Pro 9 | XteSC | STEP | Uda, ukupmanto upu ton pepkusene. Nimidi sun kayapu neng melimna tep upupmengedi, telep keca kareramengtopu, ‘Ila kael kemna deiyo kecada, nimi yuma dopropkameng’ tenen, konum ketenepra deipseu. Nimidi ‘Pio telep ati dopkup’ tenen, ketenemna tep, ayumnya co yoneitam bari ikmengedi dopmengepa, akati pio dimperamretopu, ‘Ila kael kemna deiyo kecada, nimi yuma yana dopropkameng’ tenen, konum ketenepra deipseu.

Proverbs 9

Ila di kael kemna deiyo keca tep, pepu upu

1 Uda, ukupmanto upu ton pepkusene. Nimidi sun kayapu neng melimna tep upupmengedi, telep keca kareramengtopu, ‘Ila kael kemna deiyo kecada, nimi yuma dopropkameng’ tenen, konum ketenepra deipseu. Nimidi ‘Pio telep ati dopkup’ tenen, ketenemna tep, ayumnya co yoneitam bari ikmengedi dopmengepa, akati pio dimperamretopu, ‘Ila kael kemna deiyo kecada, nimi yuma yana dopropkameng’ tenen, konum ketenepra deipseu. 2 Ukupmantoda, nimidi, gam keca popra sekmengedi, anggur tapu du mokon cap tapakra deipmengopda, kailya kalepmange nge deipra, jen jepkamangai tep, ketenepra deriramengtopu, ila kael kemna deiyo keca konum ketenepra deipseu.

3 Tonda, ila kailya kalemna deiyo nengdi, ‘Nimi weik yangepa, kikiman jen jepkamep’ tenen, sun amutara pel don neng doproipmengepa, sun dan-dana tara mutu kunge nesala yuma tep, kongperbanunge. Ange utopu, ‘Ila kael kemna deiyo kecada, nimi yuma dopropkameng’ tenen, konum ketenepra deipseu. Ada, ila di erepra buku mutu deiki welepra tekmengedi, ban mutu dutara kunge nesala gekena tep, ila upu deiki di, “Sun yuma yamumdi, kailya jeryarume,” pepra kongperamengtopu, ila kael kemna deiyo keca karena deiyo ngebodi, nimi yuma tep, “Sunda yakarume,” perure.

4 Ware nesala do yuma, tupa walwal kunge nesala tep, uperure. “Sunda ila kael kemna deiyo keca kapul men dororuma cadi, ne damai yamumpa, nedi akeca karenkamsene,” perure. Ange utopu, ‘Telep kun keca ake, mali kun keca ake’ tenen, betapra men tenepmengedi, telep kupra men kunung nesala tep nengeda, aupu perure.

5 Nimidi ila kailya kalepra deipmengedi, sun kayapu neng tep, “Sun yuma yakaso. Yamumdi, pio telep jen keca yala-yala yuma keteneipsinge cap, nedi anggur mokon purupra tapakra deipsinge capda, yana jenkamrume,” pepra kongperamengtopu, ila kael kemna deiyo keca karena deiyo ngebodi, sun walwal kunge nesala yuma tep, “Anengo, ‘Ila kael kemna deiyo keca karepkamsen’ tenen, keteneipsisi ngeda, sun doryarume,” pepra kongperure.

6 Aupu ton perure. Ne damai yamumdi, ila kael kemna deiyo keca konum dopropmumnyopda, angepu moupra talepra kumumdi, sun walwal di kuramrumnge yumada, adipapu tapkamrume. Ukupra ange yuma tapmumnyopda, ila kael kemna deiyo kecapu talepra kumumdi, telep kupra kun keca yumada, kael kepbankamrume. Angepu talepra kupbamumdi, pio telep kupra gampu kunkamrume. Tonda, pio dumsisi kun kecapu kael kepbamumnyopda, abisipu melipra dombankamrume.

7 Dinino, ware ngebo do yuma, yuk ngebodi mali upupu peredi, telep kupra kunange tep, “Angeda tali keca pua,” pepra, nyek-nyek perur ngebo tep, “Kanda mali kunmarema cadi, ange yapkurume,” pepra wenepyopda, amali upupu perur ngebodi tamupra, er wenemare ngebo tep, er nong deiki mali upu pepra derinkamre. Ange utopu, ware ngebo do yuma, mali kecapu talepra kunge nesala tep, “Sun mali kurumu keca yuma tapso,” pepra wenepmengopda, sun mali kun kecapu talepra kunge nesaladi, yu kuprepa awenemna upu penge neng tep, tamupra popmanto kungedi, sun nong deiki ikin kecapu derinkamenge.

8 Ange tep nengeda, mali upupu pengedi, telep kupra kunange tep, “Angeda tali keca pua,” pepra, nyek-nyek penge nesala tep, “Sunda mali kunmaruma cadi, ange tapkurume,” pepra wenemna gume. Sundi nyek-nyek penge nesala tep wenepmumnyopda, sun anengdi, sun tep yu kuprepa, ‘Sunda nun songe,’ tenenkamsenge. Atep, akunge nesala tep, ‘Sun dakunkameng’ tenen, tapkamrume.

Dinino, nimi ton telep kun kecapu kael kepra kunge nesala tep, sundi mali kupmengepa, wenepra lepsisikmumnyopda, anengdi kange deipra gekenkamsenge. Anesaladi, ‘Uo, sun wenepmasenga deiki di, melipra telep kudinmasenge’ tenen, sun tep, ‘Anesalada, nun kange deipmepe’ tenen, bicau tenepsengedi, weika di tapakra dipru karenkamsenge.

9 Ange utopu, nimi ton telep kupra kuredi, ila kael kemrur ngebo tep, “Ukupra kunkamrume, telep kupra kuna ngeda ake,” pepra, lepsisikra peterepmumnyopda, er pedi ton cap ila di tapakra kael kepbankamre. Tonda dumsisi kun kecapu talepra kunge nesala tep, telep keca ton tapakra peteremumnyopda, anesalada tek sisi ila di kael kepmengedi, telep kun kecapu tapakra kupbankamenge.

10 Ila kael kemna deiyo keca, gonga kepra kael kepbange nesalada, Allah Yahweh tep, ‘Erda ila mambul ngebo kurure,’ tenepmengedi, kware kuprepa, er sipu pio eremnunge. Allah tep kware tenenung nesalada, konum gonga kepra, ila di kael kepbanmange. Tonda, Allah erda mali keca tenpunge peda men kuredi, pio Lengnapu ^{▼▼Lengnapu Ngebo seku ngeda, ada ‘Bol kurun ngebo kurure,’ tenena gume. Ada ‘Mali kun keca tenpu peda men kurur ngebo,’ tenena tep seku. Indonesia upu deiki di, ‘suci’ penunge.} Ngebo kurura cadi, er pere upu cap, er kure keca cap kael kepmengedi, angepu talepra dombange nesala yumada, ila di kael kepbanunge. Ila kael kemna keca tep, bol deikingepu gum dinin, nong neitamainge yuma peda, betapra tenenunge. 11 Ila kael kemna deiyo keca talepra, kael kepbankameng nesala tep, sun gam kunkameng taruda, go ton cap lyoma di kunkamenge. Tonda, sun gam kunkameng taru yuma tep, keteng tamun ton cap tapakra kareprepa, gam kupbankamenge.

12 Akael kemna deiyo keca moupra kael kepmumnyopda, sun pedi, sun pe tepapu telep kudidankamrume. Dinino, ware nesala do yuma, sundi ila kael kemna deiyo keca tep, ‘Ne songe, ange yumada, tali keca pua,’ tenepmengopda, sun pedi sun pe tepapu, mali kudidankamenge.

Tali nyangtamameng nerapudi penge upu tep, pepu upu

13 Walwal kuna deiyoda, tali nyangtameng nerapu utopu kurure. Ada, ukupmantoda, moupra tenena gum nerapuda, ali dangna pio gum dipapu, ila di tali-tali upupu weik penunge. Sun anerapuda, kange douna gum di, walwal kungedi penunge. Dinin, sunda moupra tenena gum nerapu cadi, ‘Neda walwal kunedi, tali upupu pepra kunune,’ men tenenunge. 14 Atali-tali upu pertamnung nerapu, sun bungnungaida, buma deiki bukmengedi, dutara nimi ati domyai epmengedi, sun ati buplan damai derirameng telep bungna keca deiki bukmengedi, dutara nimi ati doramengai dingedi, utara ati kunge neng tep, mali upu weik penunge.

15 Ada ukupra bungmenge nerapudi, dutara ati arum domyai bisi embange neng, sun namdona tep, dipru gidon upu weik pununge. Animi kan-kanda, ‘Telep kupra kun keca akurur dinin, moupra men tenengedi, nun dipapu tenenup kecapu tali lupra kunkamepe,’ tenenung nengda, anerapu penge upu gekepmengedi, sun dipru gidorepa, amali bisipu dombanunge.

16 Anerapudi, sun ila kael kemna deiyo keca moupra men kael kemengedi, walwal tupa kunge neng tep, upenunge. “Sunda nun ati yamumpa, nundi sun putasere keca karenkamsepe,” pepra namdonunge. Ange utopu, ‘Telep kun keca ake, mali kun keca ake’ tenen, betapra men tenepmengedi, telep kupra men kunung neng tep nengeda, aupu penunge.

17 “Anengo, upula dopra deiamenge me jepmengepa, pio telep peramretopu kurure. Ange utopu, roti kwaneng inipra jepmengepa, tau pio peramretopu, kurure. Ange utopu, sunda nun ati inipra yamumnyopda, kange deipra kunkamrume,” pepra namdonunge.

18 Ukupra dipru gidon upu penung dinin, anerapudi penge upu gekepmenge nengda, pio moupra men kael kemnunge. Aupu gekepmenge nengdi, men tenenung kecada ake. Ada, menop taru di, sun tali nyangtamameng nerapu damai benpa, kikiman kurami neng yumada, konum deramipa, denung nesala sambala wengbaramengaipu kununge. Ada, sun mali kun kecapu, weik kuramya deiki di deramya tep, Allahdi pio malyaipu ketenepra deipkaida, acapu wengbanunge. Atep nengeda, ‘Sun kange moupra kunkamrum’ tenen, pepsene.