Proverbs 2

Raja Salomodi er amutara tara nesala tep, ‘Kael kemna deiyo keca moupra kael kemkamenge’ tenen, pepu upu

1Uo, ne nyapu sunda, nedi penkamsen upuda, sun moupra doronkamrume. Ukupra doproprumudi, sun dipru neitamaida, ‘Angeda ukunkamrume, angeda men kunkamrume,’ pepra pedinkamsen upuda, pio moupra derinkamrume. 2Ange tep nengeda, sun amul deiki di moupra gekepmumdi, ‘Kael kemna deiyo keca kael kemkamep’ tenen, pio piripra kael kemkamrume. Tonda, sun dipru puto kepmumdi, ‘Telep kunada ake, mali kuna ake’ tenen, moupra kael kemkamep’ tenen, teka tenepra kael kemkamrume.

3Ne amutara kurum nesala yumada, sundi, ‘Uo, ila kael kemna keca kael keptepe’ tenen, weika di moromum pangeda, Allahdi akeca karenkamsere. Ange utopu, ‘Telep kunada ake, mali kuna ake,’ tenen, ‘Moupra kael kemkamep’ tenen, weika di moromumnyopda, Allahdi akeca karenkamsere. 4Ukupmantoda, nimidi, ‘Akecada ila mambule,’ teneramidi, inipra derirami keca, ‘Dopropkune’ tenen, pe deipra eramengtopu kupra enkamrume. Ada, sundi, ila kael kemna deiyo keca cap, moupra tenena deiyo keca cap tep, enkamrum kecada, ila kunumna weik gat keca, emas cap, perak cap tep, ‘Doproptene’ tenen, eramengtopu kupra enkamrume.

5Ukupra eramumyane, epmum dingeda, Allah Yahweh er kure keca tep, betapra tenepmumdi, sun kware kunkamsere. Tonda, Allah er ila kael kemna deiyo keca talepra kuretopu, sun peda ila kael kemna deiyo kecapu talepra kunkamrume.

6Apepmasenada, tali tep gume. Deiyoda, ila kael kemne deiyo kecada, Allah Yahweh er dipapu kareserure. Ukupra karesere keca, ton ngeda, ‘Telep kunada ake, mali kuna ake,’ tenen, moupra kael kemna deiyo keca kareserure. Erdi kael kemna deiyo keca cap, moupra tenena deiyo keca cap, nimi nong deiki kareserepa, teka tenepra kael kemnupe. 7Ukupra kael kemenga tep, sun nimi dipru dumsisi kungedi, telep kun kecapu kunge nesala tep, ila kael kemna deiyo keca kareserure. Tonda, dipru dumsisi kunge nesala tep, Allahdi, ‘Ne mawa nesala mali kupra deipnenung’ tenen, melipra kalengserure.

8Tonda sun dumsisi teleppu kunge nesala tep, Allah Yahwehdi melimrure. Ukupra melimya tep, sun anengdi er tepapu, tumi-tumi yuma tenengedi kange deipra kununge. Ukupra kunge nesala tep nengeda, er dipapu melipra kalengrure.

9Ange tep nengeda, sundi Allah tep teka tenepmumnyopda, sunda nimi tep bicau tenepra makun kecada, kael kemkamrume. Tonda, nimi tep upu bokeipkumum dingeda, mok upu pena gum dipapu, tek sisi upupu penkamrume. Tonda, ‘Telep kunada, ake’ tenen, moupra teneprumudi, kael kemkamrume.

10Ange ukupra kael kemkamrume. Sun ukupra kael kepmumnyopda, teka tenepra kael kemna deiyo keca, sun dipru neitamai wekra dinikserepa, bouna di kunkamrume. 11Sun kael kemum keca deiki di, ‘Telepnge ake, malinge ake’ tenen, moupra tenena deiyo keca, sun dipru neitamai konum kuseryopda, sun tep melipra kalengkamsere. Tonda, sun moupra tenemumnya deiki di, sun pedi sun pe tep kalengdankamrume.

12Ange ukupmum pangeda, sun adipapu mali bisi baramengenge tapra, dumsisi bisi ban tarapu kemdongorume. Nimi sun sipyal deiki di mok upu penung nengda, sun cap tonpa kuna pio meme. Sun beipra karenaipu kunkamrume. 13Dumsisi bisipu bamum dingeda, mali kunge nesala cap, tonpa men kunkamrume. Ada, sun anengda telep kun keca tep, ‘Nun songe,’ tenena nengda, ukununge. Sunda, ‘Dumsisi bisida, nun songe’ tenen, kunungna bisipu putarure. Aputarur nengda, sun dipruaida, mali kun kecapu dinikupa kununge.

14Ukunge nengda, sun talepra kunge keca tep, ‘Nunda telep keca talepra kunupa’ tenen, akeca sipu erepra kununge. Anengda, ‘Nun kupe kecada, pio mali kecapu kunupe,’ tenenung dinin, kange di akecapu tupa putarepa, kange deipmengedi, tupa malipu kununge. 15Ukupmantoda, bura tara neitamai nimidi gwalen bisi embaramengtopu, anengdi yuk neng tep, mok upu pepra derinunga deiki di, mali weik kudinunge. Atep nengeda, sundi, ‘Malinge ake, telep ake,’ tenemumdi, dumsisi bisipu embamumnyopda, sun aneng mali kungetopu men kunkamrume.

16Tonda, sundi, ‘Malinge ake, telep ake,’ tenemumdi, dumsisi bisipu embamumnyopda, nimidi tali nyangtamamenge nerapudi, namdona upu deiki di, telep upu pepsenge pangeda, pio men gekenkamrume. Sun anerapudi, dipru gidona upu pepsenga peda, sun upu men gekenkamrume. 17Anerapu yumada, sun nimi konum domi dinin, sun anerapudi, ‘Nunda, nimi konum domupu,’ men tenengedi, sun pumun taru kaber kurami kangepu doungedi, Allahdi peiamu upuda konum yanitamnunge. Tonda, anerapudi, ‘Nun nimi konum dopsei neng cap, kikiman pio kunkamepe,’ perami ngeda, tamdongonunge.

18‘Anerapu cap kikiman men kunkamrume,’ pepmasena deiyoda, ake. Ada, sunda anerapu sun ati tara bemumnyopda, sunda gam kuna tara men kunkamrume. Ukupmumdi, ortara benkamrumai peda, nimi depmengedi wengbarameng kunungnaipu benkamrume. 19Tonda, nimi yala-yala yuma tali nyangtamamenge nerapu damai benkameng nesala yumada, pio tenpu peda ka tamupra men yankamenge. Gam kuna deiyo bisida, pio men benkamenge. Kunungnai bisipu banunge.

20Ukupkamenga tep, ne nyapu sunda, dumsisi penge upupu gekepra dombankamrume. Dumsisi kun bisipu bamumdi, sunda atelep upupu gekepra dombamum pangeda, sun gam kunada, Allah er gam kuretopu, sun peda pio gam kunkamrume. Tonda, Allahdi, ‘Ukunkamenge,’ teneseretopu, dumsisi kunge nesala banung bisipu bankamrume.

21Apepmasena deiyoda ake. Ada, Allahdi peipsutopu pel dopra kunung nesala cap, sun kange dipru telep kupra kunung nesala cap, Allahdi kareramseu mutu neitamaipu pio kunkamenge. Mali kuna gum di, pio dumsisi kunge nesalada, amutu neitamai pio tupa akunkamenge. 22Dinino, nimi yu kunge neng cap, mali kunge neng cap, anesala yumada, nimidi tuai mutu wa peamenga orleramengtopu, Allahdi anesala tep, er men di ketenepra deipu mutupu dopra dokotepkamre.