Psa 108 | XteSC | STEP | Raja Dauddi aMazmur upu mut seku. Dauddi pepu upuda ake.

Psalms 108

Raja Dauddi, ‘Yu nengdi popsenung’ tenen, Allah tep moropu upu

1 Raja Dauddi aMazmur upu mut seku. Dauddi pepu upuda ake.
2 Uo, ne nai bo Allah, ne kange dipru neitamaida, tenimtona pio gum dipapu, kan tep, tupa teka tenekenune.
Teka, ne kangeda, pio men wang-wang pepkamnere. Nedi, bung-bung pena keca deiki di, ne kange deipnedi, amut penkamne. Ne kange dipru neitamai kure sambalada, bukromemdi, moupra tenipkurume!
3 Tonda, bung-bung pena keca, er sida gambus cap, kecapi cap, keteneprerumdi, amut penkamrerume. Keteng asuru ukupu tengyakaramre taruda, nedi ton amut penkamne!
4 Amut penkamna deiki di, sun yuk mutu neitamai kunge nesala gekenkamengai, amut pepkamna deiki, kan Allah Yahweh tep, “Telepe,” penkamkene naio.
Tonda, sun yuk mutu neitamai kunge nesala yala-yala yuma, sun gekenaida, nedi kan Allah Yahweh tep, “Kanda pio teleppu kurume,” pepra, kan si eremkenedi, penkamne.
5 Deiyoda ake. Ada, kan Allah Yahwehdi nun Israel nesala tep, ila di bicau ^{▼▼bicau – Ibrani upu deiki di, ayat 5 neitamaida, Ibrani upu di ‘hesed’ pepra seku. Aupu deiyoda ake. Allah Yahwehdi Israel nesala yuma tep, ila di bicau teneredi, “Ukupra telep kudinkamsene,” pepra, pedina upu deiki peiamu utopu, tamna gum di, pio tek sisi tupa kunkamre. Yuk Allah upu buku neitamaida, ‘Kasih-Nya kekal’ tonda ‘kasih setia’ sengnung dinin, nundi, ‘Ketengban nesaladi, aIbrani upu deiyonge moupra kael kepkameng’ tenen, aupu deiyonge yuma katuai di sekmupu.} tenesememdi, “Ukupra telep kudinkamsene,” pepra, pedina upu deiki peipsemumtopu, tek sisi kupkamserume.
Ukupmantoda, tuai mutu di itara dipdongopra, dua kan-kanda, ‘Er lyomda ware kupra kurur do?’ tenen, pio men kunupetepmanto kure utopu, kanda ila di bicau teneserum ngeda, men nukmanto kurure.
Tonda, ukupmantoda, ‘Er lyomda ware kuprap do?’ tenen, tuai mutu di dipdongopra im, alau deiki tarada, meter di men kunupetepmanto kuramretopu, kandi, nun Israel nesala tep, tamna gum di, pio ila di bicau tenesememdi, melimnapu kunkamserem nge peda, pio men nukmanto kurure.
Ange utopu, kan Allahdi nun tep, “Ukupra melimkamsene,” pepra, peipsemumtopu, angepu tenepra, tamna gum di, pio melimnapu kunkamserem ngeda, pio men nukmanto kurure.
Ukupmantoda, tuai mutu di dipdongopra, deiki tara im alau neitamaida, dua embaramrurai, ‘Er lyomda, ware kuprap meter kurur do?’ tenen, men kunupetepmanto utopu, kanda tamna gum di, nun tep, pio melimkamserum ngeda, men kunupetepmanto kurure.
6 Uo nun nai Allah, kanda pio teleppu kuruma cadi, nimi yumadi kan tep, “Erda pio telepe,’ pepra, penkamep upuda, im alau tara dinin, deiki tarapu welepkamrure. ‘Nimi tuai nesala yumadi, kan si tep pio eremkamkenge’ tenen, morokenupe.
Ange utopu, kan ila puto kuna cap, tonda kanda pio teleppu kuna cap, kan dirine capda, ‘Tuai mutu ban-ban yuma neitamai kunge nesaladi, kael kepkameng’ tenen, morokenupe.
7 Ne nai Allah, kan tep teka tenepra, sun kange dipru kan deikipu konum derikenung nesalada, sun pona tep nengdi, ‘Anesala poptapra gawal daknung’ tenen, ‘Kan ila puto dumsisi buru deiki di, kan tara nesala lyepropkamrum’ tenen, moropkene naio! Ada, sundi kan tep, teka tenekenung nesala yumada, ‘Kandi sun tep, loptapra lyepropkamrume’ tenen, moropkene naio!
8 Uo, nun nai Allah, kan si eremna ati neitamai dinin, Pio Telep Lengna ati kuruma neitamai di, kan Allahdi pedina upu deiki di peipsemum upuda ake.
Ne kange deipnedi, Sikhem mutu kunge nesala yuma poptapnedi, amutu yuma dalupropnedi, bokra ne nyapu sisa Israel yala nesala karepkamsene.
Ange utopu, ila ban mutu, er si Sukot ban mutu kunge nesala peda, popnedi, amutu dopropnedi, ‘Er lyom cap, pala capda, ware kupra do?’ tenen, kunumpetena tep, meter dopropnedi, amutu yumada kunupetepra dipetepnedi nukamne.
9 Tek sisi ngeda, ware mutu do yuma, dana-dana tara mutu yumada, konum popra dopropnyopda, amutu yumada, ne mawa tep, pio talenkamne. Atep, Gilead mutu cap, Manasye mutu capda, ne konum dopropnedi, pio talenkamne.
Tonda, Efraim mutu yuma capda, nedi amutu dopropnyopda, ukupmanto gat topi, er si Baja utopu kunkamnere. Yehuda mutu yumada, amutu neitamai dopropkamne. Ada ukupmantoda, nimi deiyo nengdi talenge maca utopu, amutuda ange utopu kupkamnere.
10 Ange utopu ton, ila pala mutu, er sida, Moab tara ^{▼▼Moab tara – Uda, ayat 9-10 neitamai yumada, Allahdi ukupmanto upu cap, tonda, domon upu cappu pepu. Amutu-amutu si neitamai yumada, tek sisi akuamu. Tonda, ataru peda, tupa akurure. Dinino, aupu deiyo nong neitamai ngeda, ake. Ada, Allah Yahwehdi Kanaan tara neitamai mutu-mutu yuma talerura cadi, er kange dipapu teneamutopu, er dipapu amutu-amutu yuma bokra, Israel nesala, sun yala yuk-yuk dakuramitopu bokra karepu. Ada, dapu tara cap, iknapi dam tara cap, keteng yakan tara cap, keteng dangbaramre tara cap yumada, Israel nesaladi, ‘Allah er dipapu amutu-amutu yuma talerura cadi, erdi teneretopu, amutu neitamai yuma bokra, sun Israel nesala tep karenkamre, tenepkameng’ tenen, aupu pepu.} neitamai yuma konum dopropnyopda, amutu neitamai tep, ukupmantoda, ne yan me kunai utopu kunkamnerure.
Tonda, peten kemna tep, ne yan kouna, er sida sandal loptapnedi, Edom mutu tu deiki dokotepkamne. Ukupnyopda, nimi yuma ange epmengedi, ‘E, Edom tara mutu yumada, Allahdi konum talerure’ tenen, kael kemkamenge.
Ange utopu, Filistea mutu dopropnyopda, amutu neitamai teknedi, ila upu deiki di, ‘Amutu yumada, ne mawa mutupu kurure,’ penkamne. Nimi yumadi ange gekepmengopda, ‘E, Filistea ^{▼▼Filistea – Amutuda, ila laut mokon, er sida, Laut Tengah damai kwamu. Ada, Yehuda tara dipra, ortara, keteng dangbaramre tara kwamu. Filistea tara nengdi, sun Israel nesala tep, ‘Nun song’ teneramya cadi, mar podanapu kudarami. Allahdi pepu.} mutu yuma peda, Allahdi konum popra talerure’ tenen, kael kemkamenge. Allahdi pepu.
11 Upepupa, Israel nesala, sun ila nimi deiyo ngebo Raja Dauddi pepu. “Dinino ne nai Allah, ne pona tep neng, sun pona tep, ware ngebodi, mepra betupa, ila puto yu neng, sun ati damai dubenkamner do?
Ange utopu, ‘Ne pona tep neng porbenkun’ tenen, ware ngebodi, mepra betupa, ila pala mutu, er si Edom tara neitamai dubenkamner do?
12 Asipetepmakena deiyoda ake. Teka nun nai Allah, kandi nun mali kuramepunge yuma tep nengeda, kandi konum kaukepra tapsemuma tep, nun pe yuk dipapu ware kuptepe do?
Tonda, ukutaruda, ‘Nun pona tep yu jen talena nengdi, nun mar podankupe’ tenen, bankamep taru peda, kan Allah cap, nun jen talena neng cap, kikiman men embanupe. Nun pe yukpu porbanupe.
13 Nun kaele. Tali tuai nesala tep, ‘Melipseso!’ pepra moroptepepa, sundi yana melipsetenga peda, angeda talipu kupkamre. Tuai nesaladi men melipsetenge. Atep nun naio, nun poryakana tep neng porbana tep nengeda, ‘Kan dipapu melipsetumpa, nun pona tep neng popra gawal daktepe’ tenen, moropkepe naio.
14 Dinino, nun kaele. Nun nai bo Allahdi, yana melipsetuma deiki di, nun pona tep neng yumada, adipapu nundi popra gawal daktepe. Deiyoda, nun nai bo Allah, kan dipapu, nun pona tep neng yuma popra yaniptapmemdi, sikke buktapkamrume!