Psa 112 | XteSC | STEP | Nun yumadi, nun nai bo Allah Yahweh tep, “Kanda pio telep ngebo kurume,” pepra, er sipu eremkamepe! Ware nesala do yuma, sundi, ‘Uo, Yahwehda, ila puto ngebo kurure’ tenen, kware kupmengedi, erdi peserur upu moupra talengedi, dumsisipu kunge nesala yumada, Allahdi sun tep telep kudiramrepa, kange deipra kununge. Anesalada, Allahdi, “Ange kunkamrume, angeda pio men kunkamrume,” pepra deiamseu upu tep nengeda, pio kange deipmengedi angepu talepra dombanunge.

Psalms 112

Allahdi pesere upu moupra talengedi, dumsisipu kunge nesalada, Allahdi telep kudinkamre pepu upu

1 Nun yumadi, nun nai bo Allah Yahweh tep, “Kanda pio telep ngebo kurume,” pepra, er sipu eremkamepe!
Ware nesala do yuma, sundi, ‘Uo, Yahwehda, ila puto ngebo kurure’ tenen, kware kupmengedi, erdi peserur upu moupra talengedi, dumsisipu kunge nesala yumada, Allahdi sun tep telep kudiramrepa, kange deipra kununge.
Anesalada, Allahdi, “Ange kunkamrume, angeda pio men kunkamrume,” pepra deiamseu upu tep nengeda, pio kange deipmengedi angepu talepra dombanunge.
2 Ange utopu kunge nesalada, sundi derinkameng nyapu yumada, nepmengdi, puto weik kungopda, yuk neng yumadi sun tep, ‘Sunda ila neng kununge’ tenen, si eremengedi, gispal donkamenge.
Tonda, Allahdi pesere upu moupra talengedi, dumsisipu kunge nesalada, sundi nyapu deipmengepa, dadeipdanen bankameng neng yuma peda, Allahdi ortaru kunkameng nesala yuma tep, pio telep kupra deiprepa, kange deipra teleppu kunkamenge.
3 Allahdi telep kupra deipre pangeda, sunda bung keca cap, yuk kunumna weik keca cap akapkamra cadi, isomka nengpu kunkamenge.
Tonda, anesaladi dumsisi kupra, teleppu kunkameng ngeda, pio men tapkamenge. Tupa-tupa, dumsisi teleppu kunkamenge. Angeda men gum kuptue.
4 Ukupmantoda, nimidi ila weica upmengepa, dirin weik kuprepa, yuk neng dana-dana tara yuma, telep kupra diramengtopu, sun dumsisipu kunge nesala peda, sun telep kunga deiki di, yuk nesala weika di melimnunge.
Ada, sun dumsisi kunge keca yuk nesala epmengopda, ‘E, telep kuna ngeda ake,’ tenen, kael kemkamenga tepa.
Tonda, sun dumsisi teleppu kunge nesaladi, yuk neng tep, bicau tenengedi, telep kupra melimnunge. Tonda, Allahdi, “Ukunkamrume, angeda pio men kunkamrume,” pepra deiamseu upu moupra talengedi, teleppu kununge. Atep, yuk nesala yuma tep nengeda, telep kupra kununge.
5 Tonda, ware nesala do, sundi yuk kankan nesala do, sun damai kunge nesala do, aneng tep, keana taru sun keca karepra meliptengopda, akuna ngeda, pio telepe.
Ange utopu ton, sun kunkameng keca yumada, mawa di tali upu pena cap, bul kemna cap, gum dipapu, pio teleppu kupmengopda, ange peda pio telepe.
6 Deiyoda, Allahdi pesere upu moupra talengedi, sun pio dumsisi teleppu kunge nesalada, puto tupa kunkamenge. Ikin keca do, kange mun keca do, sun damai yarya peda, sunda kware kuna cap, malik una cap, pio gum di, puto di tupa teleppu kunkamenge.
Tonda, Allahdi pesere upu moupra talengedi, pio dumsisi teleppu kunge nesalada, yuk nesala yumadi, sun tep pio men lumdongonkamenge. Anesala tep, tupa tenenapu kunkamenge.
7 Tonda, pio dumsisi kupra, teleppu kunge nesalada, yuk nengdi ila bamur upu cap, kange mun upu cap dopra, sun damai yana lap pepmenga peda, anengda, ‘Uo, ware kuptepe do?’ tenen, kware pio men kunkamenge.
Deiyoda ake. Sun dumsisi teleppu kunge nesalada, sun kange dipru neitamai yumada, Allah Yahweh, er deikipu deringedi, ‘Allah dipapu melipra lyepropkamser’ tenen, Allah tep teka tenenapu kununga tepa. Sun kange dipru neitamai yumada, kware kuprepa, pio moropsemnapu men kununge.
8 Teka, Allah tep pio teka tenepra dumsisipu kunge nesala yumada, kware tenena gum dipapu, sun kange dipru neitamainge yumada, pio dim pepra, putopu kununge. Sun kange tenenangeda, yo punupra, yuk-yuk men tenenunge.
Atep, kware gum di, pio teka tenepmengedi, dakuramengepanen, amenda taruda, sun pona tep neng yumada, gum kupkamenge. Allahdi sun pona tep nengda, popra gum kupra deipkamre ja!
9 Tonda, Allah tep teka tenepra, pio telep dumsisipu kunge nesaladi, yuk tali kankan nesala, akeca-keca yuma men talenge nesala tep, bicau tenengedi, aneng sun putan keca weika di, tali lupra melipra karenunge.
Allahdi, “Angeda kunkamrume, angeda pio men kunkamrume,” pepra deipseu upu, angepu talepmengedi, sun dumsisi teleppu kunge nesalada, sun dumsisi kunge keca peda, pio men gum kupbankamre. Tupa akapkamre.
Tonda, yuk nesala yumadi, sun tep, ‘E, anengda tek sisi telep neng kununge’ tenen, sun tep si erepmengedi, gispal pio donapu kunkamenge.”
10 Ukupmenge pangeda, yuk nesaladi sun yuk nesala, sun mali kecapu talepra mali-malipu kunge nengdi, aneng epmengopda, sundi, ‘Anengda nun pio songe,’ tenengedi, yu weik kunkamre.
Ukunkameng dinino, sun mali kun kecapu kunge nesaladi, ‘Ukupkamepe, ukupkamepe’ tenen, sun putaramre keca yumada, nong men kupkamra cadi, sunda yu weik kuprepa, mali upu weik penkameng dinin, amenda taruda, gum kupkamre.
Ukupmanto ngeda, ket welepyanen, gum kupbaramretopu, sun amali neng peda, gum kupbankamenge.