Proverbs 31

Ila nimi deiyo ngebo er sida, Raja Lemueldi sekra deipseu upu

1Aupuda, nimi deiyo kepra kuramu ngebo er sida, Raja Lemueldi pepu. Amambul upuda, er nindi er tep peteremamupa, kael keamudi sekra deipseu.

2Ne mi sisa, nedi deipkesi ngebo, kan tep ne dipru kan deiki deipkesi. Ada nedi Allah tep mororamsa deiki di, er gekepneudi karepneupa deipkesi. Atep, nedi kan tep mambul upu peipkukene.

3Kan puto kukere ngeda, tali dakunge nerapu tep, tali-talipu men karetamkamrume. Nimi deiyo talepra Raja kunge neng weika di, tali dakunge nerapu tep, tenenapu kungopda, amenda taru anerapudi kan tep, mali kudinkamkenge. Atep nengeda, tali-tali dakunge nerapu tep, pio tenenapu men kunkamrume. Anerapu sun damai embana gume.

4Kanda Raja Lemuel, kandi kange yawaramre yu me jememdi, kange yawaramkerpa, ‘Mali kun kecapu kuprum’ tenen, pepkene. Atep nengeda, apepken upu pio tenenapu kunkamrume. Telep kunge Raja nengdi, kange yawaramre me weika di men jenunge. Ila nimi deiyo nengdi, sun amutara kunge nesala tep talenunga cadi, kange yawaramre me weika di putarepa, men jenunge.

5Aupuda, tali tep men pepkene. Deiyoda ake. Ada, ila nimi deiyo Raja nengdi, yu me weika di jepmengopda, sun pel dona deiyo keca yuma lumdongonkamenge. Ukupmengopda, kankan kunge nesala do, puto boun nesala do, ikin kange doupra kunge nesala do, nimidi, ‘Anesalada mambul gum nesala cadi dakwapye,’ tenen, yanidongonung nesala cap, sun amutara kunge nesala yuma tep, telep kupra men meliptenge.

Tonda, yu me jepmenga deiki di, sun kange yawaramrepa, nimi upu telep kupra men bokeipkamenge. Sun amutara kunge nesala tep, yanitamnapu kupmengedi, anesala yuma tep, mali kudinkamenge. Atep Raja nengda, kange yawaramre me weika di jena gume, pepkene.

6Yu me jepmengepa, kange yawaramre ngeda, sun dipru kange yuma yawaramrur nengda, sun pedi sun pe tep podidanunge. Dena damai kunge nesaladi ame jenunge.

Tonda, ila kange mun kuprepa, ‘Nunda pio men kupmanto kunupe,’ tenen, mali kange doupra kunge nesaladi, ayu me weika di jenunge.

7Tonda sun aneng yumadi, yu me jenungada, sun ikin keca neitamai kunung nge cap, sun talen keca yuma men kwapmarepa, pio kankan kunge nesalapu kungenge cap, luprongedi, ‘Nun ikin kuserenge yuma, tenena gum di, tali kange doupra kunkamep’ tenen, kange yawaramre yu me jenunge.

8Kanda ila nimi deiyo ngebo, Raja kuruma cadi, yuk nesalada kan amutara kungedi, upu puto di men pepmanto nesala cap, nimidi, ‘Anesalada dakwapye’ tenen, yanidongonung nesala cap tep tenememdi, sun makuna tep, upu melipra penkamrume.

Ton tara nengdi, yuk neng tep tomopmengedi, “Aneng poptapkupe,” pepmengopda, kan dipu apopkunge nesala, sun makuna tep upu melipra penkamrume. Ukupmemnya deiki di, nimi upu telep kupra bokeipkamenge. Kanda Raja Lemueldi, sun kankan kunge nesala yuma tep, ‘Anengda ne tara neng pua,’ tenepra, melipra kalengkamrume.

9Tek sisi kange di ton cap pepkene. Kanda ila nimi deiyo ngebo, Raja konum kunmarema cadi, kandi sun puto boun kunge nesala cap, kankan kunge nesala cap, upu puto di men pepmanto kunge nesala cap tep, telep kupra upu lepsisikra bongdinkamrume.

Ukumemnya deiki di, anesala tep telep kudinkamrume. Sun damai telep kupra kumemdi talenkamrume.

Dumsisi kuredi, nimi upu gekepra, amutara kurur ner tep, pepu upu

10‘Dumsisipu kutudi, er nenge peptu upupu gekepra, amutara kupmanto nerpu, ato ner epra doptene,’ tenen, pio piripra eramtuma peda, adipapu er utopu nerda, menmena men epkamrume. Pio telep kuredi, er neng upu gekepmanto nerda, kanam dipapu epra, men bena doropmanto cadi, autopu nerapu tep nengeda, pio piripra epeteptum dinin, ikin dipapu epkamrume.

Ange utopu, aner kamoda, ukupmanto, ila kamo telep kunumna weik gel er sida, intan berlian gelda, urasin pio ila telep keca kurur dinin, akecada yambul mambule. Dinino, pio telep kupra kurur nerda, ila mambul kurure.

11Ange utopu ner doptu ngeboda, er nerdi perur upu yumada, teka teneptue. Anerdi peramretopu kurura tepa. Aner cap, angebo cap kikiman kunkamreng taru yumada, anerdi er nenge tep, melimkamra deiki di, angebo teleppu kupbankamre. Erdi aner tep, pio kange deipra kunkamre.

12Aner er gam kunkamre taru neitamai yumada, er nenge damai mali kun keca ton men kunkamre. Ikin keca er damai men derinkamre. Sun gam tupa kunkamreng taru yumada, angebo er nerdi, telep kupra melimkamre. Ukupra kurepa, telep pelpu donkamre. 13Er anerda, pingping deiki dipapu opkal wina tep, wiramenge tapu epra dorona cap, tonda domba bisam potong bupra derinkamre. Akeca yuma bupra deipyopda, er anerdi, sun nong bupu kemna tep, pe deipra opkal win tapu opredi pel donkamre. Opkal win tapu opredi, akeca yuma keteneipyopda, adeiki di nong bol deiki kenengna opkal winkamre.

14Tonda ukupmanto, mokon deiki embaramre umpena, er sida kapal, kapal di karen mutu di dakamre bung keca kipra, duyakaramre topu, er aner dipapu, er nyapsilip sun jena tep, yuk karen mutu di jen keca kipra duyakarure.

15Tonda, er aner dipapu, sun bungsilip tupa mapmange taru dipu, bukredi, ipna taru sun jen keca tep, dapredi ketenem dirure. Tonda, er aner dipapu sun ati neitamai pel dona nerapu cap, sun wai pen dam pel dona nerapu cap tep, “Sunda apel-apel donkurume,” pepra, ‘Sun pel donkamenge,’ tenepredi, pel yuk-yuk bokra derirure. 16Er aner dipapu, sun wa pena tep tu ton epra embaramyanen, sun wa pena tu konum epyopda, atu deiyo ngebo tep, co bo karepredi atu kunumrure. Wa pena tu konum kunupyopda, nimidi wa peamengepanen, anerdi anggur tapu du yal kourure.

17Er anerdi, ‘Amenda taru ikin pel donkamne’ tenen, er dipru puto kemdina cap, er nong yuma moupra didana cap, kuredi kalengdarure.

18Er anerda, erdi kipra derirur kecada, kunumna telepngepu kunupyopda, er bungsilip putarur keca kunumrure. Ange utopu, yuk nengdi, ‘Kunupkamep’ tenen, derirameng kecada, aner er bungsilip putarur keca kunumbare taruda, kunumna pio telepnge teppu, epra embarure. Anerda, pel dona dabale gum ner cadi, ipna taru di dipdongopra pel doramrepane, lukunda kepyopda, weica upredi pel dorure.

19Yuk nerapu yumada, pel dona gum taruda, tali bepe peikra bungnung dinin, anerda beipye peingna gum di, alen win tapu pio onapu kurure.

20Tonda, er anerda, yuk kankan kunge nesala tep nengeda, ‘Ne keca men bokra karepkune’ tenen, anuna kange douna gum nere. Erda pio kange telepa di, yuk kankan kunge nesala tep, bicau teneredi, melipra karerure. Tonda, ware putan keca do yuma, yuk nesala putare taruda, aner bicau teneredi melipra karerure.

21Er anerda, ila mo li kapul men keamre taru di, bupu opkal konum wipra ketenemna ner cadi, mo cemredi, ila bul li kutua peda, ‘Uo, ware kupkamne do?’ tenen, kange men wang-wang perure. Ada tali tep gume. Er bungsilip bul kepre taru, bupu opkal ketenemna tep, bupu opkal konum wipra keteneamya tepa.

22Tonda er pe aner dipapu, ‘Ila bul li kupre taruda, bupu kepkamner’ tenen, domba bisam potong dopredi, bupu opkal konum wiramya tepa. Aopkal wina tep, kainda pio kamo telepnge, kurun nge cap, miringe cap, binge cap di, konum wiramya tepa.

23Er aner domre ngeboda, amutu kota neitamai kuramenge nesala talepra kunung deiyo neng neitamai di, ila ngebo kurure. Sun mutu talepra, ila nimi deiyo neng bulupmengedi, upu talenung taru yumada, er angebo cap kikiman kununge. Amutu nesala yumadi, angebo tep weika di gispal dopra kununge.

24Tonda, er ner dipapu, ‘Yuk nesala kunumkameng’ tenen, kamo pio telep opkal dinin, deiyoteng derina tep, ketenepra deiya wipredi, ‘Kunumna deiyo nengdi kunumkameng’ tenen, deiprepa, yuk nengdi kunumnunge. Ukurya deiki di, co boda pio weik dororure.

25Anerda, ila puto cap, ila kael kemna cap, akeca-keca yuma tep, pio moupra tenena cap, doryankamre taru tep kapul taru di ketenem dina ner kurura cadi, erda, ‘Uo, amenda taruda ikin keca ne damai yanurur’ tenen, moupra teneredi, kwar men dangrure.

26Er anerda, ila di yu upu ton, men erepra perure. Erda pio moupra tenepetepredi, ila kael kemna upupu perure. Tonda yuk nesala tep, lepsisikra peteremrur taruda, yu upu di men perur dinin, bouna dipu telep upu perya deiki di, yuk nesala tep peteremrure.

27Er anerda, puto kange doupra, pingpinga di er bungsilip kupkameng keca cap, putankamre keca cap tepapu, moupra tenepetepredi, apelpu dopra ketenemdirure. ‘Pelpu donada, nun dabale’ tenen, tali kange doupra dakunge nerapuda, amenda taru ikin kange doupra kunkameng dinin, anerda, pel telep kupra dorura cadi, ikin keca er damai men yakankamre.

28Ukurya deiki di, er nyapudi sun nin tep, ‘Erda pio telep ner kurura cadi, Allahdi telep kudinkamemere’ tenen, er tep telep upupu pengedi, ila di kange derinunge. Ange utopu, er nengedi, er ner tep pio kange derirure.

29Aner er nengedi, er ner tep uperure. “Pel telep kupra donge nerapu ton, weik akunung dinino, akununga kan-kan di, kan puda, ila di telep kurume. Yuk nerapuda, yambul telep kunung dinino, kan puda, pio telep pelpu dorume. Yuk nerapu kununga utopu men kurume,” pepra, aner er nengedi er tep gispal dorure.

30Nimidi, nerapu kuramenge keca, urasin epmengedi, tenenungada pepkusene. Ada, nimidi, “Uo, anerapu embange nge cap, telep kupra upu pengenge cap, urasin kamo telep kupra kungenge cap tep, pio telep kununge,” pepmengedi, anerapu tep, ‘Sunda pio telepe,’ tenenung dinin, konum wisi deipbangopda, akeca yumada, gum kupbankamre ja.

Dinino, ware ner do yuma, Allah tep teka tenepredi, dipru amu kepra kuredi, Allah tepapu kware kure nerda, ila mambul ner kurure. Aner utopu kunge nerapu tep nengeda, yuk nesala yumadi sun tep, gispal dongedi, “Sunda pio telepe,” pepra kunkamenge.

31Anerda, pel yala-yala yuma, telep kupra dorura cadi, er pel dorya deiki di dororum keca yumada, aner gispal dona tep bokra, er ton karenkamrume. Er anerda, dan tara do, er embarurai yumada, nimi yuk nengdi, aner kure keca tep epmengedi, “Anerda telep nere,” pepra, er sipu eremengedi, er tep gispal donkamenge.