Psa 103 | XteSC | STEP | Raja Dauddi aMazmur upu mut seku. Dauddi pepu upuda ake. Uo, ne nai Allah Yahweh tep, “Kanda pio teleppu kurume,” pepra, er teppu si eremnune. Atep, teka, ne kange dipru neitamai kunerur keca yuma deiki di, Allah tep, ‘Telepe,’ penune. Allah er mali kuna ngeda, pio men kupmara cadi, er pio telep dumsisipu kurura tep, “Kanda pio telepe,” pekenune.

Psalms 103

Allahdi nun tep pio telep kupra melimserura tep, ‘Telepe’ penkamepa tep pepu upu

1 Raja Dauddi aMazmur upu mut seku. Dauddi pepu upuda ake.
Uo, ne nai Allah Yahweh tep, “Kanda pio teleppu kurume,” pepra, er teppu si eremnune.
Atep, teka, ne kange dipru neitamai kunerur keca yuma deiki di, Allah tep, ‘Telepe,’ penune.
Allah er mali kuna ngeda, pio men kupmara cadi, er pio telep dumsisipu kurura tep, “Kanda pio telepe,” pekenune.
2 Allah er mali kunange pio men kupmara cadi, er pio telep dumsisipu kurura tep, “Kanda pio telepe,” pekenune.
Tonda, kanda Allah Yahwehdi, ne tep pio telep kudineruma cadi, ange yumada pio men lumdongonune. Tupa tenenapu kunkamne.
3 Allah er dipapu, nun mali kunup keca yuma kaukemseredi, akeca konum gum kupra deipseryopda, men wenemkamsere.
Tonda, Allah er dipapu, nun kange mun pu jeserenge yuma kwetepseredi, apu gum kupra deriserepa, kip nesalapu kunupe.
4 Angepu gum dinin, tonda, ‘Depmengepa, konum deami nesala kunung mutu, er sida Sheol mutu, Allah tep teka tenenung nesalada, amutu men wengbenung’ tenen, Allahdi lyemdoseredi, gam kuna deiyonge kareserure.
Tonda, Allah erdi, ila bicau teneseredi, ‘Ukupkamsene,’ pepra, pedina upu ^{▼▼pedina upu – Ayat 4 neitamaida, Ibrani upu deiki di ‘hesed’ pepra seku. Indonesia Alkitab neitamaida, ‘kasih-Nya kekal’, tonda ‘kasih setia’ sengnunge. Ange telep dinin, nundi, ‘Ketengban nesaladi aupu deiyo neitamainge moupra kael kepkameng’ tenen, aupu ‘hesed’ deiyo ngeda, jenek kupra sekmepu.} deiki peiamseunge yumada, tek sisi tupa-tupa kuserure. Ukuredi, nun mali kunup keca tep, adipapu wenepra men portamserur dinin, er kange dipapu bicau teneseredi, lyemdoserure.
5 Allahdi, nun gam tupa kunkamep taru neitamai yumada, pio telep kecapu kareserure.
Ukuserya deiki di, nunda puto weik ^{▼▼puto weik – Aupu deiyoda, ake. Ada, seng-seng mada, keteng tamun pio weika di gam kurure. Tonda amada, pio puto weik ma kurura cadi, ayat 5 neitamaida ukupmanto upu ‘burung Rajawali’ deiki di seku.} kupedi, keteng tamun weikanun ton gam kunkamepe.
6 Allah er si Yahwehdi, “Angeda kunkamrume, angeda pio men kunkamrume,” pepra, deiamseu upu peretopu, er pel dorenge yumada, ange utopu dumsisipu kurure.
Tonda, yu nengdi yuk nesala tep, yanipmengedi, ikin keca sun nong deiki derinung dinin, Allahdi pio amutara kupra, ikin weik kunge nesala tep, upu bokeipredi, kange di tamupra teleppu kudiserure.
7 Allahdi, ‘Israel nesalada, telep kunkameng’ tenen, erdi Musa tep, “Telep kuna tep, abisipu embankamrume. Aupupu talepra dumsisipu kunkamrume,” pepra peteremamu.
Tonda, Allah erdi puto weik pel dorur ngeda, ‘Sun Israel nesala yuma kael kepkameng’ tenen, benbenepra pel doramupa, sun yuma diramidi, kael kemami.
8 Allah er si Yahwehdi, yu menmena di kuprepa wenepra, pio men deremserure. Ange gum dinin, er kange dipapu, bicau teneseredi, teleppu kudiserure.
Allahda, menmena di yu kuprepa, men wenemserure. Ange gum dinin, erda ila di bicau teneseredi, ‘Ukupra telep kudinkamsene,’ pepra, pedina upu deiki di peserur upu yumada, angepu tek sisi tupa-tupa kuserure. Erdi nun tep, ila di bicau teneserur ngeda, men nukmanto kurure.
9 Ange tep nengeda, Allahdi nun yuma tep, ‘Sunda malipu kunmarume,’ pepra, tupa-tupa mali men penkamsere.
Tonda, Allahdi nun mali kunange tep, yu kuprepa, mali kange douserur ngeda, tupa-tupa mali kange dounapu men kunkamsere.
10 Teka, nun tuai nesala yumadi, mali kunange weik kunup dinin, nundi mali weik kurameptopu, Allah weika di men wenemserure.
Tonda, Allahdi, “Angeda kunkamrume, angeda pio men kunkamrume,” pepra, deiamseu upu yanipmepedi, mali weik kunup dinin, akurameptopu menenga keca ikin ngeda, weika di men kareserure.
11 Allahdi kaukemseredi, bouna dipapu melimseredi, kuserurnge deiyoda ake. Tuai mutu dutara, im deikida pio deiki tara, ila lyoma di kurepa, kunupetepra men nuktepe utopu, Allah ila bicau teneseredi, melimserurnge yumada, men tenepra nuktepe.
Allah tep, ‘Uo, erda pio mambul, puto weik ngebo kurure,’ tenen, er tep kware tenena ngeda, erdi peserur upu moupra talenung nesala tep nengeda, Allahdi, ‘Anesala yuma tep, ila di bicau tenesenedi, ukupra teleppu kudinkamsene,’ pepra, pedina upu ^{▼▼pedina upu – Ayat 11 cap, 17 cap neitamaida, Ibrani upu deiki di ‘hesed’ pepra seki. Sun kael kemna tep, aIbrani upu deiyo ngeda, jenek kupra sekmupu.} deiki di peiamseunge yumada, tek sisi tupa-tupa kuserura cadi, ange yuma nong kupkamser ja!
12 Tonda, keteng yakan tarada atarapu dinin, ortara keteng dangbaramre tara akurure. Aneitamai mutuda, kunupetepra men nuktepe. Ange utopu, Allahdi kaukemserurnge yumada, utopu kurure.
Ada, Allahdi, “Angeda kunkamrume, angeda pio men kunkamrume,” pepra, deiamseu upu yaniptapmepedi, mali kun kecapu weika di talepra kunup dinino, ange yuma kaukemseredi, gum kupra derirure. Nun mali kunange dopra, pio karenai utopu derirura cadi, ange peda pio men nukmanto kurure.
13 Tonda, nimi tuai nesala kankandi, nimi yuma sundi derirameng nyapu tep, ila di bicau tenerameng utopu, Allah tep, ‘Uo, erda pio mambul, puto weik ngebo kurure,’ tenen, er tep kware tenengedi, er upupu moupra talenung nesala tep nengeda, Allah Yahwehdi, anesala yuma tep, ila di bicau teneserure.
14 Allah erda, ila di bicau teneserura deiyoda ake. Ada, Allahda er kaele. Nun tuai nesala yumada, puto weik nesala men kunupe. Erdi tali tu dopra ketekeiamseu ngeda, tupa teneserure.
Ada, Allahdi tuai nesala ketekeiamseu taruda, kalkal peramu tu dopra adeiki di ketekepra deiamseue. Angeda tupa teneserura cadi, yu kuprepa, menmena di men popra gawal dangserure.
15 Tali paramre beteida, keteng bupu doprepa gelal seproprepa, menmena di kouluramretopu, nunda keana nesalapu kunupa cadi, nun peda, keteng tamun weika di gam pio men kunkamepe. Menmena dipapu denupe.
Dinino, manmaneng neitamai tali paramredi, urasin pio telep kuramretopu, nimi tuai neng peda, utopu kununge.
16 Dinino, bupu kumanya puto di, abura tara kait keca deiki pung peprepa, adipapu gelal sepra gum kuramrepa, amutu nimidi akait kecada ton cap men diramengtopu, nimi tuai nesala peda, konum depmengopda, akonuma. Yuk nengdi anesala ton cap pio men dinunge.
17 Nimi tuai nesalada, depmepyopda, menmena dipapu gum kunup dinin, Allah Yahwehdi, “Ila di bicau tenesenedi, pio telep kudinkamsene,” pepra, pedina upu deiki peserur upuda, pio men tamrure. Ada akeca-keca kapul men ketekeiamu taru di, dipdongopra, ukutaru cap, tonda, dorkunkamre taru capda, pio tep, bicau teneseredi, telep kudinkamsere. Tupa-tupa angepu nong kupra telep kudinkamsere.
Ada, ware neng do yuma, Allah tep, kware kuprepa, Allahdi, “Angeda kunkamrume, angeda pio men kunkamrume,” pepra, deiamseu upu moupra talengedi, pio angepu kunung nesala tep, pio bicau teneseredi, teleppu kudinkamsere.
Ange utopu ton, Allahda, er mali kuna pio gum dipapu, pio dumsisipu kure ngeda, er tep teka tenenge nesala cap, sundi derinung nyapu cap, tonda, anyapudi, derinkameng nyapu cap tep, Allahdi sun yuma tep, dumsisi kuna deiyonge pio karenkamsere.
18 Ada tali dakunge nesala tep, angeda men karenkamre dinin, er tep teka tenepra, erdi, “Sun tep ukupra melimkamsene, ukupsenyopda, sundi ton ukupra-ukupra kunkamrume,” pepra, deiamu pedina upu pio moupra talengedi, dombanung nesala tep, dumsisi kuna deiyo keca karenkamre ja!
Tonda, Allahdi, “Angeda kunkamrume, angeda pio men kunkamrume,” pepra, deiamseu upuda, Allah tep teka tenenge nesalada, aupu yuma men lumdongonunge. Moupra tenepmengedi, angepu talepra kununge.
19 Allah er si Yahwehdi, ‘Akeca-keca yuma talepra, deiki tara erepra pio ila nimi deiyo ngebo kunkamne’ tenen, deiyo ngebo bungrurai, er sida tahkta deikida, im deiki konum deipu.
Atep, Allah erdi talerur kecada, akeca-keca yala-yala yuma cap, tuai mutu ban-ban yuma capda talerure.
20 Uo, sun im deiki kurum malaikat yumada, sun pedi Allah er si Yahweh tep, “Kanda pio telepe,” pepra, er si eremkamrume.
Sunda im deiki kumum puto weik malaikat yumada, Allahdi, “Ukupkurume,” pere upu yuma, adipapu gekepra kurume.
Ange yuma tep nengeda, Allahdi, “Ukupkurume, ukupkurume,” konum pepyopda, sun yumadi, adipapu gekepmumdi, angepu konum kurume. Atep, sun pedi Allah tep, “Kanda pio telepe,” pepra, er sipu eremkamrume.
21 Tonda, sun im deiki kurum jen talena malaikat yuma peda, Allah Yahweh tep, “Kanda pio telepe,” penkamrume.
Allahdi tenere keca yuma tep, erdi, “Ukunkamrume,’ pepre pangeda, sundi angepu gekepra konum kurume.
22 Ange utopu, Allahdi konum ketekepra deiamu gam keca yumadi, Yahweh tep, ‘Naio, kanda pio teleppu kurume,’ pepra, er sipu eremkamrume.
Ada, tenpu mutupu gum dinin, Allahdi talerur mutu ban-ban yuma neitamai di kurumu nesala yumadi, Allah tep, “Kanda pio telepe,” penkamrume.
Ne Daud peda, ne kange dipru neitamai yuma di, Allah er si Yahweh tep, “Naio kanda pio teleppu kurume,” pepra, er sipu pio eremkamne!