kunkamenge.

16 Ware ngebo do yuma, ‘Ila nimi deiyo neng kori betenedi, upu sisiktepe’ tenen, putare ngeboda, telep keca ton ketenepra derinkamre. Akeca keteneipyopda, amenda taru go akapyopda, ila nimi deiyo neng kori karerbanunge. Ukupmengopda, aila deiyo nengdi, ‘Telepe, sun tenipmarum upu peryaserume,’ penkamenge. ‘Nimi deiyo neng damai upu sisingbetepe,’ tenenge nesalada, adeiyo neng tep telep keca ton ketenepra derinunge. Deiyoda, ‘Akeca karemepya deiki di, go ton karenkamseng’ tenen, kununge.

17 Nimi upu bongdin taruda, tenpu ngebodi menmena lap perepa, sun gekenge nesaladi, ‘E, angeboda tek sisi upu pepmasere,’ tenenunge. Dinino, sun pedanmarenge neng, yuk ngebodi pere upu gekepmenge dingeda, ‘E, angebo pepmare upuda, nong tek sisingepu pepmasere,’ tenenunge. Tenpu ngebodi pere upu gum dinin, yuk neng ton cap penge upu gekepmengedi, ‘Tek sisi deiyo ake,’ tenen, moupra tenepmenga deiki di, upu bongdina deiyo nengdi, telep kupra upu bongdinunge. Atep, ‘Tenpu ngebodi pere upuda, akonuma,’ tenena pio gume.

18 Nimidi, ‘Ware ngebo telep kurur do? Ware ngebo mali kurur do?’ tenen, moupra tenepmengedi, apepdanmangenge tep, esu pen keca er si undi deiki di donmanganen, ‘Angebo er si katuai kupne ngebopu, er tep upu bokeipkup’ tenen, wepra doronunge. Nimi tenimtorameng taruda, ukunung ngeda pio telepe. Ukupra tenenung dinino, sun yu tenepdanmange nengda, sun kikiman meneng damai pio men kununge. Anengda sun kayapu neng sisa dinin, ‘Ware kupkamap do?’ tenen, upu sisingmenge taruda, pedanapu kununge.

Ukupra kunge nesala tep nengeda, esu pen keca undi donkamrume. Si katuai kuprengepu wepmumnyopda, upu dimpeprappu kunkamenge. Utopu, nimi butene nengdi, yu kuprepa, pepdanmarenge nge tep, ‘Menmena adipapu telep kuiptepepa, kange di ton cap, dipru dukdongopra kikiman kuretenge’ tenen, nimi deiyo nengdi undi ^{▼▼undi – Aupu deiyoda, nun ataru kunup nesala yambul walwal kunup dinin, er lap pen upuda ake. Ada, pumun taruda, sun Israel yala nesala kankan dinin, imam nengdi, yambul keca dopra adeiki di si yuk-yuk seki. Ukupidi, ‘Nun wepra deipkup keca, tonda nundi kupkup kecada, Allahdi lap pepkuser’ tenen, Allah moropidi, akeca tu deiki siptapipa, Allahdi er pel dopka deiki di, tenpu si sekinge katuai kupu pangeda, sundi, ‘E, akonuma, Allahdi ange konum wepra deipmasera cadi, angepu kupkamepe, akecapu wepkupe,’ teneramidi, akeca er si undi dopra apel dorami.} deiki di sun abutene neng tep, upu bongdinunge.

19 Ne kayapu nengo, tek sisi upu pepsene. Tenpu mutu nesaladi, yuk mutu kunge nesala tep, ‘Ormutu nesala porbenkamepe,’ teneptenge dinino, ormutu nesaladi menop taru ila lyom gel beilya konum ongopgenepra wiaminge akapyopda, angeda ikin weik kupkamsere. Deiyoda, amutu neitamai tali lupra men wengbenmanto tepa.

Dinino, ila ikin ngeda pepkusene. Nimi sun buteneda, weitapsilip kurung dinin, tenpu ngebodi, er weit bo tep, ikin keca weik er nong deiki deiprepa, er du bodi, pio mali kange douprepa, derepdangopda, angeda ikin pio weik kunkamre. Ada sunda du weit sisa kurung neng tepa. Sundi yu tenedarung ngeda, menmena di lepsisikra deipmanto keca gume.

Ukupmantoda, nimidi ila kota mutu ati weik doramtengedi, gat keca besi dopra, akati ongomgenepra ila lyom beilya ikmengopda, pio ikin deiki dipu wekamrume. ‘Akota kanam dipu wengbenkamtepe’ tenena gume. Ange utopu, sun weite-du kunge nesala yu kuprepa deremdana weik konum kuprengopda, menmena di aupu lepsisikra bokeipmumdi, telep kupra men derinkamrume.

20 Ukupmantoda, nimi-nimi yumadi telep jen keca yala-yala yuma ila di jenmangepane bouramrepa, kange deriramengtopu, ila kael keamu ngebodi, kael kemna deiki di, telep upu peprepa, nimi yuma gekengedi, sun dipru neitamai kange mun kange doupra kunge keca yuma tep, ‘Ae’ tenen, ila kange derinkamenge. Ila kael nengdi, dipru kwa dimna telep upupu pepmengepa, ikin kange doupra kunge nesala gekengedi, sun dipru neitamai deipmengedi, amenda taru pio ila kange derinkamenge.

21 Ware neng do yuma, ‘Upu lyoma di penkamne’ tenen, putarepa ila di penge nengda, sun lyemu deiki di penge upu tep, “Dakwapye,” pepra men pertamkamenge. Upu weika di penge nesalada, ‘Aupu deiyoda, nun dipu penmapa cadi, nun deikipu kupkamsera’ tenen, kunkamenge. Angeda tali tep men pepsene. Nimi lyemu deiki di penung upuda, puto weik kurur keca cadi, yuk nesala aupu gekepmengopda, ton nengda mali kange doupmengedi, malipu kupbankamenge.

Ton nengda kange deipra teleppu kupbankamenge. Nimidi penung upu deiki di, nimi yuma lyemdona cap, yuk nimi mali kudina cap kurure. Adeiyo butene keca kurura tep, nimi yumadi sun upu penkunge taru yumada moupra tenengedi penkamenge. Aupu deiyoda, sun deikipu kupkamra tep pepsene.

22 Ware neng do yuma, ner dopmenge nengda, aner pio telep kupra, dipru bouna di dakra kure ner dopmengopda, pio teleppu kunkamrenge. Dumsisipu kure ner dopmumnyopda, ‘E, ne nai bo Allah Yahweh dipapu, pio telep ner karepneue’ tenen, Allah tep, “Telepe,” pepra gispal donkamrume. Angeda, tali tep men pepsene. Dipru bouna di dakra, pio dumsisipu kure nerapuda, Allah Yahweh er dipapu kareserura tep pepsene. Ada pio telep menenga keca utopu kareserure.

23 Nimi tali kankan kunge nesaladi, ikin keca sun damai yaryopda, mali kange doupmengedi, tek sisi sun putanmarepa tenenmange upu pepkunge taruda, ‘Mali upu pepmepepa, melipmanto kusenge nengdi tapsenung’ tenen, moupra tenipterepmengedi, tapnenepnen bangedi, upu bouna dipu penunge.

Dinino, sun isomka nengda, ange utopu men kununge. Ikin keca weik sun damai yaryopda, sun upu pepkunge taruda, ‘Telep upu bouna dipu pepkup,’ tenena pio gum di, ‘Mali upu pepkup do? Telep upu pepkup do?’ tenen, men tenimterenunge. Sun isomka nengdi, tali yu kange doupra, puto di, yuk neng gekenmangai, tali lupra mali upupu pertamnunge.

24 Ton nengda, “E, nun cap kikiman dukdongopra kunkamepe,” pepra nalemna upu penung dinin, sun cap kikiman kunge nesala tep pio malipu kudinunge. Sun cap kikiman kunge nesala sun damaida ikin keca pio weika di yakankamre. Ton nengda, “E, nun cap kikiman dukdongopra kunkamepe,” pepra penung dinin, aneng cap kikiman kunkameng nesalada teleppu kunkamenge.

Ada aneng cap, sun kayapu neng cap, pio telep kupra makudanapu kunkamenge. Anengdi sun kikiman kunge nesala tep, ‘Anengda, nun weitapsilip utopu kununge,’ tenenunga cadi, kange deipmengedi, sun cap kikiman dukdongopra kunge nesala tep telep kudinunge.