Psa 110 | XteSC | STEP | Allah Yahwehdi, ne ila nimi deiyo ngebo tep pepu. “Kanda ne dumsisi tara yana bukmempa, nedi kan podan nesala yuma popbisipnedi, anesala yuma dopra kan yan amutarapu deipkamkene. Kan podan nesala yuma dopra kan yan amutara deipkenepa, anesala sun nong deiki yanipdongopkamrume.” Allahdi upepra deipu.

Psalms 110

Allah Yahwehdi, amenda taru yankamu ila nimi deiyo ngebo tenpu tep, wepra deipudi pepu upu

1 Allah Yahwehdi, ne ila nimi deiyo ngebo tep pepu. “Kanda ne dumsisi tara yana bukmempa, nedi kan podan nesala yuma popbisipnedi, anesala yuma dopra kan yan amutarapu deipkamkene.
Kan podan nesala yuma dopra kan yan amutara deipkenepa, anesala sun nong deiki yanipdongopkamrume.” Allahdi upepra deipu.
2 Allah Yahwehdi ne deiyo ngebo tep pepu.
Kandi Sion ^{▼▼Sion mutu perami ngeda, ada Yerusalem mutu tep perami. Amutu si butene dinin, amutuda tenpu mutupu.} mutu talepra kumem dinin, nedi puto ton cap karepkenepa, amutu di dipra ortara mutu yuma kan dipapu talenkamrume. Kandi talenkamrem mutu yumada, pala pio weik mutu kuprepa, kan podan nesala sun kunge mutu peda, kan dipapu talememdi, sun ila nimi deiyo ngebo kunkamrume.
3 Kan podan nesala tep, popbisipbankamrum taruda, kandi talemempa, kan amutara kunge nesala yumada, sun kange tenimtona gum dipapu, kan damai yangedi, kan cap, sun cap, kikiman wisipra yuk mutu nesala tep porbenkamrume.
Ukupmantoda, ipna taru kuru dei saka mutmuta deiki paleramretopu, tumi-tumi yuma kan amutara kunge jen talen kaber nengdi, ‘Nun nai cap kikiman mali neng tep porbenkamep’ tenen, kan damai tupa-tupa yakankamenge. Ne Allahdi melimsenedi, kan amutara jen talen neng cap, kan cap puto keipsenepa, kan podan nesala tep, mar porbenkamrume.
4 Tek sisi Allah Yahwehdi, ne deiyo ngebo tep upepu. Ne Allah Yahwehdi, konum peipkesa tep, apeipkesi ngeda, ton cap tenepnedi, yuknge ton men punupra pepkamkene.
Ada, ne Allah cap, nimi cap telep kupra kikiman kuna tep, antamdina deiyo ngebo pel talepra pio donkamrume. Ada pumun taru kuramu ngebo, er sida Melkisedekdi apelpu talepra doramutopu, kan peda, apelpu talepra pio donkamrume.
5 Kanda, Ila Nimi Deiyo Ngebo kumemdi, Allah er dumsisi tara kuruma cadi, sun mali kunge nesala yuma tep, tulum kupkerepa, tuai nesala wenepra popkamrum taruda, Allahdi kan tep melimkerepa, tuai mutu neitamai nimi ila deiyo talepra kunge Raja-Raja neng yala-yala yuma popra gawal dakamrume.
6 Tonda, ban-ban yuma mali kunung nesala wenemna tep popmempa depmengopda, adepkameng neng sun nong dopra, sun pe nong deikipu taplakra deipra welepkamre. Ataruda, tuai mutu ban-ban yuma nimi deiyo talepra kunung neng yuma poptapkamrume.
7 Ukupkamrum taruda, mutu ban-ban yuma nimi deiyo kepra talenung nengda, popbisipmemdi, gum kupra deipkamrume. Sun aneng yuma gum kupkameng dinin, ne Ila Nimi Deiyo Ngeboda, ^{▼▼Ila Nimi Deiyo Ngebo – Dauddi, “Ila Nimi Deiyo Ngebo,” pepu ngeda, ada Yesus tep pepu. Yesusda, Allah er dumsisi tara bungbeupa, Allahdi Yesus er podan nesala yuma tep popbisipredi, Yesus er yan amutara deipkamre. Tuai mutu neitamai, ila deiyo talepra kunkameng Raja-Raja neng yumada, Yesusdi popbisipredi, sun cap, sun amutara kurami mali kun nesala yuma cap, sun nong deiki yanipdongopkamre. Tuai nesala ban-ban yuma deiki tara kunkamre.} er embankamre bisi damai yumada, pio telep me akuamrepa, gwepra jenkamre. Aila Deiyo Ngeboda, akeca-keca yuma er ila puto deiki di popbisipredi, yuk nesala yuma deiki tara erepra kunkamre.
Dauddi aupu yuma pepu.