Psa 111 | XteSC | STEP | Nun yumada, nun nai bo Yahweh tep, “Kanda pio teleppu kurume!” pepra, er tep gispal donkamepe. Tonda, ne kange dipru neitamai yuma di, Yahweh tep, “Kanda pio teleppu kurume!” pepra, er sipu eremkamne! Tonda, Allahdi, ‘Angeda kunkamrume, angeda pio men kunkamrume,’ pepra deiamseu upu, moupra talengedi, dumsisipu kunge nesala bulumnungai bena, Allah tep, ‘Telepe,’ penkamne. Ange utopu, sun Israel yala nesala yumadi, ‘Allah er damai bena kunkamepe’ tenen, bulumnungaida, nedi, Allah tep, “Kanda pio teleppu kurume,” pepra, er si eremna tep penkamne.

Psalms 111

Allah Yahweh tep, “Kanda pio teleppu kurume!” pena tep seki upu

1 Nun yumada, nun nai bo Yahweh tep, “Kanda pio teleppu kurume!” pepra, er tep gispal donkamepe.
Tonda, ne kange dipru neitamai yuma di, Yahweh tep, “Kanda pio teleppu kurume!” pepra, er sipu eremkamne!
Tonda, Allahdi, ‘Angeda kunkamrume, angeda pio men kunkamrume,’ pepra deiamseu upu, moupra talengedi, dumsisipu kunge nesala bulumnungai bena, Allah tep, ‘Telepe,’ penkamne.
Ange utopu, sun Israel yala nesala yumadi, ‘Allah er damai bena kunkamepe’ tenen, bulumnungaida, nedi, Allah tep, “Kanda pio teleppu kurume,” pepra, er si eremna tep penkamne.
2 Uo, ne nai Allah Yahwehdi, kunupsek pen pel doserurada, pio puto weik kecapu kurure.
Amambul pel yuma konum dopre pangeda, nimi epmengedi, ‘Gume, akeca yumada, kael kepkamepe’ tenen, moupra tenepmenge nengdi, er pel dorurnge yuma tep, kange deipra kununge.
3 Ada, Allahdi pio telep kunupsek pen pel dorurnge yumada, ila puto cap, urasin pio telep kuna cap, ila mambul kuna cap, pio telep cap kurure. Ange yuma, nimidi epmengedi, kange deipmengopda, ‘Uo’ tenen, kange lorure.
Tonda, Allahdi, “Ukunkamrume, angeda pio men kunkamrume,” pepra, peserur upu utopu kupra, pio telep kupra, dumsisipu pel doserur ngeda, men gum kupkamre.
4 Allah Yahwehdi, nimi kange dipru neitamai pel dopre pangeda, nimi yumadi, erdi kunupsek pen pel doserurnge yumada, tupa tenenapu kununge. Ange yumada, pio men lumdongonunge. Ange yumada, pio tep, akunkamre.
Nun nai bo Allahda, akeca-keca yuma talerur ngebo cadi, er kange dipapu, nun tali kankan nesala yuma tep, ila di bicau teneseredi, nun putaserur keca yuma kareseredi melimserure.
5 Tonda, ware nesala do yuma, Allahdi, ‘Angeda kunkamrume, angeda pio men kunkamrume,’ pepra, deiamseu upu moupra talengedi, dombange nesaladi, Allah tep kware kunge nesala yuma tep nengeda, Allah dipapu, sun jen keca kareserure.
Tonda, Allahdi er mawa nesala tep, ‘Sunda pio men tamkamsene. Pio tep telep kupra derinkamsene,” pepra, pedina upu deiki di peiamseu upu yumada, pio men lumdongorure. Ange yuma tupa tenenapu kuredi, telep kudinkamsere.
6 Tonda, Allahdi, ‘Anesalada, ne nyapu sisa’ tenen, konum weamseu Israel nesala tep, er ila puto di pel dorur ngeda, ‘Sun kael kemkameng’ tenen, erdi pel dorur keca yumada, katuai dipu peteremserepa, kael kemnupe.
Ukupmanto ngeda, sun yuk-yuk dakurami nesala yala-yala yuma talerami mutu-mutuda, Allahdi amutu yuma dopra, erdi, ‘Ne mawa nesala’ tenen, Israel nesala tep, kareamupa, dopromidi talepra kurami.
7 Allah, er buru di pel dorurnge yumada, pio dumsisi pelpu dorure. Ada, erdi, “Angeda kunkamrume, angeda pio men kunkamrume,” pepra, deiamseu upu perurtopu, dumsisipu pel dorure. Tonda, erdi nun tuai nesala yuma tep, ‘Angeboda, ne kabo dinin, angeboda gume,’ tenena deiki di, men wilimdoserure. Ange gum dinin, pio dumsisi kupra pel doserure.
Allahdi, “Angeda kunkamrume, angeda pio men kunkamrume,” pepra, deriserur upu yumada, tali upu pio men perure. Aupu yuma, nong kupkamre. Allahdi perur upu yumada, pio tek sisi upu peserura cadi, ange yuma tep, ‘Teka,’ teneptepe.
8 Tonda, Allahdi, “Ukunkamne, ukunkamne. Tonda, sundi ukunkamrume,” pepra, peserur upu yumada, ataru di dipra, dorkunkamre taru yumada, pio yuk-yuk men kupbankamre. Apepra deipunge yumada, tupa apeipseutopu pio tep kunkamre.
Ada, Allahdi, “Angeda kunkamrume, angeda pio men kunkamrume,” pepra deipudi, kareamseu upu peserya utopu, dumsisipu pel dorure. Allahdi, “Ukunkamne,” perur upu yumada, angepu kurure. Aperur upu yumada, tali upu men perure. Nun yuma tep dumsisi kupra taleseredi peserure.
9 Allahdi, ‘Sunda ne mawa nesala’ tenen, wepra deiamu Israel yala nesalada, Mesir mutu neitamai ikin weik kurami dinin, erdi, ‘Anesala loptapra lyepropkamne’ tenen, sun melimna ngebo ton dopra dokotepu. Ukupmantoda, anesala yuma kunupudi, lyepropu.
Tonda, Allahdi er mawa nesala tep, “Sunda pio men tamkamsene. Pio tep telep kupra derinkamsena tep, sundi, ukunkamrume,” pepra, pedina upu deiki peiamseu upu yumada, pio men gum kuptue. Ange yumada, pio akunkamre ja!
Allahda, mali kunange tenpunge peda, men kurura cadi, pio Telep Lengna Ngebopu kurure. Atep nengeda, er cap, er si cap tep, nimi tuai nesala yumadi, ‘Uo’ tenen, kware kupmengedi, er sipu eremkamenge. Tek sisi telep ngeda, sun kange dipru neitamai yumada, er deikipu deiptenge.
10 Ware nesala do yuma, sundi, ‘Gume, Allahdi peserur upu utopu kupra, pio telep kunkamne. Pio telep, ila kael ngebo kunkamne,’ tenenge nesala yumada, menmena ila mambul kunkameng ngeda, ake. Ada Allah tep kware tenepmengedi, erdi peserur upu moupra talengedi dombankamenge. Ukunkamenga deiki di, ila kael neng kunkamenge.
Allahdi, “Angeda kunkamrume, angeda pio men kunkamrume,” pepra, deiamseu upu moupra talengedi, dombanung nesalada, ware keca do yuma, nong neitamainge moupra tenengedi, teleppu kununge.
Tek sisi telep ngeda, nimi tuai nesala yumadi, Allah tep, “Kanda pio teleppu kurume,” pepra, er si eremnapu kunkamenge. Er si eremnada, pio men tamkamenge.