Proverbs 21

1Allah Yahwehdi, me ketekepra deiamu taru di, “Ne tenepnetopu telep kupra embankamrume,” peiamupa, ukutaru abisipu embarure. Ange utopu, ila nimi deiyo talepra kunge neng, sun Raja neng peda, Allah Yahwehdi sun dipru talerure. Atep nengeda, Allahdi, ‘Ange kunkamre, ange men kunkamre. Ukupra kuredi, anesala talepra ukunkamre,’ tenen, kange deirurtopu, Raja neng sun dipru talerya deiki di, tamupra deiprepa, tuai mutu nesala talenunge.

2Nimi yumadi, sun yuk-yuk tenepra kunge keca yuma tep, ‘Gume, nunda telep kupra kunupe,’ tenenunge. Dinino, nimi sun dipru neitamai di, ‘Adeiyo tep apel donkamne, adeiyo tep aupu penkamne,’ tenepmengedi, kurameng keca yumada, katuai men kurur dinin, nimi tuai nesala, sun dipruaida, Allah Yahweh er dipapu kael kemserure. Atep, ‘Sun dipru telep do, mali do?’ tenen, asimterena deiki di kurpetenkamsere.

3Dumsisi telep kupra, nimi tep upu bongdina cap, telep kupra kuna cap kumepyopda, Allah Yahweh er kange deriserure. Akupenge tep nengeda, ila di kange deriserure. Dinino, nimidi, ‘Nun mali kunup keca kaukepkamser’ tenen, gam keca popra, uku dongonung ngeda, yambula dipu kange deriserure. Allahdi, ‘Angeda ila mambule,’ teneserurada, dumsisi kuna pua.

4Nimi ton sun asuru gwengtongedi gemenung nengda, sundi sun pe dipru eremdanunge. Ukupra kununga deiki di, pio malipu kununge. Sun dipru pio malipu kunge nesaladi, akeca yuma kununge.

5Nimi ton, ‘Ne kupkamne kecada ace,’ tenemretopu, pio pe deipra pel telep kupra dorur ngeboda, er teneramre kecapu, tek sisi er damai yankamre. Atep, er pel donkamrenge yuma nong kupkamre. Dinino, yuk nengdi, ‘Gume, akeca ton ukuptepe,’ tenenge keca yumada, nong men kunkamre.

Deiyoda, sun kange moupra tenena gum dipapu, ‘Berbera dipu, apel dopedi gawal dakamepe,’ tenengedi, telep kupra pel men donunga cadi, sun talenung keca yuma gum kupbankamre.

6Tonda tali bunga keca tepapu, ‘Akeca dopropnedi, isomka kepkamne,’ pepra, mok upu perur ngeboda, akeca-keca weika di doror dinin, er dororur keca yumada, gum kupbankamre. Ukupmantoda, keteng dorepa, tu puto welenmarenge, menmena gum kupbaramretopu, mok upu deiki dororamre keca peda, gum kupkamre. Tonda, nimidi pena deipmengepa, bura tara gam kure keca mangkau di embarepa, youpra poramretopu, mok upu pengedi, bung keca doronunga deiki di dena damai bisipu banunge.

7Nimi ton tupa-tupa mali kun kecapu kungedi, yu tenepra kunung nengda, nimi deiyo nengdi penge upu, kware tenepra men kununga cadi sundi, ‘Telep kupra kunkamepe,’ men tenenunge. Mali kecapu talepra kununga cadi, sun malipu kununga deiki di, ikin keca weik sun nong deiki yakankamra tep, depkamenge. Sunda, podan nesala utopu kununge. Ukupmantoda, sundi mali kunga deiki di, sun pedi sun pepu podidanunge.

8Mali kun keca tep pio tupa tenepra kunge nesaladi, tek sisi mali kununga cadi, sunda gwalin bisipu embanunge. Sundi, yuk nesala tep, tali upupu pertamnunge. Dinino pio dumsisipu kupra kungedi, kwirye bisipu embange nesalada, pio teleppu kununge. Sundi kunge keca tep, ‘Malinge ace,’ men peptepe.

9Nimi cap, sun nerapu cap, pio pala weik urasin telep ati kikiman kutenge dinin, aneng sun nerapudi, sun nenge yapu penge upu yuma men gekemengedi, bisipra mali upupu pengopda, upu deiki di pangdanapu kunkamenge. Ukupmengopda, anengda utenenunge. ‘Gume, telep ngeda, aurasin telep ati tapmepyopda, im dup ati, alau tara kumun damaipu nun yuk-yuk kunkamepe. Alau ati kumun damaida, malyai dinin, nun yuk-yuk kutepyopda, kange deipra kunkamepe,’ tenenunge.

10Nimi ton tupa-tupa mali kun kecapu kurur ngeboda, amali kun kecapu tupa teneredi, er kange dipru neitamai di, ‘Mali kun kecapu kupbankamne,’ teneredi putarure. Er kayapu neng sisa, er cap kikiman kunge neng tep, bicau tenepra pio men melimrure. Sun damai ikin keca kuptua peda, amali ngebodi sun tep, pio men melimkamre.

11Telep kun keca tep, mali upu pepra nyek-nyek penge nesala tep, nimi deiyo nengdi wenepmengopda, yuk neng ton, moupra men kael kemenge neng epmengedi, yambula di kael kemnunge. Dinino, ila kael ngeboda, telep kupra kuramre ngebo tep, lepsisikra peteremnupa deiki di, menmena telep kupra kael kemrure. Mankau di mali kuprepa, sun deiyo nengdi, “Ukupkamrume,” pepra wenepyopda, aupu gekerya deiki di telep kupra kael kemrure.

12Allah erda, mali kun keca tenpungepu doupra men kurure. Erda pio dumsisi kuna deiyo ngebo kurure. Ukupra kuredi, sun mali kun kecapu talepra kunge nesala tep, ‘Ware mali keca ton kunmang do?’ tenen, Allahdi sun kunung ati tep, moupra kalengredi telep kupra dinkamre. Ukupra diramrepane, amali kun kecapu tupa kupbaramengopda, anesala tep wenepredi portamrure.

13Ware nesala do yuma, puto boun ngebodi, er putaramre keca tep, ‘Uo, ne ton melipneso,’ pepra, mali pepra mororamre keca tep, moupra men gekepmengedi, amul kinipdongopmengopda, amenda taruda, sun pedi pio kange mun kange doupra, tupa mali peptenga peda, yuk nesaladi sun tep pio men melimkamenge. Kaukemnapu kunkamenge.

14Nimi ton yu penmare ngebo tep, yuk neng dinmangai gum dinin, angebo tep telep keca inipra karepmum pangeda, ka di tamupra dipru bouna di kupredi, er yu tenerenge tapredi, sun cap kikiman telep kupra kunkamre. Yu tenesenge neng tep, telep karen keca karepmum pangeda, akeca dopropredi yu tenenmare ngeda, dipru boun kuprepa, ka di tamupra teleppu kunkamre.

15Tonda, nimi mali kupmengepa, wenemna ati neitamai dopra bengedi, ‘Upu moupra lepsikamep’ tenen, upu penunge. Ada, aupu pedanmanga neitamai di, sun upu lepsikra bongdina deiyo nengdi, tek sisi sun kupmangetopu wenepra upu bokeipmengopda, sun dumsisi kunge nesala yumadi, pio kange deipra teleppu kununge.

Dinino, nimi ton tupa-tupa malipu kupbarur ngeboda, sun upu bongdina deiyo nengdi wenepmengepa, aupu moupra gekepredi, ‘Uo, angeda, ne kupsinge tep, telep kupra wenemna upu pepmanenge,’ tenepredi, aupuda gekepra lungdarure. Tonda, ‘Ila di wenepkamnenge’ tenen, kware weik kurure. Mali kurur ngebodi, ‘Aupuda ne songe,’ tenerure. ‘E, angeda tek sisi pepmanenge,’ tenepra kange pio men derirure.

16Nimi ton telep kupra men tenimterengedi, tali kange doupra mali-malipu kunge nesalada, ‘Amali kupenge tep, amenda taru ware kupkamser do?’ tenena gum di, mali bisipu dombanung nesalada, tek sisi nimi deramenge nesala sambala kungaipu banunge.

17Ware nesala do yumadi, ‘Uo, pio telep kecapu talepmepya deiki di, isomka nengpu kunkamepe,’ tenen, dipru engepra kunge nesalada, amenda taru tali kankan kunge nesalapu kupkamenge. Deiyoda, atelep keca doronunga deiki di, sun pedi talerami keca cap, co bo yuma cap gum kupbarepa, kankan kunge nesalapu kunkamenge.

Ada, kunumna weik keca cap, anggur tapu du mokon kunumna cap, yuk tali keca kunumna cap deiki di, sun talenung keca yuma gum kupbarepa, isomka neng men kunkamenge. Tali kankan kunge nesalapu kupbankamenge.

18Nimi ton tupa-tupa pio mali kun kecapu tenepra kupbange nesalada, Allah Yahwehdi amali keca talepra kunge nesala yuma tep, ila di wenepredi poptapkamre. Ada, ukupkamra deiyoda, mali kunung nesala yumada, poptapredi, telep dumsisipu kupra kunung nesala yuma tep, telep kupra deipredi lyepropkamre.

19Nimi ton, ner dopredi, ‘Ne cap, ne ner cap telep kupra kikiman kunkamneme’ tenen, er cap, er ner cap tonpa kurung dinin, angebo, er nerdi, mali kange douredi, er nenge pere upu bisipra deremnapu kuryopda, mali kange doupredi, tupa-tupa, “Kandi kunmarum keca yumada, deiyo warya tep do? Ange kuna yumada, ne pio dabale,” perure.

Ange utopu perur ner, er nengedi, er pe yuk kange deipredi, ‘Gume, telep ngeda, ne pe yukpu kunkamne. Mo pio cemna gum di, me pio men kurepa, yuk nesala ton men kunge mutu, katuai mutu neitamaipu, ne yuk kunkamne. Aner cap kikiman tupa men kuteneme,’ tenerure.

20Nimi ton telep kupra kure ngeboda, er pel dopra kurura deiki di, kunupra talere keca yumada, er ati telep kupra derirure. Ukurya deiki di, telep ati neitamai kurure. Tonda, erdi talerur keca yuma weik kupbankamre.

Dinino, walwal dipu kunge nesalada, sun pel dopmengedi doronung co boda, adipapu sun putan keca kunumdonga deiki di, gum kupbarepa, tenpunge peda mawa ton men derinunge. Atep sun doronge kecada, menmena di gum kupbarure.

21Ware neng do yuma, ‘Telep kun kecapu kupbankamne’ tenen, putare pangeda, ‘Allahdi peseretopu kunkamepe. Tonda yuk neng tep bicau tenepra melimdanapu kunkamepe,’ tenepmengedi, akeca tepapu domembanung nesalada, teleppu kunkamenge. Sundi gam kuna deiyo keca cap, Allahdi, ‘Ukunkamenge’ teneamseu deiyo keca cap doronkamenge.

Tonda, yuk nesaladi sun tep, ‘Uo, anesalada, tek sisi teleppu kununge,’ tenepmengedi, sun tep gispal donkamenge. Telep kupra kuna deiyo keca dopronung nesalada, sun kupbankamenga tep, goda Allahdi lyom di kareprepa, pio teleppu kupbankamenge.

22Ila kael deiki di pio telep kupra kurur ngeboda, er podan neng, sun ila kota mutu neitamai, puto jen talen nengdi kalekra dinmatenga peda, er angebo betudi amutu yuma popra, sikke buktapkamre. Er podan nengdi, ‘Gume ila lyom gel beilya cap, gel ati cap dopmupka neitamai kunupa cadi, ware nesaladi popbisipsetenge do, gume,’ tenerami dinin, ila kael ngebodi ange yuma uruptapredi, anesala yuma tep popbisipkamre.

23Ware neng do yuma, sun upu pepkunge taruda, ‘Tali lupra mali upu pepnup’ tenen, sun lyemu moupra kalengdangedi, ‘Upu weika di men pepkupe,’ tenepra, meteka dipu penge nengda, ikin keca weik sun damai men yakankamre. Upu weika di tali lupra penge nengda, ikin keca, sun damai yankamre. 24Nimi ton sal nong-nong kungedi, dipru erepra gemenapu kunung nengda, ‘Menmena, mali kuptepe’ tenen, balila weik kupra, mali kun kecapu talepra kununge. ‘Ukupmepepa, ikin keca nun damai yankamser do?’ pio men tenenunge.

25Pel dona tep nengeda, ‘Ne dabale, pel men donkamne,’ tenerur ngeboda, pel yala-yala yuma, telep kupra men dorure. Atep, er putan keca tep, ‘Uo, neda akeca cap, ange ton cap tapakra doproptene’ tenen, putarepa, mali kun kecapu talepra kunkamra deiki di, er pedi er pe tepapu podidankamre.

26Nimi ton er kupbankamre taru yumada. ‘Pelpu donada, ne dabale, talipu kunkamne,’ tenerur ngeboda, erdi, ‘Uo akeca ton doproptene’ tenen, putare keca yuma tep, pio tenenapu kunkamre. Ware keca do yuma, yambula di ton konum dopropyopda, ‘Akonuma,’ men tenenkamre. Erda, ‘Uo, weika di ton cap tapakra doproptene’ tenen, ila di putarepa, pirirterenapu kunkamre.

Dinino, Allahdi, ‘Tuai nesala yumada, ukupra kunkamenge,’ teneamseutopu, angepu tenepmengedi, teleppu kunge nesalada, yuk neng tep, ila di bicau tenepmengedi, karenunge. ‘Nepu dopropkune,’ tenepra men kununge.

27Mali kecapu talepra kure ngebodi, ‘Ne mali kunun keca, Allahdi daepneredi, kaukepkamner’ tenen, telep keca duyaredi, Allah tep karepya peda, Allahdi angebo tep, kange pio men derirure. Ange gum dinin, amali kure ngebodi, ‘Akeca Allah tep karepnyopda, Allahdi telep kupra deipneredi, er keca weika di melipra karenkamnere,’ tenepredi, er dipru neitamai mali kure keca yuma iniptapredi, atenena deiki di, Allah tep karepyopda, Allah Yahwehdi angebo tep, kange pio men derirure. ‘Angeboda ne songe,’ tenerure.

28Nimi upu lepsisikra bongdina tep bulupmenge taruda, mok upupu pertamrur ngebo tep, sun deiyo nengdi, “Kanda dimpepo, upu ton cap dukdongopra men penkamrume,” pepmengedi, er pere upu sengdongonkamenge.

Dinino, nimi ton upu pepkamarenge yuma moupra tenipetepredi, ‘Deiyo ake’ tenen, betapra teneredi dumsisi upu perur ngeboda, sun upu bongdina deiyo nengdi, “Telepe, kanda upu ton cap dukdongopra pepbankurume,” penkamenge.

29Nimi ton tek sisingepu kurur ngeboda, ‘Telep kun kecada ake, mali ngeda ake’ tenen, er kunkamrenge yuma tep, moupra tenerya deiki di, ange yuma ketenemdirure. Dinino, mali kecapu kure ngeboda, ‘Yuk nesaladi ne kune keca kael kepnenung’ tenen, balila weik kuredi, sal nong-nong kupra gemerure. Tek sisi er kunkamre keca kapul men tenerur dinin, er urasinda yupropredi, kwar kuna gum nesala kungetopu kupra, tali lupra embarure.

30Ware nesala do yuma, sundi, ‘Ukunkamepe, telep kun kecada ake,’ tenepmengedi, ‘Ware kupra kupkamep do?’ tenen, ila kael kemenge neng cap, kikiman upu sisiktengedi, pe deipra, pio piriptereptenga peda, Allah Yahwehdi, ‘Ukunkamne,’ teneamu keca tep, tuai nesaladi bisbisa men kaptenge. Allahdi teneretopu kurura tepa.

31Sun mar podana tep ban nengdi, ‘Nun kuda bali deiki bukmepedi, nun podan nesala tep porbenkamep’ tenen, akeca-keca yuma ketenepra betenga peda, sun puto deiki dipapu, sun podan nesala tep men popbisipkamenge. Allah Yahweh, er puto dipapu, ‘Anesala popbisipkamenge. Atara nesaladi ortara nesala poptapkamenge,’ tenepmaretopu kunkamre. Allahdi tenepmaretopu porbisinunge. Nimidi tenipeteptenge dinin, Allahdi teneretopu apio kunkamre.