Proverbs 26

1Ukupmanto ila douman taru keamrepa, dou maramredi bupu weik kuramrepane, mo cepredi mul duduya weika di sakyopda, nimi yumadi, ‘Uo, angeda warya tep kupser do? Angeda men kupmanto,’ tenepmengedi, mali penunge. Ange utopu, nimidi ila uku imna ipmengedi, ‘Wa pepra, yal keca cap weika di kounkamepe’ tenen, ketenepra kouramengepane, mo weik cepredi, kouamenge keca deiki sakredi, kerye jepra mali kuptaprepa, nimidi, ‘Uo, angeda, pio mali,’ tenepra, mali penunge.

Ange utopu, walwal kuna cap, ‘Deiyo ake,’ men tenepmanto cap kure ngebo tep, yuk nesala yumadi, gispal dopmengedi, angebo ereipmengopda, yuk nesala yumadi, ‘Uo, angeda ware keca deiyo tep, awalwal kure ngebo ereipmang do?’ tenen, mali kange doununge.

2Ma bukmarya erepropredi, im deiki lakra embaredi, men amuramretopu, nimidi yuk dumsisi kunge nesala tep, “Sunda mali weik kununge,” pepra, luludina upu deiki di peptaptenge dinin, amok upu pepmenga peda, dumsisi kunge nesala damai yaredi, sun nong deiki men kupkamre.

Anengda, ikin keca men dopronkamenge. Deiyo men kupmara tep, yuk nesala yuma amok upu gekepmengedi, ‘Gume, anengda, teleppu kunge neng cadi, aupuda mok upupu kurure’ tenen, moupra kael kemkameng ja.

3Keledai bisam u pumbon bisi tapu gerekdongomenga di, atapu talepra gipropmengepa, baramretopu, pio walwal kuna cap, ‘Mali kun kecapu tali lupra kunkamne’ tenen, amali kun kecapu talepra kunge nesala tep nengeda, sun wenemna tep, balena dopropmumdi, sun bali tara bongonkamrume.

Akupmumnya deiki di kael kepkamenge. Gum dingeda gume. Ange utopu, nimidi kuda bisam bali deiki tara bukmengedi, “Beo,” pepra, co balana di akuda er bali deiki bongoramengtopu, sun mali kun kecapu pio talepmengedi, walwal kange doupra, mali weik kunung nengda, sun peteremna cap, wenemna cap tep, adipapu balena dopropmumdi, sun bali deiki bongopra wenemkamrume.

4Walwal tupa kunge nesaladi, yu kuprepa, upu deiki di pangdanapu kunge taruda, sun pio walwal di perameng keca gekepmumdi, sun penge upu utopu, tamupra men penkamrume. Sun walwal kange doupra penge nengdi, penge upu gekepmumdi, sun pengetopu, walwal di tamupra pemumnyopda, sun peda awalwal di penge nesala utopu kunkamrume. Atep, ukuna meme pepsene.

5Dinino, walwal tupa kunge nesaladi yu kuprepa, upu deiki di pangdanapu kungedi, sun tep mali upu pepsengopda, tali kange doupra men kaukemkamrume. Sun walwal di penge upu gekepmumdi, ka tamupra ila kael upu pepmumdi, sun penge upuda sekdongopkamrume.

Sun walwal deiki di penge upu men sekdongopmumnyopda, sun walwal di penge nesalada, ‘E tek sisi, nunda kael neng utopu kunupe,’ tenepmengedi, mali upu cap, walwal upu cap tupa-tupa penkamsenge.

Atep nengeda, walwal di penge nesala tep, ‘Jo, dakwapye, sundi dapenkamenge’ tenen, men kaukemkamrume. Ila kael upu penkamruma deiki di, sun walwal di penge upu tep, sengdongonkamrume. Ukupmumnyopda, walwal upu pena gum di, dimpepra kunkamenge.

6Walwal tupa kurur ngebo tep, ‘Angebodi ne mambul upu dopra, yuk neng tep lap perbenkamnere,’ tenepmumdi, ‘Aupu lap perbenkamre’ tenen, walwal kange doupra kurur ngebopu, wepra deipmumpa, sun mambul upu doupra lap perbaryopda, amenda taru ikin keca weik, sun damai yakankamre.

Ukupmantoda, sun pedi sun pe yanpu sektapmumpa, ikin weik kuramsertopu, kunkamsere. Tonda, walwal nengdi, nimi poramre yu me jepmengepa, adipapu pu weik jenmaryane deramengtopu, sundi, walwal kunge nesala tep, “Ne mambul upu doupra lap perberume,” pepmumnyopda, amenda taru ikin weik kunkamsere. Atep, ‘Walwalpu kunge nesaladi melimkamsenge,’ tenena gume.

7Ukupmantoda, yan mali kuramre ngebo, er yan tali dakupmarepapu, yanipra men baramretopu, sun walwal kange doupra kunge nesaladi, ila kael upu cap, domon upu cap doupra, lap pepterep embange taruda, aupu telep kupra men pepmanto kununge.

Ada tali tep gume. Sun walwalpu kunge nesaladi, ‘Aupuda deiyoda ake’ tenen, men kael kemnunga tepa. Tali pertamnapu kununga cadi, sundi, ‘Ila kael upu pepkupe,’ tenenung dinin, yan mali ngebodi telep kupra men embaramretopu, walwal kunge nesaladi, ila kael kemna upu dopra, men lap pepmanto kununge.

8Moupra kael kemnange, men kael kemmarepapu, yuk nesaladi, pio walwal ngebo tep, “Angeboda, ila kael kepu ngebo,” pepra, er tep gispal dopra ereipmengopda, ada pio walwal di kununge. Ukupmengopda, amenda taru ikin keca weik sun damai yankamre.

Ukupmanto, gil du dopra, nenel deiki koupdongopmengedi, pepra dopterepmengepane, konum koupdongopmanunga cadi, men baramretopu, kununge. Atep, walwal nesala ereipmumdi, ‘Nun deiyo neng kunkamsenge. Tonda, nun mambul pel donkamseng’ tenen, aneng tep gispal men donkamrume. Ukupmumnyopda, tek sisi amenda taru, ikin keca weik sun damai yakankamsere.

9Ila kael upu akaptua peda, pio walwal kange doupra, mali kecapu talepra kure ngebodi, aupuda telep kupra lap pepra men petereptue. Tek sisi ngeda, mali upupu penkamre. Ange utopu, ukupmantoda, nimi kange yawaramre yu me jepmange nengdi, takke keca doupmengedi, yuk nesala damai pepkopetepmengedi, mali kuramenge.

Angeda mali kuramengtopu, pio walwal ngebodi, ila kael upu dopra lap peptereptu dinino, telep kupra men peterepsetue. Angebodi, mali upupu penkamre.

10Ware pel dona deiyo ngebo do yuma, ‘Nimi ton wepra deipnepa, ne mambul pel donkamneng’ tenen, sun kunge keca men kael keami neng dinin, tali daembaramenge neng cap, walwal kange doupra, tali-talipu kunge neng cap tep, wepra dopropredi, aneng tep pel karepyopda, pio mali kurure. Adeiki di nimi weik etetemdanunge.

Ukupmantoda, walwal ngebodi, ‘Yuk nesala ton ortara kunmang do, gum do?’ tenena gum dipapu, moupra dirterena gum dipapu, er mar dopyopda, nesala kunmanga damai dourberya deiki di, nimi pio weik poramre.

Ange utopu, pel dona deiyo nengdi walwal nesala cap, men kael keami nesala cap, wepra dopropmengedi, ‘Nun pel donkameng’ tenen, mambul pel karepmenga peda, pio walwal di kununge. Ukupmengopda, nimi weik etetemdanunge.

11Ukupmantoda, kam dukna duktapredi, ka tamupra acapu bena jerure. Ange utopu, walwal kunge nesaladi, mali kunge kecada, men tamnunge. Tupa-tupa akecapu ka di tamupra kununge. Ada, mali kun kecapu talepra kunge nesalada, mali kupmengepa, kael nengdi wenemengedi, lepsisikra petereptenga peda, ange moupra tenena gum di, men di mali kuramengetopu, ka di ton cap malipu kupbanunge.

Sun dipru malipu kupbange nesalada, amenda taru amali kecapu talepra kunge nesalada, mali kun keca, ke taru tepapu tapmanganen, ka tamupra, amali kecapu talepmengedi, mali weik kupbankamenge.

12Nimidi kunge keca moupra dinkamrume. Ware neng do yuma, sun pedi sun pe tepapu, ‘Nunda ila kael neng kunupe,’ tenedange nesalada, tek sisi walwalpu kununge. Tek sisi akeca-keca yuma men kael keami dinin, tupa walwal kange doupra kunge nesaladi, “Uo, nun tep peterepserume,” pepra moropsengopda, nundi betapra lepsisikra petereptepya peda, anengda men kael keptenge.

Angetopu, yuk nesalada, sun pedi sun pe tepapu, ‘Nunda ila kael neng konum kunupe,’ tenedange nesalada, lepsisikra men peterepmanto kununge. Kael nengdi penge upuda, moupra men gekenunga tepa. Sunda sal nong-nongpu kunung nesala cadi, sun pedipapu tenenangepu tenenunge. Yuk nengdi penge upuda, pio men gekenunge.

13‘Ikin pel donkamne ngeda, ne dabale, men donkamne,’ tenepra kurur ngeboda, ‘Yuk nengdi, pel dorberume, pepnenung’ tenen, uperure. “Gume, bura embana ne songe. Ati pumbonpu kunkamne. Deiyoda, bura tara embanyopda, bura tara kuramre ila yu pus, er sida, singadi yana popnerura tep, bura men benkune.

Tonda, nimi ati dopmupka neitamai embanup bisida, ila yu singa pusdi yana popnerur tep, bura tara bena pel men donkamne,” perure. Tek sisi deiyo men kapmarepapu, tali pertamrure. Deiyoda, angebodi, pel dona dabal tep kurure.

14‘Ikin pel men donkamne, ne dabale’ tenen, ati pumbonpu kuredi, tali-talipu embare ngeboda, ukurure. Ukupmantoda, ati buplan don keca ensel di domenga pakmengepa tamurtoramretopu, pel dona tep dabal kure ngeboda, er pe ason deikipu mapredi tamurtorure. Bukroredi, pel men dorbarure.

15‘Ikin pel men donkamne, ne dabale’ tenen, ati pumbonpu kure ngeboda, jen keca jen taruda, angebo er jen keca talepra dupmare dipapu, er buru dopra, ‘Jepkun’ tenen, er sipyal pumbon men dongorure. Angeboda, ‘Ne dabale’ tenen, kurur ngebo tepa.

16‘Ikin pel men donkamepe, nun dabale’ tenen, ati pumbon tali dakunge nesalada, sun pedi, sun pe tepapu, tenedanung ngeda ake. ‘Nunda, ila kael neng kunupe,’ tenedanunge. Ukupmantoda, tek sisi ila kael nengda, yoneitam bari akutengedi, ila kael upu peptenge.

Anengdi, ila mambul upuda, telep kupra lap peptenge dinin, sun pedi sun pe tep, ‘Nunda ila kael neng kunupe’ tenen, sal nong-nong men kununge. Dinino, pel tep dabale tenenung nesaladi, ‘Gume, sun ayoneitam bari nengda, walwal dipu penung dinin, nun puda, ila kael deiki di telep upupu penupe,’ tenedanunge. Aupu penge nesalada, tek sisi walwalpu kunung dinin, sun pe kange dipru eremdangedi, walwal deiki di aupu penunge.

17Nimi ton, yuk neng ila upu pepra podanmanga kan-kan bena, “Sunda ware keca deiyo tep pedanmarumdi, podanmarum do? Sun yapso,” pepra, tapakra bena upu penge nengda, pio walwal di kununge. Ada popdanmanto kununga tep pepne.

Ukupmantoda, pio walwal ngebodi, tali daembandenkapredi, er men tarur kam dinin, tali dakunmare kam, er amul puto di talepra dororepa, akamdi si toramretopu, kununge.

Atep, deiyo men tenepmamumpapu, tali embankamrum taruda, yuk nengdi upu deiki pangdangedi, podange taruda, aneng damai bena, upu tapakra men penkamrume. Upu ton men penkamrume.

18– 19Nimi ton, er kabo tep mok upu peptapmare dinin, yuk taruda, “Kao ne tali peptapmakunu,” pertamrure. Atopu upu perur ngeboda, mutana taleamrepa, moropsemrepa, ‘Nimi popnun do?’ tenen, tenimterena gum di, mar tali-tali doramengtopu kurure. Anengdi moupra men tenipterepmengedi, yuk neng yuma bulupra wekmanga neitamai donunge.

Ange utopu, nimi ton uku jenmare co kol sirik dopra, er kabo ati dum deiki dopredi, ‘Angeda ne walwale,’ pepra, er kabo tep inimtamrure. Angeboda, moupra tenimterena gum cadi, ‘Angeboda ne kabo tep, kange mun kupra deipnepa, ikin kange doupra kunkamre do?’ pio men tenerure.

20Uda, nimidi co dopra uku dongopmangepa, uku jepra gawal dakroprepa, co tapakra men dongopmengepa, uku tamamretopu, nimidi mali upu cap, luludina upu cap tapmengedi, mali upu ton cap men pedangopda, nimidi upu deiki di pangdaramenge ngeda, gum kuprepa, upu ton cap pena gumi di, tali dimpeprappu kunkamenge. Dinino, tupa-tupa mali upu pepmengopda, tupa-tupa pedangedi, podanapu kunkamenge.

21Ange utopu ukupmantoda, uku kalum lereng penmarenge dopra, yuk co damai deipmumpa, ajenmare uku di, yuk co ton menmena sakroredi jeramretopu, ila upu deiki di, “Kanda warya tep do?” pepra, yu upu deiki di wenemna upu cap, pangdana upu cap peredi, yuk neng tep, deremrur ngeboda, er mali upu perya deiki di, menmena yu kuprepa, nimi weik ton cap upu deiki di pangdangedi, podanunge.

22Tali mok upu cap, luludina upu cap, “E, angeda teka, ne asuru di diramsi kecada ake-ake,” pepra nungameng upuda, nimi yuma telep kupra gekengedi kange derinunge.

Ukupmantoda, jen keca pio telep, tau keca jepkotepmengepa, sun mundu pumbon barepa, kange deriramegtopu, nimidi tali-tali penge upu yuk neng gekenai pepmengopda, gekepmengedi, sun dipru neitamai marbarure. Nimidi tali pertamamenge upu, yuk neng ton gekepmengopda, kange derinunge. Angeda malipu kununge.

23Ukupmantoda, kerah tu doprapmengedi, tali lungdin mau ketekepmengedi, ‘Urasin telep kupkamre’ tenen, urasin telep keca perak dopra, akerah tu di ketenepra deipmange keca deiki palepra deipmengepa, urasin pio telep kurure.

Ange utopu, dipru pio malipu kunge nesalada, sun sipyal deiki di telep upu pengepa, aupu geken nesaladi, ‘E, sunda telep neng kununge,’ tenenung dinino, tek sisa anesala sun dipru neitamaida, tupa pio malipu kurure.

24Nimi tep yu tenepra wilimdirur ngebo, er pere upuda, ‘Gekena pio telepe,’ pepketua peda, angeda teka men tenenkamrume. Yu weik kure ngebo, er dipru neitamaida, mok kecapu dinikudi, tupa akurura cadi, telep upu peptua peda, teka tenena gume. 25Atep er angebodi, ‘Telep upu pepnepa, yuk neng gekepnengopda, sundi ne tep, ‘E, erda telep ngebo kurure,’ tenenkamnenge,’ tenerure. Dinino, sun dipru neitamai yu keca tupa akaprepapu, sundi penge upuda, ‘Tek penmanga,’ tenepra men kunkamrume. Ato nesalada, yuk neng tep, tupa ‘Songe,’ tenenapu kununge.

26Yu tenepra wilimdin keca, sun dipru neitamai akapmarepapu, mawa di telep upu cap, telep kuna cap kuptenga peda, amenda taru sun dipru neitamai yu keca cap, nimi tep, ‘Song’ tenena cap, tupa akapka deiki di katuai kuprepa, yuk nimi yumadi, epmengedi kael kepkamenge. Pio dipru malipu kusere ngeda, men inipmanto.

27Tonda ware neng do yuma, yuk nesala tep, ‘Anesalada ne song cadi, tu pumbon saktenge,’ tenepmengedi, tu palipra bon kemdinung dinin, amenda taruda, sun pedi palipra deipi tu pumbon saka popkamenge. Ange utopu ware neng do yuma, ‘Yuk neng tep popkamep’ tenen, gel lukra gamupra dokotemenge nengda, amenda taru agel dipu, ka di tamupra sun nong deiki yana popkamre.

28Nimi ton er lyemu deiki di, er kayapu neng tep, mok upu pertamrur ngeboda, tek sisi er kayapu neng tep, ‘Sunda ne songe,’ teneredi, sun tep mali kudirure. Ange utopu, sun dipru neitamai di, ‘Anengda nun songe,’ tenenung dinin, mawa upu deiki di, ‘Gume, sunda telepe, nun cap kikiman kutepe. Sun tep kange deipmepe,’ pepra, tali upu deiki di pertamenge pangeda, tek sisi apenge upu deiki di, sun kayapu neng tep mali kudinunge.