Psalms 105

“Yuk nesala ban-ban yuma, ‘Allah teka tenenkameng’ tenen, Allah er kure keca tep lap penkamrume,” pepu upu

1Allah tep telepe pepmumdi, er ila mambul upu peipu ngeda, nesala ban-ban yuma kungai lap penkamrume.
2Allah er tepapu, kange lon mut pena deiki di, “Allah erda nimi men kupmanto keca yuma, pel dorur ngebo,” pepra, er sipu erepra nukbamumpa, nesala yumadi, ‘Aupuda mambul upu’ tenen, kael kemkamenge.
3Allah er nongeda, pio lek ngebo kurure. Atep nunda er mawa neng kunupe cadi, atep nunda pingping kange doupra kunkamepe. Utopu ware nesala do yuma, Allah tep si eremnung neng yumada, kange deipra pingpinga di kunkamenge.
4Nun Israel nesala yumadi, Allah Yahweh er tepapu tumi-tumi yuma si erepmepedi, “Kan ila putoda nun karepsememdi, nun damai kumemyopda, adeiki di nun putopu kunkamepe,” pepra tumi-tumi yuma moronkamepe.
5Allahdi nimi men kupmanto pel doamunge cap, “Ange-angepu moupra talepkamrume,” peiamseu upu cap, nimi upu bokeiamseunge yuma capda, moupra tenepmumdi talepra kunkamrume. Tonda, pio men lumdonongkamrume.
6Uo, Allah er amutara kuramudi, er pel don ngebo Abrahamdi deiamseupa, dadeipdanen yakarum nesala yuma cap, tonda Allahdi wepra deiamudi anuamu ngebo Yakubdi deiamseupa, dadeipdanen yakarum nesala yuma capdi, Allah erdi nimi men kupmanto pel doamunge cap, tonda “Angepu moupra talenkamrume,” peiamseu upu cap, angepu moupra taleprumdi, tenenkamrume. Men lumdongonkamrume.
7Allah Yahweh erda, nun ila nimi deiyo ngebo kuserura tep, erdi nun tep, “Angeda kunkamrume, angeda men kunkamrume,” peiamseu upuda, tuai mutu ban-ban yuma kunup nesala tep pepra deiamseu upuda, nun damai pio akunkamre. Angepu talepra kunkamepe.
8Allah erdi nun tep, “Ukunkamsene,” pepra pedina upu deiki di peiamseu upu yumada, ton men lupronkamre. Pio tupa tenenkamra cadi, tenpunge peda men tapkamre. Aupu yumada tek sisi nong kupkamre.
Tonda, Allahdi, “Angeda kunkamrume, angeda men kunkamrume,” pepra deipseu upu yumada pio tep akunkamre. Menmena taru di akuramnga utopu, ataru peda akunkamre. Doryankamre taru pe pio tep akunkamre. Men gum kupkamre.
9Allah Yahweh er pedina upuda, nun apu yapu Abraham cap, Isak cap, sun damai pepra deiamu. Allah Yahwehdi, “Ukupkamsene,” pepra pedina upuda, Abraham er kori pepra deiamu. Aupuda tek sisi Abraham er mi Isak deiki yan dukdongopu. Atep aupu pio tupa-tupa tenerure.
10Tonda apeiamu upupu, ‘Tupa akapkamre’ tenen, kange di moupra Allahdi Yakub er damai yaudi, “Men di peipkesi upuda, tek sisi nong kupkamre,” pepra, ka di ton cap deipu. Ada, Israel nesala yumadi, ‘Aupupu pio moupra tupa-tupa tenenedi, telep kweipkamsene’ tenen, yan pepra deipu. 11Upepu dingeda, Allahdi sun Abraham cap, Isak cap, nun Israel nesala cap tep, “Kanaan mutu karepsenepa, sun pe mutu utopu kumumdi, pio tep amutu talepra kunkamrume,” pepra deipu.
12Pumun taru, Allah er nyapu Israel nesala, Mesir mutu kurami taruda, nimi bo neng utopu kurami. Sun Israel neng Mesir mutu kurami neng yumada, sun gung yambulpu kurami. Weik men kuramya cadi, yuk mutu nesala yumadi sun tep, ‘Dakwapye, anesalada mambul gume,’ pepra tenerami.
13Sun Israel nesalada tenpu mutupu men kurami dinin, amutu-amutu yuma sun dipapu pamdinkamidi ton mutu kuramnanen tapra, yuk mutu bena kunmananen, amutu di gopra yukai barami. Adeiki di, sun anesala yumada, tali bisi embanapu kurami. Tenpuaipu dimpepra men kurami.
14Ukurami dinino, Allahdi sun aneng yuma tep, men kaukeptamupa, yuk mutu nesaladi sun Israel nesala damai ikin keca ton men derirami.
Tonda, ‘Sun anesala ikin keca deipnung’ tenen, sun nai bo Allah Yahwehdi dana-dana tara ila nimi deiyo kepra talerami neng, Raja-Raja tep, “Sundi ne nyapu ikin keca derina gume,” pepra, upu sengamu.
15Allahdi yuk mutu nimi deiyo neng tep uperamu. “Sun Israel yala nesalada, nedi wepra deipsi neng cadi, sun tep ton men dumkamrume. Tonda, ne upu peipnepa, lap pena neng, nabi-nabi neng sun damai ikin keca ton men derinkamrume,” pepra upu sengamu.
16Tonda, pumun taru, Israel nesaladi talepra kurami mutu yumada, jen putan keca li karepupa, amutu ila jen putaramu. Ukupudi amutu neitamai jen jerami keca yumada, gum kupbaramupa, ikin weik kupu. Allah erdi sun jen jerami keca yala-yala yuma dopdaropu.
17Dinino, tenpu ngebo Yusup puda, ‘Er menmena Mesir mutu bena kunkamre’ tenen, Allahdi wepra deiamu. Atep, Allahdi teneramutopu, Yusup er du yapudi Mesir neng kori kunupipa, menmena benamudi, Mesir neng sun pel melipra don ngebo kepra pel melipra kuramu.
18Ataru, angebo Yusup er yaneda, gat tapu di pio koupdongomi. Tonda, er kum damaida, ikin keca rantai besi di garakeami.
19Ukuamipa, Mesir mutu ila nimi deiyo ngebo ikin kange doupra kuramudi, Allahdi peramu upu tep, ‘Ange kupkamre do? Ware keca kupkamser do?’ tenen, mambul kange doupra kuramupane, Allahdi Yusup tep meliamnga deiki di, Yusup erdi, “Dorkunkamre taruda, ange kupkamre, ange ton kupkamre,” pepra lap pepu.
Yusupdi lap peputopu, angepu dukdongopu. Ukupka tep, Mesir deiyo ngebodi, ‘Uo, tek sisi Allah Yahwehdi perur upuda, tek sisi kurure’ tenen, kael kepu.
20Ange kael kepka deiki di, Mesir mutu nesala sun ila nimi deiyo ngebodi, Yusup tep tapu koupra wenemna ati dongomya, “Loptapso,” pepupa, lopra deipudi, adipapu wenemna ati neitamai di loptamipa, telep kupra deipua kuramu.
21Yusup konum loptapipa, Mesir mutu nesala, sun ila nimi deiyo ngebodi, Yusup konum dopropu dingeda, Yusup erepra deipu. Erepra deipudi upepu. “Yusup ne talenun bung keca yala yuma cap, tonda ne ati dam kalengna cap deiyo ngeboda, er dipapu kalengneredi, talepra kunkamre,” pepra, Yusup wepra deipu.
22Upepu dingeda, Yusup er tepapu, Mesir mutu taleamu ngebodi, upepu. “Kan dipapu, ne ati pel don neng cap, wisi-wisi neng yuma cap tep, kandi kael keamum ila kael kemna deiyo keca peteremkamrume,” pepra deipu.
Tonda, “Yusup er dipapu, ne pel don neng yuma cap, amutu neitamai taleami neng wisi-wisi neng cap yuma, sun deiyo ngebo kumemdi, sun aneng yuma tep, upu bokra deipmemdi, dumsising derinkamrume,” pepra deipu.
23Ukupu taruda, Yusup er nai bo, Yakub Kanaan mutu taprapudi, Mesir mutu beu. Mesir mutu beudi, nimi bo ngebo utopu bena kuramu. Ada teng ban neng utopu kupra bena kuramu.
24Allahdi Yakub er nyapu weik kupra deipbaramudi, puto kareramupa, pio puto weik kuramya cadi, sun podan nengdi yana men popbisipmanto kurami. Israel nesala kurami mutu dana-dana tara kurami nesalada puto yambulpu kurami dinin, Israel nesalada puto weik kurami.
25Allahdi Mesir mutu kurami neng tep, kange tamupra deipupa, sun anengdi er nyapu sisa Israel yala nesala yuma tep, derepra mali upu pepra, ila ikin keca sun nong deiki derirami.
Tonda, Allah er nyapu Israel nesala sun tep, mok upu peptapra, ikin keca deriramidi, amutu nesala tep, ‘Minina upu pemepya deiki di, amutu nesala yumadi Israel nesala tep, ‘Nun song’ tenenkamenge’ tenen, tali upupu pertamami. Tonda, Mesir mut nesaladi, sun Israel nesala tep mok upupu pertamami.
26Ukuramipa, Allah Yahweh, er melimna ngebo Musa cap, er du bo Harun cap, Allah erdi wepra deiamudi, ‘Israel nesala melimkamreng’ tenen, doproipupa, sundi Mesir mutu berei.
27Sun abutene nengda, Allahdi konum wepra deipupa, sun anengdi, Mesir mutu neitamai bereidi, nimidi men kupmanto pel yala yuma cap, tonda kunupsek pen pel yala yuma capda, Allahdi, ‘Ukupkamrenge,’ tenemutopu, bena kuramreidi pel doramrei. Allahdi, ‘Ukupkamreng,’ teneramutopu, mambul pel bena doramreipa, amutu kurami nesala yumadi, ‘Uo, tek sisi Allah er puto deiki di pel dorenge’ tenen, kael keami.
28Ila mambul pel dopra kuramrei taruda, Allahdi, “Angeda kunkamrerume. Ukuprerumpa, ikin keca yana kupkamre ngeda ake,” pepra, peiamutopu kupu.
Allah Yahwehdi Mesir mutu neitamai yumada, kunungna kecapu karepupa, kunungnapu kupu. Kunungna neitamaipu kurami dinin, adeiki di men kael keamidi, balila kuramidi, “Allahdi perur upuda, men gekenkamepe,” pepra, er upu yanirami.
29Allah erdi peiamu upu men gekepmanto kuramya tep, Allahdi sun wenemna tep, erdi, ‘Telep kurur me yumada, tamupra yapipu kupkure,’ tenepupa, Mesir mutu neitamai embaramu me cap, mokon cap yumada, yapipu kupu. Yapi kupka deiki di, amutu me neitamai kurami mekina yala-yala yumada, depra gawal daki.
30Mesir mutu nesalada, tupa balilapu kuramipa, Allahdi karepupa, kori yala-yala yuma, ila upu pepidi, amutu yan wekra dinipi. Tonda, kori dipapu Mesir mutu nesala sun ila nimi deiyo ngebo kun damai, pio telepai yuma peda, beidi wekra diniki.
31Ukupu dinino, Mesir mutu nesala tupa balilapu kuramipa, Allah Yahweh erdi amutu neitamai tep, “Bum cap, suma cap, weika di wekurume,” pepupa, upu lelim ila di pepra, amutu neitamai yana weki. Ukupya deiki di, Mesir mutu yumada, suma cap, bum cap, sunpu pio weik kupu.
32Tonda, Mesir mutu neitamaida, Allah Yahweh erdi, ‘Mul duduya moda, es mo cepkamre’ tenen, pepudi dokoteputopu kupra, tuai mutu saku. Aes mo tuai sangmau taruda, tupa-tupa perenglang penapu kunmau.
33Ukunmau taruda, anggur tapu cap, kwarang co cap yumada, lekra tuaipu sangmau. Ukunmaudi Mesir mutu neng, sun co yala-yala yumada, dalupra tuaipu sangmaudi gawal daku.
34Ukupu dinino, Mesir mutu nesaladi tupa balilapu kuramipa, Allah erdi sul po upupupa, sul po dengeda, men nukmanto weika di amutu neitamai yana diniki.
35Ukupidi, asul po yuma belepra yaidi, amutu nesala sun kourami keca yala-yala yuma, bo deiki yana amupidi, jepra gawal daki. Tonda amutu nesala sun jena tep tu deiki kourami keca yumada, jepra gawal dakropi.
36Tonda, ange yuma konum dinino, sun Mesir mutu kurami nesalada, balilapu kuramipa, Allah erdi, Mesir mutu kurami nesala, sun weni sal nyapu yumada, popra tapu.
Ada, amutu kuramidi ner dodana derirami weni nyapu yumada, popra gawal daku. Mesir mutu nesaladi, aweni nyapu tep, ‘Nun nyapu puto kunkamenga deiki di, teleppu kunkamepe,’ tenerami dinino, Allahdi aweni nyapu yuma popra gawal daku.
37Ila ikin keca yala-yala yuma, Mesir mutu nesala sun deiki konum deipu dingeda, Allah Yahweh er nyapu Israel nesalada, Mesir mutu di doupra beu. Adoupra benkoi taruda, Mesir mutu nesaladi, ‘Menmena betenge’ tenen, Israel nesala tep, kamo telep keca, kunumna weik keca emas cap, perak cap karepipa dubei.
Ada, sun ila puto cap, pingping deiki cap dipapu bei. Israel nesala yala-yala yuma kikiman bei taruda, tenpu ngebo peda, puto boun kuna tep men tapu. Sun yuma puto di bendopi.
38Ataruda, sun Mesir mutu nesaladi, Israel nesala tep, ‘Uo, sun Israel nesaladi popkamser do?’ tenen, kange mun deiki kuramidi kwar kuramu. Ukupra kuramya tep, Israel nesala bei taruda, sun Mesir mutu nesalada, kange telep kupra kurami.
39Israel nesalada, Mesir mutu tapra, bisi barami taruda, Allah er nyapu melimna tep, keteng komunida, Allah Yahwehdi dua karepnepa, yana lelipdongopnepa, sunda amutara barami. Tonda ipna taruda, Allahdi uku karepnepa, sun bisi banaida, dirine kupnepa, adeiki epnedi, yanipra barami.
40Ukupra melipupa barami taruda, Israel nesaladi Allah tep “Uo, nun jenada tu keca ton putapsera tep, melipseo,” pepra moropi pangeda, ma er si puyu ma, weika di yamupra karepnepa, sundi popra jerami.
Tonda “Nun jena tep roti keca putapsere,” pepra moropne pangeda, Allahdi roti kwaneng er sida mana, im deiki di dokotepnepa, dopra jepnedi boupne pangeda, sun bisi barami.
41Tonda, “Me putapsera tep, me karepseo,” pepra, Allah tep moropipa, mutu bukamnga neitamai di, gil dikda pepupa me pukra saku. Ataruda, me gumai, pio katuai mutu neitamai kurami dinino, ameda mutu katawai di pukra yaudi, puto di embeupa, gwepra jerami.
42Akuramunge yumada, Allahdi er pel don ngebo Abraham tep, ‘Ukupkamkene,’ pepra, pedina upu peiamu ngeda, men lupronamu. Angeda tamupra tenepudi amambul pel yuma doamu.
43Utenepu dingeda, Allah Yahweh er nyapu tep, pingping kange doupra meliamudi, doupra baramu. Adoupra baramu taruda, Allah er pedi wepra deiamu nesala yumada, pingping kange doupra kuramidi, ila upu peramidi kange deipra kurami.
44Bisi barami taruda, Allahdi melimamupa baramyane, erdi ‘Karepkamsene,’ peiamu mutu bei dingeda, sun amutu men di nimi yala-yala yumadi talepra kuramipane, Allah peiamutopu er nyapu sisa Israel nesala tep, amutu kareramupa, bena kurami.
Tonda yuk mutu nesala talepra perami wa bun yuma cap, sundi ‘Nun mawa’ tenen, moupra derirami kunumna weik keca yuma capda, Allahdi Israel nesala tep puto kareramupa, yuk mutu taleami nesala yuma popbisipra baramidi, amutu keca yuma dopbarami. Sun Israel nesaladi akeca-keca yuma talepra kuramidi, sun pe mutu cap, bung keca cap utopu kupra taleami.
45Allah Yahwehdi amambul pel doramunge yumada, mesum tep men pel doramu. Deiyoda ake. Ada, ukupnepa, kael kepmengedi, “Angeda kunkamrume, angeda men kunkamrume,” pepra, deiamsi upu yumada, ‘Tek peamseua,’ tenepmengedi, ‘Angepu talepra dukdongopra kunkameng’ tenen, apel doramu.
Atep nengeda, nimi yumadi Allah tep, “Uo, kanda pio telepe kurume,” pepra, er sipu eremkamrume. Dauddi pepu.