Proverbs 20

1Yu me jenung nengda, kange yuma yawaraprepa, mali weik kununga cadi, ayu me er sida bir cap, anggur cap, ton yuk yalange yuma capda, weika di jenada meme. Yu me weika di jepmengepa, sun kange yawarapya deiki di, ila upu ding pengedi, mali kecapu talepra kununge.

Yu me jepmengepa, kwisi yung telepnge yuma yawaramamre nengda, sun telep kange pio ton men doungedi, yuk neng tep nyek-nyek penunge. Tonda, yuk neng tep ponapu kununge. Atep nengeda, ‘Yu me jepkup,’ tenepmengedi, mali bisipu embange nengda, kael kemna keca ton talepra men kununge. Sunda, pio walwal nengpu kununge.

2Ukupmantoda, bura tara kuramre pus utopu keca, er sida singa pus ilangedi, yu peredi, ngur-ngur peramretopu, ila nimi deiyo ngebo Raja er yuda, ange utopu kurure. Ada, ila yu singa pusdi, nimi poramretopu, sun Raja neng peda utopu, mali kunge nesala tep yu kuprepa wenemnunge. Atep ware ngebodi aRaja ngebo tep, ‘Yu kupnutue’ tenen, dumtererur ngeboda, er pedi er pe tepapu podidarure.

3Moupra men tenepredi, tali kange doupra walwal deikipu kurur ngeboda, ‘Tupa pedanapu kupedi, podanapu kutepe’ tenen, pio mali upupu pertamrure. Dinin, ila kael nengdi, ‘Dipru dukdongopra kikiman kunada telepe pua,’ tenenunga cadi, yuk nengdi sun tep mali kweipmenga peda, adipapu men deremnunge. ‘Upu deiki di pedana cap, nimi podana capda, ne dabale,’ tenepredi, yuk tara kemdongorure. Atep nengeda, yuk nesaladi sun kael neng tep, pio gispal donunge.

4Wa pen taru pel doptua peda, sunda, ‘Wa penada, nun dabale,’ tenenung nesala kununga cadi, ‘Wa penada nun men penkamepe,’ tenenunge. Er kayapu neng yuma wa peramenge taruda, er ton pio men perure.

Atep nengeda, er pel dona dabal kuramre ngeboda, er kayapu yuk neng sun wa peamenga wisiprepa, kipra jenge taru yumada, er angeboda, jen keca yala-yala yuma ton kipra men jerure. Jen keca putana deikipu kunkamre. Erda, ‘Ware keca jeptene do?’ tenen, epra embarur dinin, nong ton men kupkamre. Erda, jen putana deikipu kunkamre.

5Ukupmantoda, nimidi me derina tep, bunkon paliamengepa, mokon deriruraida, karu pio weik kurura cadi, ame pumbon kure kecada, menmena dipapu, men eptepe. Ange utopu, nimi dipru neitamai teneramenge keca yumada, adipapu menmena men kael keptepe. Dinino, pio ila kael kemamre ngebodi, moupra asipeteprepa, nimi sun dipru neitamai tenenung keca yumada, lap penkamenge.

6Nimi weika di upepra lap penunge. “Gume, nunda pio tek sisa bicau tenesenupa cadi, sun tep pio men tamkamsepe,” penunge. Dinino, sun aneng kan-kan di, nimi pio weik tarada, tali upu deiki di pertamnunge. Dinino, tali upu pertamna gum di, “Tek sisa angeboda ne kabo sisa, ne dipru ngebo kurure,” pepra, pio bicau teneseredi, men tamserur ngeboda, pio er tep epeteptepe dinin, angebo kuretopu, yuk neng ton weik men kununge. Tek sisa bicau tenesenung nesalada, tenpu-tenpupu kununge.

7Mali keca yuma tamredi, pio dumsisipu kure ngeboda, mali keca tenpunge peda talepra men kurure. Erda pio teleppu kurure. Atep nengeda, erdi deipkamre nyapu yumada, telep kun kecapu talepra kunkamenge. Allahdi angebo cap, erdi derinkamre nyapu yuma cap tep, Allahdi sun tep telep kupra derirura deiki di, dumsisi kungedi, teleppu kunkamenge.

8Ware taru di do, ila nimi deiyo ngebo Raja tenpu, nimi mali kuramenge neng yuma upu bongdina tep, bungna keca deiki bukredi, nimi yuma sun kuramengetopu epredi, ‘Ware neng telep kunung do, ware neng mali kunung do?’ tenen, kael kemredi, mali kunge nesala wepra yukai derirure.

9Ware nesala do yuma, nimi tuai mutu kunge nesala kan-kan neitamaida, tenpu kure ngebodi balila kupra upu peptudi, ‘Uo, neda pio teleppu kunedi, ne dipru neitamai yumada, mali keca tenpu peda pio men kunune. Ne tupa gam kunkamne taru yumada, mali kun keca cap, yuk mali kun keca yala-yala yuma cap, pio men kunkamne. Neda dipru dumsisi teleppu kupra kunun ngebo,’ tenepra men peptenge.

Nimi tuai kunge nesala yumada, pio telep nesala ton pio men kununge. Ange tep, sundi, ‘Neda tek sisi telep kuprappu kunune,’ pen upuda men peptenge. Aupu pepmenga peda, tali upupu penunge.

10Uda, nimi yumadi bung keca kunupmengedi, ikin tep eremterena cap, kunumpetena cap, nungterena cap kunge taruda, tek sisipu men kungedi, sun pepu weika di doronunge. Ukunung nesalada, nun nai bo Allah, er si Yahwehdi konum diredi, ‘Angeda ne pio songe,’ tenerure. Nimi ton bung keca kunumna cap, ikin tep, erepra derirterena cap, kunumpetena cap kunge taru di, ‘Nunpu pio weik dopropkupe,’ tenenge neng tep, nun nai bo Allah er si Yahweh tupa-tupa diredi, ‘Akunge ngeda, ne pio dabale. Angeda ne pio songe,’ tenerure.

11Tonda, nundi ware nyapu do yuma, sun kunkameng keca tep, ‘Ware kupra kunkameng do?’ tenen, moupra dinkamepe. Ukupra dinapu kuramepepane, sundi telep kunge keca yumada katuaipu kurure. Ange utopu, sundi amali kunge keca peda, katuaipu kurepa epra kael kemnupe. Angeda men iniptenge.

Ange utopu, nundi wisi neng sun kuramenge keca yuma epmepedi, ‘Sun kunge kecada, pio telep kupra kununge,’ teneptepe. Uteneptepedi, ‘Anengda pio telep kununge, anengda tupa-tupa malipu kupbanunge’ tenen, kael keptepe.

12Nun nai bo Allah er si Yahwehdi, nimi amul ketekepra deiamseuada, gekepmantonge ton ketekepra deiamseue. Ange utopu asuruda, ‘Akeca-keca yuma moupra dingedi, telep kupra kunkameng’ tenen, asuru epmantonge ton ketekepra deiamseue. Ware neng do yuma, amul akaprepa moupra gekenkameng neng cap, asuru di telep kupra dinkameng neng capda, ‘Teleppu kunkameng’ tenen, Allah Yahwehdi abutene keca yuma ketekepra deiamseu.

13Ware neng do yuma, puto di pel dona gum, tali martamnapu kunung nengda, yuk taru sun talenge keca yuma gum kupbarepa, sunda tek sisi kankan kunge nesalapu kunkamenge. Ange utopu, ware nesala do yuma, ‘Pel donada nun dabale,’ tenenge nesala kungetopu men kungedi, telep kupra pel puto di wa pena cap, yuk pel yala-yala yuma cap doramenge nengda, yuk taru sun pel doramenge keca yuma tek sisi nong kupredi, weik kuprepa, tupa-tupa kipra jengedi, sun cap sun nyapsilip yuma cap, sun kayapu yuk neng yuma cap, bokra jenunge.

14Tonda, nimi yumadi akeca-keca yuma deipra kunumamengai, pasar do, kunumna keca deipra kunumameng toko ati do, bengedi, ‘Nun putapser keca kunupkamepe,’ tenepmengedi, akeca deiamre ngebo tep, upenunge. “Uo, akecada pio telep keca guma cadi, er kunumnada kwereipsetumdi, metekapu pepsetumpa, nundi kunuptepe,” penunge.

Dinino, akeca upeptapra kunupmenge dingeda, sun kayapu yuk neng gekenmangai bengedi, “Nunda weik kael neng kunupe. Akecada kunumna yambul deiki dipu kunupmape,” pepra gemenunge. Sun kayapu yuk neng tep, “Teka, akecada dipetepso. Kunumna weik keca dinin, meteka di kwereipseipa kunupsi,” pepra gemenunge.

15Ware neng do yumada, tu pumbon neitamai cap, bung keca deipra kunumameng ati pumbon cap, epra embangedi, kunumna weik keca tep enunge. Ada urasin telep kunumna weik keca, emas cap, gat gel kunumna weik gel, er sida berlian cap tep pio enunge.

Ukunung dinino, nunda nimi ton dumsisi telep kupra kuredi, pio teleppu kurur ngebo, ila kael kemna deiyo upupu perur ngebo tep, enkamepe. Dinino, ato ngeboda, adipapu menmena epra men kael keptepe. Deiyoda ake. Ila kael kemna keca konum kael keami nengda, weik men kununge. Tenpu-tenpupu kununge.

16Tonda nimidi upenunge. Sundi, “Angeboda, ne men kael kepsi dinin erdi, ‘Kunupkune,’ penmar keca tep, ataru kunumna men karepmare ngeda, amenda taru nedipu melipra kareptene,” penunge. Tonda, sundi upenunge, “Gume, angeboda ne walwal dinin, moupra tenipetepnedi, amenda yana karepkamasere.

Ukupkamsera tep, er kunumna keca yo pununa ngeda, nedipu karepkamsene.” Ware neng do yuma, sundi aupu utopu upepseryopda, ‘Tek pepmasera,’ tenena pio gume. Nimi ton atopu upu pertamrur ngeboda tek sisi ila kael kemna ngebodi men perure.

Atep nengeda, utopu upu talipu pertamenge neng tep, telep ngeda, sun bung keca do, opkal do, sun mambul kunumna weik keca do yumada, dopra mawa derinkamrume. Deiyoda ake. Sundi, “Abung keca yo punupkamne. Ne dipapu animi bo ngebodi dopropkur bung kecada, kunumna men karepseryopda, nedi punupkamsene,” pepra peptu dinin, amenda taru tek sisi men karepseryopda, er keca mawa deipkamrum ngeda, tamupra doronkamrume. Angebo erda, tek sisi ila kael keamu ngebo gume.

Ange utopu, mali kunge nerapu tep, “Sun kunumna gum dipu, tali dopropkameng keca tep nengeda, nedipu kunupra punupkamsene,” pepyopda, sun bung keca deiyo nengdi, er pe kunumna weik opkal ton dopra mawa derinkamrume. Sun keca tali dopramsengetopu, aupu pertamre ngebo yo pununange tamupra men karepseryopda, er pe keca talipu dopropkamrume. Sun keca yumada pio etetemnapu kunkamrume. Telep ngeda, er mambul kecapu tamupra doronkamrume.

17Tonda nimi tenpu ngebodi, er kayapu yuk neng tep, tali upu deiki di mambul kunumna weik keca cap, jena pio telep keca cap yuma dopropkamre. Ada, tali upu pertamrura deiki di dopropredi, atelep jen keca jepredi kange derirure.

Dinino ukupmantoda, amenda taru er jenkamrenge yumada, dato-dato di er sipyal pumbonda gel wenenga wengamretopu kunkamre. Deiyoda, mok upu pepka deiki di telep keca yumada dororamu dinin, amenda taru ikin keca weik er damaipu yankamre.

18Sundi, ‘Ila mambul keca ton ukuptepe’ tenen, keteneipmumnyopda, telep ngeda kapul taru di, yuk ila kael keamenge neng yuma tep lap pepmumpa, upu karena cap, “Ukupkamape,” pepra, lap pena cap, pepmumdi, akeca yumada pel donkamrume. Ange utopu, yuk ila kael keami neng tep, ‘Porbenkup,’ tenepmumnyopda, telep ngeda, kapul taru di, “Ukupkamepe,” pena cap, upu karena cap, kunkamrume.

Sun ila kael keami nengdi penkamseng upu moupra gekepmumnya deiki dipapu kunkamrume. Moupra tenimpetena gum dipapu, tali lupra kuna menmena, ‘Mambul kecada tali lupra kunkamepe,’ tenenada pio gume.

19Nimi ton yuk neng sun gekena tep, ‘Tali upupu pertamkamne’ tenen, putarepa kurur ngebo, er damaida, sun mambul upu ton pio men penkamrume. Atep, angebo er gekenaida moupra tenemumdi penkamrume. Ange gum dingeda, ‘Nimi ton tali upupu doupra perbetenepa, nimi yuma kael keptenge’ tenen, putarepa perbarure. Ukupyopda sundi, ‘Aupuda katuai dipapu men penkamepe,’ teneramrumnge yumada, erdi tali lupra katuaipu perbarura tepa.

Atep, atali upu doupra perbarur ngebo gekeryaida, sun mambul upuda men penkamrume. Tonda ange utopu, upu yuma dopra, ‘Yuk nesala weika di gekenkameng’ tenen, putarepa kure ngeboda, kikiman kuna gume. Sun mambul upu dopra angebo damai men pepembankamrume. Ange tep, ‘Yuk nengdi tali penge upu gekepra pepembankamne,’ tenerur ngebo cap kikiman wisipra pio men kunkamrume.

20Ukupmanto ngeda, lukunda taru neitamai weica tapredi kunukrepa, akeca yuma nimidi men diramengtopu, ware nesala do yuma, sun nin yapu cap, sun nai yapu cap tep, mali upu pepra wipdongopmengopda, Allahdi anesala yuma tep menmena wenepra poprepa, depkamenge.

21Tonda tenpu mi do, kaber ngebo do, kaber ner do, er nai bo konum depyopda, er nai bo taleamudi, ‘Ne mambul kunumna weik keca,’ teneramu keca yumada, er midi menmena weika di dororedi, gum kupra deipbankamre. Pumun taru er nai bodi taleamu taruda akeca yuma pio teleppu dekperamu dinin, akaber ngebo do, kaber ner do, menmena dopropredi talepre taruda, akeca yuma gum kupra deipbaramyane, pio gum kudorure.

Menmena taru akeca yuma dopropre taruda, kange deipkamre dinin, amenda taruda, akunumna weik mawa keca bokra karepropnen baramya deiki di gawal dakrepa gum kupkamre. Atep, amenda taru ikin kange doupra kunkamre.

22Nimi tenpu ngebo ton, sun tep mali kupra deipseryopda, sundi tamupra, ‘Angebo tep, er peda mali kupra deipkupe,’ tenepra men penkamrume. Angebo tep, menmena kwangdana meme. Telep ngeda, go tapra diramumpane, Allah er si Yahwehdi angebo tep, tamupra wenepkamre. Amali kwamserenge tep, sun pedipapu tamupra menmena kwang men dangkamrume. ‘Allahdi tek sisi aneng wenepkamre ja’ tenen, go tapra dinapu kunkamrume.

23Tonda nimi weika di tali keca kunge nengdi ukununge. Bung keca kunumna cap, ikin tep kunumpetena cap, nungna cap kunge taruda, tek sisinge men kupmarepapu, talipu “Akeca ikinda ake. Akeca er kunumnada ake,” pepra peptapmengedi, sun kunumna keca talipu weika di doronunge.

Ukunung dinino, nun nai bo Allah, er si Yahwehdi anesala kunge keca diredi, ‘Angeda pio ne songe,’ tenerure. Allah Yahweh erda, bung keca kunumna cap, ikin tep kunumpeten taru cap, nungne taru cap di, yuk neng keca tali upu peptapra doronung neng yuma tep, tupa-tupa diredi, ‘Ne songe,’ tenerure.

24Nun nai bo Allah, er si Yahwehdi, nun kunkamep keca cap, pel donkamep keca cap, bisi embankamep mutu yuma capda, erdi konum kael keamseu. Allah Yahwehdi, ‘Anesalada, ukunkamenge, amutu ton embankamenge,’ teneramudi, amenda taru nundi kunkamep keca cap, nun damai yakankamser keca yuma capda, konum tenepra keteneiamseua tep, nun pe kange tenena deiki dipapu, ware kupra kael keptepe do? Gume, nundi men kuptepe.

25Ton nesalada, sundi sun telep keca tep, tenpu-tenpu nengdi moupra men tenepmenga deiki di, sun keca menmena yuk neng cap, Allah cap tep, “Sun tep akeca karenkamepe. Tonda Allah tep karenkamepe,” pepra pedina upu deiki di pertamnunge. Anesalada pio moupra men tenepterepmengedi penunga cadi, amenda taru kange di ton cap tenipetepmengedi, ‘Uo, apedina upu men pepkune,’ tenepmengedi tamnunge.

Ada pio mali. Anesaladi ukununga utopu, ma mankau di lakra barepa, pena pepmanga pumbon wekredi, youramre. Ange utopu, nimi tenpu ngebo ton, kapul taru di moupra men tenipterepredi, “Allah cap, nimi yuk neng cap tep, ukupkamne,” pertamrur ngeboda utopu kurure. Telep ngeda, kapul taru di moupra teneptenge.

26Ukupmantonge ton pepkusene. Sun gandum wa pen nesaladi, gandum du deiki bol koptapmengedi, du telepngepu wepra, yukai mawa derinunge. Ange utopu, ila nimi deiyo ngebo Rajada, ila kael ngebo kurure. Nimi deiyo ngebo Rajada, ila kael ngebo kuredi, tek sisi pio moupra dirura cadi, telep nesala kuramenga kan-kan di, mali kecapu talepra kunge nesala yumada, wepra yuk tara deribaredi wenemrure. Ukuredi mali kun nesala yumada, telep kunung nesala kan-kan di wepra yukai deipredi wenemkamre.

27Ukupmanto ngeda, nimidi weica upmengepa, sun keca wangamredi iniamre keca yuma, katuai kuprepa telep kupra epmengedi doronunge. Ange utopu, nun nai Allah Yahwehdi, nimi dipruai di mali kupra inimamenge keca yuma epra kael kemrura cadi, ange yumada, katuaipu kurure. Nimi dipru neitamai di mali kupra inimenge keca yumada, Allah tep men iniptenge. Allah Yahwehdi nimi dipru neitamai kure keca yumada dirure.

28Tonda, nimi deiyo ngebo Raja tenpu di, er talepra kunkamre mutu neitamai di penkamre upu yumada, er talenkamre mutu nesala yuma tep, bicau teneredi penkamre. Ada, ‘Mali kupmanto ngeda tapmengedi, telep kun kecapu talepra kunkameng’ tenen, er talenkamre mutu neitamai kunkameng nesala yuma tep, bicau teneredi penkamre. “Amutu talepra kunkamsena tep, sunda pio telep kupra kunkamrume,” pepra pedina upu pediramretopu, pio amutupu talepra kurure.

Ukupra kurepa, er amutara kunge nesala yumadi, er tep kange deipra kungedi, er pere upu yuma tep men yaninunge. Telep kupra kunge Raja nengdi, sun talenge mutu go weika di kareprepa, gam kunkamenge. Tonda, keteng tamun weik neitamai di sun mutupu pio talenkamenge.

29Kaber ngebo er nong puto kurur ngebo tep, yuk neng yumadi er tep kange pio deringedi, ‘E, angeboda pio teleppu kurure,’ tenenunge. Ange utopu, wisi neng peda, telep kupra dumsisipu kuramengepa, kul potong pare neng tep, yuk nengdi, “Anengda pio telepe,” pepra gispal donunge.

30Nimidi, mali kupmengepa, nimi deiyo nengdi sun nong deiki wenemna keca weik deipmengopda, adeiki weika di kael kemnunge. Sun men taru di malingepu talepra kuraminge yuma tamnunge. Wenemna deiki di nimi dipru yumada pio telep kemdirure. Ange utopu, nimi ton mali kun kecapu kupra kurur ngeboda, nimi deiyo nengdi, tomopmengedi wenepra ikin keca weik sun nong deiki derinunge.

Ukupmengopda, amali kecapu talepra kure ngebo kael kepredi, amenda taru teleppu kunkamre. Deiyo nengdi er tep wenemenga deiki di, er dipru neitamai teneramre mali keca yumada, pio gum kupbankamre.