Psa 107 | XteSC | STEP | Allah Yahweh er tepapu telepe penkamepe. Allah erda pio dumsisi teleppu kuredi, nun tep bicau teneserur ngeda, men gum kupkamre. Pio atep akapkamre. Atep nengeda, er tepapu gispal donkamepe.

Psalms 107

“Allah Yahweh pio teleppu kurur ngebo tep, mut pena deiki di gispal donkamepe,” pepu upu

1 Allah Yahweh er tepapu telepe penkamepe. Allah erda pio dumsisi teleppu kuredi, nun tep bicau teneserur ngeda, men gum kupkamre. Pio atep akapkamre. Atep nengeda, er tepapu gispal donkamepe.
2 Uo, ne kayapu, ware nesala do yuma, sun tupa-tupa ila kange mun keca sun damai yakaramupane, Allah Yahweh sun tep melipra lyemdoramseudi, kange di tamupra, telep kupra deiamsei nesala yumada, Allah erdi meliamseunge yuma tep, sun kayapu yuk nesala kori bena lap penkamrume.
3 Sunda yuk-yuk mutu, pio karen mutu, yuk nesala kan-kan dubenamseipa, kuramrumdi nimi bo neng utopu kupra kuramrumpane, Allah erdi konum lyepseudi bulupra deiamseu.
Ada keteng yakan tara cap, keteng wengbaramre tara cap, tonda utara cap, itara cap, dana-dana mutu yuma cap, dabena kuramrumpane, bupra tenpuai deipseue. Atep Allah er si erepra gudinkamrume.
4 Tonda, nesala men kunung mutu, ila katuai mutu, me gumai bena dakuramyane, gopra ortamna mutu bena kunmananen, adi tapra yukai barami. Adeiki di tenpu mutupu men kurami, embandanapu kurami taruda, ‘Ila ati arum domi mutu bana tep bisida ace, ati kunungaida ace’ tenen, men kael kemami. Tali embanapu kurami.
5 Sun anesalada, ukuramya deiki di jen keca putana cap, me putana cap, kupupa, adeiki di sun anesalada depmanto kurami. Sun kan-kan neitamaida ton nengda derami. Ukuramya deiki di, sun gungda metek kupbarami.
6 Ataruda, sun kange mun kange doupra kuramidi, Allah Yahweh tep, ‘Uo, nun nai Allah melipseo,’ pepra mororami. Upepra moropi pangeda, sun kange mun kuamu ngeda, konum lyepropudi, telep kupra deipu.
7 Allahdi sun anesala tep nengeda, kalekra meliamudi dumsisi kuna bisipu doupra baramu. Anesala doupra dubaramupane, amenda taruda, ila ati arum telepnge, ila kota mutu doupra baramudi, atelep mutu neitamai deipupa teleppu kurami.
8 Atep nengeda, Allah Yahweh erdi dipru kareprepa, bicau tenen, melimrur nesala yumada, Allah er tepapu, “Telepe, kanda ila telep ngebo kurume,” pepra, er si erepra gispal donkamenge. Tonda Allah er si Yahwehdi tenepra pel dorurnge yumada, ‘Uo, angeda nimidi men kupmantonge kurura’ tenen, er tepapu, ‘Telepe,’ penkamepe.
9 Ada mesum tep gume. Deiyoda, me putanmare nesala cap, jen putanmare nesala cap, erdi yamupra karerepa jengepa bourure. Atep nengeda, Allah er tepapu, “Telepe, kanda ila telep ngebo kurume,” pepra, er si erepra gispal donkamenge.
10 Ton nesalada, yu nengdi bisbisa kapidi, anesala tomopra wenemna ati neitamaida, bena deiamidi, ila gat tapu, rantai besi di ateng koupdongomipa, kange mun kange doupra dakurami. Anesala yumada, kunungna kan-kanpu dakuramidi, pio ikin kange doupra kurami.
11 Wenemna ati dakurami nesala yumada, tali tep men wenemna ati men kurami. Deiyoda, Allah er upu deiki di, ‘Ange kunkamrume, angeda men kunkamrume,’ pepra deiamunge tep, sun pedi, moupra men taleamidi yanirtamamipa, Allah erdi yuk neng deiki puto karepupa, sun amali kurami nesala yumada, yuk mutu nengdi sun nong deiki ikin keca deriramipa, kange mun kangepu doupra kurami.
Tonda, Allah Yahweh ^{▼▼Allah – Acada, Ibrani upu deiki di, Allah er si tep, ‘Yahweh’ cap, ‘Sebaot’ cap, ‘Elyon’ cap pepra seki. Indonesia Allah upu buku neitamaida, aupu ‘Elyon’ tep, ‘Allah yang Mahatinggi’ pepra sengnunge. Dinino, ‘Sebaot’ cap, ‘Elyon’ cap, aupu deiyo ngeda, sun kael kemna tep, angeda konum jenek kupra sekmepu. ‘Yahweh’ kael kemna tep, Keluaran 3:14 dinkurume.} akeca-keca yuma talepra, deiki tara kurur ngebodda, Ila Puto Eremna Ngebo kuredi, im deiki jen talepra kunge malaikat yuma, sun ila deiyo ngebo kurur dinin, erdi peramu upu yuma tep nengeda, ‘Nun songe, ange men kunkamepe,’ pepra, moupra men taleramidi yanirtamamipa, Allahdi anesala tep wenemamu.
12 Allah Yahweh er upu men gekeramidi, mali kurami nesala yuma tep, pio ikin keca sun nong deiki deiamupa, sun dipru neitamaipu jeramupa, kange mun kange doupra kuramidi, yuk mutu nesaladi, sun tep, “Ila ikin pel donkamserume,” peprapipa, ila ikin pel dorami. Ukuramipane, sun nong yuma puto boun kupupa, tu deiki saka dourbenami taru yumada, ‘Uo, ware nengdi yana melipra lyepsetenge do?’ tenen, erami dinino, sun yuk nengdi makupra men leproami. Ikinpu kurami.
13 Ikin kuramipa, mambul kange douamidi, Allah tepapu, “Melipserume,” pepra, mali pepra mororami. Mali kange doupra mororami pangeda, Allah gekepudi sun tep lyepropudi telep kupra deipu.
14 Allah tep moropi pangeda, kunungna kan-kan neitamai kuraminge cap, gat tapu di koupdongopi cap kuramyaida, Allah dipapu atapu loptapra, lyepropudi, ka di ton cap anesala telep kupra deipu.
15 Atep nengeda, Allah Yahweh erdi dipru karepupa bicau tenen, melimamu nesala yumadi, Allah er tepapu, “Telepe, kanda ila telep ngebo kurume,” pepra, er si erepra gispal donkamenge. Tonda, Allah er si Yahwehdi tenepra pel dorurnge yumada, ‘Uo, angeda nimidi men kupmantonge kurura’ tenen, er tepapu, ‘Telepe,’ penkamenge.
16 Allah tep ‘Telepe,’ pepkamenge ngeda, mesum tep gume. Deiyoda, Allah er ila puto deiki di, gat keca er si tembaga deiki di betapra domi bisi buplan dekdongomseinge yuma cap, tonda gat keca di bisi embana neitamai dopra, lelipdongomseinge yuma capda, konum dakra tapu.
17 Tonda, ton nesalada, sun pe mali kuramya menenga deiki di, pio walwal neng kuramengtopu kurami. Ukupra kuramipa, sun mali weik kuramya deiki di, ila ikin pu jeramupa, ila ikin keca dororamidi, pio kange mun kange doupra kurami. Ada, sun pe mali kurami keca deiki di, sun anesala damaipu ila ikin pu cap, ikin keca cap yaupa dopropidi, ila kange mun kurami.
18 Ila kange mun pu jeramupa, sun anesalada jepmanto jena yala-yala yuma epya peda, dukmantopu kuramidi men dopra jerami. ‘Jen keca yala-yala yumada, nun dabale’ tenen, tamamidi ikin weik kurami. Ukuramya deiki di, sun depmanto kurami.
19 Ikin kuramipa, mambul kange douamidi, Allah tepapu, “Melipserume,” pepra, mali pepra mororami. Mali kange doupra mororami pangeda, Allah gekepudi sun tep lyepropudi telep kupra deipu.
20 Anesalada sun kange mun pu jeramu ngedi, gawal dakmanto kurami dinino, Allah erdi peipu upu deiki dipapu, apu gum kupupa, anesala tep gam bungdiramu. Pu di depmanto kurami dinino, Allah erdi, ‘Ne mawa nesala gum kupnung’ tenen, kweteipudi, ka di ton cap telep kupra deipu.
21 Atep nengeda, Allah Yahweh erdi dipru karepupa bicau tenen, melimamu nesala yumadi, Allah er tepapu, “Telepe, kanda ila telep ngebo kurume,” pepra, er si erepra gispal donkamenge. Tonda, Allah er si Yahwehdi tenepra pel dorurnge yumada, ‘Uo, angeda nimidi men kupmantonge kurura’ tenen, er tepapu, ‘Telepe,’ penkamenge. 22 Tonda, sundi Allah Yahweh tep, ila kange deipmengedi, ‘Telepe,’ pepra, yapi keca popra, er gispal dona tep, duyana karenkamenge. Ange utopu, Allah erdi nimi men kupmanto pel dorurnge yuma doupra, yuk nesala damai lap pepra, peterepra embankamenge. Aupu lap perbenkameng taruda, Allah tep gispal don mut pengedi, yuk nesala sun damai lap perbankamenge.
23 Ton nesalada, ila laut mokon deiki embaramre umpena doupra, embarami nesala peda, tali tep men kurami. Ada, ‘Bunga keca yala-yala yuma, nun laut mokon deiki embaramre keca, er sida kapal laut pumbon dongopmepedi, yuk karen mutu dubena kunupmepyopda, kunumna keca weika di doronkamepe,’ tenerami. Tonda, ‘Nun jen jepmepedi, gam kunkamepe’ tenen, sun jena tep, ila laut mokon deikipu pio embaramidi, mekina tep enapu kurami.
24 Atep, sun ila laut mokon deiki, umpena di bukra embarami nengda, Allah Yahwehdi nimi men kupmanto pel, ila mambul pel laut mokon deiki doamu ngeda, sun asuru di diramidi kael kemami. Tonda, ila laut mokon neitamai kapu keca yuma peda, katuai kuramupa, epra kael kemami.
25 Ada, Allahdi “Ukupkamrume,” peiamutopu, ila puto kumanya embaramudi, laut mokon deiki yan kweiamupa, meda longteng-longteng peramudi ila me kait bukra weleramu.
26 Laut me mokon deipka neitamai di, me kait bukra welepuopda, mokon deiki bukra embaramu umpenada, me kait di erepra alau tara dubenmauanen, tamupra mokon deikipu yan tapupa, amokon deiki umpena bungami nesala yuma kware weik kurami.
Menop taruda, kwar gum nesala kurami dinin, mokon di sun tep jepmanto kupu taruda, kware weik kupupa, sun tenerami ngeda, ‘Uo, tek sisi talito mokon jepkusere’ tenen, kware weik kupupa, sun kange yumada yawaramu.
27 Adeiki di sun anesala yumada, giso duembaramupa, yu me ila di jepmengepa, giso biri-biri pepredi, kange yawaramamretopu kupu. Ukupupa sundi, ‘Ukupkamape,’ tenepmai kange yumada, yawarapupa adipapu lumdongorami.
28 Ikin kuramipa, mambul kange douamidi, Allah tepapu, “Melipserume,” pepra, mali pepra mororami. Mali kange doupra mororami pangeda, Allah gekeramudi sun tep lyepramudi telep kupra deriramu.
29 Ada, kumanya puto ila di embaramunge tep, ‘Dim pepo,’ peramupa, kumanya Allah er upu gekeramudi, adipapu dimperamu. Ukupupa, ila me kait weleramunge peda, dim peramu.
30 Kumanya konum gum kupyopda, sun aneng kange deriramidi, ‘Nun benkamap mutu ake,’ tenerami ngeda, Allahdi meliamupa, barami.
31 Atep nengeda, Allah Yahweh erdi dipru karepupa bicau tenen, melimamu nesala yumadi Allah er tepapu, “Telepe, kanda ila telep ngebo kurume,” pepra er si erepra gispal donkamenge. Tonda, Allah er si Yahwehdi tenepra pel dorurnge yumada, ‘Uo, angeda nimidi men kupmantonge kurura’ tenen, er tepapu telepe penkamenge.
32 Tonda, sun anesaladi Allah Yahweh nimi men kupmanto keca mambul pel doramunge yumada, upu doupra yuk nesala tep, lap perbankamenge. Tonda Allah er upu talepra pel donung neng, sun wisi-wisi nengda, nimi upu bongdina tep bulumnungai damai lap perbankamenge.
33 Tonda, Allahdi ila mambul pel dorur ngeda ake. Ware mutu nesala do yuma, er upu yanipmengedi, pio mali weik kupmengopda, Allahdi anesala ikin keca karerure.
Ukupmantoda, me embarurnge yuma, gum kupra deiprepa, cedorure. Me bungna bukra embaramrenge yuma peda, Allahdi pepre pangeda, ame bungna cepra gelal sepdara deiprepa, tu yuma gatpu kemdirure.
34 Ange utopu, ware mutu nesala do yuma, er upu yanipmengedi, pio mali weik kupmengopda, sukun tu yuma gum kweipredi, katawai mutu tupu yana punupdongorure. Amutu tu deiki, tu pumbon di garam utopu keca beleprepa, paramre keca yala-yala yuma, men bongopmanto kurure. Angeda, amutu kunge nesaladi, mali kunga kunumna tep kurure.
35 Dinino, ware mutu nesala do yuma, Allahdi perur upu moupra gekepmengedi, telep kupra dumsisipu kupmengopda, Allahdi anesala atep melimrure.
Ada, katuai mutuda, ka di tamupra me mokon derinai kemdirure. Ange utopu, keteng bupu di me yuma ceproprepa, gelal tuai di, ka di tamupra me bungna keipkamre.
36 Ukupre taruda, jen putarepapu kunge nesalada dopra, telep kupra derirur mutu deiprepa, telep kupra kunkamenge. Anesala yuma tep, ukupu mutu ton keteneiprepa, anesala yumadi ila ati arum domengedi, amutupu kunkamenge.
37 Tonda, sundi wa pepra bolongkameng keca cap, tonda anggur tapu du wa pepra kounkameng nge cap yuma, nong kepyopda, kipra tenpuai bulupra deipbaramengepa, pio weik kupkamre.
38 Allah Yahwehdi sun anesala tep melimamrepa, sun nyapu derina tep nengeda, tali yamupra karepbarepa, derinkamenge. Ukupbankamenga deiki di, sun nyapu yuma pio weik deipbankamenge. Tonda, sundi talepra peinkameng gam keca yala-yala yuma peda, pio weik kupbankamre.
39 Dinino, yuk mutu nesaladi, Allah er mawa nesala tep yana popbisipmengedi, sun anesala denge pio weik popra gawal dakmengedi, Allah er tep teka tenenge nesala, yambulanun gawal tupa tapmengopda, Allahdi atapkameng nesala tep melimrure.
40 Yuk mutu nesaladi Allah er mawa nesala tep, ikin keca weik dopra, sun nong deiki konum deipmengopda, Allah Yahwehdi sun yuk mutu deiyo talepra kunung neng yuma tep nengeda, dipru boun kepra deiprepa, yuk neng sun amutara kunkamenge.
Ukunkameng taruda, Allahdi sun anesala tep, “Nimi pio embana gum mutu, pio katuai mutu bisi berumudi, tenpu mutu men bena kunkamrum dinin, amutupu bena yana kemumdi, ongomtonkamrume,” pepra deipu.
41 Dinino, Allah er tep teka tenenung nesala, sun kange mun kange doupra kunung nesala, kan-kan kunge nesala yumada, Allah Yahwehdi lyepropredi, telep kupra derinkamre. Ukunkamre taruda, akankan kunge nesala tep, Allah weika di melimreya deiki di, sundi deipmengepa, dadeipdanen kunkameng nesalada, sun tara nesala yumada, nimi gung pio weik kupbankamenge. Ukupmantoda, domba bisam mi deibarepa, weik kuramretopu kupra weik kupbankamenge.
42 Pio dumsisipu kupra kunung nengda, ange epmengedi kange deipra pingpinga di kunkamenge. Dinino, sun mali kun kecapu talepra kunung nesalada, upu pepna gum di sipyal kepdongopra kunkamenge.
43 Ware ngebo do, ila kael kemna deiki di, pio moupra kael kepmanto ngeboda, apepman upu yuma tenepredi, moupra kael kepkamre. Tonda, er angebodi, ‘Allahda tek sisi akurure. Allah Yahwehdi nun tuai nesala tep, ila di bicau teneseryada, pio men gum kupkamsere’ tenen, moupra tenenkamre. Dauddi aupu pepu.