Proverbs 8

Ila kael kemna deiyo keca di, “Nimi yuma moupra kael kepnetenge,” pepra peserur upu

1Ila kael kemna deiyo ngebo erdi, “Ne upu gekepneso,” pepra perure. Tonda, ila kael kemna deiyo ngebo erdi, “Ne upu gekepnemumnyopda, telep kupra kunange yuma betapra kael kemkamrume,” pepra, ila upu deiki di upuserure. 2Er angeboda, bisi embana pirimanai mutu buma deiki cap, tonda bisi kwangdai cap tekredi, ila upu deiki di upuserure. 3Tonda, ila kota mutu ati arum doramidi, ongomgenepra wiami gel beilya pumbon wengbanung buplan damai yuma cap, tekredi ila upu deiki di peserure. Atep aca di peserur upuda ake.

4Uo, neda sun nimi yumadi, ‘Ne upu gekenkamrum’ tenen, aupu pesenune. Ange utopu, “Sun tuai mutu kurum nesala yumadi, ne pesenun upuda, moupra gekepmumdi kael kepneso,” pepra, sun yuma tep upesenune. 5Sunda betapra weika di kael kemna ngeda, kapul men kael keprum nesalada, ne upu moupra gekepmumnyopda, telep kun keca betapra kael kemkamrume. Ange utopu, sun tupa walwalpu kurum nesala peda, ne pesene upu moupra gekepmumnyopda, ‘E, telep kupra kuna ngeda ake’ tenen, nong bol deikinge kael kemna gum dinin, nong neitamainge ton, moupra kael kemkamrume. Sunda kika pio weik nesala kuruma cadi, ne pesene upu betapra tenenkamruma deiki di, pio moupra tenepeteprumudi, telep kupra kael kemkamrume.

6Ne penun upuda, moupra gekenkamrume. Ada tali tep men pepsene. Deiyoda, nedi pesenun upuda, tali upu men pertamnun dinin, pio telep upupu penuna cadi, moupra gekenkamnerume. Nedi pesenun upu yumada, pio dumsisi kupra kunangepu penuna cadi, sun yumadi moupra gekenkamnerume.

7Neda tali mok upu pertamnada, ‘Pio ne songe,’ tenenun ngebo kununa cadi, mok upu pio men pesenune. Atep nengeda, nedi pesenun upu yumada, pio tek sisi kun keca tepapu pesenune. 8Ange utopu, ne sipyal pumbon di pesenun upu yumada, dumsisi kupra kunange tep, tek sisi upu pesenune. Mali upu tenpu pe ton men pesenune. Gwalin upu cap, mawa di mali pertamna upu cap, ton pio men petamsenune.

9Tali bol deikinge gum dinin, ikin upu nong neitamainge tep, moupra tenere ngebodi, ‘E aupu deiyoda ake,’ tenen, kael kemre ngeboda, ne penun upu yuma tep, ‘Teka aupuda pio tek sisi upupu pepmara,’ tenenkamre. Ange utopu, ila kael kemna deiki di moupra tenerur ngeboda, ‘Teka aupu neitamaida, malinge tenpu peda pio men kurure. Aupu yumada dumsisingepu kurure,’ tenenkamre.

10Atep nengeda, ton neng dingeda utenenunge. ‘Uo, kunumna weik keca, er sida perak cap, urasin pio telep keca emas capda, pio putanerura cadi, akecapu erbenkamne,’ tenenkamenge. Dinino, sun ila kael nengda, ange men tenenkamrume. Pio telep ngeda, nedi sun tep, “Ukunkamrume, angeda pio men kunkamrume. Pio telep kupra kuna ngeda ake,” pepra, peteremsene upu dopromumdi, angepu talepra kunkamrume. Pio telep ngeda akonuma.

11Nedi ila kael kemna upu pesenunada mambul weik kurure. Nimidi, ‘Uo, kunumna weik gel er sida permata cap, batu delima capda, pio telepe,’ tenenunge. Dinino, nedi pesenun upuda, tek sisi ila mambul kurura cadi, yuk kunumna weik keca yumada, mambul men kurure. Sun putan keca yala-yala yumada, yambul mambul kurur dinin, nedi ila kael kemna upu pesenunada, ila mambulngepu kurure. Atep, aupu yumada, ‘Uo aupu moupra kael keptepe’ tenen, putarepa, pio tenenapu kunkamrume.

12Ila kael kemna deiyonge cap, tonda, ‘Tali lupra kundenkapmepedi, mangkau di mali kupkup’ tenen, moupra tenena deiyonge cap, kikiman kurunge. Nedi ila kael kemna tep pesene upu, moupra tenenapu kumumnyopda, ila kael kemna deiyo keca cap, ‘E, dumsisi kuna tep, telep ban bisida ake’ tenena deiyo keca cap doronkamrume. Ila kael kemna upu kael keprumnyopda, moupra tenenange peda dororumudi, ila kael nengpu kunkamrume.

13Allah Yahweh tep, kware kuprepa, er sipu eremengedi, er tepapu gispal donung nesala yumada, ‘Mali kun keca yuma tep, nun songe,’ tenengedi tamnunge. Neda, ila kael kemna deiyo keca karena deiyo ngebo kununa cadi, nedi, ‘Angeda ne songe,’ tenenun kecada ake. Ada, mali kun kecapu talepra kungedi, sun dipru erepdanung nesala cap, sal nong-nong kupra gemena deiki kunung nesala cap, mawa di mali upu pertamnung nesala cap, mali keca yala-yala yuma talepra kunung nesala cap, sun yuma tep, yu kunerepa, ‘Ne pio songe,’ tenenune.

14Neda ila kael kemna deiyo keca karena deiyo ngebo kununa cadi, “Telep kuna ngeda ake, mali kuna ngeda ake. Dumsisi kuna tep, bankamrum bisi ake,” pepra, lap pena deiyo ngebo kunune. Tonda, ‘Ado, ado?’ tenena pio gum dipapu, dumsisi kupra kunedi, nimi tep upu bongdina deiyo ngebo kunune. Tonda, ila kael upu nong neitamainge peda, ne kaele. Bol deikingepu gum dinin, neda ila kael kemna deiyo cap, ila puto cap ngebo kunune.

15Nimi deiyo kepra talenung neng, Raja-Raja neng yumada, nedi ila kael kemna deiyo keca, sun tep karepnyopda, adeiki di, sun amutara kunge nesala yuma tep, telep kupra talenunge. Nedi ila kael kemna deiyo keca karesenuna deiki di, yuk deiyo pel talepra donung neng yuma peda, moupra tenepmengedi, sun amutara nesala tep, “Telep kupra kuna ngeda ake, mali kuna ngeda ake. Angeda ukunkamrume, angeda pio men kunkamrum,” pepmengedi, mem upu cap, wenemna upu cap, telepngepu sekra deringedi talesenunge.

16Ware mutu do yuma, sun ila deiyo kepra talenung neng yuma cap, ila nimi deiyo Raja kepra, talenung neng cap, sundi deipmengepa, dadeipdanen bankameng nesala talenkameng nimi deiyo neng yuma capda, nedi ila kael kemna deiyo keca karesenuna deiki di, sun amutara kunge nesala talepra kununge.

17Sundi ne tep putaprepa, ‘Uo, ila kael kemna deiyo keca ton doproptepe’ tenen, tupa tenenenung nesalada, nedi sun tep bicau tenenedi melimnune. Tonda, ware mutu nesala do yuma, sundi, ‘Uo ila kael kemna deiyo keca doproptepe’ tenen, ne tep putaprepa, pio pe deipra enenung nesalada, tek sisi sundi ila kael kemna deiyo keca konum talepra kunkamenge.

18Ila kael kemna deiyo keca tenepra kunung nesalada, bung keca cap, kunumna weik keca yala-yala yuma cap, dopromengedi, telep kupra kungepa, yuk nesala yumadi, aneng sun kunge keca epmengedi, gispal donkamenge. Ila kael kemna deiyo keca moupra tenengedi, dumsisipu kunung nesalada, kunumna weik keca, pio tep akaprepa sundi talenkamenge. Sun talenkamenge ngeda, men gum kupkamre. Tonda, sundi kunkameng keca yuma peda, pio teleppu kunkamre.

19Tali tuai nesaladi, ‘Uo, kunumna weik gat keca, er sida emas cap, perak capda, pio telep kecapu kurur,’ tenenunge. Dinino, nedi tek sisi pepsene. Ila kael kemna deiyo keca tenepra kunung nesaladi doronkamenge ngeda, pio teleppu kunkamre. Emas cap, perak capda, yambul telep kecapu kurure. Dinino, ila kael kemna deiyo keca moupra tenengedi, dumsisipu kunkamenga deiki di, doronkamenge keca yumada, pio mambul weik keca kurure. Yuk telep keca yumada, yambul telep kurur dinin, ila kael kemna deiyo keca moupra tenenge nesaladi, doronkameng kecada, ila mambul keca kurure.

20Ne embanun bisida, pio telep dumsisi kuna bisi tepapu, melipra embanune. Tonda, ne yan yanipra banun bisida, dumsisi kuna bisi tepapu banuna cadi, nimi upu lepsisikra bongdina tep nengeda, “Telep kunmarum neng ake, mali kunmarum neng ake,” pepra, pio tek sisi kupra, nimi tep upu lepsisikra bongdinune. 21Ila kael kemna deiyo keca tep tupa tenenung nesalada, nedi sun tep, ila isomka nesala kepra deipnepa, kunumna weik keca weika di talepra kunkamenge. Tonda, nedi anesala tep, bung keca derin ati weik dinipkamre.

22Menmena taru Allahdi akeca-keca yuma kapul men ketekepra deipu taruda, Allah Yahwehdi, ‘Ila kael kemna deiyo ngebo’ tenen, ketenepra deiamneue. Ada, pio menmena taru, Allahdi er pe buru di talepra pel donkamunge yumada, tenpunge peda kapul men domu taru di, ‘Ila kael kemna deiyo ngebo kunkamre’ tenen, ketenepra deiamaneue. 23Allahdi mutu-mutu yuma, kapul men ketekepra deiamu taru di, neda menmena konum ketenepra deiamneue. Tonda, akeca-keca yuma kapul men kamu taruda, Allahdi konum ketekepneudi, wepra deiamneue.

24Allahdi ila pala laut mokon yuma, kapul men ketekepra deipupa, laut mokon men deiamu taru di, neda menmena ketenepra deiamneue. Tonda, me bungna cap, embaramre me yala-yala yuma cap, kapul men ketekeiamu taru di, neda menmena ketenepra deiamneue. 25Allahdi mutu-mutu yuma kapul men ketekepra deipupa, men bukamu taru di, neda menmena ketenepra deiamneue. Tonda mutu buma-buma yuma men kwamu taru di, neda konum ketenepra deiamneupa akuramsi.

26Tonda ila pala ban mutu yuma kapul men ketekepra deiamu taru di, neda menmena ketenepra deiamneue. ‘Nimidi wa pepkameng’ tenen, wa tu kapul men ketekepudi, men telep kupra deiamu taru cap, tonda tu bute kapul men ketekepra deiamu taru cap di, Allahdi ne konum ketenepra deiamneupa akuramsi.

27Allahdi im alau tara cap, im neitamai kure keca yuma cap, ketekepra deipu tarada, ne konum akuramsa tep apel domunge yuma epsi. Ange utopu, ila pala laut mokon deiamngai di wiliprapudi, ila laut mokon yuk-yuk derina cap, mutu sirik, im sirik ketekepra deipu taru peda, ne akunmasidi dinmasipa kupu. 28Tonda Allahdi, ‘Duada, im alau tara kunkamre’ tenen, ketekepra deipu taruda, ne akunmasidi dinmasipa kupu. Ange utopu, ila laut mokon kauru pumbon neitamai bukra embaramre puto me bunga yuma ketekepra deipu taru peda, ne akunmasidi dinmasipa, akeca yuma ketekepra deipupa epsi.

29Allahdi, ‘Ila pala laut mokon derinaida, acapu deipkamre’ tenen, ame tep, “Kanda nedi ketenepra deipkenaipu, acapu deipkamrume. Yukai ton gopra, men bena deipkamrume,” pepra, upu karepu taruda, ne akunmasidi dinmasipa kupu. Tonda, ‘Tuai mutu amutara bukamre’ tenen, ila mutu yangne gel yuma ketekepra deipu taruda, ne peda akunmasidi dinmasipa kupu.

30Ataru neitamai yumada neda, Allah er pel melimna ngebo utopu kuramsidi, ne ila kael kemna deiki di diramsipa, akeca-keca yuma ketekepra deiamu. Allah er damai tumi-tumi yuma tekra diramsi taru yumada, kange deipra teleppu kuramsi. Allahda, ne damai kuramupa, nun kikiman kuramnumnga cadi, pingpinga di, kange deipra kuramsi. 31Ange utopu, Allahdi tuai mutu ban-ban yuma ketekepra deipupa, diramsidi, ne pio kange deipra kuramsi. Tonda, Allahdi tuai mutu ban-ban yuma kunge nesala ketekepu taruda, ne ton diramsidi, kange deipra pio pingpinga di kuramsi.

32Atep nengeda, sun ne nyapu yuma cap, sun kaber neng yuma capda, ne pesene upu moupra gekenkamnerume. Ware neng do yuma, nedi, “Ukunkamrume, angeda men kunkamrume. Telep kupra kuna ngeda ake,” pepra, derisene upu moupra gekepmengedi, talepra dombanapu kunkameng neng yumada, Allahdi melimrepa, pio teleppu kunkamenge. Allahdi anesala yuma tep, kange deipredi, telep kudinkamre.

33Nedi, sun tep, “Ukupra kunkamrume. Telep kupra kuna ngeda ake,” pepra, peteremsenun upu cap, wenemna upu deiki di pesenun upu yuma capda, moupra talepmumdi kunkamrume. Aupuda, pio men tamkamrum dinin, aso deiki pio deipkamrume. “Aupuda tali upu cadi, dakwapye,” pepra yanina meme. Ne pesene upu moupra talepmumnyopda, tek sisi ila kael kepra teleppu kunkamrume.

34Ware ngebo do yuma, ne pene upu gekerur ngeboda, ‘Uo aupu ton cap gekeptene’ tenen, pio pingping kange doupra kuredi, ne ati damai yana gekeryakankamre ngeboda, Allahdi melimrepa, teleppu kunkamre. Ukupmantoda, ne pene upu gekena tep, tumi-tumi yuma ne ati buplan dam yana bukra gekepredi, ‘Ware telep upu ton yana pepkamaner do?’ tenen, tupa moupra kalengkamre ngeboda, Allahdi angebo tep melimrepa, teleppu kunkamre. 35Ware ngebo do yuma, ‘Ila kael kemna deiyo keca doproptene’ tenen, ne tep pio pe deipra er peternere ngeboda, ne cap antapnemnyopda, angeboda gam kuna deiyo keca ton doronkamre. Er angeboda, Allah Yahwehdi kange deipra melimrepa, pio teleppu kunkamre.

36Dinino, ware ngebo do yuma, ‘Ila kael kemna deiyo keca ne dabale’ tenen, ne cap men antapneme ngeboda, er pedi er pe nong tep, mali kudidarure. Ange utopu, neda ila kael kemna deiyo keca tep, ‘Akecada ne songe’ tenen, ne tep tamnenung nesala yumada, tek sisi dena deiyo keca tepapu kange derinunge. Ange tepapu kange derinung nesalada, ‘Dena deiyo keca doroptepe’ tenen, putarepa, sun pedi ketenemdinunge.

Ila kael kemna deiyo keca karena deiyo ngebodi, nimi tuai nesala yuma tep pepu.