Psalms 115

‘Allah, er puto deiki di akeca-keca yuma talepra kurur ngebo, er sipu erepra gispal donkamepe’ tenen, mut pepi upu

1Nun nai Allah Yahweh, kan tepapu gispal dopra gudinkamkepe. Ada, nun pe tepapu men gispal dodankamepe. Dinino, nun nai Allah, kandi nun tep bicau tenepsememdi, melimseruma tep, nun adipapu kan tep gispal dopra gudinkamkepe.
Tonda, kandi nun tep, ‘Ukunkamsene,’ pepra pedina upu peamsemumnge yumada, tenpunge peda men tapsemumdi, ange yuma kuserema tep, kan si pio eremkenupe.
2Tonda, ware keca deiyo tep sun yuk mutu nesala ban-ban yumadi, “Israel nesala sun nai bo Allahda, dan cei kurur do?” pepra nalemsenung do?
3Nun kaele. Nun nai bo Allahda, im deiki kuredi, ‘Angeda ukupkune,’ tenepmare ngeda, adipapu angepu kurure.
4Dinino, sun yuk mutu dakunung nesalada, sundi talepra si eremenge kecada, urasin pio telep gat keca, er sida emas cap, perak cap, nimi buru deiki di dopra, nimi urasin utopu kupra petupra deipmengedi, “Nun nai bo ace,” pepra gispal donunge.
5Sundi talepra si eremnung keca yumada, sipyal akapu dinin, upuda men penunge. Asuru akapu dinin, men dinunge.
6Akecada, amul peda akapu dinin, upuda men gekenunge. Utopu ue akapu dinin, nintong kecada men gekenunge.
7Tonda, sun buru akapu dinin, talen kecada men talenunge. Utopu sun yan peda akapu dinin, yanipra men embanunge. Utopu sipyal akapu dinin, upu pena cap, isin angamna cap, sime jerkotena cap, men kununge.
8Ware nesala do yuma atali keca petupra derinung nengda, atali keca kange douna gum di kururtopu, sun peda tali kange doupra kunkamenge. Sun pe buru puto deiki dipapu pel donung keca nonge kuretopu, sun peda utopu kunkamenge.
Tonda, atali keca tep, “Nun nai bo,” pepra, teka tenepmengedi, si eremnung nesala peda, tali kange doupra kunkamenge. Telep kun keca pio men kunkamenge, talipu kunkamenge.
9Ukunkamenga tep, uo sun Israel yala nesalada, atali neng kununga utopu men kunkamrume. Nun nai Allah Yahweh, er tepapu teka tenepra kunkamrume. Ukumum pangeda, er dipapu sun tep melipra kalengkamsere.
10Uo, Harundi deipupa dadeipdanen, yakaramyanen, deipsei neng, sundi Allah er si eremna ati pumbon talepra, pel dorum neng yumada, nun nai Allah Yahweh tepapu teka tenepra kunkamrume. Allah er dipapu sun tep melipra kalengkamsere.
11Uo, nimi yumadi Allah Yahweh tep, kware kupserepa, teka tenepra kunkamrume. Ukupmumnyopda, nun nai Allah er dipapu tupa melipra kalengkamsere.
12Nun nai Allah Yahwehdi, nun Israel yala nesala yuma tep, tupa teneserya deiki, teleppu kudinkamsere. Allahdi Israel yala nesala cap, Harun yala nesala cap yuma tep, pio tupa melipseredi, teleppu kupra derinkamsere.
13Allah tep kwar tenepra kunung nesalada, ila neng pe, yambul nesala pe yumada, Allah er dipapu tupa melipseredi, teleppu kupra derinkamsere.
14Ukupra melimseredi, Allah Yahweh er pingping keca karepserepa, nyapu weik deipdanen bankamrume. Ada sun cap, sundi deipmumpa, dadeipdanen bankameng nesala yuma tep kunkamsere.
15Angeda, Allah Yahweh im deiki cap, tuai cap ketekepra deipu ngebo, er dipapu sun damai akuredi, melipra teleppu kudinkamsere.
16Im deikida, Allah Yahweh er pe mawa kecapu ketekepra deipupa kurure. Dinino, tuai mutuda, nun nimi tuai nesala ‘Talepra kunkameng’ tenen, ketekepra deipseue.
17Tonda, konum depmengepa, nimi pein damai peirbenge taruda, kange di ton cap tamupra yangedi, Allah Yahweh er si eremna tep, kange don mut men penunge. Sunda tali dimpepra dabena kununge.
18Ukunung dinin, nun tupa gam kunmape nesalapuda, gam kunmape taru dipapu, Allah tep telepe pepra gispal dopedi, er sipu eremkamepe. Ukutaru di dipdongopra, yuk taru yumada, pio tep er sipu eremkamepe.
Allah Yahweh tep telepe pepne.