Psa 102 | XteSC | STEP | Ataru neitamaida, nimi tenpu ngebo ton ikin kupudi, puto pio bounpu kuramnga tep, angebodi, Allah tep moropu upu. Allah tep moropu taru neitamai di, “Ikin kunerur ngeda, ukupra-ukupra kunerure,” pepra, Allah Yahweh er damai tep pepu. Angebodi pepu upuda ake.

Psalms 102

Tenpu ngeboda, “Ikin kupnepa, kange mun kange doupne taruda, tek sisi Allahdi, melipra lyepropkamne,” pepu upu

1 Ataru neitamaida, nimi tenpu ngebo ton ikin kupudi, puto pio bounpu kuramnga tep, angebodi, Allah tep moropu upu.
Allah tep moropu taru neitamai di, “Ikin kunerur ngeda, ukupra-ukupra kunerure,” pepra, Allah Yahweh er damai tep pepu. Angebodi pepu upuda ake.
2 Uo, ne nai Allah, kan si Yahwehda, ‘Ne moropkuken upu yumada, gekepkunerem’ tenen, moropkene.
Ada engepra, mali penmandi ngolongman upuda, ‘Kan damai yatupa, kandi gekepnetum’ tenen, moropkene.
3 Ikin weik kupmanerepa, kange mun kange doupra kune taruda, ‘Ne moropkuken upu gekepkunerum’ tenen, moropkene. Kandi ne tep, ‘Angeboda ne dabale,’ tenepmemdi, ‘Amnyo karikra, men kaukemkamnerum’ tenena tep, moropkene naio.
Atep, nedi moropkene taruda, ‘Kanda ne damai yatumdi, kan amul deiki di gekepnetum’ tenen, moropkene.
Tonda, nedi moropne pangeda, ‘Kanda adipapu menmena di, yana melipra lyepropnetum’ tenen, moropkene.
4 Apepmakenada, deiyo ake. Ada, ne gam kune taruda, menmena di gum kupbanerura tepa. Ukupmantoda, uku sekmengepa, uku bu jeredi, ket welepredi, aketda menmena gum kupbaramretopu, neda menmena di depnyopda, gum kupkamne.
Ikin weik kunerepa, ne nongda kange mun pu jenere ngeda, ukupmanto ngeda, ila uku jeamredi, bupu weik kuramretopu, ne nong pumbonda, ila pu jenerura cadi, bupu weik kunerure.
5 Ukupmantoda, keteng bupu di, tali manmaneng poprepa, gelal seprepa, nimidi yanipmengepanen, amenda taru amanmaneng gum kuramretopu, ne kange dipru neitamai peda, pu weik jenerura cadi, puto bounpu kunune.
Pio puto bounpu kunerura cadi, ne jen jenkune taru yumada, ‘Jen kecada ne dabale’ tenen, ange lumdongonune. Ukunun taru yumada, ne jen pio men jenune.
6 Pu weik jenerepa, ila upu deiki di, mali pepra engenune.
Tonda, ne jen jena gum tep, ne nong bol yumada, malipu kunerepa, ne nong bolda, yo deikipu kurepa, ne yo katuaipu kununge.
7 Tonda, ne jen jena gum tep, ne nong bol yumada, malipu kunerepa, ne nong bolda, yo deikipu kurepa, katuaipu kunune.
Ange utopu, nimi pio men kunungai, karen mutu neitamaida, lukunda tarupu embaramre ma, er si burung Hantu, er yuk kuramretopu, ne peda pio yuk kunune. Yuk neng cap, ne cap, kikiman ton pio men bungnupe.
8 Lukunda neitamaida, mapmane taruda, ne pio men mapmanto kunune. Asuru lanapu kunune.
Tonda, tenpu metek ma, nimi ati deiki tara, er yukpu bukapyanen, adipapu lakra baramretopu kunune. Neda, pio ne pe yukpu kunune.
9 Yu nengdi, ‘Angebo poptapkupe,’ tenen, pio dinapu kunenung nengda, tumi-tumi yuma, nyek-nyek pepnengedi, mali penenunge.
Ne tep mali weik penenung nengdi, ‘Yuk neng tep mali kweipkup’ tenepmengedi, “Angebo pio ikin weik kuprepa, nong mali kuramretopu, sun peda utopu kupkamrem ja!” pepra, ne amut pena deiyo ngebo si deiki di wimdongonenunge.
10 Apenungada, tali tep gume. Deiyoda, neda kange mun kange doununa cadi, sikke butpu jenune. Ada, sun yuk nengdi, telep roti kwaneng jerameng dinin, neda, uku sikkepu jenune.
Tonda, nedi me gwepra jene taru yumada, ne asi me weika di sangnerura cadi, tali me cap, ne asi me cap, wisipra jenune.
11 Uo, ne Allah, kandi ne tep, ‘Dabale,’ tenepnememdi, yu weik kukerura cadi, ne tep wenemnerume.
Ada, kandi ne dopra, bura tara utopu konum dokotemneruma tep pepkene naio.
12 Atep nengeda, ne gam kunkamne taruda, idona taru keteng deiki di kukia belepyanen, kange di tamupra adipapu gum kupbaramretopu, kurure. Angeda, neda adipapu menmena depkamna tep, aupuda pepne.
Tonda ukupmantoda, keteng bupu deiprepa, tali manmaneng menmena gelal sepredi, mali kuramretopu, ne peda menmena gum kupkamne ja.
13 Dinino, ne nai Allah Yahweh, kanda akeca-keca yuma talepra, ila deiki tara erepra, nimi deiyo kuna tep, pio telep bungna keca, er sida tahkta deiki bukmemdi, puto weik deiyo ngebo pio akunkamreme.
Atep nengeda, kan sida, nimi tuai nesaladi, tupa-tupa tenepmengedi, kan si tepapu pio eremkamkenge. Nimi tuai nesaladi nyapu deipmengepa, dadeipdanen bankameng nesala yuma peda, kan si tupa tenenapu kunkamenge.
14 Amenda taruda, kan Allahdi, bukromemdi, Sion ^{▼▼Sion mutu – Ibrani upu neitamaida, ‘Sion mutu’ seki dinin, asekinge deiyoda, tek sisi Yerusalem mutu tep seki. Sion perami ngeda, ada pumun taru amutu si tep perami dinin, ukutaruda, amutu tenpu tep, Yerusalem mutu penunge. Allah upu neitamaida, amutu si tep, si butene sengnung dinino, amutuda, tenpu pua. Atep, ‘Sion’ epmumnyopda, ‘E, ada Yerusalem mutu tep seki,’ tenenkamrume.} mutu cap, amutu neitamai kunge nesala cap tep, bicau tenepsememdi, melipra lyepropkamsereme.
Nun kangeda, ‘Ataru neitamai dipapu, kandi Sion mutu kunup nesala tep, nun damai yana, melipra lyepropsememdi, telep kudinkamsereme,’ tenepmepe.
Tonda, nun tenepmapada, kan Allahdi, ‘Sun Sion mutu kunge nesala, sun lyemdona tep taruda, ake,’ konum tenemum ngeda, ukutaruda konum damai yare. Atep, ‘Kanda adipapu yana lyepropsememdi, telep kudinkamserem,’ tenenmape.
15 Angeda tali tep men pepmepe. Allah, kan amutara kupedi, kan pel melipra donup nesala yumadi, Sion mutu neitamai kwamu ati uruptapipa, tali tu deiki tupa akapu gel yuma peda, ‘Ange yumada tupa ila mambul ngepu kurure,’ tenenupe.
Ange utopu, Sion mutu neitamai tali tu buta akapmarya peda, ‘Ange yumada, pio mambule,’ tenen, tupa bicau tenenupe.
16 Nun kange tenenupada ake. Ada, sirya taruda, sun yala yuk-yuk nesala, kan tep kapul men kael keamkei yala yuk-yuk mutu nesala yumada, kanda Allah Yahweh, kan ila puto kuruma tep, kael kepmengedi, kan tep kware weik kunkamenge.
Tonda, tuai mutu ban-ban yuma neitamai kunge ila nimi deiyo neng, Raja-Raja neng yuma peda, Allah kan pio telep kurumnge cap, ila puto weik kurumnge cap tep, epmengedi, ‘Uo’ tenen, kware pio weik kunkamenge.
17 Sun ayala yuk-yuk mutu nesala yumadi, kan Allah tep kware kunkamenga deiyoda ake. Ada, kanda Allah Yahwehdi, Sion mutu uruptamaminge yumada, kange di ton cap, tamupra telep kupra dopmemdi, pio teleppu kunkamre. Ukupmempa, epmengedi, kware kuprepa, kan sipu erepkamenge.
Ataruda, kanda Allah Yahwehdi, kan pio telep kurumnge cap, ila puto weik kurumnge cap tep, dirine pio weik kupmemdi, katuaipu yana kunkamrume.
18 Allah Yahwehdi, sun tali kan-kan nesaladi er tep moronung upuda, men kaukepkamre. Amenda taruda, sun kange mun kange doupra, ikin weik kuramenge nesaladi moronung keca yumada, Allah Yahwehda gekepredi, sun tep melimkamre.
Sundi moronkameng keca yuma tep nengeda, Allahdi, “Akeca yumada dakwapye,” pio men penkamre. Sundi mororameng keca yuma, konum kael kemrura cadi, ange men tapkamre.
19 Apepmasen upu yumada, moupra gekeprumudi, sekra deipkamrume. Ada, ‘Amenda doryankamre taru kunkameng nesala, sun peda ange yuma gekepmengedi, kael kepkameng’ tenena tep, aupuda sundi sekurume.
Ada, ataru kunge nesaladi, kapul men deiami nyapu dinin, amenda taru deipmengepa, gam tupa kunkameng nesala yumadi, nun nai Allah Yahweh tep, “Kanda pio teleppu kurume,” pepra, er si eremkamenga tep, aupu yumada sekurume.
20 Aupuda ake. Allah Yahwehda, im deiki tara pio telep lengna mutu neitamai kururai di, tuai mutupu dirure.
Teka, Yahwehda, im deiki kururai di, dutara tuai mutu yuma peda, er dipapu dirure.
21 Diredi, ‘Ne mawa nesala, Israel yala nesalada, yuk karen mutu wenemna ati pumbon kunge nesala cap, ikin weik kunge nesala cap, sundi ware upu pepmenga deiki di, ne tep moropkamneng do?’ tenen, moupra pio diserure.
Ada, sun tuai mutu kunge nesala kankan di, nimi upu konum bokeiamidi, ‘Anesala konum poptapkamepe,’ pepra, upu konum deiamipa, wenemna ati tupa dakunge nesala tep, ‘Ne dipapu anesala loptapnedi, lyepropkamne,’ tenepudi, keteneipu.
22 Allahdi konum keteneipudi, ‘Anesala yuma lyepropkamne,’ konum tenemnga cadi, ange konum kupyopda, ataruda Sion mutu neitamai kunkameng nesala yumadi, nun nai bo Allah, er si Yahweh tep, “Uo, kanda pio telep kurume,” pepra, er si lap pepra eremnapu kunkamenge.
Teka, Yerusalem mutu neitamai kunkameng nesala yumada, er Yahweh tep, er sipu erepmengedi, “Uo kanda tek sisi pio teleppu kurume,” penkamenge.
23 Ada, tuai mutu ban-ban yuma neitamai kunge nesaladi, ‘Allah er sipu eremkamepe’ tenen, bulupmengedi, Yerusalem mutu kikiman yankameng taruda, Allah tep si eremkamenge.
Tonda ataruda, yuk mutu nesala yala-yala yuma cap, sun nimi deiyo neng cap, sun yumadi, Allah Yahweh tep, teka tenepmengedi, er si tepapu, pio eremkamenge.
24 Dinino, nedi apu pepmasen ngeboda, wisi kapul men deipsi taruda, Allahdi ne puto yumada, adipapu konum dopropneupa, ne puto bounpu kunune.
Ukupneua deiki di, ne gam kunkamne taruda, konum sekdongopneupa, keteng tamun weikanun ton, gam men kunkamne. Neda, ‘Uo, menmena di depkamne ja,’ tenepne.
25 Atep nengeda, ne nai Allah, nedi kan tep, upepra moropkene. Ne gam tupa kunmane taru neitamai dipapu, ‘Gam kuna deiyo keca men dopropnemempa, adipapu men depkamne’ tenen, moropkene naio. ‘Tupa gam kutene’ tenen, moropkene.
Ne nai Allah, kanda pio men depkamrume. Tupa-tupa dorkunkamre taru neitamai yumada, gampu kunkamrume. Pio men depkamruma tepa.
26 Akeca-keca kapul men kwamu taruda, kan konum gam kuramuma cadi, kan dipapu, tuai mutu yuma ketkemna tep, ila puto di ketekepra deipmumpa, pio puto weik kurura cadi, ukutaru peda tupa akurure. Ange utopu, im neitamai cap, im deiki cap, amutu neitamai kure keca yuma capda, kan dipapu ketekepra deiamume. Kan pe buru puto deiki dipapu, akeca-keca yuma konum ketekepra deiamume.
27 Kandi ketekepra deiamum keca yala-yala yumada, mali kupbaramyanen, amenda sirya taruda, gum kupkamre. Dinino, kan tenpu puda, pio tep gampu tupa, pio teleppu kunkamreme.
Kandi ketekepra deiamum keca yala-yala yumada, gum kupbankamre. Ukupmantoda, nimidi winung opkalda, amenda taru lyuramretopu, kandi ketekepra deiamum keca yuma peda, gum kupkamre ja.
Ukupmantoda, nimidi pumun opkal tapmengedi, ukupu opkal kenengamengtopu, kandi akeca-keca yuma ketekepra deiamumnge yumada, sirya taru di yo punupmemdi, ukupunge ton ketekepra deipkamreme.
28 Dinino, kan tenpu ngebo puda, yo pununa gum dipapu, pio tupa-tupa gam kumemdi, pio teleppu kunkamreme. Kan keteng tamun tupa kunkamremada, men nukmanto, tonda pio men gum kupkamre.
29 Dinino, kan tenpu ngebo puda, yo pununa gum dipapu, pio tupa-tupa gam kumemdi, pio teleppu kunkamreme. Kan keteng tamun tupa kunkamremada, men nukmanto, pio akunkamre. Tonda, men gum kupkamre.
Kandi sun tep, telep kweipmempa, sundi derinkameng nyapu yuma peda, kan damaipu telep kunkamenge. Ange yuma peda kan dia!