Psa 11 | XteSC | STEP | Raja Dauddi, aMazmur upuda seku. Ada Allah upu mut pena deiyo ngebo karepkamnga tep sekudi karepu. ‘Ikin keca ne damai yaredi, popnerur’ tenen, ne nai bo Allah Yahweh, er damaipu kunune. Atep nengeda, warya tep, sundi ne tep, ‘Sepdaro bendopkurume,’ pepnetum do? Sundi ne tep, “Metek madi, ‘Nimi popserur’ tenen, kware kuprepa, menmena mutu dup lakra badoramretopu, benkurume,” pepra, penurumu ngeda, warya tep do?

‏ Psalms 11

‘Nun nai bo Allahda, pio kalekra melimserure. Er damaida, ikin keca pio men kupsetue,’ pepu upu

1 Raja Dauddi, aMazmur upuda seku. Ada Allah upu mut pena deiyo ngebo karepkamnga tep sekudi karepu.
‘Ikin keca ne damai yaredi, popnerur’ tenen, ne nai bo Allah Yahweh, er damaipu kunune. Atep nengeda, warya tep, sundi ne tep, ‘Sepdaro bendopkurume,’ pepnetum do?
Sundi ne tep, “Metek madi, ‘Nimi popserur’ tenen, kware kuprepa, menmena mutu dup lakra badoramretopu, benkurume,” pepra, penurumu ngeda, warya tep do?
2 Sundi ne tep, “Gume konum dirume! Ada sun yu nengdi, ‘Angebo popkup’ tenen, sun mar cap, jen cap, konum ketenepmang adano!
Sun marda, jen tapu deiki konum ketenepra deipmangdi, lukunda taru neitamaida, mar yana popkamsenge.
Ada, Allahdi pesere upu talepra, nundi dumsisipu kunup neng tep, sun yu nengdi, ‘Popkamep’ tenen, ketenepmange!
3 Uo, Allahdi, ‘Ange kunada pio telepe, ange kunada pio mali pua,’ pepra, deiamseu upu yumada, mali nengdi, aupu yuma yaniptapmengedi, nun mali kweipsengopda, nun dumsisipu kunup nesaladi, ware kuptepe do? Gume, angeda upu men lepsisiktepe!
4 Dinino, nun nai bo Allah, er si Yahwehda, akeca-keca yuma talepra, ila nimi deiyo ngebo kuredi, er putoda pio weik kurure.
Allah Yahweh, akeca-keca yuma taleruraida, im deiki di pio telep takhta deiki bungredi, upu bongdiserure. Atep nengeda, ware keca do yuma, er dipapu diserure.
Atep, tuai mutu kunge nesala yuma, sundi kunge keca yala-yala yuma peda, er dipapu diredi, kael kemserure.
5 Allah Yahwehdi, mali kun kecapu talepra kunge neng pe, telep keca talepra, dumsisipu kunge nesala peda, ‘Telep kunkameng do, gum do?’ tenen, pirirteserure.
Dinino, Allah er kange dipru neitamaida, sun mali kun kecapu talepra kunge nesala yuma tep nengeda, ‘Sun anengda, ne pio songe,’ tenerure.
6 Atep, sun mali-malipu kunge nesalada, sun nong deiki ila kange mun keca karepkamre. Atep, sun tupa gam kunkameng taru neitamai yumada, sun menenga tep, pio ikin keca karenkamre.
Ukupmantoda, ila bupu kumanya yaredi, pung peprepa, akeca-keca yuma gelal seramretopu, sun tep ila di wenepkamre ja!
7 Ange ukupkamra deiyoda, tali tep gume. Deiyoda, Yahweh er kange dipru neitamaida, pio dumsisi kun kecapu kurura cadi, nimidi kunge nge epredi, kange derirura cadi, erdi, “Angeda kunkamrume, angeda pio men kunkamrume,” pepra, deipseu upu deiki peseretopu kunge nesala tep nengeda, er kangeda pio derirure.
Atep, dumsisipu kunge nesalada, sirya taruda, er damai yangedi, er urasin ton epkamenge. Allahdi sun anesala tep, bicau tenepredi kange deipkamre.