Proverbs 5

Raja Salomodi, “Tali dakunge nerapu tep, tali-tali nyangdana meme,” pepu upu

1Ne nyapu sunda, ne upu moupra gekepneso. Nedi sun tep, ‘Angeda telepe, angeda mali’ tenen, ila kael kemna deiyo keca deiki di, men taru dordi peiamsisi upuda, pio moupra gekepmumdi, tenenkamrume. Moupra tenena deiyo keca deiki di peiamsisi upuda, sun amul deiki di ukupra gekepmumdi, sun yuma moupra tenenkamrume. 2Aupu pepmasenada, tali tep gume. Ada, nedi sun tep peiamsisi upu, moupra tenenapu kumumnyopda, mangkau di mali men kunkamrume. Telep kupra kael kepmumnyopda, ‘Telepe ace, malinge ace’ tenen, moupra dipetepmumdi, telepngepu talepra kunkamrume. Ukupra kael kepmumnyopda, sun embamumdi upu sisingkamruma yumada, ila kael kemna deiki dipu penkamrume. Ukupmumnyopda, mangkau di mali upu men penkamrume. Sun sipyal deikida, yuk nesaladi walwal upu peramengtopu, men penkamrume.

3Aupu pepmasenada, tali tep men pepsene. Deiyoda, ake. Ada, sun nimidi tali-tali nyangdarameng nerapudi, sun sipyal deiki di penung upuda, madu mong mokon jepmengepa, telep peramretopu upu penunge. Tonda ukupmantoda, nimidi minyak me diktapmangai, telel di olapne kuramretopu, anerapudi perameng upuda, pio boun upu pepmenga deiki di, namdonunge.

4Dinino, anerapu kori embanung nengda, anerapu cap kikiman mapmengopda, amenda taru nong kupkamre ngeda, ikin weik kurure. Ukupmantoda, ila su keca kapang me tu jepmengepa, su peramretopu, anerapudi nimi dipru gidona upu pengepa, aupu gekepmenge nengda, ila kange mun keca, sun nong deiki kunkamre. Ukupmantoda, si dana-dana tara kuramre parang ya di, nimi weik poramengtopu, anerapu cap kikiman kunga deiki, anerapudi nimi weik poramengtopu kununge. Ada anerapu kori embanung nengda, sun nong deiki ikin keca weik kunkamre.

5Nimidi tali-tali nyangdarameng nerapuda, nimi depmengedi baramengaipu banunge. Anerapu embanung bisipu dombanung nengda, anerapu cap, sun aneng cap, kikiman uku jen ban bisipu banunge. 6Anerapuda, ‘Gam kuna tep, dumsisi bisida ace’ tenen, moupra men tenengedi, gwalipdanamre bisi baramengtopu, sun anerapuda, dumsisi bisi bana gum di, gwalidan bisipu embanunge. Ukunung nerapuda, ‘Nunda gwalidan bisi embanupa,’ men tenepmengedi, tali kange doupra embanunge.

7Ange tep nengeda, ne nyapu sun yuma tep, nedi pepra deiamsisi upu, sun adipapu moupra gekenkamrume. Ne sipyal deiki di pepra deiamsisi upuda, tali gekertamna utopu men kunkamrume. 8Nimidi tali-tali nyangamenge nerapu, sun damai di goprapmumdi, pio karenaipu kunkamrume. Tonda, er aner ati damaida, pio men kunkamrume. Beipra karenaipu kunkamrume.

9Sunda, anerapu cap kikiman mapmumnyopda, yuk nengdi, sun tep, ‘Anengda, telepe’ tenen, gispal doramsei dinin, amenda taruda, sun tep, ‘Nun songe,’ tenenkamsenge. Orketeng tamun denge weik deiki di, pel telep kupra doramumpa, akeca-keca yuma weika di dororamum dinin, anerapu cap kikiman mapmumnyopda, yu nengdi yana tomopra ateng koupsengdi, upu bokeipkamseng taruda, sun taleamum keca yuma peda, dalupra dopropkamsenge. Anengdi sun tep, bicau men tenenkamsenga cadi, ikin keca weik sun nong deiki derinkamsenge. Pumun taru di, ‘Nunda ukunkamepe,’ teneramrumnge yuma peda, nong men kupkamre.

10Anerapu cap mali kudamumnyopda, sun talepra kuramum keca yumada, yuk nengdi jepra gawal dakeipkamsenge. Tonda, sun kwisi me deiki pel doramum kecada, yuk mutu neng, sun men kael keamrum neng yangedi, akeca yuma dalupra dopropkamsenge. Dopropsengedi, sun pe keca utopu kepropkamsenge.

11Sunda moupra gekepso. Anerapu cap antapra kikiman mapmumnyopda, adeiki di ila kange mun pu jeramserpane, depkumum taruda, sun nong yumada, bol mali doupra ekropkamsere. 12Sun bol mali doupra ekropseryopda, sun yumadi, ‘Uo, ware keca deiyo tep, wenemna upu peramipane men gekeramsi do? Tonda, ware keca deiyo tep, ne kange dipru neitamai di, wenemna upuda, ne songe, teneramsi do?’ tenedamumdi, engenkamrume.

13Tonda, ‘Neda warya tep ne peteremna nengdi penman upuda, pio men gekeramsi do? Tonda, ne peteremna nengdi, penman upuda, amul deiki di pio moupra men gekeramsi do?’ tenedamumdi, engenkamrume. 14‘Uo, ukutaruda mali weik kuramupka deiki di, nimi yuma bulupra dinmasengai di, saka dourbanupe,’ tenedamumdi, engenkamrume.

15Ukupmantoda, nimidi sun pe nengpu, me bungapu me gwepra jeramengtopu, sun konum domum nerapu cap meliprapmumdi, kikimanpu kunkamrume. Ange utopu, nimidi, ‘Me jenkamep’ tenen, bunkun palipra deipmengepa, deriramre mokon, sun pe nengpu gwepra jeramengtopu, ‘Ne dopkamne’ tenen, mun peramrumu nerapu tep, sun kange tenenange yumada, sun anerapu deikipu derinkamrume. 16Nimidi, me jena tep, deiamengepa deriramre meda, warya tep dikrongepa, nimi ati kuramenga neitamai, tali-tali embandankamre do? Ange utopu, warya tep sun domum nerapu tep, yuk nengdi tali-tali dalupra doronkamseng do?

17Sun cap, sun nerapu cap, sun nongda sun neng butene sun nge pua. Tonda, sun cap, sun nerapu cap, sun nongda yuk neng cap kikiman mana meme. 18Ange tep nengeda, sun kaber kumum taru di, buru dipsei nerapuda, sun nerapu sisa pua. Atep, anerapu teppu bicau tenedarumudi kunkamrume. Ada, sun nerapu sisa tepa. Sundi sun pe nerapu tep, telep kupra melipmumnyopda, anerapudi sun tep kange deipsengedi, telep kudinkamsenge.

19Akaber nerapu, sun urasin telep kupra neramenge taru, sun urasinda, tu deiki embaramre keca, er sida kijang, urasin telep kuramretopu kununge. Atep sundi sun pe nerapu epmumdi, sun anerapu tep kange derinkamrume. Ukupmantoda, nimidi kange yawaramne me jepmengepa kange deriramengtopu, sundi sun pe nerapu tep epmumdi, anerapu tep kange derinkamrume. Ataru-ataru yumada, sun pe nerapu teppu kikiman kumumdi, kange deridankamrume.

20Uo, ne nyapu sunda, ware keca deiyo tep, sun dipru kange tenenange yumada, yuk nerapu deikipu derinkamrum do? Nimi konum domre dinin, anerapudi yuk neng cap, tali-tali nyangdange nerapuda, ware keca deiyo tep, anerapu tep sun kange derinkamrum do? Tonda, nimidi tali-tali nyangdarameng nerapuda, sundi anerapu tep, kange deipra iridankamrum do?

21Aupu yumada, tali tep men penmasene. Deiyoda ake. Ada, tuai mutu ban-ban yuma kunge nesalada, sundi kunge keca yumada, nun nai bo Allah Yahwehdi, diserure. Diseredi, nimi kunge keca yuma tep, ‘Telepnge ace, malinge ace’ tenen, upu bongdiserure. Akeca-keca yuma diserura cadi, tenpunge peda men tamrure.

22Mali kunge nesaladi, sun mali kunge keca deiki di mali kudidanunge. Ukupmantoda, nimidi pena pemengepa, kapang mangkau di pena pumbon wekrepa youramretopu, sun mali kunge nesaladi, sun pedi sun pe tep, mali kudidanunge. 23Sun aneng depkamenge ngeda, pumun taru wenemna upu deiki peiami ngeda, moupra men teneramya deiki di depkamenge. Sun pedi moupra men kalengdaramya deiki di poipdangedi, depkamenge. Tonda, sun pio walwal kupra kuramya deiki di depkamenge.