Psa 114 | XteSC | STEP | Israel yala nesalada, Mesir mutu neitamai di tapra, bendopi. Ada, sun apu bo Yakubdi deiamupa, dadeipdanen yakarami nesala, sun Israel yala nesalada, Mesir mutu neitamai kurami nesaladi, pio yuk upu perami neng kankan di, tapra bendopi.

Psalms 114

Allahdi, Israel nesala Mesir mutu neitamai di dopra loptapra lyepropudi, katawai mutu dubeu taruda, Allah ila puto deiki di kunupseng pen pel dopunge tep, pepu upu

1 Israel yala nesalada, Mesir mutu neitamai di tapra, bendopi. Ada, sun apu bo Yakubdi deiamupa, dadeipdanen yakarami nesala, sun Israel yala nesalada, Mesir mutu neitamai kurami nesaladi, pio yuk upu perami neng kankan di, tapra bendopi.
2 Ataruda, Israel yala nesala, sun apu bo Yehudadi deiamupa, dadeipdanen yakarami nesalada, Allahdi sun Israel nesala tep, ‘Ne mawa nesala kunkameng’ tenen, anesala wepra deipudi lyepropupa, er cap, sun cap kikiman kurami.
Ada, Allahdi, ‘Sun Israel yala nesala yuma talepnedi, sun ila deiyo ngebo pio kunkamne,’ tenepka deiki di, Israel nesala lyepropudi taleramu.
3 Ataruda, sun ila laut mokon er si, Laut Teberau damai yana dinmaipa, Allahdi nimi men kupmanto pel dopka deiki, alaut mokon neitamai di bokropupa, laut mokon dana-dana tara gopra teku. Ange utopu, ila embaramre me, er sida Yordan me, pirman yai taruda, Allahdi kunupseng pen pel dopka deiki, ameda, tamupra itarapu keproupa, keana tep cepropu.
4 Tonda, ataru neitamaida, ila mutu buma bukamnga yumada, loknapu kupudi im kuruka embendau. Ukupmantoda, kambing bisam erepra di im kuruk baramengtopu, aila mutu buma peda, utopu loku. Tonda, amutu yambul mutu buma bukamnga yuma peda, domba bisam nyapu im kuruk embaramengtopu, ayambul mutu buma peda loku.
5 Atep nengeda, nedi asipetepsene. Israel nesala me goupra, ortara bana tep, kan neitamai di bokrapmumdi, dana-dana tara kepra deipmum do?
Tonda, Yordan me kanda, ware keca deiyo tep, Israel nesala me ortara goupra bana tep, kandi tamupra, itara kepra kepromumpa, er ameda keana men embeudi, dim pepra teku do?
6 Ange utopu ton, sun ila mutu-mutu buma bukamnga yumada, ware keca deiyo tep, sun yuma im kuruk embana utopu kupra loknapu kuprum do?
Tonda, sun yambul mutu buma bukamnga yumada, ware keca deiyo tep, loknapu kuprum do?
7 Uo, tuai mutu ban-ban yumada, nun nai Allah Yahweh, er damai yarumnyopda, kware kuprepa, mutu-mutu yumada, longna cap, moropsemna cap kunkamrume!
Ada, nun apu bo Yakubdi, si eremamu Allah, er damai yarumnyopda, moropsemnapu kunkamrume!
8 Tonda, nun nai Allahdi, katawai mutu neitamaida, me pio gum kwamu mutu dinin, Allahdi kunupsek pen pel dopka deiki, ila gel neitamai di kumupra deipupa, ila mokon deipu. ^{▼▼ila mokon deipu – Aseki ngeda, Allahdi Israel nesala dopra, Mesir mutu neitamai di loptapra lyepropupa, ila katawai mutu neitamai embaramipa, me pio gumai tep, meda ila di putaramupa, Allahdi sun tep me karepu. Aupu kael kemna tep nengeda, Keluaran 17:1-7 cap, tonda, Bilangan 20:1-13 cap neitamai di dinkurume.}
Ada, pio gat gel, mutu yangne gel kwapka neitamaida, Allahdi nimi men kupmanto pel dopka deiki, me bungna pakra embeu.