Pro 22 | XteSC | STEP | Kan bung keca pio weika di deriramemdi, isomka kuramem ngeda, yambul mambul dinin, telep kupra dumsisipu kumumpane, yuk neng epkengedi kan tep, “Angeboda pio dumsisi kupra kurura tep, telep ngebo kurure,” pepra, kan si eremkengopda, pio ila telepe. Ange utopu, yuk nesala yumadi, kan tep, ‘Erda telep kurur ngebo’ tenen, kan tep gispal dokengopda, ada pio telepe. Urasin telep kuna cap, kunumna weik keca, er sida emas cap, perak cap akaptua peda, ada yambul teleppu kurure. Dinino, ila mambul ngeda, yuk nengdi, kan tep gispal donkamkeng ngeda, ada pio telepe.

Proverbs 22

1 Kan bung keca pio weika di deriramemdi, isomka kuramem ngeda, yambul mambul dinin, telep kupra dumsisipu kumumpane, yuk neng epkengedi kan tep, “Angeboda pio dumsisi kupra kurura tep, telep ngebo kurure,” pepra, kan si eremkengopda, pio ila telepe.

Ange utopu, yuk nesala yumadi, kan tep, ‘Erda telep kurur ngebo’ tenen, kan tep gispal dokengopda, ada pio telepe. Urasin telep kuna cap, kunumna weik keca, er sida emas cap, perak cap akaptua peda, ada yambul teleppu kurure. Dinino, ila mambul ngeda, yuk nengdi, kan tep gispal donkamkeng ngeda, ada pio telepe.

2 Isomka nesala cap, bung keca talena gum di, tali kankan kunge nesala cap, sun butene yumada utopua. Deiyoda, sun nai bo Allah Yahweh, er dipapu sun buteneda ketekepra deiamu.

3 Kange pio moupra tenepredi, telep kupra kurur ngebo puda, er benmaryai mali kun keca akupmarepa, epredi moupra kael kepyopda, er adipapu go dorure. ‘Amali kun keca damai men kunkamne’ tenen, mepra yukai barure. Dinino, sun walwal nesalada, moupra men tenepetepmenge dipapu, ‘Abisida tali lupra bankamne’ tenen, banung nesala yumada, ila ikin keca pio weik doronunge.

4 Allah Yahweh er tepapu, ‘Ila mambul’ tenen, Allah tep kware kurepa, dipru dakra bouna di kunge nesalada, Allah cap, yuk nesala cap, sun amutara kurur ngebo puda, pio ila kange deipkamre. Amenda taruda, Allahdi melimredi, gam kuna deiyo keca cap, menenga keca cap karenkamre. Tonda, yuk nesaladi, sun telep kupra kunge neng tep, “Sunda telep kupra kununge,” pepra, sun tep gispal donkamenge.

5 Pena pemenga pumbon mankau di wekrepa youramretopu cap, tonda co tungkul deiki yan yanipmengepa poramrenge utopu cap, mankau di takke keca deiki yanipmengepa poramretopu, sun mali kun kecapu talepra kungedi, malipu kupbanung nesalada, sun amenda taruda, pio ikin kecapu talepra kunkamenge.

Dinino, ware ngebo do yuma, ‘Ne pe mali kweipdanepa, ne dipru cap, sambala cap, mali kweipdanun’ tenen, pio moupra kalengdarur ngeboda, amali kun keca damai men barure. ‘Mali keca di ne dipru gidonerepa, mali kupnun’ tenen, gopra yuk telep bisipu embarure.

6 Sun nyapu yuma tep nengeda, ‘Telep kun kecapu talepmengedi, telep bisipu benkameng’ tenen, moupra peteremkamrume. Ukupmumdi, sun nyapu yuma tep wenepra peterepmumpa, sun telep bisipu embankamenge. Sun metek nyapu kunge taru neitamai dipu, telep kupra peteremrumnyopda, amenda taru sun nyapu konum nepmengopda, dumsisi bisipu embankamenge, men tamkamenge. Sun mankau di ke tep, yuk mali bisi bandenkapmengedi, mali kupmenga peda, amenda taru ka di ton cap, moupra tenepmengedi, amali kun keca tapmengedi, tamupra telep kun bisipu yakankamenge.

7 Sun isomka nengdi, kankan kunge nesala tep talengedi, sun nong deiki ikin keca derinunge. Tonda, nimidi talenge keca tep, ‘Ne ton bon dopropkun,’ moropra dororur ngeboda, er tep karerya deiyo ngebodi, bon mororur ngebo, er deiki tara kunkamre.

Nimidi sun putan keca tep, ‘Uo, kandi akeca ke tep kareamnemempane, amenda taru tamupra karepkamkene,’ pepra moropmengepa, akeca taleamya deiyo ngebodi, sun moropmenge keca bokra karerur ngebo, nimi deiyo utopu talepra kuredi, sun moronge nesala deiki tara kuredi, “Ukunkamrume, ukunkamrume,” pepra kunkamre. Sunda, er amutarapu kungedi, tali pel melimna nesala utopu kunkamenge. Bokra karena deiyo ngeboda, sun deiyo ngebo utopu kunkamre. Bon moronge nesalada, er amutarapu kunkamenge.

8 Ukupmantoda, nimi ton mali yal kecapu kourur ngeboda, nong kin taru yumada, malingepu kinkamre. Ange utopu, ware neng do yuma, sun mali kun kecapu talepra kupbaramenganen, amenda taruda, ikin keca weik sun nong deiki yankamre. Ke kunkameng taru tep, amali kunge nesaladi, yuk nesala tep, yu kurepa, sun nong deiki ikin keca weik derinkameng dinino, amenda taru Allahdi amali kunge nesala wenepra poptapkamre. Ukupkamre taruda, anesala yuma gum kupra deipkamre.

9 Nimi ton er dipru telep kupra kuramre ngebodi, sun tali kankan kunge nesala tep, bicau teneredi, er talepra kurur jen keca neitamai di bokra, kankan kunge nesala tep kareredi, telep kupra melimrura cadi, Allah Yahwehda, angebo er damai yakaredi, pio melimkamre. Ada er dipru telep ngebodi, akankan kunge nesala tep melimrur utopu, Allahdi angebo tep, weika di melimkamre.

10 Nimi ton mali kun kecapu tenepra kungedi, yuk nesala tep, ‘Nun songe,’ tenepra kungedi, mali upu cap, nyek-nyek pena upu cap, luludina upu cap pengedi, yuk nesala sun nong deiki derinung nesalada, weneprapmumdi, “Sunda nun cap kikiman kuna gume. Sunda, yukai bendopso,” pepkamrume. Upepmumpa, sun kan-kan di yukai konum bendopmengopda, sun yumada, kange deipra teleppu kunkamrume.

Mali kuna cap, mali upu pena cap kunge nesala yumada, yukai enepra dokotepmumdi, sun yuk nesala yumada, kange deipra kunkamrume. Nimi podana cap, upu deiki di pangdana cap, amali kun keca yumada, gum kuprepa, teleppu kunkamrume. Dinino, sun mali kunge nesala cap wisipra tupa kumumnyopda, sun tupa ikin kecapu kunkamsere.

11 Nimi ton er dipru dumsisi kupra kuredi, telep kun kecapu putarepa, kange derirur ngeboda, erda amutu ila nimi deiyo Raja ngebo, er kabo sisa kunkamre. Ange utopu, amutu ila nimi deiyo talepra kure ngebodi, atelep upupu perur ngebo tep, kange deipredi, ‘E, angeboda telep upupu perura cadi, ne kabo sisa kunkamnere,’ tenenkamre. Amutu Raja kure ngebodi, atelep upu perur ngebo tep, kange deipra kunkamre.

12 Ware nesala do yuma, sundi ila kael kemna upupu penge nesala tep, anesala cap, sundi penge upu cap tep, Allah Yahweh diredi, ‘Anesala melimkamne’ tenen, pio moupra kalengrure. Dinino, nimi ton tali minina upu cap, mok upu cappu peptapra embarur ngeboda, Allahdi angebo tep, ‘Er tenere keca cap, er kunkamre keca cap tep, gum kupkamre’ tenen, angebo er nong deiki ikin keca deiprepa, gum kupbarure.

13 Pel yala-yala yuma, ‘Ne dabal tep, apel men donkamne,’ tenepra kure ngeboda, ati pumbonpu kuredi tali pertamrur upuda ake. Tek sisi men kupmarepapu, “Uo, bura benyopda, ila yu kure pus utopunge, er sida singa pus, bura tara tekmarya di banepane, bisi neitamai di popnurure,” pepra tali upupu perure. Ange utopu ton, “Uo, nimi ati weik dopra kunga neitamai, bisi benyopda, mali nengdi yu kuprepa popnenung,” pepra, tali upupu perure.

14 Tonda tali-tali nyangtamenge nerapudi penung upu, sun walwal nengdi gekepmengopda, podidanunge. Ukupmantoda, nimidi tu palipmengedi, ila bon kepra iniptapmengepa, yuk ngebo tali mankau di embarepa, apumbon saka poramretopu, sun tali nyangdarameng nerapudi penge upu gekenung neng tep, Allah

Yahwehdi amali kunge neng tep, er yu sun nong deiki deipredi, wenepra poptapkamre. Allahdi wenepra poptapkamre nengpu, tali nyangtamamenge nerapudi penge upu gekenunge.

15 Ange utopu, sun nyapu yambul taru di, ‘Gume nunda mali kun kecapu kupbatepe,’ tenepra kunung kecada, sun dipru neitamai palerure. Dinino, sun nai yapu cap, sun nin yapu capdi, ‘Gume, nun nyapu sun mali kuramenge kecada, tapmengedi telep kupra kunkameng’ tenen, balana deiki di bongopra wenepmumdi, lepsikra peterepmumnyopda, anyapu, sun mali kuramenge keca tapmengedi, ka tamupra telep kun kecapu talepra kunkamenge.

16 Ware nesala do yuma, ‘Isomka kunge nesala tep, telep keca karepmepya deiki di, kange deipsengedi, amenda taru melipra telep kunkamseng’ tenen, karenung nesalada, amenda taru isomka men kunkamenge. Dinin, tali kan-kanpu kupbankamenge.

Ange utopu, ware nesala do yuma, tali kankan kunge nesala tep, ‘Anesalada nun songe’ tenen, yanidongonung nesalada, amenda taru Allahdi sun wenemna tep, sun talepra kunge keca yuma gum kupra deiprepa, sun peda tali kankan kunge nesalapu kupbangedi, ikin kange doupra kunkamenge. Isomka neng tep, karenung nesala cap, tonda, kankan kunge nesala tep, ikin keca sun nong deiki derinung nesala capda, sun pedi sun pe tepapu etetemdidanunge.

“Ila kael keami nengdi penung upu ake,” pepu upu

17 Ne pepkusen upuda, amul pakeipmumdi moupra gekenkamrume. Sun ila kael keami nengdi penge upu, pio moupra gekenkamrume. Tonda, nedi peteremsene upu yumada, moupra gekepmumdi, ‘Nun peda angepu talepra kunkamepe’ tenen, pio pe deipra piripetenkamrume. Dumsisi kupra kuna tep peteremsenun upuda, moupra gekepmumdi, aupupu talepra kunkamrume.

18 Ange utopu kumumnyopda, ne pesene upu yuma, moupra dipru neitamai deipmumdi, kange deipra kunkamrume. Ange utopu, nedi peteremsene upu yumada, kael kepmumdi, nimi kuramengetopu urasin dipetepmumdi, telep upupu penkamrume. Atep nedi peteremsene upu moupra kael kepmumdi, sun sipyal deiki di ketenepra deiya kumumnyopda, yuk nesala tep, peterenkamrume.

19 Sundi ukupra kumum pangeda, Allah Yahwehdi teka tenena keca, sun deiki deipkamsere. Nedi sun tep peteremsene deiyoda, ake. Ada, ne peteremsene upu moupra gekemumdi, kael kepbamumnyopda, puto di nun nai bo Allah Yahweh tepapu, teka tenepra kunkamrume. Ange deiyo tep peteremsenune.

20 Dumsisi kuna tep, ila kael kemna deiyo upu, 30 ngeda pumun taru di dipra ataru neitamai yumada, nedi sun damai sekra men deiamsisi do? Ada, sun ikin kunkamser taru cap, sundi, ‘Ware kunkamep do?’ tenen, kange tenimtonapu kunkamrum taru yumada, sundi, ‘E, nun kunkamep keca tep, telep kupra kuna ngeda ake, mali ngeda ake’ tenen, ‘Moupra tenipetepmengedi, teleppu kunkameng’ tenen, peteremamsisi.

21 Ange utopu, nedi sun tep peteremamsisinge deiyo ton ake. Ada, nimi deiyo nengdi, ‘Pel donkameng’ tenen, sun dopra dokotemkamseng taruda, nedi peteremamsi nesala yumada, ‘Telep upupu penkameng’ tenen, peteremamsisi. Tonda, nimi deiyo nengdi, sun tep, “Ware keca deiyo tep, apel donmarum do?” pepra asipetepkamseng taruda, sundi moupra tenepmumdi, adeiyo neng tep tamupra telep kupra lap pepkamrume. Ada, ‘Nedi peteremamsisi nesala yumada, telep upupu penkameng’ tenen, peteremamsisi.

22 Tonda, sun puto boun kupra tali kan-kanpu kungedi, akeca-keca yuma talepra men kunge nesala yuma tep nengeda, sun yumadi anesala, sun nong deiki ikin keca pio men derinkamrume. Ukupmumnyopda, ada pio mali kunkamruma tep pepsene. Tonda, sundi, ‘Gume, anesalada, sun puto guma tep, tali kankan kunge nesalapu kununga cadi, sun talenge keca tep, tali dalupra doproptepe,’ pio men tenenkamrume.

Ange utopu, nimi upu lepsisikra bongdina tep, upu bongdina deiyo neng damai bemumnyopda, sun puto boun kungedi, tali kankan kunge nesala tep, yaniptapmumdi, ikin keca dopra sun nong deiki men derinkamrume. ‘Ange yumada, pio mali kuprum’ tenen, pepsene.

23 Aupuda, tali tep men pepsene. Deiyoda ake. Sundi, tali kankan kunge nesala tep, ikin keca dopra, sun nong deiki deipmumnyopda, Allah Yahwehdi sun mali kuramum neng tep, wenepseredi, sun taleramum keca yuma doproprepa, gum kupkamsere. Allah Yahwehdi, sun tali kankan kunge nesala tep bicau tenepredi, sun ikin kure keca yuma moupra diredi melipra kalengrure.

24 Tonda nimi tenpu ton, yapi puto welepredi yu kuprepa, menmena nimi deremrur ngebo cap kikiman wisipra kuna gume. Ada, ‘Aneng cap kikiman kuramepyanen, sun mali kuramengtopu, amenda taru nun peda, utopu kupbenup’ tenen, sun aneng cap kikiman pio men kunkamrume. 25 Apepmasentopu menmena yu kuprepa, ‘Yuk nesala tep deremkamne,’ tenepra kurur ngebo cap, kikiman wisipra kumum pangeda, yuk taru sun peda er kurenge utopu kupkamrume. Ukupmumnyopda, sun pedipapu pena pumbon dongopra youdidarume.

26 Tonda, sundi yuk neng makuna tep, “Akeca ton dopropo,” men penkamrum upuda ake. Ada, “Gume sundi yuk neng talenge keca, ke tep dopropramumnyanen, akamrepane, yuk taru sundi akeca ka tamupra men karepmanto kupsengopda, ne dipapu punupkamsene,” pepra, pedina upu pio men penkamrume.

Tonda, ange utopu, yuk nengdi ke tep dopropkameng keca pununa tep nengeda, “Gume, ne kayapu nengdi, tamupra men karepmanto kupmengopda, ne dipapu tamupra karepkamsene,” pepra, tali pertamna upu pio men penkamrume.

27 Ada tali tep men pepsene. Deiyoda ake. Sundi, “Nun dipapu amenda taru punupkamsepe,” peptamumtopu punupra men karepmanto kupseryopda, ware kupkamrum do? Sun yuk nengdi ke doprami keca, ka tamupra men karepmanto kupseryopda, akeca pununa tep, amenda taru sun talerum keca yuma, dopropmengedi, sun kumumdi marumu ati neitamai peda, sun ason cap, sun manai derirum keca cap, tali lupra dopropsununga tep pepsene. Atep nengeda, “Nedi tamupra punupkamsene,” pepra pedina upu pio men penkamrume.

28 Ange utopu, pumun taru sun apu yapudi, ‘E, angebo er taleramu tuda ace. Yuk ngeboda, er taleramu tu ace’ tenen, peten kemna tep derirami gelda, ‘Atu nundipu dopropkamep’ tenen, sundi adeiami gel dopra yukai pio men derinkamrume. Sun apu yapudi yuk-yuk, tu talepra kuramitopu, pio tep aceipu kunkamrume. ‘Yuk nengdi talerami tuda, peten kemna tep deami gel dopra, yukai deipnyopda, nedipu atu talenkamne’ tenen, upula dorona pio meme, pepsene.

29 Sun ton dirum do? Nimi ton er pel yala-yala yuma, pio telep kupra pel dorur ngebo epmumnyopda, moupra dinkamrume. Angeboda, amenda taru, ila nimi deiyo Raja neng sun makuna tep, mambul pel dopra kunkamre. Er pelda, pio telep kupra dorura cadi, tali dakunge nesala tep, sun amutara kuredi, sun tep pel men donkamre. Ange gum dinin, sun ila nimi deiyo Raja neng tep, sun ati pel talepra donkamre.