Psa 101 | XteSC | STEP | Raja Dauddi, aMazmur upu mut seku. Dauddi pepu upuda ake. Nedi, ne kayapu neng cap, ne kikiman pel dope neng cap tep, pio men tapkamne. Tonda, nedi Israel nesala talepra, nimi upu bokeipkamne taru yumada, tali upu pena gum dipapu, pio dumsisi kupra upu bokeipkamne. Atep, nedi, ne nai bo Allah, ‘Kandi gekepkunerum’ tenen, aMazmur upu mutda, kan tep mut penkamakene.

Psalms 101

Israel nesala sun nimi deiyo ngebo Raja Dauddi, ‘Pio dumsisipu kunkamne’ tenen, putapupa, aupu pepu.

1 Raja Dauddi, aMazmur upu mut seku. Dauddi pepu upuda ake.
Nedi, ne kayapu neng cap, ne kikiman pel dope neng cap tep, pio men tapkamne. Tonda, nedi Israel nesala talepra, nimi upu bokeipkamne taru yumada, tali upu pena gum dipapu, pio dumsisi kupra upu bokeipkamne.
Atep, nedi, ne nai bo Allah, ‘Kandi gekepkunerum’ tenen, aMazmur upu mutda, kan tep mut penkamakene.
2 Nedi, mali kuna gum dipapu, pio dumsisi kuna ngeda, moupra kael kepbankamne ja! Ange yuma konum kupnyopda, yuk nesaladi, ne tep, ‘Erda mali kurur kecada ake-ake,’ pepra, mali men pepnetenge.
Dumsisi kuna ngeda, moupra kael kepetepkamne dinin, dan taru di, “Ange yumada, konum kael kepsa cadi, neda konum pio dumsisipu kunune,” peptene do? Ne walwale.
Ne kange dipru neitamaida, pio dumsisipu kangepu tenenkamne. Ne nyasilip cap, ne tara neng cap kunkamne taru neitamai yumada, mali kuna gum dipapu, dumsisipu kunkamne.
3 Nedi tali-tali keca cap, nong men kupkamre keca cap, mali kun keca cap, yala-yala yumada, pio men dinkamne. Akeca yuma tep, pio men tenenkamne.
Ware neng do yuma, Allahdi, “Angeda telepe, angeda mali,” pepra, deiamseu upu yumada, sundi ange yaniptapmengedi, mali kun kecapu talepra, pio malipu kunge keca yumada, ne pio song cadi, akeca yumada, pio men dinkamne.
4 Tonda, mawa di pena upu cap, tali-tali upu cap, telep kunange tapra, gwalin bisi bena mali kunange yumada, ne pio men kunkamne. Akeca yumada, ‘Ne damai kupnerur’ tenen, gopra karenaipu bena kunkamne. Ne kange dipru neitamaida, dumsisi kecapu tenenkamne.
Atep nengeda, mali kun keca yala-yala yumada, men kael kepkamna cadi, ange yuma pio men kunkamne.
5 Ware neng do yuma, sundi sun damai kunge nesala tep, mur-mur pena deiki di, menina upu penge nesala yumada, nedi ato neng yuma tep, wenepnedi, popra gawal dakamne ja!
Ange utopu, salnong-nong kamna cap, gemena cap kuna ngeda, ne pio song cadi, ato nengda, men kaukepkamne. Sun ato kunge nesala tep wenepkamne ja!
6 Dinino, sun teleppu kungedi, sun damai kunge neng tep, pio men tamnung nesalada, kange deipnedi, aneng tep melimkamne. Ukupnyopda, aneng cap, ne cap kange deipdapedi, kikiman kunkamepe.
Atep, ware neng do yuma, sundi mali kunange yuma tapmengedi, pio dumsisipu kunge nengda, nedi aneng tep, erepra deipnedi, nimi deiyo keca karepnepa, sunda deiyo-deiyo neng kepmengedi, ne amutara kungedi, ne pel tep melipra donkamnenge.
7 Dinino, ware neng do yuma, sundi mawa penange cap, tali-tali upu penange cap kunge neng yumada, ne cap kikiman men kunkamenge. Aneng utopu kunge nengda, enepra dokotepkamna cadi, ne amutara kungedi, ne pel melipra men donkamnenge.
Teka, ‘Aneng utopu kunge nengda, ne pio dabale,’ tenenuna tep, sun mok upu penge neng yumada, ne damai pio men yana kunkamenge.
8 Sun mali kun kecapu talepra, pio mali-mali weik kunge nesala yumada, tumi-tumi yuma, ipna taru di kuramnetopu, nedi nimi upu bokeipkamne taruda, ato neng tep, dopra wenepnedi, popra gawal dakamne ja!
Teka, sun mali kun kecapu talepra, mali weik kunge nesala yumada, ‘Nun nai Allah Yahwehdi, er kange derirur mutu, Yerusalem mutu neitamai pio men kunkameng’ tenen, ato nengda, dopra wenepnedi, popra gawal dangkamne ja!