Psa 113 | XteSC | STEP | Nun yumadi Allah tep, “Haleluya,” pepra, er si eremkamepe. Nun yumadi, nun nai bo Yahweh tep, “Kanda pio teleppu kurume!” pepra, er tep gispal donkamepe. Tonda, nun nai bo Allah, er amutara kumumdi, er pelpu melipra dorumu neng peda, Yahweh tep, “Kanda pio teleppu kurume,” pepra, er si eremkamrume. Teka, nun yumadi, nun nai bo Yahweh tep, “Kanda pio teleppu kurume!” pepra, er si eremkamepe.

Psalms 113

“Allahda pio telep kurure,” pepra, mut pena tep upu

1 Nun yumadi Allah tep, “Haleluya,” ^{▼▼Haleluya – Aupuda, Ibrani upu deiki di seki. Aupu deiyoda, ake. Ada, Ibrani upu menmena ngeda, ‘halal’ deiyoda, ‘Allah kanda pio telepe,’ pena tep, penunge. Sirikaida, ‘Yah’ seki. Angeda, Allah er pe si sisa, ‘Yahweh’ tep, seki. Atep nengeda, aupu butene dukdongopmengopda, “Yahweh tep, kanda pio telep kurume,” pepra seki.} pepra, er si eremkamepe.
Nun yumadi, nun nai bo Yahweh tep, “Kanda pio teleppu kurume!” pepra, er tep gispal donkamepe.
Tonda, nun nai bo Allah, er amutara kumumdi, er pelpu melipra dorumu neng peda, Yahweh tep, “Kanda pio teleppu kurume,” pepra, er si eremkamrume.
Teka, nun yumadi, nun nai bo Yahweh tep, “Kanda pio teleppu kurume!” pepra, er si eremkamepe.
2 Nesala ban-ban yumadi, nun nai bo Yahweh tep, kanda pio teleppu kuruma cadi, kan sida, “Pio telep sipu kurure,” pepra, ‘Er si eremkameng’ tenen, putaserepa, ‘Ukupkameng’ tenen, moronupe.
Ada, ataru pe, amenda taru pe, tonda dorkunkamre taru peda, ‘Nimi yala-yala yumadi Allah tep, “Kanda pio teleppu kurume!” pepra, er si eremkamenge’ tenen, putaserepa moronupe.
3 Tonda, ada tuai mutu nesala ban-ban yuma neitamai kunge nengdi, Allah er cap, er si Yahweh cap tep, eremkamenge. Ada keteng yakan tara di, dipdongopra keteng dangban tara cap, daneitamai tara yuma cap, kunge nesala yumadi, Allah er cap, er si Yahweh cap tep, si eremkamenge.
Teka, pio telep ngeda, nimi yumadi, Allah Yahweh, er tep, er si eremkamenge.
4 Nun tuai nesala, ban-ban yuma neitamai kunup nesalada, amutara utopu nesala kunup dinin, Yahweh erda tuai nesala yala-yala yuma pio deiki tara kuredi, sun yuma tep, deiyo kepra talerure.
Tonda, Allah Yahweh er puto weik kururnge cap, pio telep kurenge capda, pio weik cadi, ila deiki tara ngebopu kurure. Ada, im deiki tara utopu kurura tepa.
5 Atep nengeda, ware ngebo ton, nun nai bo Allah Yahweh utopu kurur do? Gume, ada nun tuai nengda, pio men kupmanto. Er tenpua!
Yahweh erda, akeca-keca yuma pio deiki tara bukredi, akeca-keca yuma talerura tepa.
6 Tonda, Allahda pio deiki tara kurura cadi, im cap, tuai mutu capda, Allah er im deiki tara kuredi, dutara yuma dirure.
7 Sun puto bouna dipapu kunge nesala yumada, pio amutara, tu but neitamai utopu kunung dinin, Allahdi anesala yuma tep, moupra melipredi, erepra telepaipu dopra derirure.
Ange utopu ton, akeca-keca men talengedi pio kan-kanpu kunge nesalada, pio amutarapu kununge. Nimidi sikke but tamamengai utopu, pio mali mutu kununge. Dinino, Allah Yahwehdi anesala tep, melipra lyepredi, erepra telepaipu derirure.
8 Allahdi, pio kankan kunge nesala dopra ereipredi, ila nimi deiyo neng damai deiprepa, kikiman bungnunge.
Ada, akeca-keca yuma men talenge neng dopra ereipredi, er mawa neng, sun Israel yala nesala kan-kan neitamai derirure.
9 Tonda, nyapu men deipmanto nerapu dopra, er puto deiki melipra kweterepa, sun nyapu derinunge. Atep, sun anerapu cap, sun nenge yapu cap, sun nyapu capda, tenpu ati neitamaipu kange deipra kungedi, gispal dopra kununge.
Allah er puto deiki di, anerapu melipra kwetepre pangeda, nyapu weikanun deipmengedi, ‘Uo, ukutaru nyape derin nerapuda, nun kunupe,’ tenepmengedi, pio kange deipra kununge.
Ange tep nengeda, nun yumadi, nun nai bo Yahweh tep, “Kanda pio teleppu kurume!” pepra, er sipu eremkamepe.