Psalms 10

Yu nengdi, Israel nesala tep mali kudiramya tep, Allah mororami upu

1Uo, nun nai bo Allah Yahweh, ware keca deiyo tep, kandi nun pera karenai utopu tekmemdi, men melimserum do?
Tonda, ware deiyo tep, nun ikin keca weik kunup taruda, kandi men yana melipra lyemserum do? Ukupmantoda, kanda inipmamemdi, kau kemtamnapu kuserume.
2Tonda, sun yu weik nengda, gemepra salnong-nong kungedi, sun tali kan-kan nesala tep, ikin keca pio weik, sun nong deiki derinunge.
Ukununga tep, sundi yuk nesala tep, ‘Anengda mali kweipmepepa, ikin kange pio weika di doupra kunkameng’ tenen, tali upu pengedi, mali kun keca kangepu tenepmenge pangeda, ‘Ange deiki yumada, ka tamupra sun pe nong deikipu yankamre’ tenen, morokenupe.
3Sun mali kun kecapu talepra kunge nengda, ‘Nun putapser kecada ake-ake,’ pepra salnong-nong kapmengedi, gemenunge. Atep, ‘Sun mali kunge kecada, tamupra sun pe nong deiki yana mali kweipdatenge’ tenen, morokenupe.
Tonda, sundi, ‘Nun bung keca weika di dopropmepedi, isomka kunkamepe’ tenenung nengda, Allah Yahweh tep, ‘Allahda, nun songe,’ tenengedi tamnunge. Tonda, yuk nesala yuma tep, ‘Mali kweipkamep’ tenen, pio pe deipra wimdongonunge.
4Tonda, sun urasin epmepedi, kael kemnupe. Sun dipru neitamaida, pio salnong-nong kamna nengpu kununga cadi, sundi utenenunge. Ada, sundi, ‘Gume, nun mali kunup keca cap, tenenup keca capda, Allahdi epra kael men kemserure,’ tenenunge. Sundi tenenung ngeda, ‘Gume, tek sisi Allahda men kurure. Allah tep penge upu yumada, tali upu pua,’ tenenunge.
5Tonda, sundi, ‘Co bo weik doronkamep’ tenen, pel donung keca yala-yala yumada, telep kupra kungepa, nongda pio weik kupbarure.
Nun nai bo Allah, kandi, ‘Ukupkamne ngeda ake. Ada, ‘Angeda pio mali, angeda pio telepe,’ tenepmemdi, upu pepra deriserum upu yumada, pio telepe. Ada, im alau tara utopu kurura cadi, anengdi pio moupra men kael keptenge.
Tonda kandi upu bongdiserum ngeda, sundi moupra men tenenunge. Tonda, yuk nengdi, sun salnong-nong kamnung nesala tep, ‘Sun mali kurum ngeda yapso, mali kuna meme!’ pepmangepa, sun gemenung nengdi, ‘Anengda, nun songe, dakwapye’ tenen, nyek-nyek pepra nalemengedi, mali upupu pesenunge.
6Sun salnong-nong kamnung nesalada, sun kange dipru neitamaida, ‘Gume, ikin keca nun damai pio men yankamsere. Tonda, ataru di dipra, doryankamre taru peda, kange mun keca nun damai pio men yankamsere. Atep nunda pio teleppu kunkamep ja!’ tenenunge.
7Sun anesalada, wimdongon upu cap, tali upu pena cap, weika di penunge. Tonda, yuk nesala tep, ‘Sun nong deiki ikin keca weika di derinkamepe,’ tenenapu kununge.
Ange utopu, yuk nesala yuma tep, ‘Anengda, nun pio songe,’ tenengedi, pio mali kun kecapu talepra, tali lupra kunkamep ja!’ tenenunge.
8Tonda, sun ayu nengdi, utenenunge. Sundi, ‘Teleppu kunge nesala, bisai tali mangkau kange doupra embangepa, metek nimi ati damai inipmapyadi, aneng yangepa, dato-dato di poptapkamepe,’ tenenunge.
Utenepmengedi, anesala mangkau embangepa, ayu neng inipmangai di, talepra ponunge. Ataruda, moupra dingedi, ‘Abisi embankameng nengda, puto boun kupre ngeboda, adipapu poptepe nengda, danto neng do?’ tenen, ‘Moupra eptene’ tenen, dinunge.
9Ukupmantoda, bura tara tali gam kuramre ila yu keca, er si singa pusdi, inipmaredi enmaryanen, yuk gam keca popra jeramretopu, aneng peda utopu kununge. Tonda, sundi yuk nesala tep, inipmangadi warengnung ngeda, tali tep gume. Ada, ‘Sun tali kan-kan nesala tomopkup’ tenen, kununge.
Utenepmengedi, tali kan-kan nesala mankau kange doupra, sun damai embangepa, sun yu nengdi, anesala talepra tomopmengedi, doupra bengedi ponunge.
10Tonda, ‘Menmena adipapu moupra tekapmepyadi, puto boun nesala popkup’ tenen, iniapmengadi, warengnunge. Tonda, sun yu nengda, puto weik kununga deiki di, puto boun nesala mangkau kange doupra embangepa, adipapu popmengedi, sikke buktamnunge. Atep, sun tali kan-kan nesalada, pio weika di, ikin kange doupra kununge.
11Sun salnong-nong kamnung neng, sun kange dipru neitamaida, ‘Gume Allahda, nun kunup kecada, pio men teneserure. Erdi nun tep, konum lupropseua cadi, mali kun kecapu tali lupra kunkamepe,’ tenenunge.
Tonda sundi, ‘Allah erda, nun mali kunup ngeda, men diserura cadi, yuk neng tep ikin keca pio weika di, sun nong deiki deiptepya peda, Allahdi epra men kael kepsetue,’ tenenunge.
12Ukununga tep nengeda, uo nun nai Allah, kanda tekmemdi, sun mali kunge nesala tep, menmena wenepkurume!
Tonda, nun ikin kange weik doupra kunup nesala cap, dipru bounpu kupedi, yuk neng amutarapu kunup nesala cap tep, lumdongona gume naio! Nun tep melipra lyepserume!
13Uo, sun anesalada, balila kupra, pio mali kun kecapu talepra kunge nengda, ware deiyo tep, nun nai bo Allah kan tep, ‘Nunda songe’ tenen, yanitamkenung do?
Tonda, sun kange dipru neitamaida, warya tep sundi, ‘Gume, Allahda, nun mali kunup keca tep pio men wenemkamsere. Allahdi nun tep, ‘Sunda, warya tep mali-mali kun kecapu tupa talepra, pio kuramrum do?’ pepra, ‘Men wenepra asimkamsere,’ tenengedi penung do?
14Dinino, nun nai bo Allah, nun konum kaele. Tek sisi ngeda, kandi tuai nesala kunge keca yumada, kandi moupra diserume.
Ada tali tep gum dinin, kandi, ‘Sun kunge keca yuma tep, moupra epnedi, sun wenemna tep menenga keca karepkamne,’ tenerume. Tonda utopu, ‘Sun tep, upu bokeipkamne,’ teneruma tepa.
Ange tep nengeda, sun puto pio bounpu kunge nesaladi, ‘Gume, nun kunkamep keca cap, nun nong cap yumada, Allah er buru deikipu derinupe,’ tenen, kan tep pio teka tenekenunge.
Tonda, nun nai bo Allah, kandi sun lyan nyapu tep, pio moupra dimemdi kalekra melimrume!
15Naio, kan tep moropkepe. ‘Sun balila kupra, pio yu weik kunge neng tep, sun puto kunungada, kandi gum kupra deipkurume!’ tenen, moropkepe. Tonda, kandi sun tep, ‘Sun pio mali-mali kunge kecada, ware kunmang do?’ tenen, moupra dipetepmemdi, ange yuma epmemdi wenepkamrem’ tenen, moropkepe naio.
16Nun nai bo Allah Yahwehda, akeca-keca yuma talepra, ila nimi deiyo ngebo pio kunkamreme! Ware nesala do yumada, Allah tep teka men tenengedi, malipu kunge nesala yala-yala yumada, Allah erdi talerur mutu neitamai di, gum kupra deipkamre!
17Nun nai bo Allah Yahweh, nun kange dipru bounpu kunup nesaladi, nun putapserepa, kan tep morokenup keca yumada, kan adipapu gekeserume.
Tonda, nun kange mun kuserur keca yuma tep, melipsememdi, nun dipru kwa dimkamserume!
18Tonda, nun kaele. Nundi moropkepepa, kandi nun kankan neitamai kunge lyan nyapu yuma cap, ikin keca deipsengepa, kange mun kange dounup nesala yuma cap tep, telep kupra melipra lyemkamserume!
Ada kandi, “Angeda kunkamrume, angeda pio men kunkamrume,” pepra, deipsemum upu akuretopu deiki di, telep kweipkamserume. Telep kweipkamserema deiyoda ake. Telep kweipsemem pangeda, sun yu nengdi, mali kusengepa, kware weik kunupnge yumada, gum kupra deipsemempa, teleppu kunkamepa tepa.