Psalms 116

Depmanto kupupane lyepropupa, mut pepu upu

1Neda Allah Yahweh tep tupa kange derinkamne. Ada, ne kange mun kupnere taru yumada, Allah tep moropne pangeda, er gekepredi erdi ne tep moupra melimnerure.
2Ne ikin weik kuramneu taruda, ne nai Allah tep, mali pepra moropsi pangeda, er gekepneudi meliamneua tep, ne gam kunkamne taru yumada, er tepapu moronkamne.
3Tapu koupmengepa, men lopmanto kuramretopu, kupneupa, neda depmanto kupsipane, Allahdi lopra lyepropneupa, gam kunune. Depmanto kupsi taruda, ‘Depkun do?’ tenen, kware weik kupneupa, ne dipru ila di pu jepneue.
4Depmanto kupsi dinin, ukupneu taruda, ne nai Allah Yahweh tep moropsidi, “Ne nai Allah Yahweh kandi ne tep melipra lyepropneo,” pepra moropsi.
5Nun nai Allah Yahweh, erda nimi tep bicau tenena cap, melimna cap deiyo ngebo kurure. Allah erda mali kun keca tenpunge peda men kuredi, dumsisipu kurura cadi, nun tep men tamserure.
6Nimi dipru eremna gum di, boun kange doupra kurur ngeboda, Allah Yahwehdi melimrure. Atep nengeda, ne puto pio gum kupneu taruda, Allahdi ne tep melipra lyepropneue.
7Allah er si Yahwehdi konum melipneua tep, ne dipru bouna di er amutarapu kunkamne. Atep ukupnedi, pio men tenimtonkamne.
8Ne nai Allah Yahweh, ne depmanto kuramsi taruda, kandi lyepra deipnemume. ‘Ne depkun do?’ tenepsi taruda, kange mun kupneupa ila di ngolokra engepsipane, ne nai Allah Yahweh kandi melipra lyepropnemume.
Tonda, ne yan giso dukneupa, sakmanto kupsipane, Allah kandi talepra Allah tepapu, tupa-tupa teka teneramsa cadi, ne ikin weik kuramneu taruda, kan tep mororamkesi.
9Mororamkesipa, kandi lyemnemuma cadi, ukutaruda gam tupa kunge nesala kankan, tupa gampu kunedi embanune. Neda, ne nai bo Allah er si Yahweh damai embaramnepa, dinerure.
10Ne kange mun kange doupra kuramsi taruda, ‘Uo, ware kupkamner do?’ tenen, kware weik kuramneupa kuramsi. Ataru neitamaida, “Uo, neda ikin weik kunune,” pepra engeramsi.
11Ikin weik kuramneupa, kange tenimtonapu kuramsi taruda, “Yuk tuai nesala yumadi, ne tep nengeda, mok upupu petamnenunge,” peramkesi.
12Allah Yahweh kandi, akeca-keca yumada ne tep weika di telep kupra kareramnemume. Atep nengeda, nedi ware telep keca tamupra Allah kan tep karepketene do?
13Allah kandi nimi lyemna tep telep upu pepra deipmum ngeda, nedi, ‘Yuk neng gekepmengedi teka tenenkameng’ tenen, pio lape pepra peteremkamne. Tonda, ‘Allah kandi pio melimkamnerem’ tenen, kan sipu erepra moronkamkene.
14Ne nai Allah, kan nyapu yuma wekmaiyai di, kan Allah tep, “Ukunkamne,” pepra pedina upu deiki di deiamkesitopu, tek sisi kunkamne. Men tapkamkene.
15Allah Yahweh tep teka tenenung nengda, tenpu ngebo do, ton depmenge pangeda, sun aneng tep pio bicau tenerure. Allahdi wepra deiamu nesala depmengopda, ‘Anesalada pio ila mambule,’ tenerure.
16Teka ne nai Allah Yahweh, neda kan amutara pel don ngebo kunune. Ada, ne deiamneu nerda, Allah kan amutara kuramu nerdi deiamneue.
Tonda, mali keca di ateng koupra wenemnai utopu deiamneupane, kandi loptapnemuma tep, neda kan pelpu donkamkene.
17Ukupnemuma tep, nedi kan si eremna tep, yapi keca popra duyanedi, adipapu kan tep, “Telepe,” pepra kan si eremkamkene.
18Tonda, kan nyapu weik wekmaiya neitamai di, “Ne nong yumada dopra, Allah Yahweh kan tep karenkamkene,” pemkesa tep, angepu tupa kunkamne.
19Ada, Yerusalem mutu Allah er si eremna ati domidi, akati damai wengbana tep, bura tara betapra deiamyai, teknedi, nimi pio weik wekmangai di, “Ne nong yumada, Allah tep karenkamne,” pepkamne. Allah Yahweh tep telepe penkamne.
Daud mut deiki di pepu.