Proverbs 7

Raja Salomodi, er nyapu tep, “Sunda tali-tali nyangamenge nerapu kori bana meme,” pepu upu

1Ne mio, nedi kan tep, “Ukunkamrume,” peramkesidi, “Telep kunada ake,” pepra derikenun upu yumada, lumdongona pio gume. Kan kange dipru neitamai di, pio tenenapu kunkamrume. 2Kanda ne pekene upu moupra gekepmemdi, aupupu talepra kunkamrume. Ukupmantoda nimidi, ‘Nun asuru tulupdanup’ tenen, pio moupra kalengdaramengtopu, kanda, ‘Ne naidi penere upuda lupronun’ tenen, pio moupra tenenapu kunkamrume.

3‘Aupuda lupronun’ tenen, ne pekene upu yumada, sekra kan pe buru deiki getepdongoprapmemdi kunkamrume. Ada, ‘Aupu tupa tenenapu kunkamne’ tenen, kunkamrume. Ange utopu, nimidi mambul upu sekrapmengedi, ‘Angeda gum kupserur’ tenen, telepai deriramengtopu, kandi ne pekenun upu dopra, kan giso deiki cap, kan dipru pumbon cap deipmemdi, pio tenenapu kunkamrume.

4Ukupmanto ngeda ake. Nimidi, sun mal nerapu tep, ‘Uo, ne pio bicau tenenune,’ teneramengtopu, ila kael kemna deiyo keca tep, ‘Angeda ila mambule,’ tenenkamrume. Ange utopu, sundi sun nong neng tep, ‘Ila di bicau tenenune,’ teneramrumtopu, ila kael kemna deiyo keca tep, ‘Angeda, pio mambul cadi, aupuda moupra talenkamne,’ tenenkamrume.

5Ila kael kemna upu moupra tenepmemdi, pio talememnyopda, nimidi co bo karepmengedi, tali-tali nyangmenge nerapu, sun damai men bankamrume. Ange utopu, yuk nengdi domenge nerapudi, ‘Nun kikiman mapteneme’ tenen, telep upu pepmengedi, napropkenga peda, sun upu gekena gum di, tali kange doupra, sun anerapu cap kikiman kuna pio men kunkamrume. Beipra kunkamrume.

Atipu dimpepra men bungrur ner tep pepu upu

6Tenpu taru ton, ne ati bo bukmasidi, jendela bon bisi di dinmasi. 7Dinmasipa kaber neng weik kuramya kan-kan di, walwal ngebo tenpu kunmaupa epsi. Angeboda, tek sisi pio walwal ngebo kuramu. Erda, ‘Telep kun kecada ake, mali kun kecada ake’ tenen, moupra tenena gum ngebo cadi, dumsisi kupra men kuramu ngebo kuramupa epsi.

8Sintara kepmauanen, konum kunukpepdongongu pangeda, akaber ngeboda, co bo karepmengedi tali nyaramenge ner, ‘Nimidi co bo karepnengopda, nyakdankamep’ tenen, ketenepra tengrura damai benmaue. Ada, ‘Atali nyangtamameng ner, er ati damai benkun’ tenen, banmaupa epsi. 9Awalwal kaber ngebo kunmaupa epsi taruda, ipbanmaudi, kunukbanmau taruda, akaber ngeboda, ‘Yuk nengdi men epkuneng’ tenen, aner er ati dam banmaupa epsi.

10Anerda, dimpepra ati pumbonpu men bungrur ner cadi, awalwal kaber ngebo epudi, ‘Angebo cap kikiman mapteneme’ tenen, angebo yanmau bisiai, bena antapdanmarei. Anerda, nimi men domenge dinin, tali nyangtamenge nerapu kenengameng opkal kenekrapudi benmaupa epsi. Aner er tenepu ngeda, ake. Nimidi, ne nong cap, ne opkal cap epnengedi, ‘Uo aner tep, co bo karepmepedi, nyaktepe, tenenkamneng’ tenen, er kange dipru neitamaida, mali kun kecapu tenenmaudi, banmaupa epsi.

11Anerda, dipru boun kupra tali dimpepra kuramu ner pio gume. Anerda, kware ton men kurur dinin, pio balila ner kurure. Erda, er nai yapudi perami upu ton pio men gekeramudi, yanitamnapu kuramudi, ila upu deiki di, “Sundi penerum upuda, ne men gekenkamsene,” pepra, balila weik kuramu. Tonda, anerda er pe ati bo dimpepra men kurur dinin, tupa embandanapu kurure.

12Anerda, ‘Nimi ton napropkamne’ tenen, ton taruda, nimi embarameng bisiaipu abena tengrure. Ton taruda, adi goprapredi, nesala weik bulumengai cap, bung keca kunumamengai cap, abena kunmaryane, ka di ton gopropredi, bisi kwangdanai abenap, orbenap kunmaryane, tapra embandanapu kurur ner kurure. Ukururada, tali tep gume. Ada, ‘Nimi ton napropnepa, co bo karepnenga deiki di, nyakdankamepe’ tenen, kurure. 13Ukurur nerda, ataru dinmasipane, kwardana gum dipapu, akaber ngebo bena talepra iripudi, urasin mutupudi, dipru gidon upu pepra napropu. Anerdi pepu upu ake.

14Atumida, ne si eremnun keca gispal dona tep, telep karen keca konum karepmanue. Ne si eremnun keca tep, ‘Ukunkamne,’ pepra pedina upu pemsi ngeda, konum kupmasi. 15Atep nengeda, nedi kan tep eryanmakene. ‘Neda angebo cap, ne cap kikiman kuteneme’ tenen, eryanmaken dinin, ukutaru nun butene konum antapmanema tep, ne kange deipne. 16Tonda, nun kikiman mapkamanemaida, Mesir mutu di kunumnung opkal, urasin pio telepnge, berwarna ngeda, ne ason deiki konum deipra keteneipmane.

17Ukupmandi, nintong pio telep peramre keca, er sida mur cap, cendana cap, gaharu co utopunge, er si kayu manis cap, konum pulupra deipsaipu mapkamaneme. 18Atep nengeda, nati yakayo. Atumida, nun tenepnemetopu, kange deipra kikiman mapra nyangdanmanemepane, ipmarya berekamare. 19Kan kwar tenena gume. Ne nengeda, ati men kunmare. Erda pio karen mutu beua tep, menmena tamupra men yankamre.

20Angeda tali men pepkene. Erda, co bo pio weik buluprapudi, er alen kipra beua cadi, ne kaele, menmena tamupra men yankamre. Pio dakuramreyanen, orwar neitamaipu, tamupra ati yankamre.

Atali-tali nyangtamamenge nerdi, walwal kaber ngebo tep, upepra napropupa, erdi aner pepu upu kange deipra gekepu.

21Atali-tali nyangtamamenge nerdi akaber ngebo tep, dipru gidona upu cap, gekena telep upu cap, mawa di pepka deiki di, angebo adipapu napropupa, er ati berei. 22Er akaber ngeboda, moupra men tenepudi, aner pepu upu gekepudi melipupa berei. Ukupmantoda, sapi bisam popkamanga tep, asapi doupra banmange taruda, asapi bisamdi, ‘Neda popkamnenga tepa’ tenen, men kael kemrurtopu kupudi, aner cap beu. Tonda, nimidi, ‘Rusa bisam tomopkamap’ tenen, pena pepra keteneipmangai, rusa bisam kange douna gum dipapu, pena pepmangai mangkau di barepa youramretopu, akaber ngebo peda, moupra men tenepka cadi, aner cap berei.

23Akaber ngeboda, betapra men kael kepka cadi, ukupmantoda, rusa bisam pena pemengepa, youprepa tekamrepane, men benmanto kuramre pangeda, nimidi mar marapmengepa, nong neitamai wekrepa deramengtopu kupu. Akaber ngebodi, ‘Ikin weik keca kupkamner ja,’ tenena gum dipapu, tali kange doupra aner cap kikiman beu. Tonda nimidi, ‘Ma mangkau di barepa, youprepa tomopmepedi popkamep’ tenen, ma embaramre bisiai ma youn keca deipmangepa, mangkau di apumbon wekrepa poramretopu kupu. Ada, madi, ‘Akeca pumbon weknepa youpneryopda, tomopra popnenunge,’ men teneramretopu, awalwal kaber ngebo peda utopu kupu. Ada, ‘Ikin weik keca kupkamner ja,’ tenena gum dipapu, tali kange doupra aner ati beu.

24Atep nengeda, ne nyapu yuma tep, nedi, “Ukupra kunkamrume,” pepra, pesene upu moupra gekemumdi, kael kemkamrume. 25Sun tali nyangtamameng nerdi penkamser upuda, pio men gekenkamrume. Er mali kurya deiki di, sun dipru gidoserura cadi, aner embankamrai yuma, pio men benkamrume. Er mali bisipu embankamraida, sun ton abisi lerekra men embankamrume.

26Sun tali nyangtamenge nerapudi, mali kuramenga deiki di, nimi pio weika di, sun dipru gidoramengepa, mali kun keca talepra kununge. Anerapuda, nimi pio weik, men nukmanto namdoramengepa, sun upu gekepmengedi, mali kununge. Sundi nimi weik, mali kudiramenga deiki di, tek sisi nimi denge pio men nukmanto podinunge.

27Aner er ati ban bisida, nimi derban bisipu kurure. Aner er ati damai embange neng yumada, amenda depmengedi, derameng nesala kungaipu bena kunkamenge. Atep, anerapu kungai yumada, mepropmumdi, pio yuk karenaipu bena kunkamrume. Raja Salomodi, er nyapu tep pepu.