Psa 106 | XteSC | STEP | Nun nai bo Allah Yahweh tep, “Kanda pio telep ngebo Kurume!” pepra er si eremkamepe. Teka, Yahweh pio teleppu kuserura cadi, nun yumadi, “Naio kanda pio telep Kurume,” pepra, er tep gispal donkamepe. Tonda, Allahdi nun tep, “Ila di bicau tenesenuna tep, pio telep kudinkamsene,” pepra, pedina upu deiki di pepra deipsene,” peipseu. Ange yumada, pio men tapkamre.

Psalms 106

Allahdi er nyapu sisa, sun Israel nesala tep, telep kemdirure pepu upu

1 Nun nai bo Allah Yahweh tep, “Kanda pio telep ngebo Kurume!” pepra er si eremkamepe.
Teka, Yahweh pio teleppu kuserura cadi, nun yumadi, “Naio kanda pio telep Kurume,” pepra, er tep gispal donkamepe.
Tonda, Allahdi nun tep, “Ila di bicau tenesenuna tep, pio telep kudinkamsene,” pepra, pedina upu deiki di pepra deipsene,” peipseu. Ange yumada, pio men tapkamre.
2 Allah Yahwehda, er pio ila puto weik deiki di, nimi men kupmanto kunupsek pen pel dorur ngeda, ware ngebodi ange yuma lap peptu do? Gume, ange yuma men lap pepmanto tepa.
Ange utopu, Allah er pio telep kure keca yumada, wareto ngebodi ange yuma lap peptu do? Gume, ange yuma peda men lap pepmanto tepa.
3 Ware nesala do yuma, Allahdi, “Angeda kunkamrume, angeda pio men kunkamrume,” pepra, deiamseu upu dopra, aupu peseretopu, nimi upu bongdina deiyo nesala yumada, pio kange deipra, teleppu kunkamenge.
Ada, adeiyo-deiyo neng yumadi, pio dumsisipu kununge. Ada, Allahdi, “Ukunkamrume,” peseretopu kununge. Tonda, yuk nesala tep nengeda, teleppu kununge.
4 Uo, ne nai bo Yahweh, kandi, ‘Ne mawa nesala kunkameng’ tenen, weiamum Israel nesala tep, telep kudinkamrum taruda, ne tep ton tenepra lyepnememdi, melipkamnerume.
Tonda, sun Israel nesala ikin kange doupra kununga cadi, kandi anesala yuma loptapmemdi lyepropkamrem taruda, ne ton melipkamnerume naio!
5 Ada, tali tep gum dinin, kandi Israel yala nesala yuma tep, telep kweipmempa, sundi pel dopra kunkameng keca yuma cap, sundi telep keca weika di doronkameng nge cap, pio teleppu kunkameng taruda, ‘Nedi ton eptene’ tenen, moropkene naio!
Tonda, kandi wepra telep kupra deiamum Israel nesaladi, kange deipra, pingping kange doupra kunkameng ngeda, ‘Ne ton eptenedi, sun telep kunkamenga tep, ne peda kange deiptene’ tenen, moropkene.
Ada, kan mawa nesala, pio tep talepmempa, sun Israel nesala telep kunkameng ngeda, ne ton epnyopda, teleppu kange deipra, pingping kange dounkamne.
6 Uo, ne kaele. Nun Israel yala nesala, nun co puna neng, men taru kurami nesalada, mali weik kuramitopu, nunda ataru kunup Israel nesala peda, kan upu yanitamepedi, mali kun keca weik kunupe.
Sun menop taru kurami nesala pe, nun ataru kunup Israel yala nesala peda, kandi, “Angeda kunkamrume, angeda pio men kunkamrume,” pepra, deiamsemum upu tapmupudi, mali weik kuramuputopu, tupa malik kun keca weika di tupa kunupe.
7 Nun co puna nengda, Mesir mutu neitamai kurami taruda, kandi pio mambul keca, puto weik kunupsek pen pel dorum ngeda, telep kupra men tenemya tep, ‘Angeda, deiyo neitamai ngeda ake,’ tenen, moupra men kael keami.
Angepu gum dinin, tonda kandi pedina upu deiki peiamsemum upu peda, lupropi. Ada, kandi, “Sunda ukunkamrume, ukunkamrume. Ukupmum pangeda, nedi sun tep, ila di bicau tenesenedi, pio tep telep kudinkamsene,” pepra, pedina upu deiki di peipsemum upuda, sun yumadi lupromi.
Ange yuma tenena gum di, tupa talepra men kuramya tep, nun apu yapudi, kan Allah tep tapkei. Kanda, akeca-keca yuma deiki tara erepra, ila puto weik deiyo ngebo kurum dinino, sundi kan tep tapkeidi, “Allahdi pesere upuda, men gekepra talenkamepe, nun yuka!” pepra, kan damai di gopra yukai bendopi.
8 Teka, nun apu yapudi, pio mali weik kurami dinino, Allahdi, ‘Yuk nengdi ne si tep, mali upu pepnenung’ tenen, sun Israel nesala lyepropudi, loptapu.
Allahdi, Israel yala nesala lyepropka deiyoda, ‘Nimi yumadi, ne ila puto weik kununada, moupra kael kepkamneng’ tenen, Israel nesala loptapra lyepropu.
9 Ataru neitamaida, sundi pio katuai mutu neitamai embaramidi, ila laut mokon er sida, Laut Teberau ^{▼▼Laut Teberau – Aila laut mokon tep nengeda, si butene perami. ‘Laut Teberau’ perami, tonda, ‘Bi Laut’ (Laut Merah) mokon tep perami. Tonda, yuk Allah upu buku neitamaida, ‘Laut Gelagah’ pepra seki. Si yuk-yuk pepra sengnup dinino, aila laut mokonda, tenpu pua.} damai yana, men benmanto kupmai pangeda, Allahdi alaut mokon tep, upu puto di pepupa, laut mokon me yuma cepropupa, tu kalkal pepudi, katuai kupu.
Abisi katuai kupupa, Allahdi menmena benmaupa, sun Israel yala nesala yuma er amnyo tara domyanmaidi, kalkal pepu tu deiki di bisi ortara banmai. Ada, me pio gumai, ila katuai mutu neitamai embana utopu kupra, gopra ortara bei.
10 Allah ukupka deiki di, sun Mesir mutu jen talena nengdi, ‘Israel yala nesala yuma popkup,’ tenepi neng yumada, Allahdi popka deiki di, er mawa nesala tep lyepropu.
Teka, Mesir nengdi, ‘Israel nesala popkamep,’ tenepidi, poryanmai dinin, sun buru neitamaida, Allahdi Israel nesala lyepropu.
11 Israel nesala lyepropu dinin, Allahdi pepupa, alaut mokon di ka tamupra yau dingeda, sun pona tep jen talena neng yumada, jepropu.
Amokondi aneng yuma jepropudi gawal daku pangeda, tenpu ngebo peda, tupa ton tapupa, gam men kupi. Sun yuma denapu kupi.
12 Allahdi ange yuma konum kupropkopda, adeiki di sun Israel yala nesala yumada, Allahdi pepu upu yumada, teka tenepi.
Teka tenepidi, mut upu pepya deiki di Allah tep, “Uo, nun nai bo Allahda, er pio puto cap, telep cap kuryada, pio telepe,” pepra, er si eremami.
13 Dinino, sun dakuramipanen, yambulanun ton konum kupkopda, Allahdi akunupsek pen pel doramu ngeda, ka tamupra lupropi.
Tonda, sundi, ‘E, menmena Allahdi, “Ukupkamrume,” pepserepa, gekepmepya deiki di kunkamepe,’ tenena ngeda, tupa men teneramya cadi, sun pe kange di tenerami kecada, tali lupra kurami.
14 Tonda dakuramipanen, amenda taruda, sun yumadi, ‘Uo ajen keca ton tapakra jeptepe,’ tenen, putana weik kupupa, mali kurami.
Ukuramya deikida, ‘Allahdi kareserur jen kecada, nun dabale’ tenen, ‘Allahdi nun putapseu kecapu karepsetu do, gum do? Erdi ange men kuptu do?’ teneramidi, Allah tep pirirpetepra, asimterenmaidi, mali kunmai.
15 Allahdi, ‘Ne dabale,’ tenepu dinin, sundi moronmai keca karepu.
Sundi moronmaitopu, tu keca karepu dinin, ataru neitamai di, ila kange mun pu ton dopra, sun deiki deipupa, sun nong bol yumada, malipu kupbaramupa, puto bounpu kurami.
16 Tonda, sun keana opkal bol di dodin tenda ati kuramyai di, sun deiyo ngebo Musa cap, tonda er weit bo Harun cap tep, ‘Anengda nun dabale cadi, sundi pesererung upuda, tupa men gekenkamepe. Nun tenepmepengepu kuptepe,’ tenerami.
Ada Allahdi Harun tep, ‘Angeboda, ne amutara kuredi, ne si eremna tep mambul pel donkamnere,’ tenepudi, Harun wepra deiamupa, mambul pel dona deiyo ngebo kuramu dinin, Israel nesaladi, ‘Gume, angeboda, nun songe,’ teneramya di mali weik kurami.
17 Mali weik kuramipa, Allahda yu weik kupka cadi, amali kuraminge gonga kemna deiyo neng butene, sun sida, Datan cap, Abiram cap tep, wenepra popu.
Ada Allahdi peipupa, amutu tu bokrapupa, dana-dana tara konum kupkopda, sun abutene neng cap, sun upu gekerami nesala cap, atu pumbon sakipa, atuda ka tamupra yaudi, anesala yuma antipdongopra, singipdongopupa, anesala yuma jepropi. ^{▼▼jepropi – Aupu kael kemna tep, Ulangan 16.25-34 dinkurume.}
18 Ton taruda, mali weik kuramya tep, Allahdi peipka deiki di, sun Kankan neitamai di ila uku ^{▼▼ila uku – Aupu kael kemna tep, Ulangan 16.35 dinkurume. Ataruda, nimi si Kora cap, er upu gekerami neng capdi, “Musadi peserur upu tupa men gekenkamepe,” pepra, er upu yanitamamya tep, Allahdi, ila uku bu dokotepupa, anesala yumada, uku jepropudi, gawal daku.} karepupa, auku di sun mali kurami nesala yuma jepropupa depi.
19 Tonda, dakuramyanen, yuk taruda, Allah tep tamamya cadi, Horeb mutu bena kunmai taruda, sapi bisam mi ^{▼▼sapi bisam mi – Aupu seki ngeda, kael kemna tep Keluaran 32.1-14 dinkurume.} urasin utopu keca petupra deipidi, akeca si erepi.
Ada, ‘Akecada nun nai bo akurure’ tenen, gat keca dopra, sapi bisam mi urasin utopu keca petupra deipidi, isok si erepi. Ukupya deiki di, pio mali weik kupi.
20 Israel yala nesalada, akupya deiki di, ‘Allah er pio telep kurya cap, puto weik kurya capda, nun song’ tenen, tapidi, Allah er pununa tep, tali sapi bisam mi, manmaning batu jeramre gam keca urasin utopu keca petupra deipidi, akeca epra isok sipu eremai.
21 Ukupya deiki di, sun Lyemna Deiyo Ngebo, Allah tep lupropi.
Ada, Mesir mutu neitamai ikin weik kurami taruda, sun lyemna tep, sun nai bo Allahdi, ila puto weik pel doramunge yumada, lupropi.
22 Ada, Mesir tara neitamai dinin, mutu si Ham mutu neitamaida, Allahdi er ila puto deiki di, sun lyemna tep, kunupsek pen pel doramunge yumada, adipapu luproidi, tupa men tenerami.
Tonda, ila katuai mutu neitamai embarami taru, ila laut mokon er si Laut Teberau damai yai taruda, Allahdi ila mambul pel dopupa, sun yumadi, ‘Uo’ tenen, kange lopudi, kware weik kupi dinin, ange peda lupropidi, tupa men tenerami.
23 Ataru neitamaida, sun mali weik kuramya tep, Allahdi, “Sun Israel yala nesala yumada, popra sikke buktapkamne ja!” pepu.
Upeputopu, Allahdi anesala yuma konum popra gawal dakmatu dinin, Musadi, ^{▼▼Musa – Angeda, sun Israel nesaladi, “Gume Kanaan mutu men bena wengkamepe,” pepi taru tep seku. Aupu kael kemna tep Keluaran pasal 32, ayat 9-14 dinkurume.} Allah er damai yana, Allah tep, “Uo naio, angeda men kunkamrume. Anesala kaukepkamrume,” pepra moropka cadi, Allahdi anesala men popra gawal daku.
Ada, Allah er yu weik kupka cadi, ‘Anesala adipapu popra gawal dakune,’ tenepu dinin, ange taprapudi, anesala sun mali kuraminge tep, kaukepudi, men popu.
24 Sun yuma dakuramyanen, amenda taruda, pio telep mutu, Kanaan tara mutu ukupu weki taruda, sundi, ‘Gume, amutuda nun songe,’ tenen, mali weik perami.
Deiyoda, Allahdi, “Nedi karenkamsen mutu, Kanaan tara mutuda, pio telep mutu cadi, amutu neitamaida, telep kweipsenepa, teleppu kunkamrume,” pepra, pedina upu deiki peiamu ngeda, sun Israel nesaladi teka men teneramya cadi, “Amutuda nun dabale,” perami.
25 Ukuramya cadi, sun opkal bol di domi dodin tenda ati pumbon bungamidi, amutu tep mali pepra, engerami.
Sunda, ‘Nun dabale,’ teneramidi, mali weik peramya tep, Allah Yahwehdi, “Ukupkamrume,” pepra deiamu upuda, men gekeramidi, ange utopu men kupbarami.
26 Sun Israel yala nesalada, “Allahdi peserur upuda men gekenkamepe,” pepra tamamya cadi, Allahdi er buru erepudi, pedina upu ton pepu.
Ada, Allahdi, “Sun Israel yala nesalada, pio mali weik tupa kununga cadi, sun yumada popra gawal daknyopda, akatuai mutu neitamaida, sun yuma denapu kunkamenge,” pepra deipu. ^{▼▼pepra deipu – Angeda, sun Israel nesaladi, “Gume nun kware tep, Kanaan mutu men bena wengkamepe,” pepi taru tep seku. Aupu kael kemna tep Ulangan pasal 13 cap, 14.1-10 cap dinkurume.}
27 Tonda, Allahda, “Sun Israel yala nesaladi deipmengepa, dadeipdanen bankameng nesala yumada, wenepnedi, bokra yuk-yuk deipnedi, amutu neitamai di enepronyopda, sun yumada yuk-yuk mutu neitamai kunge nesala kankan neitamaipu bena kunkamenge. Tenpu telep mutu neitamaipu men kunkamenge,” pepra deipu.
Ukupka tep nengeda, Allahdi sun Israel nesala yuma bokrapudi, amutu neitamai di enepropupa, sunda yuk-yuk mutu kurami nesala yala-yala weik neitamai bena aneng cap kikiman kurami.
28 Yuk-yuk mutu neitamai bena kurami taru neitamaida, sun Israel nesaladi, sun Peor ^{▼▼Peor – Amutda, Moab tara neitamai dini, tenpu ila bungamu mutu tep, ‘Peor mutu’ perami. Amutu neitamai kurami nesaladi isok si Bahal tep, si eremamya cadi, Israel nesala peda, aisok sipu eremami. Ukuramya tep, Allahdi anesala denge pio weik 24.000 neng popu. Aupu kael kemna tep Ulangan pasal 25.1-13 dinkurume.} mutu nesaladi isok si eremaminge tep, ‘Nun nai boda, isok si Bahal ^{▼▼Bahal sekmepu ngeda, yuk Alkitab neitamai Baal sengnunge. Bahal sekmupkada, ‘Baal pepetepmengepa, ikin kuprepa, ‘Bal sisa tenepnung’ tenen, nundi Bahal sekmupke. Si yuk sekmepu dinino aisokda tenpua.} akurure’ tenen, atali keca taleramidi, isok Bahal, er sipu eremami.
Tonda, sun yuk-yuk mutu nesala kuramitopu, sun Israel yala nesala peda, ‘Konum deami neng, sun sambala di yana nun tep melipsetenge’ tenen, gam keca popra, konum deami nesala tep kareramidi, aneng sun sambala tep, “Melipseso,” pepra mororami.
29 Ukuramya deiki di, mali-mali weik kuramya tep, Allahdi ange yuma diramnga cadi, yu weik kupu.
Sun mali kurami keca tep, Allah er yu weik kupka cadi, sun wenemna tep, ila kange mun pu dopra, sun deiki deipupa, apu di anesala weika di jeramu.
30 Ila kange mun pu jeramupa, nimi weika di deipi taruda, tenpu ngebo er si Pinehas ^{▼▼Pinehas – Angeboda, Israel ngebo kuramu. Yuk Israel ngebodi Allah teka men teneramu ner, Midian mutu ner dopka cadi, angebo cap, aner capda, Pinehasdi popu. Deiyoda, Allahdi, “Kanaan tara nerapu pio men dopkamrume,” konum pepka cadi, Pinehasdi aneng butene popu. Allahdi ange epudi, kange deipka cadi, ila kange mun pu kareamu ngeda, gum kupra deipu. Aupu kael kemna tep Ulangan pasal 25.1-13 dinkurume.} tekrapudi, tenpu mali ngebo popka tep, Allahdi ange epudi kange deipu.
31 Allahdi, Pinehas kupunge epudi, kange deipka cadi, erdi, ‘Pinehasdi aneng butene popkada, dumsisi telep kunange konum kupmare,’ tenepu.
Allahdi, utenepudi, ila kange mun pu gum kupra deipka cadi, sun Israel yala nesaladi, Pinehas kupu ngeda pio tenenapu kununge. Ada ataru kurami nesala pe, amenda taru kurami nesala pe, ukutaru tupa kunge Israel nesala peda, ‘Pinehasdi kupu ngeda, pio telepe,’ tenen, ange tupa tenenapu kununge.
32 Tonda, Kanaan mutu neitamai dakuramyanen, amenda taru Meriba ^{▼▼Meriba – Meriba mutuda, Kanaan tara neitamai kwamu. Ada pio me gumai mutu cadi, amutu kurami taruda, me tep ila di putaramupa, Israel nesaladi mali kupi. Mali kupipa, Musada yu weik kupupa, mali upu pepu. Mali upu pepka tep, Allahdi, er Musa wenemna tep, “Uda amenda taruda, kanda Kanaan mutu men wekra kunkamrume,” pepu. Aupu kael kemna tep, Ulangan pasal 20.1-13 dinkurume.} mutu damai kunmai taruda, sun Israel yala nesaladi kange di ton cap mali kunmaiya deiki di, Allah Yahweh er yu weik kupu.
Israel nesaladi me putaramnga cadi, mali weik kupya deiki di, Musa peda mali kupka cadi, Allahdi Musa tep wenepupa ikin weik kupu.
33 Ada Israel nesaladi, mali upu weik peramya deiki di, Musada yu weik kupu. Yuk weik kupka tep, moupra tenena gum di, mali upu ton pepupa, Allahdi er Musa tep yu kupudi wenepu.
34 Tonda, Israel nesalada, Kanaan tara wengbenkoi taruda, Allahdi, “Ne teka tenena gum, amutu yuk-yuk kunge nesala yumada, sundi popra gawal dangbenkamrume,” pepra, deipu dinin, sun Israel yala nesaladi, ange men kupbaramidi, amutu nesala cap kikiman kurami. Ukuramya deiki di, mali weik kurami.
35 Israel yala nesaladi, sun Allah tep, teka men tenerami nesala, Kanaan mutu neitamai yala yuk-yuk dakurami nesala damai bena, tali kange deipra, aneng cap kikiman kuramidi, amutu kurami nesaladi mali weik kurami keca diramidi, ‘Nun peda ange utopu kunkamepe,’ teneramidi, mali weik kurami.
36 Israel nesalada, Kanaan tara neng cap kikiman kuramya cadi, Kanaan tara nengdi isok-isok si eremami ngeda, sun Israel yala nesala peda, aisok sipu eremami.
Ukuramya tep nengeda, mali kun keca ton tapakra talepra kuramidi, mali kweipdanami.
37 Sundi mali kuraminge ton ake. Ada, sundi derirami sal nyapu ton, tenpu-tenpu dopra, isok si eremna tep, anyapu popra, isok tep karerami.
Ange utopu ton, sundi derirami ner nyapu peda, tenpu-tenpu dopra, isok si eremna tep, aner nyapu popra, isok tep karerami.
38 Israel nesaladi derirami nyapu cap, ner nyapu capda, mali men kurami dinin, sun nai yapudi, anyapu weika di poramipa, yapi weik embaramu.
Ada tali yapi gum dinin, sun pedi derirami sal nyapu cap, ner nyapu cap poramipa, sun yapi weik embaramu.
Ada tali tep men porami dinin, deiyoda, ‘Kanaan tara neitamai kunge nesaladi, isok si eremnung nge tep, nun ton aisok si eremkamep’ tenen, sun nyapu weika di poramidi, aisok tep, karerami.
Ukuramya deiki di, Allahdi sun tep kareamu mutu yumada pio mali kupra deiamya cadi, Allahdi amutu yuma tep, ‘Ne dabale,’ tenen kuramu.
39 Angepu gum dinin, isok si eremna tep, sundi derirami nyapu weika di popra, isok-isok tep kareramya deiki di, sun pe nong ton, mali kweipdaramipa, Allahdi, sun tep, “Gume, anesala yumada, konum mali kweipdanmaiya cadi, ne damai men yatengedi, ne si tupa men eremnetenge,’ pepu.
Ukupmanto ngeda, nimidi nerapu konum domi dinin, anerapu tapra, yuk tali dakunge nerapu ton dopmengedi, kikiman kungedi, upula nyangdarameng utopu, Israel nesaladi, sun nai bo Allah tep yanitamnapu kuramya deiki di, pio mali weik kurami.
40 Israel yala nesaladi, ange-ange yumada, mali weik kuramya tep nengeda, Allah er yu weik kupupa, sun anesala tep wenepu.
Ada, Allahdi sun Israel yala nesala tep, ‘Pio tep, sunda ne mawa neng kunkameng’ tenen, konum wepra deipudi, sun tep kange deiamu dinin, mali-mali weik kuramya tep, Allahdi, ‘Uo, anesalada ne pio songe,’ teneramu.
41 Tonda, yu weik kupka cadi, sun wenemna tep, er tep teka men tenerami nesala, ‘Sundi Israel nesala popmengedi talenkameng’ tenepudi, er nyapu sisa, Israel nesala dopra, sun yuk mutu neng buru deiki karepu.
Israel nesala tapra, yuk-yuk mutu nesala tep karepka cadi, go karepupa, anesaladi, ‘Israel yala nesalada, nun pio songe,’ tenerami nesaladi, Israel yala nesala damai yana poramidi, sun cap, sun bung keca yuma cap talerami.
42 Atep nengeda, ‘Israel yala nesala nun songe,’ tenerami neng, sun yuk-yuk mutu nengdi, Israel nesala popra, sun nong deiki, ila ikin keca weik deriramidi, ikin pel ton dimamipa, kange mun kange doupra kurami.
Ukuramya tep, sun Kanaan tara yuk-yuk yala nesalada, sun puto deiki di Israel nesala taleramipa, Israel nengda, ikin weik kuramupa, men lyepdanmanto kurami.
43 Ataru ton, ataru ton, sun yuk-yuk nesaladi, Israel yala neng taleramipa, ikin weik kurami dinin, Allahdi sun damai yana loptapra lyepropu.
Allahdi Israel neng lyepropu dinin, kange di ton cap, sundi, sun pe kange dipapu, ‘Allahdi pesere upu tupa men gekenkamep’ tenen, Allah yanitamnapu kurami.
Tonda, sundi mali weik kuramya deiki di, Allahdi sun tep wenepudi, pio amutarato kepra deipupa, ikin deikipu kurami.
44 Ukuramu dinino, dakuramyanen, amenda taruda, ikin kupupa, sundi, “Uo, nun nai Allah yana melipra lyepropseo!” pepra mororamipa, sun ikin kange doupra kuraminge diramu dingeda, sun tep bicau tenepudi, kange di ton cap, sun tep melipra lyepropu.
45 Tonda, Allahdi, ‘Uo, ne mawa nesala gum kupnung’ tenen, erdi sun tep, “Sunda ukunkamrume. Ukupmumnyopda, nedi pio tep telep kudisenepa, teleppu kunkamrume,” pepra deiamu pedina upuda, kange di ton cap tenepu.
Ange tupa tenenapu kuramnga cadi, sun tep bicau tenepudi, sun damai yana lyepropu. Deiyoda, Allahdi sun tep, “Ila di bicau tenesenedi, pio tep telep kudisenepa, pio teleppu kunkamrume,” pepra, pedina upu konum peipka tep, adeiki di ka di ton cap, Israel nesala lyepropu.
46 Ange yuma ka di ton cap tenepka cadi, erdi sun Kanaan tara yuk yala nesala, sun kange dipru neitamai pel dopupa, anengdi, sun Israel yala nesala yuma tep, bicau tenerami.
Ada, Israel nesala popra, ateng koupdongopra, talerami nengdi, Israel neng tep bicau tenerami.
47 Ange tep nengeda, nedi amazmur upu deiki, mut sekman ngebodi pepne. “Uo, nun nai bo Allah, kan si Yahwehda, nun Israel yala nesala yuma tep melipseo!”
“Ada, yuk-yuk mutu nesaladi talesenungai, yuk-yuk karen mutu neitamai yana, melipra lyepsememdi, ‘Nun yuma bulupra dubenkamserum’ tenena tep, moropkene naio.”
Ada tali tep gum dinin, deiyoda ake. Ada, nun Israel yala nesala, tupa gam kunmap nesaladi, kan tep, “Kanda pio telep ngebo kurume. Kan si cap, kan ila puto cap, kan pio telep kumemya capda pio teleppu kukerure,” pepra, kan sipu erepmepedi, kan tep, pio gispal donkamkepe. ‘Ukunkamep’ tenen, “Kandi melipra lyepropserume,” pepra moropkepe naio!
48 Tonda upepsene. Nun yumadi, nun nai bo Allah, nun Israel nesaladi si eremnup Allahda, er si Yahweh tep, “Kanda pio telep ngebo kurume,” pepra, er sipu eremkamepe.
Allah Yahwehda, akeca-keca kapul men kwamu taru di dipra, daneitam taru yuma cap, dorkunkamre taru yuma cap, erpu akurure. Pio gam kuna ngebo kurura cadi, pumun taru konum kuramudi, daneitam taru ukuramnganen, ataru tupa kuretopu, amenda dorkunkamre taru peda, gam tupa kunkamre ja!
Ange tep nengeda, nun Israel yala nesala cap, tuai mutu kunge nesala yala-yala yuma capda, “Allah pio akunkamre” tenena tep, ‘Amin’ pepkamepe.
Tonda, nun kikiman yumadi, “Yahweh kanda pio telep ngebo Kurume,” pepra, er sipu pio eremkamepe. Telepe akonum pepmasene.