Psalms 118

Allahdi meliamupa konum kupunge tep, “Telepe,” pepra, pepu upu

1Allah Yahweh er tepapu, “Pio telepe,” pepra er si eremkamepe. ‘Er telep kuna deiyo ngebo kuredi kange deriserure. Tonda, erdi nun tep dipru kareprepa, ila di bicau teneseredi, melimserure.
Angeda men gum kupkamre, pio akunkamre,’ tenepra, nun Israel yala nesala yumadi, er sipu eremkamepe.
2Ukuserya tep nengeda, sun Israel yala nesala yumada, “Allahdi nun tep dipru karerepa, bicau teneseredi, kange deriserure. Angeda men gum kupkamre, pio tep kunkamre,” pepra, nun Israel yala nesala yumadi, er si eremkamrume.
3Utopu, Harundi deipupa dadeipdanen, yakaramrum nengda, Allah er si eremna ati neitamai talepra pel dorum neng imam-imam neng, sun yumada, “Allahdi nun tep dipru karerepa, ila di bicau teneserur ngeda, men gum kupkamre. Angeda pio tep akunkamre,” pepra, er si eremkamrume.
4Tonda, Allah er tepapu pe deipra teka tenengedi, er tep kwar tenenung nesala yumada, “Allahdi dipru karerepa, ila di bicau teneserur ngeda, pio tep akunkamre,” pepra, er sipu eremkamrume.
5Ne ton kange mun kupneu taruda, Allah Yahweh tepapu mali pepra ngoloksidi moropsi. Amoropsi ngeda, er dipapu gekepneudi, ne kange mun kupmaneunge yumada, er dipapu lyepropneudi, telep kupra deipneu.
6Ange tep nengeda, ne kwar kupnerepa, yo men moropsemnune. Ada, Allah Yahweh dipapu pio tupa melimnerure. Atep nimi yuk neng sun puto deiki di ne damai yan kurpeten keca ton men kupterepnetenge. Ada, Allahdi tupa melimnerura tep pepne.
7Ne nai Allah Yahweh, erda ne damai kuredi, tupa melimnerura cadi, ne pona tep neng ne damai yankunge taruda, ‘Angebo er nong deiki ila ikin keca deipkamep’ tenen, yakanung dinino, Allahdi, “Kan podan neng konum yakanmanga tep, kalekra pio dinkurume,” penerepa, neda dinapu kunune.
Ne podan nengda, Allah er dipu porbisinkamre. Ne podan neng porbisinkamre ngeda, neda asuru dipu dinkamne.
8Ukunkamra tep, telep ngeda, ‘Allah Yahweh er amutara bena kunada pio telepe. Allah er dipapu melimkamnere,’ tenen, er tepapu moronkamne. Dinino, ‘Sun nimi tuai nesala tepapu sundi melipnetenge,’ tenena ngeda, pio men tenenkamne.
Ada nun tuai nesala yumada puto boun nesalapu kunup dinin, Allah er puda ila puto ngebo kurura tep pepne.
9Utopu, ‘Nimi deiyo kepra kunung neng, sun amutara kunepa, melimkamnenge,’ men tenenkamne. Dinino, telep ngeda, ‘Allah Yahweh er amutarapu dimpepra bouna di kunkamne. Er dipapu melimkamnere,’ tenenapu kunkamne. Nun tuai nesala yumada, ange utopu tenepra kunkamepe.
10Pumun taruda, ne podan neng weik yakaramidi, yana weika di warengamnei dinin, Allah Yahweh er ila puto deiki di meliamneupa, Allah Yahweh er si deiki di, sun aporyakaramnei neng yuma tep porbisiramsi.
11Ada tenpu bisi dipapu men yakarami. Dana-dana bisi cap, itara bisi cap, utara bisi cap kepra yakaramidi, yana warengamnei. Dinino, ukuramnei taru yumada, Allah Yahweh er ila puto deiki di meliamneupa, Allah Yahweh er si deiki di, sun aporyakaramnei neng yuma tep porbisiramsi.
12Ukupmantoda, ne podan nengdi, yana warengamnei taruda, ‘Mongdi nimi topkup’ tenen, amupra domembaramengtopu, kuramnei. Tonda, ukupmantoda, sun aneng yumada mutmuta kel-kel peramrenge, uku dinikdongopmengepa, uku bu dingpepra sakroredi, uku bu jeramretopu kuramnei.
Ada popra gawal dakmanto kuramnei. Ukupra kuramnei dinino, ukuramnei taru yumada, Allah Yahweh er ila puto deiki di meliamneupa, Allah Yahweh er si deiki di, sun aporyakaramnei neng yuma tep porbisiramsi.
13Neda, ne podan neng sundi ila puto di papra, ‘Dokotepkup’ tenen, dokotepneipa, kot sakmanto kuramsi dinin, ataru-ataru yumada, Allah Yahweh er ila puto di ne tep meliamneupa, aporyakaramnei neng yuma tep porbisiramsi.
14Allah Yahweh er dipapu melimnerura cadi, erda ne puto kemdina ngebo kurure. Atep nedi er tepapu, “Telepe,” pepra gispal donkamne. Ada tali tep gume. Allah er dipapu neda konum lyepramneua tep pepne.
15Geketerepso. Allah Yahweh er nyapu sisa, sun dumsisi kunge nesalada, sundi ati dopra kunungai yuma, “Nun nai bo Allahdi nun tep, melimseredi nun podan nesala yuma konum porbisirure.
Ada Allah er ila puto deiki di mambul pel domseudi, nun podan nesala yuma tep porbisiramseu. Allahdi nun melimna tep, er dumsisi buru deiki di, ila mambul pel doserure,” pepra er si tepapu eremnunge.
16Tonda, “Allah Yahweh er ila puto kareserya deiki di, ila puto kupserya deiki di, nun podan neng yuma porbisinupe. Allahdi nun melimna tep, er dumsisi buru di, ila mambul pel doserure,” pepra, er si tepapu eremnunge.
17Neda men depkamne dinino, pio tupa gampu kunkamne. Agam tupa kunkamne taruda, ne nai Allah Yahweh, erdi ila mambul pel dorurnge yuma tep, nedi sun yuk nesala gekena tep lap penkamne.
18Allah er si Yahwehdi, ne mali kuramsi keca yuma wenemna tep, ila ikin keca ne nong deiki deiamneupa, kange mun kuramneu. Dinino, Allahdi ne tep, ‘Erda deptudi, nimi depmengedi banungaipu betue,’ men teneramneue. Melipneupa, er puto deiki di tupa gam kunune.
19Ange tep nengeda, Allah Yahweh er si eremna ati bisi buplan wengbanai yanyopda, menmena akati buplan pakra deipneso. Ukupnerumu pangeda, nedi Allah er si eremna ati wekra benedi, Allah Yahweh tep “Telepe,” pepra gispal dopkamne. Ukupnedi er sipu pio eremkamne.
20Allah Yahweh er si eremna ati wengbana tep, bisi buplanda, adano. Abisi buplan wengbana tep nengeda, dumsisi teleppu kupra kunung nesalapuda, abisi buplan wengbenkamenge. Dinino, mali kun kecapu talepra kunge nesala yumada pio men wekamenge.
21Atep neda Allah kan sipu pio eremkamkene. Ada tali tep gume. Ne nai Allah, ne morokenun nge yumada, gekepra melimneruma tepa. Tonda, ne podan neng yuma porbisiramumdi, ne tep pio lyemdoneruma tep, “Telepe,” pepkene.
22Tonda, sun ati telep kupra dorami nengdi, ‘Agelda urasin mali gel’ tenen, dopra bura tara donoki. Agelda tamami dinino, agel dopra bura tara dopmai gelpu ila mambul gel konum kupmare.
Ukupmantoda, gel ati donge nengdi, ‘Agel ati dela yuma pio telep dumsisi kupkamre’ tenen, menmena derirameng gel utopu, sun bura donoki gelda, ila mambul gel konum kurure. Ukupmantoda, yuk gel yumada yambul mambul dinin, agelpuda ila mambul ati dona deiyo gel konum kurure.
23Angeda, Allah Yahweh erdi, ‘Agelda ila mambul gel kunkamre,’ tenen, agel dopra, erepra deipu. Allah er dipapu apel yuma dopu. Atep tek sisi, nun anesala yumadi ange epmepedi, ‘Uo, ada ila mambule’ tenen, kael kepmepedi lolomkamepe.
24Allah Yahwehdi tenepra keteneiamu taruda, akonum kupmara tep, nun yumadi ataru tep nengeda, ila kange deipmepedi, gupra Allah er sipu erepmepedi, gispal donkamepe.
25Teka, nun nai Allah Yahweh, nundi kan tep moropkepe. Ada, “Allah kandi nun moropkepnge, adipapu gekepsememdi lyemdonkamserume,” pepra morokunupe.
Tonda “Allah Yahweh, kan ila puto nun deiki deipsemempa, nun podan neng yuma popbisipkamepe. Tonda, nun pel donkamep keca yumada, telep kupra pel dopmepepa, teleppu kunkamre,” pepra kan tep morokunupe.
26Allah Yahweh er si deiki di dokoteprepa, yankamre ngebo tep nengeda, nundi er tep, Allah Yahweh er si eremnup ati neitamai wekrapmepedi, er tep gispal donkamepe.
27Allah Yahweh erda, er tenpu tek sisi Allah kurure. Ukuredi, nun kange dipru neitamaida, kael kemna deiyo keca cap, kange dirina keca cap kareserure. Ukuserya deiki di melimserure.
Atep, ‘Ne tep karen kecada, sun anesaladi karenkamnenge’ tenen, ketenepra deipu taru konum kupre pangeda, Allah er gispal dona tep, embek co bo doupra wengbemumdi, Allah Yahweh er si eremna tep gel yakrapidi taplakra keteneiami keca damai, benkurume.
Ada, agel yakrapidi taplakra keteneiami keca dana-dana tara, sapi giso takke dana-dana beleramre utopu keca petupra deiaminge damai benkurume. Ada Allah er gispal dona tep benkurume.
28Kanda ne nai bo Allah kunerume. Ange tep nengeda, nedi ne nai Allah kan tepapu, “Telepe,” pepra, nedi Allah kan sipu ila di eremkamkene.
29Allah Yahweh er si tepapu eremkamepe. ‘Erda telep kuna deiyo ngebo kuredi, kange deriserure. Tonda, erdi nun tep dipru karerepa, ila di bicau teneseredi, melimserure.
Angeda men gum kupkamre, pio akunkamre,’ tenepra, er sipu eremkamepe. Ne Raja Dauddi pepne.