Psa 1 | XteSC | STEP | Mali kuramenge nesaladi pemenge upu men gekenung nesalada, Allahdi melimrepa, teleppu kunkamenge. Tonda, mali kun keca talepra kunge nesaladi, mali weik kuramengtopu men kunge nesalada, Allahdi melimrepa, teleppu kunkamenge. Cadi, Allah tep teka tenenung nesalada, Allah tep songe tenepra, nalepra autusenun nesala cap, kikiman men kununge.

Psalms 1

Mali kun nesala cap, telep kun nesala cap, kunkameng keca tep pepu upu

1 Mali kuramenge nesaladi pemenge upu men gekenung nesalada, Allahdi melimrepa, teleppu kunkamenge. Tonda, mali kun keca talepra kunge nesaladi, mali weik kuramengtopu men kunge nesalada, Allahdi melimrepa, teleppu kunkamenge.
Cadi, Allah tep teka tenenung nesalada, Allah tep songe tenepra, nalepra autusenun nesala cap, kikiman men kununge.
2 Dinin, sun Allah tep teka tenenung anesalada, sun putare ngeda, Allah Yahwehdi, ‘Ukunkamrume, angeda men kunkamrume,’ peipu upu yuma tepapu, kange deipmengedi, moupra gekenunge. Ada, komuni taru pe, lukunda taru pe, Allah Yahweh ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda lap pena upu nomor 49 dirume.} erdi peiramseu upu yuma gekepmengedi, ‘Deiyoda ange tep pepu do?’ tenen, moupra tenepmengedi kunkamenge. Anesalada, Allahdi melimrepa, teleppu kunkamenge.
3 Allah upu moupra tenere ngeboda, er kunkamre keca yumada, teleppu kunkamre. Angebo er kunkamre keca yumada, ukupmanto nimidi me pirmanai, co koupmengepa, bongopredi bo telep kupra doupredi, du moun taru li yumada, tamna gum di, telep kupra du mourure.
Tonda, aco bo kolupra men sangamra utopu, Allah tep teka tenerur ngebodi kunkamre keca yumada, teleppu kunkamre. Deiyoda, Allahdi dumsisipu kunge nesala tep, melimrepa teleppu kunkamenge.
4 Dinino, sun mali kun kecapu tenepra kupbange nesalada, kumanya embaredi pung peprepa, sepmenga lakra baramre utopu kunkamenge. Adeiki di sun cap, sun kunge keca yuma capda, gum kupkamre.
5 Ange tep nengeda, mali kun kecapu talepra kunge nesalada, Allahdi tuai nesala ban-ban yuma, upu bokeipredi wenepkamre taruda, sun amali kun kecapu talepra kunge nesalada, wenepredi gum kupra deipkamre.
Ada, Allah er nyapu kan-kan di bokra, yukai deipredi, amali kunge nesala tep wenepkamre. Mali kun nesala cap, Allah tep teka tenepra dumsisipu kunung nesala cap, kikiman men kunkamenge.
6 Apepmasen upuda, tali tep men pepsene. Deiyoda, er dipru bouna di Allah amutara kuredi, dumsisipu kure ngeboda, Allah Yahwehdi melipra kalengredi, anesala tep telep kudirure.
Dinin, mali kun kecapu tenepra kupbange nesalada, wenepra popkamrai tep, ketenem dirure. Sun mali kun kecapu talepra kunge nesala cap, sun kunge keca cap yumada, Allah Yahwehdi gum kupra deipkamre.