Psalms 104

“Nun yumadi, Allah nun ketekepra deipseu ngebo tep, gudinkamepe,” pepu upu

1Ne nai Allah Yahweh, kanda ila mambul ngebo kurume. Atep ne kange dipru yuma kan deiki deipnedi, “Kanda pio telepe kurume,” pepra, kan sipu eremkenune. Uo, ne nai Allah Yahweh, kanda pio mambul weik kurume.
Ukupmantoda, nimidi pio telep opkal kenekmengepa, urasin pio telep kuramengtopu, kanda ila eremna cap, pio mambul kuna cap, urasin pio telep cap ngebo kurume. Atep kan sipu eremkamkene.
2Nun nai Allah er dirin weik ngebo kurure. Nimidi urasin telep opkal kenengamengtopu, er deiki dirin weik kurure.
Tonda, nimidi kanam dipapu opkal bol dopra, keana tep dodin ati bepekra deriramengtopu, kanda im deiki kure keca yuma ketekepmumdi, telep kupra deipmume.
3Tonda kan kuremai, im deikida, nimidi ila lyom ati alau tara dopra welerbaramengtopu, kandi kan kuremai yuma im deiki dipdongopra dopmume. Kan ati yumada im neitamai cap, tuai mutu cap kwamre me yuma dutara akurepa, kandi dopmum atida, akeca yuma deiki tara, im deiki di dopmume.
Ukupmantoda, kandi tuai mutu yakamem taruda, kan bisida dua deiki atekmemdi embankumem taru dingeda, dua deiki bukmempa, kum di doupra embakerure. Dua cap, kum capda, kan amutara kuredi, kandi ‘Ukupkamre,’ tenememtopu kan pelpu dorure.
4Akeca-keca yuma talepra kuruma cadi, kum cap, uku capda kan amutara bukra kurura cadi, kandi, ‘Ukupkamre,’ tenememtopu, kan pelpu dorure. Tonda perelang penada, kan melimna keca kukerure.
5Tuai mutu ban-ban yuma dopra, ila mutu yangne gel deiki deipmume. Nimidi ati dopkunge taru, ayomnya co ingdaramameng utopu, kandi, ‘Tuai mutu yuma long-long pepredi, men gum kupkamre’ tenen, tuai mutu amutara mutu yangne gel deipmumpa, pio dimpepra pio tep akunkamre.
6Kandi akeca-keca yuma kapul men ketekepra deipmum taruda, tuai mutu deiki ila mokon deipupa, tuai mutu katuai men kwamu. Ila mutu dup peda, me mokon neitamai kauru pumbon kwamnga cadi, mutu dup peda men epmanto kupu.
7Ukupra kwamu dinino, nun nai Allah kandi me mokon tep, “Dana-dana tara kepropo,” pepra, ila upu deiki di peipmumpa, me mokon yuma dana-dana tara kepropupa, tuai mutu katuai kupu.
Kulman poramretopu, kandi ila upu deiki peipmumpa, me mokon yumada adipapu menmena dana-dana tara kepdongopu.
8Me opra embaramngaida, mutu dupai di popdoupra ban tara baramu. Ada, kandi, ‘Ila me mokon acapu deipkamre’ tenen, keteneiamumtopu, mokon embaramudi, deipu.
9Nun nai Allah, kan dipapu me derirbankamreai konum ketenepra dediamumtopu, acapu tupa kurure. Tonda, ‘Acapu deipnyopda, deipra men banadongorure’ tenen, keteneiamumtopu, ila pala laut mokon cap, yuk me mokon capda, ‘Akunkamre,’ teneamumtopu deipmume. Akupmum ngeda, ‘Me dinipselakredi nimi kun damai yan deipredi jeprur’ tenen, kupmume.
10Ange kupmum dingeda, Allah kan dipapu mutu bungamra amutara bon sekeipmumpa, me pukra yakarure. Me pukra yakaredi, dana-dana tara mutu buma akapmarpa, daneitamaida, me embarure.
11Ukupmuma tep nengeda, ‘Bura tara tali gam dakunung keca yuma, mepu jenkameng’ tenen, kupmume. Ange utopu, bura kurur keca keledai bisam yuma peda, ‘Me putapre taru, me jepmengedi kunkameng’ tenen, karepmume.
12Mada yala-yala yuma co bo deiki ati dopmengedi, ‘Co pala damai kungedi, upu penkameng’ tenen, ketekepra deipmume.
13Tonda im deiki mutu di mutu dam mo dokotemrume. Ukupmemdi tuai mutu yumada, kandi ketekepmum keca yala-yala weik paramredi, teleppu bongorure.
14Nimidi peinung gam kure keca yala yuma, sapi bisam do, domba bisam do, akeca yuma tep, ‘Sun jenkameng’ tenen, mutmuta karerume. Ange utopu, nimi tep nengeda, nimidi wa pepmengepa kourameng keca yala-yala yuma kareserume.
Kan melimsememnya deiki di, tu neitamai di, jen keca yala-yala yuma paramredi, bolongrepa, dopra jenupe. Ukusememnya deiki di, tuai mutu deiki gam kure keca yala-yala yumada, jen keca jenunge.
15Tonda, anggur co bolokamenganen, nimidi dakra jepmengopda, kange deipra telep kununge. ‘Zaitun co du telel doprapmengedi, sun aso deiki likmengepa, urasin telep kunkamre’ tenen, zaitun co du mouramre co ton kareserume. Tonda, ‘Nimi tuai nesala yuma jen keca jepmenge pangeda, sun nong puto kupbankamre,’ tenen, roti jen keca pe, yuk jen keca yala-yala yuma peda, kareserume.
16Allah Yahweh, er pedi Libanon mutu wapum co, er sida cemara co perameng co kouamunge damaida, mo weika di karerepa, telep kupra bolongrure.
17Aco dupaida, metek ma yala-yala yuma sun ati donunge. Tonda, lyom yan cap, kurun pol cap kurur ma er sida, ranggung ma, ila lyom co dupaida, sun ati donunge.
18Ila di erepra buku mutu dupaida bura kambing gel si deiki embaredi akurure. Tonda, ‘Mutu bukreya amutara gel amutara kunkameng’ tenen, mutu dup gel deiki embaramre keca, er sida pelanduk ketekepra deipmume.
19Allah kandi ware ketekepmumada, ‘Nimidi, e, ali taru ake, bupu li ake, mo cemre li ake, ali taru yumada ukupre’ tenen, kael kemna tep war ketekepra deiamsemume. Tonda, keteng bena wekure taruda, keteng di kael kemredi, wengbarure.
20Allah kandi kunungna keca karepsemem pangeda, tumi-tumi yuma iramre. Konum ipropre taruda, bura tara komuni manung kecada, bukra lukunda embanunge.
21Tonda, bura tara kure ila pus utopu keca, er sida singa pus, ‘Ne jen keca ton Allahdi ketenepra deipneunge ton, jeptene’ tenen, ila upu pepredi erbarure.
22Ukunmangepane, berekyopda, asinga pus yuma, komuni taru sun inipra maramengaipu, tamupra marbanunge.
23Lukunda neitamai embaramre keca, sun maramengai tamupra bange pangeda, nimi tuai nesala yuma bukrapmengedi, sun pel dorbanunge. Apel yala-yala yuma donmangepane, konum ipbaryopda, sun pel tapmengedi, ka tamupra sun ati marbanunge.
24Uo, nun nai Allah Yahweh, kandi pel domem keca yala-yala yumada, pio weik akurum ngeda, nimidi men nuktepe. Kanda tek sisi ila kael kemna deiki di akeca-keca yuma ketekepra deiamsemume. Ukupra kupsemumpa, tuai mutu neitamai yuma kandi ketekepra deiamsemum keca, yala-yala yuma weik akurure.
25Ange utopu, Allah kan dipapu ila pala laut mokon ketekepra deipmumpa, mokon amu kunge keca yambulnge cap, ilange cap, mokon amutara tu deiki embaramrenge cap, mokon neitamai embaramrenge cap, pio weik kununge. Ange yumada pio men nukmanto.
26Tonda, laut mokon pumbon, ila nong weik mekina er sida Lewiatan, kandi ketekepra deipmumpa, laut mokon neitamai di esu pepra embarure.
Tonda, kandi ketekepra deipsemum laut mokon deiki tara, nimi dopmengedi, ila gapung co er sida kapal laut, akapal pumbon wekmengedi, laut mokon deiki embange keca peda dinupe.
27Ware yala gam kure keca do yuma, sun yumada, Allah kan tepapu, ‘Ware taru di nun jen keca karepkamser do?’ tenen, pio ketenepra dikenunge.
28Nimi do, yuk gam kure keca yala-yala yuma do, kandi nun jen keca karepsemem pangeda, nundi bupra jenupe.
Tonda kandi keteneipsemem keca, kan buru di bepekra karesemempa, tuai mutu gam kure keca yumadi, nun jen keca jemepedi, bouserure.
29Dinino, nun nai Allah, kandi nun yuma tep, dabal kukere taruda, tapsememdi, nun ton men diryasemem pangeda, nun kwar weik kuserepa, kange mun kange doupra kunupe.
Tonda, nimi do, yuk gam kure keca do, kandi nun isin doropsemem pangeda, adipapu denupe. Konum depmepyopda, nimi pe, yuk tali gam kure keca peda, ka di tamupra tupu darbanupe.
30Dinino, kandi nun cap, yuk tali gam kure keca yala-yala yuma cap tep, ‘Nyape deipmengepa, gam kunkamenge,’ tenepsememdi, isin tupa karepsemem taruda, nyape ton deipmepepa, gam kunkamenge.
Kandi gam kuna deiyo keca karepsememnya deiki di, tali gam kure keca do, nimi do, nyapu deipmepepa, dadeipdanen, bankameng nyapu cap, gam kure keca deipbankameng nyapu capdi, tuai mutu ban-ban yuma bena kunkamenge. Ukupra kusememnya deiki di, tuai mutu yuma telep kudiserume.
31Atep, nun nai Allah kan sida Yahweh, kan pio telep kurumnge cap, ila puto di pel dorumnge cap, nimi yumadi kan tep, “Erda pio telepe,” pepra, kan si eremkamkenge cap yumada, ‘Ange yuma pio tep akunkamre’ tenen, morokene.
Tonda, kanda Allah Yahweh, kandi ketekepra deiamum keca dimemdi, ‘Akeca yuma tep kange deipra telep kunkamrum’ tenen, moropkene.
32Uo, nun nai Allah kanda tali ngebo gume. Tuai mutu diryamem taruda, mutu yuma longrure. Tonda ila bungrur mutu yuma yan bepre pangeda, aca di uku jeredi, ila ket pangrure.
33Ange yuma tep nengeda, ne gam kunkamne taruda, Allah Yahweh, er tepapu gudinedi, mut penkamne. Tonda ne akunmane taruda, Allah tep, “Kanda pio teleppu kurume,” pepra kange lon mut penedi gudinkamne.
34Ataru-ataru neitamai yuma, ne kange dipru neitamai tenenkamne keca yuma peda, Allah dineredi, kael kepneryopda, ‘E, er tenere kecada teleppu kurure, tenepneredi, kange derinkamner’ tenen, moronune.
Ada tali tep men pepne. Ne nai Allah Yahweh, er tepapu, ne kange derinuna tep pepne. Er melimnerya deiki di kange derinune.
35‘Nimi mali kecapu talepra kunung nesala yumada, tuai mutu di gum kupra deipkamre’ tenen, moronune.
Ange utopu, yu tenepra mali kange dounung nesala yuma peda, ‘Allahdi anesala wenepra gum kupra deipkamre’ tenen, moronune.
Ne nai Allah Yahweh, kanda ila mambul ngebo kurume. Atep ne kange dipru yuma kan deiki deipnedi, “Kanda pio telep kurume,” pepra, kan sipu eremkenune. Nun tuai nesala yumadi, Allah tep, “Kanda pio teleppu kurume,” pepra, ‘Kange lon mut pepmepedi gudinkamepe’ tenen, moronune.