Psa 109 | XteSC | STEP | Raja Dauddi aMazmur upu mut seku. Ada, ‘Allah upu mut pena deiyo ngebo karenkameng’ tenen, sekra karepu. Dauddi pepu upuda, ake. Uo teka, neda kan si eremkenun Allahda, ‘Dim peprappu men kunkamrum’ tenen, moropkene.

Psalms 109

Daud, er pona tep nengdi er tep, mali upu weik peramya tep, ‘Allahdi aneng kwangdangkamre’ tenen, moropu upu

1 Raja Dauddi aMazmur upu mut seku. Ada, ‘Allah upu mut pena deiyo ngebo karenkameng’ tenen, sekra karepu. Dauddi pepu upuda, ake.
Uo teka, neda kan si eremkenun Allahda, ‘Dim peprappu men kunkamrum’ tenen, moropkene.
2 Deiyoda, ake. Sun pio mali-mali weik kunge nengdi, ne tep tali upu weika di penenunge.
Sundi mok upu deiki dipapu, mali upu cap, minina upu cap penenunge.
3 Aneng yumadi ne tep, ‘Angebo nun pio songe,’ tenengedi, pio mali upu, ne deiki penenunge.
Deiyo keca pio ton men kwapmarepapu, mali upu pepmengedi, ‘Angebo poptapkupe’ tenen, ne damai yana warengnenunge.
4 Ne dingeda, aneng tep, bicau tenepra teleppu kunun dinin, sundi ne tep, minina upu weika di penenunge.
Tonda, sun ikin kupre taruda, nedi, ‘Kanda Allahdi, anesala melipkamrum’ tenen, sun tep, Allah moronune.
5 Atep nengeda, nedi sun tep teleppu kuptenya peda, sundi tamupra ne tep, ikin keca pio weika di, ne deiki derinenunge.
Nedi sun tep, tek sisi bicau tenenun dinin, sundi ne tep nengeda, “Angebo nun pio songe,” pepra, malipu kudinenunge.
6 Ne nai Allah, ayu nengdi, ne tep penenung upuda, pepkukene. Aupuda, ake.
Sundi, ne tep, “Gume nimi upu bongderina taruda, tali upu pepkamre ngeboda dopra deiptepepa, Daud er dumsisi tara tektudi, er deiki mali upupu peprepa, animi deiyo nengdi Daud tep wenepkamenge,” penunge.
7 Tonda, upenenunge. “Nimi deiyo nengdi, ‘Angebo Daudda, mali kupu do, gum do?’ tenen, upu talepra bokeipkameng taruda, siryada, sundi, ‘Teka, er Daudda, mali kupka tep, wenepkupe, peptenge’ tenen, putarepa, penenunge.
Tonda sun anesala yumadi, “Erdi Allah tep moroptua peda, ‘Allahdi men gekenkamre’ tenen, penenunge. Tonda, sundi, ‘Allahdi, er Daud tep, ‘Erdi moronkamnere upuda, pio malipu kurure,’ teneptue,’ tenepmengedi, penenunge.
8 Tonda sundi, “Daudda keteng tamun weikanun ton, gam men kunkamre. Menmena dipapu dadeptupa, yuk ngebodi, nimi deiyo keptudi, angebo dipapu, ‘Raja Daud punuptudi, Daudda nimi deiyo keca talerur keca yumada, angebo dalupra doproptudi, taleptue,’ tenepmengedi, penenunge.
9 Tonda sundi, “Daudda, menmena deptupa, erdi deiamu nyapu yumada, lyan nyapupu kunkameng,’ tenepmengedi, penenunge.
Tonda sundi, “Daud dadeptupa, erdi domu nerda, solu nerpu kunkamre,’ tenepmengedi, penenunge.
10 Tonda, ange ton tenenunge. Ada, “Dauddi deiamu nyapu, sun yumadi talenung keca yuma, gum kuptupa, anyapudi, ‘Dan mutu bena kutepe do?’ tenen, dana-dana tara yuma tali embanapu kutenge,’ tenepmengedi, penenunge.
Tonda sundi utenenunge. ‘Daud er nyapudi domi ati-ati yumada, yuk nengdi urupra sikke buktaptengedi, Daud er nyapu tep, amutu neitamai peda, enepra dokoteptengepa, bura mutupu bena kutenge,’ tenepmengedi, penenunge.
11 Tonda ange utopu, sundi utenenunge. Ada, ‘Dauddi isomka keca taleramunge yumada, yuk nengdi dalupra doproptengedi, erda pio tali kan-kan ngebopu kutue,’ tenepmengedi, penenunge.
Tonda, ‘Dauddi menop taru ikin pelda, wa pepra yal keca kouamupa, akeca pakredi, nong kupkamre taruda, yuk nengdi akeca yuma upula doproptengepa, erda wa kin keca tenpunge peda, men kiptue,’ tenepmengedi, penenunge.
12 Tonda sundi, ‘Daudda, ikin weik kuptupa, kange mun kange doupra kunkamre taruda, tenpu ngebo peda, er Daud tep, bicau tenepra men meliptue,’ tenepmengedi, penenunge.
Ange utopu, sundi ne tep, ‘Daud deptuopda, erdi deiamu gam tupa kunkameng nyapu yumada, lyan nyapupu utopu kupra kunkameng dinin, ataruda tenpu ngebo peda, bicau teneptudi, anyapu ton pio men melipkamre,’ tenepmengedi, penenunge.
13 Angepu gum dinin, tonda sundi ne tep, ‘Dauddi deiamu nyapu yuma cap, sundi deiamipa, dadeipdanen yakarami neng yuma peda, adipapu deptengepa, gum kupkamenge,’ tenepmengedi, penenunge.
Er nyapu yumadi konum deiami nyapu yuma cap, sun anyapu yumadi deipmengepa, dadeipbankameng nyapu yuma cap, menmena deptengedi, gum kuptengopda, Daud er yala cap, er si capda, pio gum kupkamre.
Ada yuk nengdi, Daud er yala si tupa men tenenkamenge. Daud er yala cap, er si capda, pio gum kuptupa lumdongonkamenge,’ tenepmengedi, penenunge.
14 Tonda, sundi ne tep, ‘Angepu gum dinin, Daud er nai sisadi, mali kuramunge yumada, Allah Yahwehdi akeca yuma men kaukepkamre. Er nai bodi, mali kuramu ngeda, Allahdi gum kupra men deipredi, Daud er nai bo tep, weneptue,’ tenepmengedi, penenunge.
Tonda, ange utopu, sundi ne tep, ‘Tonda, Daud er nin sisadi mali kuramunge yumada, Allah Yahwehdi akeca yuma men kaukepredi, gum kupra men deipredi, Daud er nin sisa tep, weneptue,’ tenepmengedi, penenunge.
15 Tonda, sundi ne tep, ‘Daud er nai cap, er nin capdi mali kuramrei kecada, Yahwehdi akeca men kaukepredi, tupa tenenapu kuptue,’ tenepmengedi, penenunge.
Tonda, sundi ne tep, ‘Daud cap, er nai cap, er nin capda, sun si gum kuptupa, nun tuai mutu neitamai kunup nesala yumadi, aneng sun si pio lupropedi, anesala sun tep, kange di ton cap pio men tenenkamepe,’ tenepmengedi, penenunge.
16 Tonda, sundi ne tep, ‘Daudda ikin weik keca taleptupa, kange mun kange doupra kutue,’ tenepmengedi, penenunge. Tonda, sundi, “Ange yuma putapserepa penupada, tali tep gume.
Deiyoda, ake. Ada, nun kangeda, Daud erda, gam tupa kuramu taru neitamai yumada, erdi, sun pio tali kan-kan nesalada, ikin weik kurami dinin, erdi sun tep, bicau tenepra, pio men melimamu.
Angepu gum dinin, sun bung keca pio men talerami neng cap, akeca-keca yuma putaramupa, ikin weik kurami nesala capda, Dauddi bicau tenena gum di, atali kan-kan nesala tep, ton pio men melimamu. Dauddi, aneng tep, ‘Sunda dakwapye,’ teneramu. Teka, sun yu nengdi, ne Daud tep, ukupra tenengedi, mali upu weik penenunge.
Tonda, sundi ne tep, ‘Angepu gum dinin, sun tali kan-kan nesala cap, dipru buluksaknepa, kange mun kange doupra kurami nesala tep nengeda, Dauddi anesala tep, domnapu kuramupanen, siryada sun yuma deami.’ Ayu nengdi ukupra tenenengedi, mali upu penenunge.
17 Tonda, sundi ne tep, ‘Daudda, yuk nesala tep, ‘Ikin weik kupkameng’ tenen, nimi ker dona cap, ‘Nimi depnung’ tenen, wimdongona cap tep, kange deiamudi, apel weika di doramu. Nimi wimdongona pel doramnga cadi, ukutaruda, amali keca weik, er pe nong deiki yana kupkamre,’ tenepmengedi, penenunge.
Tonda, sundi ne tep, “Dauddi yuk neng tep, “Allah bicau tenepredi, ‘Sun tep pio telep kudinkamsere’ tenen, Allah tep moronkamsene,” pepra, telep pena upuda, ‘Ne song’ tenen, men peramnga cadi, nun kangeda, ‘Allahdi, Daud tep, telep men kweipkamre,’ tenepmengedi, penenunge.
18 Tonda, sundi ne tep, “Ukupmantoda, bul li taruda, nimidi deiki tara kenengameng opkal, er sida jaket, tupa-tupa kenengamengtopu, Dauddi, yuk neng tep, mali upu cap, wimdongona upu cap, ataru-ataru yuma weika di peramu.
Ange tep nengeda, ukupmantoda, me mokon pumbon wekmepepa, ame nun nong yuma bul kemdongoramsertopu, nimi ker don upu cap, wimdongona upu capda, Daud er nong deiki yana kuptupa, ikin weik kunkamtue.
Tonda ukupmantoda, nimi nong bol deiki nintong telep minyak likeipmengedi, sun anesala nong tu pumbon wengamretopu, “Nimi wimdongona upuda, er nong neitamai yuma wektupa, dadeptue,” pepra, ayu nengdi, ne tep tenepmengedi, penenunge.
19 Tonda, sun yu nengdi ne Daud tep, “Ukupmantoda, nimidi bul li taru, deiki opkal er si jaket, kenengamengtopu, tonda deiyo teng, er si pinggang deriramengtopu, Daudda, nimi wimdongona upu, er nong deiki yuma yana kuprepa, ikin weik kuptue,” tenepmengedi, penenunge.
20 Atep ne Dauddi, kan Allah tep, upepkene. Sundi amali upu yuma penenunga cadi, ne Dauddi kanda Allah tep, aupu moropkene. Ada, ‘Kanda Allah Yahwehdi, sun tali minina upu cap, mali upu cap, penenung nesala yuma tep, weika di wenepra popkamrume’ tenen, moropkene naio.
Ada, sun yu nengdi, ne tep, “Daudda adipapu dadeptue,” pepra, mali penenung yu neng tep pepkene.
21 Sun ayu nengdi ne tep, pio mali upu penenung dinin, ne kaele. Kanda Yahweh, akeca-keca yuma talepra, ila puto weik ^{▼▼puto weik – Ayat 21 neitamaida, Ibrani upu deiki di, Allah tep, upu butene seki. Tenpu ngeda, er pe si ‘Yahweh’ pepra seki. Butene ngeda, ‘Adonai’ pepra seki. Aupu ‘Adonai’ ngeda, ‘Sundi kael kepkamrum’ tenena tep, aupu deiyo neitamai ngeda, jenek kupra sekmupu.} deiyo ngebo kuruma cadi, kandi ne tep talepra kumemdi kalengnerume. Atep kanda ne deiyo ngebo kurume.
Atep nengeda, ‘Allah kandi ne Daud tep, melipra lyepropnemem pangeda, yuk neng yuma epmengedi, kan si moupra kael kepkameng’ tenen, moropkene naio.
Ne nai Allah, ne kaele. Kandi, “Bicau tenesenedi, pio tep telep kudinkamsene,” pepra, pedina upu ^{▼▼pedina upu – Ayat 21 cap, 26 cap neitamaida, Ibrani upu deiki di ‘hesed’ pepra seku. Atep, aupu ‘hesed’ deiyo ngeda, jenek kupra sekmupu.} deiki di peiamsemum ngeda, ange utopu tupa-tupa kuseruma cadi, angeda pio telepe. Atep nengeda, nedi kan tep, ‘Melipra lyepropneo!’ pepra, morokenune.
22 Ton deiyoda, neda kange mun kange doupra kununa cadi, nedi men kupmanto kunune. Atep, ‘Kan dipapu, ne tep melipra lyepropkamnerem’ tenen, moropkene naio.
Tonda, ukupmantoda, nimidi, yuk ngebo tep, tema di er dipru neitamai poramengtopu, ayu nengdi, ikin weik deriramnenga deiki di, ne kange dipru neitamai yumada, buluksakmanto kunerura cadi, kan tep moropokene, ne nai Allah.
23 Ukupmantoda, keteng dukduk di, keteng dirin deipyopda, kuki ton katuai akurur dinin, idona taruda, menena di akukia dim pepra gum kudoramretopu, neda menmena di depkamne ja! Depnya peda, neda kange di ton cap, men bukamne.
Ukupmanto ton, tali po yaredi, nimi nong deiki amupra bukaprepa, nimidi apo popmengepa, menmena di gumpu kupbaramretopu, ne peda menmena di gum kupbankamne ja.
24 Nedi, jen keca yuma tapnedi, ‘Allahda, ware upu pepkamner do?’ tenen, jen jena gum dipapu, moupra gekenun dinin, adeiki di ne yan cap, gutam capda, pio puto bounpu kupmanere.
Jen jena gum dipapu, puto bounpu kunerepa, ne nong bol yumada, pio malipu kupmanerpa, ne yo cap yumada, katuaipu kepnere.
25 Bol malipu kunmanerdi, ikin kange doupra kunmana cadi, ne tep minina upu penenung nengdi, nyek-nyek pepnengedi, autupra, mali upu penenunge.
Sunda ne damai yangedi, ne nong epmengopda, ‘Uo, erda pio bol malipu konum kupmare,’ tenepmengedi, sun gisoda, gong-gong pepmengedi, genepdongopmengedi, aupuda penenunge.
26 Neda pio ikin weik kununa cadi, ne nai Allah Yahweh, ‘Kan dipapu yana melipkamnerem’ tenen, moropkene.
Kandi, “Ila bicau tenesenedi, pio teleppu kudinkamsene,” pepra, pedina upu deiki di konum peipsemuma cadi, apemsemumtopu, ukutaruda, ne damai yana, melipra lyepropneo, ne nai Allah.
27 Kan Allahdi konum lyepropnemem dingeda, sun akeca dinkameng nesala yala-yala yumadi, ‘E, Daud tep kange di tamupra telep kweipmar ngeboda, Allah er pua,’ tenepmengedi, ‘Sun yuma moupra kael kepkameng’ tenen, kandi sun anesala yuma tep, peteremkamrume naio!
Teka, ne kaele, kanda Allah dipapu, ne tep melipra lyepropkamnerume. Yuk ngebodi, ange utopu pio men kuptua tepa.
28 Ne kangeda, ‘Sun yu nengdi, ne Daud tep, tali minina upu cap, nimi wimdongona upu cap, tali lupra pepnetenga peda, kanda Allahdi ne tep, lyepnememdi, teleppu kudinkamnerume,’ tenenune.
Tonda, sun yu nengdi, ‘Daud tep, poptapkupe,’ tenepnenge neng, ne pona tep keteneptenga peda, kandi anesala wenepra popmem pangeda, ali weik dangkamenge.
Sun amali kuna nengdi, ali weik dangkameng dinin, kanda Allah, kan amutara kupra, kan pelpu donun ngebo, ne Daudda, kandi melipnemempa, kange deipra kunkamne ja! Utenena tep, moropkene naio!
29 Tonda, ne tep tali minina upu cap, mali upu cap penenung nengda, kandi wenepmemdi, sun tep ikin keca karepmemnyopda, sunda ali weik dakamenge. Tonda, yuk nengdi aneng tep, ‘Sunda tek sisi mali neng kununge,’ tenepmengedi kael kepmengopda, aneng tep tapmengedi, tupa gispal men donkamenge.
Ukupmantoda, nimida bul li taru, deiki tara kenengameng opkal, er si jaket kenengamengtopu kupra, sun ali dangkameng ngeda, weik kuprepa, sun nong yuma deiki singidongonkamre. ‘Kandi aneng tep, ukupra wenepkamrem’ tenena tep, moropkene, ne nai Allah.
30 Ukupmem pangeda, ne Dauddi, ne pe sipyal deiki di, kan tep, “Kanda pio teleppu kurume,” pepra, kanda Allah Yahweh tep, upepnedi, kan si tepapu eremkamkene.
Ada, nun Israel yala nesala, nimi denge pio weik, men nukmanto kikiman bulupmepe taruda, anesala kankan neitamai teknedi, kanda Allah tep, “Naio kan tep telepe pepkene,” pepra, kan si tep pio eremkamkene.
31 Kan Allah tep, ‘Telepe,’ penkamkena deiyoda ake. Ada, kanda Allah Yahwehdi, akeca-keca talena gum di, pio tali kan-kan nesalada, sun dumsisi tara tekmumdi, melimnapu kuruma tepa. Kanda Allahdi, sun kan-kan nesala damai tekmemdi, melimruma deiyoda ake.
Ada, yuk yu nengdi, atali kan-kan nesala tep, ‘Adipapu tali minina upu pepmepedi, nimi upu bokeipmepepa, aneng tep tali lupra poptapkamenge,’ tenengedi, keteneipmange. Ukupkamenga cadi, kanda Allahdi akankan nesala tep, melimrume.
Atep nengeda, ne Dauddi, kan Allah tep, “Pio telepe,” pepra, kan sipu eremkenune.