Psa 119 | XteSC | STEP | Kange deipra telep kupra kuramenge nesala yumada, mali kun keca talepra pio men kununge. Tonda, Allah Yahweh erdi, “Angeda ukunkamrume, angeda pio men kunkamrume,” pedisere upu yumada, pio moupra gekengedi, angepu talepra er amutara kungedi, dombange nesalada pio gampu kunkamenge.

Psalms 119

“Allah Yahwehdi pedina upu, pepra peramseu upu yuma talepra, er amutarapu kuramepyopda, pio gam kunkamepe,” pepu upu

1 Kange deipra telep kupra kuramenge nesala yumada, mali kun keca talepra pio men kununge. Tonda, Allah Yahweh erdi, “Angeda ukunkamrume, angeda pio men kunkamrume,” pedisere upu yumada, pio moupra gekengedi, angepu talepra er amutara kungedi, dombange nesalada pio gampu kunkamenge.
2 Allahdi, “Ukunkamrume,” pedisere upu tepapu talepra kumumdi, angepu melipra dombankamrum nesala yumada, kange deipra telep kupra kurume.
Ange utopu ukupra kurumu nesala yumada sun dipru kange yuma er deikipu deiprumudi, er tepapu piripra er giringkamrume.
3 Allah Yahweh erdi teneretopu angepu talepra dombankameng nesala yumada, kange deipra teleppu kunkamenge.
Tonda sun anesala embandankamengai yumada, mali kun keca tenpunge peda, talepra pio men kunkamenge. Ukupra kunge nesala yumada, kange deipra telep kupra kununge.
4 Teka nun nai Allah, kandi, “Angeda kunkamrume, angeda pio men kunkamrume. Telep kunada ake,” pepra deiamsemum upu yuma karepsemum deiyoda ake. Ada kandi, ‘Aupu yuma gekepmengedi, talepra dombangedi, pio dumsisipu kupbankamenge’ tenen, aupu kareamsemume.
5 Teka ne nai Allah, neda kandi pepra deiamsemumtopu pio moupra kunedi, ne dipru kange yuma kan deikipu deipnedi, kandi, “Angeda kunkamrume, angeda pio men kunkamrume. Telep kunada ake,” pepra deiamsemumtopu, ‘Ne nai bo Allahdi melimnerepa, aupupu moupra talepnedi, angepu melipra dombankamne’ tenen, morokenune.
6 Uo, ne nai Allah, kandi peiamsemum upu yuma moupra talepnedi, telep kun kecapu kupbankamne. Ukupra kunyopda, neda kware dangna cap, ali dangna cap, pio men kunkamne.
7 Kandi, “Angeda ukunkamrume, angeda pio men kunkamrume,” pepra deiamsemum upupu, kael kepnedi, aupu talepra kunedi, telep kupra kunkamne. Ukupra kunkamne taru yumada, ne kange dipru yumadi kan nong deikipu deipnedi, kan tepapu telepe pepra, kan sipu eremkamkene.
8 Tonda kandi, “Ange kunkamrume, angeda pio men kunkamrume. Telep kunada ake,” pepra deiamsemum upupu talepra kunedi kan amutarapu dombankamne.
Aupu talepra dombankamne taru yumada, ‘Ne nai bo Allahdi ne tep pio men tapkamnere’ tenen, morokenune. Ada, kandi ne tep, ‘Angebo telep kupra men kurura cadi, er tep tapkamne, tenepra, men tamkamnerum’ tenen, morokenune ne nai Allah.

Allah Yahwehdi, “Angeda kunkamrume, angeda pio men kunkamrume,” pepra, peiamutopu kuna tep, pepu upu

9 Kaber nesala sun kunkameng taru yuma tep, telep kupra kuna tep, moupra kalekdangopda, yuk mali keca ton sundi talepra pio men kunkamenge.
Ada nun nai bo Allah kandi, “Angeda kunkamrume, angeda pio men kunkamrume,” pepra deiamsemumtopu, sun anesaladi angepu moupra tenengedi, aupu talepra kupbangopda, mali kun keca ton talepra men kunkamenge.
10 Tonda, ne dipru kange yumadi kan deikipu deipkenedi, tumi-tumi yuma kan tepapu piripra enkamkene. Ange utopu kandi melimnemempa, ‘Kandi peiamsemum upu moupra talepnedi, pio dombankamne’ tenen, morokenune.
Ada kandi, “Ange kunkamrume, angeda pio men kunkamrume,” pepra deipsemum upu yumada, ‘Moupra dombankamne’ tenen, pepne.
11 Ne nai Allah kandi peteremserum upu yumada, ne dipru neitamaipu pio moupra deipnedi, angepu tenepra kunune. Ukupra kunyopda, nedi kan damai ton mali kupra men derinkamne.
12 Teka ne nai Allah Yahweh, kanda pio teleppu kuruma cadi, neda kan sipu eremkamkene. Ukukenepa kandi nun tep, “Telep kunada ake,” pepra pedisemem upu yumada, ne tep melipra peteremkamnereme.
13 Ne nai bo Allah kandi, “Ukunkamrume,” pepra deipsemum upu yumada, ‘Yuk nesala ton gekenkameng’ tenen, ila upu deiki di penkamne.
14 Ukupra kunkamne taru yumada, ne kange deipnedi kandi, “Ange kunkamrume, angeda men kunkamrume,” pepra deriserum upupu talepra dombankamne.
Ukupmantoda, nimidi, ‘Ada ila mambul keca’ tenen, sun mawa keca tep moupra taleramengtopu, nedi apepra deipsemum upu yumada, pio talepra kunkamne.
15 Kandi, “Ange kunkamrume, angeda pio men kunkamrume. Telep kunada ake,” pepra pediramsemum upu yumada, ‘Deiyo neitamainge dan do?’ tenen, nedi pio moupra tenepnedi talepra kunkamne.
Ange utopu, kandi, “Angeda ukunkamrume,” pepra deiamsemumnge tep, pio tenimterenkamne. Mali kun keca tenena gum dipapu, kan upupu moupra tenenapu kunkamne.
16 Kandi, ‘Ukupra kunkamenge,’ tenena tep peiasemum upu yumada, ange utopu kune dingeda, ne kange derinkamne. Ukupra kunkamna cadi, kandi “Ange kunkamrume. Telep kunada ake,” pepra pediramsemum upuda, pio men lumdongonkamne.

Allah Yahwehdi, “Telep kupra kunkamrume,” pepra deiamseu upu

17 Neda, ‘Allah er pel don ngebodi teleppu kunkamne,’ tenenuna tep, kandi weika di melimnemempane, ne dipru boun kemdinkamnerume. Ukupnememnyopda, ne kupbankamne taru yumada, kandi pediramum upupu gekepra kupbankamne.
18 Tonda kandi ne asuru telep kupra laipnemempa, telep kupnerya deiki di, kandi, “Ange kunkamrume, angeda pio men kunkamrume,” pepra deiamum upu yuma moupra dinedi telep kupra kael kemkamne.
Ada kan upu neitamai di nimi men kupmanto keca yuma moupra kael kepkamna tep, pepne.
19 Ne tuai mutu neitamai keana kunkamne taruda, nimi bo neng kuramengtopu kunkamna cadi, kan upu deiki di, “Angeda ukupra kunkamrume,” pepra deiamsemum upu yumada, kandi pio men inimdongonkamnerume. Kandi pesemem upu pio putanerura cadi, aupu yumada katuaipu kemdinkamnurume.
20 Tonda kandi, “Angeda kunkamrume, angeda pio men kunkamrume,” pediserum upu yumada, ne pio tenenuna deiki di, ne dipru neitamai yuma wekra dinikneredi, ne dipru neitamai tenenange yumada, yawa ponerure. ‘Ange ukunerura deiki di tumi-tumi yumada tupa utopu kunkamnere,’ tenenune. Tumi-tumi yumada kan upu pio putanerura tep pepne.
21 Kandi pesemem upu men gekepmenge nesaladi, gemenunga deiki mali kunkameng nesala tep, kandi wenepkamrume. Kandi, “Angeda kunkamrume, angeda pio men kunkamrume,” pepra deiamsemum upu yumada, amali kun kecapu talepra kunge nesaladi yanitamnunge.
Kandi pedisemem upu yanipra tapmengedi, mali kupbanunge. Ukupra kunge nesala tep nengeda, sun aneng nong deiki widongonkamrume.
22 Kandi pesemem upu yanitamenge nesala kankan kununa cadi, sundi ne tep, “Erda walwal ngebo kurura cadi, tali kecapu talepra kurure,” pepra ne tep nyek-nyek pepnenunge.
Sun anesaladi, mali kuramenga kan-kan di ne nai bo kandi lyepra derinkamnerume. “Kandi pedirasemum upupu moupra talenuna cadi, kan dipapu lyepra derinkamnerume,” pepra moropkene ne nai Allah.
23 Tonda, amutu neitamai talepra kungedi, ila nimi deiyo neng yumadi bulupra wekmengedi, ne pona tep, upu talenkamnenge. Sundi ukupra upu talenkamneng taru yuma peda, neda kan pel dona ngebo kununa cadi, kandi, “Telep kunada ake,” pepra deiamsemum upupu talepra dombanedi, pio tupa tenepra kunkamne.
24 Atep kandi, “Angeda ukuna gume, angeda ukuna telepe,” peiamsemum upu neitamai yumada, ne kael kemna upupu kurure. Ukupredi ne dipru neitamai yuma telep kupra derinurure.
Nedi, ‘Uo, ware kuptene do?’ tenen, tenimtona kunere taru neitamai yumada, kandi pesemem upu deiki di, ‘E telep kupbankamne bisida ake,’ tenepra kael kemnune.

Allah Yahwehdi peiamu upu moupra gekena tep pepu upu

25 Uda ne dipru pu jenerepa, ‘Depkamne do?’ tenen, ikin weik kunere taruda, tu deikipu manune. Ukupra ikin kunerepa, tu deiki mapman dinino, ne nai bo Allah kandi pepra deiamnemumtopu, gam bukeipnemempa teleppu kunkamne.
26 Nedi kan tep, “Ne nai bo Allah, ne kunkamne kecada ake,” pepra lap peiamkesipa, kandi ne tep tamupra, “Ukupra kunkamrume,” peiamnemume.
Ange utopu, ukutaru peda, kandi, “Ukupra kunkamrume. Telep kunada ake,” pepra lap pedinerum upu yumada, kandi ne tep katuaipu lap pepnememdi, moupra peteremkamnerume.
27 Ukupra aupu lap penkamnerem taruda, kandi nimi tep, “Angeda kunkamrume, angeda pio men kunkamrume. Telep kunada ake,” pepra peiamsemum upupu tenepra kunkamne. Neda, ‘Allahdi peiamseu upu nong neitamainge deiyo dan do?’ tenen, ‘Moupra kael kemkamne,’ tenenuna cadi, ne nai bo kandi moupra melimamnemempa, aupupu pio talepnedi tenepra kunkamne.
28 Tonda ikin keca ne damai yanerepa, kange mun weik kuneredi, ne dipru pu jenere taru yumada, ne nai Allah kandi pedisemem upu melipra peteremnememdi, ne dipru kwa dimkamnerume. Kandi pesemem upu deiki di, melipra peteremnememdi, ne dipru pio puto kepra keipnemempa, nedi teleppu kunkamne.
29 Ange utopu ne dumsisi bisi tapra, mali bisi lerekra embane pangeda, kan dipapu ne dopra yuk karenai kemdinkamnurume. Ukunememnya deiki, kandi pio telep kupra kun kecapu peterepnemempa, kandi, “Ange kunkamrume, angeda pio men kunkamrume,” pepra deiamsemum upupu talepra kunkamne. Ada, kan dipapu bicau tenepnememdi, ‘Telep kun kecapu peteremkamnerum’ tenen, morokenune.
30 Neda pio telep kupra kunedi, dumsisi bisipu wepra dipetepnedi, dombankamne. Allah kandi, “Ange kunkamrume, angeda pio men kunkamrume,” pepra deiamsemum upuda, pio men tamkamne. Aupuda, ne tupa-tupa tenenedi, nukra kunkamne. Tumi-tumi yuma neitamaida, aupu dinedi, moupra dombankamne.
31 Ne nai Allah Yahweh, kandi, “Ukupra kunkamrume. Telep kunada ake,” pepra pedinememtopu, angepu melipra dombankamne. Teka ne nai Allah Yahweh kandi pio men tapkamnerume. Atep nengeda, mali nesaladi ne nong deiki mali upu pepnenga peda, ali dangna cap, kware kuna cap, pio men kunkamne.
32 Ne nai bo Allah, kandi ne tep telep kupra kael kemna deiyo keca karenemempa, kandi pedinemem upu nong neitamaingepu gekepra dombanune.
Ange tep nengeda, kandi ne tep, “Ange kunkamrume,” pedinemem upu, ‘Angepu gekepra dombanedi kange deipra kunkamne’ tenen, kan damai sepdaro banune. Kan upupu moupra talenedi, dombankamne.

“Kael kemna deiyo keca karepnetume,” pepra moropu upu

33 Teka ne nai Allah Yahweh, kandi ne tep kan ila mambul upu, “Ukupra kunkamrume, telep kunada ake,” pepra deiamsemum upupu peteremkamnereme.
Ukupra peteremamnemempane, ataru di dipdongopra kan upupu talepra dombankamne. Dombaramnyane, sirya gawal dangkamne.
34 Kandi, “Ange kunkamrume, angeda men kunkamrume,” pepra derisemem upu yuma peterepnememdi, kael kemna deiyo keca karepnemempa nedi, kan upupu tenepra kunkamne.
Ukupra kunkamne taru yumada, ne kange dipru tenenange yumada, kan deikipu derinkamkene. Kandi pesemem upupu talepra dombankamne.
35 Ne gam kunkamne taru yumada, kandi “Ukunkamrume,” pepra deiamsemum upu yumada, peterepnemempane, aupupu talepra kunedi puto di kunkamne. Ada tali tep gume. Deiyoda, nedi, ‘Kan upupu talepra kunkamne’ tenen, pio putanerure.
36 Allah kandi ne dipru neitamai pel dopnemempa, kandi, “Angeda ukunkamrume. Telep kunada ake,” pepra, deiamsemum upu yumada, angepu putanerepa, kan upu talepra kunkamne.
Ne dipru neitamai kan upupu pio putanerepa, angepu talepra kunkamne taru yumada, yuk tali keca yuma tep, ‘Akeca weika di doproptenepa, isomka kunkamne’ tenen, men putankamnere. Ne kange dipapu tenena keca talepra men kunkamne.
37 Tonda kandi ne tep, pio moupra kalengkamnerume. Kandi ne tapnemempa, ‘Mankau di tali-tali yuk mali kun kecapu dinedi, melipra dombenun’ tenen, moropkene. Ada ne nai bo Allah kan pio gam kumem ngebodi, ‘Ukunkamenge,’ pesemem upupu karenemempa, aupupu talepra kunkamna deiki di, gam pio kunkamne.
38 Ne nai bo Allah, ware nesala do yumadi, kan tep, ‘Uo, nun nai bo Allah erda ila mambule,’ tenen, kwar kunkameng nesala yuma tep, kandi, ‘Sun tep pio melimkamsene,’ pepra pediramsemem upupu talepra kunkamenge.
Neda kan amutara kunedi, kan pelpu talepra kununa cadi, ‘Kandi pedisemem upu yuma tep, teka tenepra pio dombankamne, tenepra kunkamne’ tenen, morokenune. Ada, ne kange neitamai tenimtona kunerepa, ‘Kan upu tep teka tenepra men kupnun’ tenen, ‘Ne nai bo Allah melipneo,’ pepra morokenune.
39 Ne nai bo Allah, kandi, “Ukunkamrume,” pepra pediserum upuda, tek sisi pio teleppu kurure. Atep nengeda, ‘Nedi, mali kun keca talepra kunyopda, ali dakra kupnun’ tenen, ne kwar pio weik kunurura tep, kandi kalekra melimnemempa, ‘Telep kun kecapu talepra kunkamne’ tenen, morokenune.
40 Tek sisi kandi, “Ukupra kunkamrume. Telep kunada ake,” pepra pediserum upu yuma tep nengeda, pio putanerepa, aupu tep nedi pio kange derinune.
Atep nengeda, mali keca tenpunge peda talepra men kumemdi, kanda pio dumsisi ngebo kuruma cadi, kandi ne tep ukupu gam kun keca karenkamnerema deiki di, ‘Gam pio kunkamne’ tenen, morokenune.

“Allah Yahweh, erdi pedisere upu damaipu kunkamrume,” pepu upu

41 Teka ne nai bo Allah Yahweh, kandi ne tep tamna pio gum dipapu, bicau tenepra melimnerume. Tonda kandi ne tep, “Ukupra lyepra derinkamkene,” pepra, ‘Pedinememtopu kupra lyepkamnerum’ tenen, moropkene naio.
42 Kandi melipra lyepnemem pangeda, nedi aupu dopra ne tep, ‘Nun songe,’ tenenengedi, nyek-nyek penenung nesala sun damai lap perbankamne. Aupuda tali tep men pepne.
Deiyoda, ne nai bo Allah kandi peserem upu tep nengeda, ‘Aupu yumada pio tek sisi upu cadi, angepu talepra kunkamne’ tenen, kunune. Kandi perum upu yuma teka tenenuna cadi, ne tep nyek-nyek penenung nesala tep lap perbankamne.
43 Tonda kandi, “Ukunkamrume, angeda pio men kunkamrume,” pepra pediramsemumtopu, ‘Aupu talepra kunedi kan amutarapu telep kupra kupbanyopda, aupu di telep kudinkamner’ tenen, teka tenenune.
Atep nengeda, kandi ne sipyal pumbon di kan telep peserum upu dorona gume naio. Allahdi penerur upuda, pio tek sisi upu tenenuna tep, ‘Atek sisi upu dopropnememdi, ne men tapkamnerum’ tenen, moropkene naio.
44 Neda kandi, “Angeda kunkamrume, angeda pio men kunkamrume,” pepra deiamsemum upu, ‘Tamna gum dipapu talepra pio kupbankamne,’ tenenune.
45 Gam kunkamne taru yumada, kandi pediramsemum upu yuma tepapu, pio pe deipra doproptenedi, ‘Deiyo ake’ tenen, ergiringnune. Ukupra kununa cadi, ne tenimtona gum di talipu lupra gampu kunkamne. Ware mali kun keca di do, tenpunge peda, ne dipru ateng koupra men kunkamner dinin, teleppu kudinerumpa, teleppu kunkamne.
46 Tonda kandi, “Ukunkamrume, angeda men kunkamrume. Telep kunada ake,” pepra deiamsemum upu dopra, nedi nimi deiyo talepra kunung neng gekenai yuma lap perbankamne. Aupu doupra ila nimi deiyo neng Raja neng gekena tep, lap perbankamne taruda, ali ton pio men dangkamne.
47 Kandi, “Ukunkamrume, angeda pio men kunkamrume,” pepra deiamsemum upu gekepra kuna tep, ne kange derinkamne. Ange tep nengeda, kan upu dopra yuk nesala kori lap perbankamne taruda, ali men dangkamne.
48 Nedi kandi, “Ukunkamrume, angeda pio men kunkamrume. Telep kunada ake,” pepra deiamsemum upu tep kange derinedi, aupu cap, kan cap tep, pio telepe pepra gispal dokenune.
Tonda, kandi nun tep peiamsemum upu tep, ‘Deiyo neitamai ngeda dan do?’ tenen, aupu yumada nuknedi moupra tenenkamne.

Allahdi, “Ukunkamrume, telep kunada ake,” pepra deiamseu upu, yanipmengedi, “Ikin keca nun nong deiki derisenung dinin, Allahdi lyepropkamsere,” pepu upu

49 Kandi ne kan amutara kunedi, kan pelpu donun ngebo tep, “Ukunkamkene,” pepra pedina upu peiamnemumnge moupra tenenkamnerume. Nedi aupu dopropnedi, ‘Tek sisi ne nai bo Allahdi melipra lyepkamaner taruda, dan taru do?’ tenen, kange bongtona gum di, kange deipnedi ketenepra dinapu kunune.
50 Ne kange mun keca kunerur taru, ikin kunerya peda kange deipra pingpinga di kununa deiyoda ake. Kandi, “Ne upu gekepmemnyopda, nedi telep kupra melimkamkene,” pepra pediramnemuma cadi, kandi aupu peiamnemumnya deiki di, ne dipru kwa dimnerume.
51 Nimi ton mali kupra gemenapu kungedi ne tep, “Erda mambul gum, tali ngebopu kurure,” pepra nyek-nyek penengedi, pio mali tenenenunge. Utenenung dinino kandi, “Ukunkamrume, angeda men kunkamrume,” pepra deiamsemum upuda talepra kunkamne. Aupuda, tapra tali kange doupra men kunkamne.
52 Ne nai bo Allah Yahweh, kandi nun tep, “Ukunkamrume, angeda men kunkamrume,” pepra pediramsemum upu yumada, nedi pio moupra tenenkamne. Ada ne gam kune taru yumada, ne kange dipru neitamai, aupu moupra tenenuna cadi, ne dipru kwa dimnerure.
53 Tonda nedi sun mali kun kecapu talepra kunge nesala tep, ila di deremnune. Sun anesala tep dabal weik kunerur deiyoda, kandi, “Ukunkamrume, angeda men kunkamrume,” pepra deiamsemum upu yuma, amali kunge nesaladi aupu tapra banunga tepa.
54 Ne tuai mutu neitamai kunkamne taru yumada, ke tarupu kunun dinin, go yambulanun karepnemempa, kandi, “Ukunkamrume, telep kunada ake,” pepra peiamseumum upu yuma tenepnedi, aupu deiki di kange lon mut penedi, kange deipra kunkamne.
55 Teka ne nai Allah Yahweh ne lukunda mankamne taru yumada, kan tepapu pio tenenkamkene. Atep, ne kunkamne taru yuma, kandi, “Ukunkamrume, angeda men kunkamrume,” pepra peiamsemum upu moupra talepnedi, aupu peserurtopu kunkamne.
56 Pumun taru di dipra, ukutaru peda, kandi, “Ukunkamrume, angeda pio men kunkamrume. Telep kunada ake,” peiamum upu yuma, aupupu talepra kunune.

Allah Yahwehdi, “Ukupra kunkamrume. Telep kunada ake,” pepra, deiamu upu gekepra kuna tep, pepu upu

57 Teka ne nai Allah Yahweh, ne gam kunkamne taru yumada, kan tepapu tenepnedi pio talepra kunkamkene. Kandi, “Ukunkamrume,” pepra deiamsemum upu yuma tep pio tenepnedi aupupu talepra kunkamne, pepkene.
58 Ne kange dipru yuma kan deikipu deipnedi moropkene. Ada, ‘Kandi ne tep bicau tenepnememdi, pio teleppu kudinkamnerume’ tenen, moropkene.
Abicau tenenkamnerema deiyoda, kandi, “Ukupra melimkamkene,” pepra pedina upu deiki di peipnemumtopu, ‘Angepu kunkamnerum’ tenen, moropkene naio.
59 Ne gam kunedi embandankamne taru yumada, nedi pel dopra kunkamne keca yumada, pio moupra teneramsa deiki di, ukunkamne. Ada, ne gam kunkamne taru yumada, kandi, “Ukunkamrume.
Telep kunada ake,” pepra deiamsemum upu moupra talepnedi, nedi kunkamnenge tep, moupra tenenedi, teleppu kunkamne.
60 Nedi ukutaru dipapu aupu yuma doupra embankamne. ‘Ukutaru gum dinin, amenda yuk taru telep kunkamne,’ men tenenkamne. Atep kandi, “Ukunkamrume, angeda pio men kunkamrume,” pepra deiamsemum upu doupra embankamne. Aupu tapra tali kange doupmanyane, men kunkamne. Aupuda pio tep talepra kunkamne.
61 Tonda, mali kun kecapu talepra kunge nengdi, ne tep, ‘Angebo nun songe. Er youpkamre’ tenen, ateng koupra deipnetenga peda, kandi, “Ukunkamrume, angeda pio men kunkamrume,” pepra deiamsemum upu yuma, ne pio men lumdongonkamne. Angepu pio talepra embankamne.
62 Ange utopu ne mapmanyane, lukunda neitamai bukrone taru cap, tamudongone taru yumada, ne nai bo Allah kandi, “Ukunkamrume, angeda pio men kunkamrume,” pepra deiamsemum upu, dumsisi kuna tep karepsemum upu yuma tep tenepnedi, kan tepapu “Telepe,” pepra kan sipu eremnune.
63 Neda kandi peiamsemum upu yuma tep, kware tenepmengedi, kan upupu moupra talengedi, dombanung nesala yuma tep, nedi, ‘Sunda ne kayapu nesala sisa kununge,’ tenepra kunune. Kandi peiamsemum upupu gekepra dombanung nesala tep, ne kange derinune.
64 Teka ne nai Allah Yahweh, kandi nun tuai mutu ban-ban yuma neitamai kunup nesala tep, pio bicau tenesememdi, melimserume. Bicau tenesemem keca yumada, tuai mutu neitamai pio weik kurure.
Uo ne nai Allah, kandi, “Ukunkamrume, angeda pio men kunkamrume. Telep kunada ake,” pepra deiamsemum upu yumada, kandi ne tep moupra peteremkamnerume.

Ikin keca nun nong deiki kuserya deiki di, nun dipru wisipserepa, adeiki di Allahdi pesere upu, moupra kael kemnupa tep, pepu upu

65 Uo, ne nai Allah Yahweh, ‘Kandi ne kan amutara pel don ngebo tep pio telep kupra derinkamnerum’ tenen, moropkene. Kandi, “Ukupkamsene,” pepra peiamsemum upu peseretopu, ‘Kandi ne tep melipra telep kupra derinkamnerum’ tenen, moropkene.
66 Atep kandi ila kael kemna deiyo keca karenemempa, kael kepra kunkamna deiki di, nimi upu telep kupra bokra derinkamne. Tonda ne peda dumsisipu kupbankamne. Angeda tali tep men pepne. Deiyoda, neda, kandi, “Ukunkamrume, angeda pio men kunkamrume,” pepra deiamsemum mem upu yumada, pio teka tenepnedi, aupu talepra dombanune.
67 Tonda, menmena taruda, tali kange doupra mali kun keca talepra, mali kupbaramsi dinino, amenda taruda kandi ne mali kuramsinge tep wenepnemumpa ikin kuramsi. Dinino, ukutaruda kandi peiamsemum upu yumada men tamkamne. Pio tep talepra kunkamne.
68 Ne nai Allah, ne konum kael keamsi. Kanda pio telep kun kecapu talepra kurum ngebo cadi, kandi kurum keca yuma peda dumsisipu kurume. Atep, kandi, “Ukunkamrume, angeda pio men kunkamrume. Telep kunada ake,” pepra deiamsemum upu yumada, peteremkamnerume.
69 Uda, sun dipru erepra gemenung nengdi, ne tep mali upu pepra derinengedi, luludina upu weik penenunge. Mok upu penenung dinino, kandi, “Ukunkamrume, angeda pio men kunkamrume. Telep kunada ake,” pepra deiamsemum upu yumada, ne kange dipru neitamai yumadi aupu tenepnedi, talepra kunkamne.
70 Amali mok upu penenung nesala yumada, telep kun keca moupra men kael kemengedi, sun kange dipru neitamai, ‘Telepnge ake, malinge ake,’ men tenipmanto nesala kununge. Dinino kandi, “Ukunkamrume, angeda pio men kunkamrume,” pepra deiamsemum mem upu yuma tep nengeda, kange deipnedi, ne dipru neitamai deipra kunkamne.
71 Tek sisi mali weik kuramsa tep, kandi ne tep wenepnemumdi, ikin keca weik ne nong deiki deriramnemum dinino, ukupnemuma deiki di, kandi, “Ukunkamrume, angeda pio men kunkamrume. Telep kunada ake,” pepra deiamsemum upu yumada, moupra kael keamsi. Atep ikin keca karepnemum ngeda, telep kudiramneu.
72 Ne nai Allah, kandi, “Ukunkamrume, angeda pio men kunkamrume. Telep kunada ake,” pepra deiamsemum upu, ne tep bokra karenerum ngeda, tuai mutu neitamai talepra kunge urasin telep keca, er sida emas cap, perak cap, kunumna weik kuramre.
Dinino, ne kangeda, akunumna weik kecada, yambul mambul pua. Kandi penerum upu yuma tep nengeda, ‘Aupuda ila mambule,’ tenenune. ‘Aupuda, ila kunumna weik keca utopu kurure,’ tenepnedi, aupu tep kange derinune.

“Allah Yahwehdi peteremsere upuda, pio teleppu kurure,” pepu upu

73 Allah kan dipapu ketekepra deiamnemumdi, kan buru dipu ne tep telep kupra deiamnemume. ‘Ukutaruda, ila kael kemna deiyo keca karenememnya deiki di, kandi, “Ukunkamrume, angeda men kunkamrume,” pepra deiamsemum upu yuma moupra kael kemkamne’ tenen, morokenune.
74 Allah kandi, “Ange kunkamrume, telep kunada ake,” pepra deiamsemum upu yumada men tapkamne. ‘Aupuda, ne tupa-tupa tenenedi, aupu deiki di telep kupra kundinkamnere’ tenen, moupra dombankamne.
Kan pesemem upu tep kange derinuna cadi, kan tep kware kuprepa, ‘Nun nai Allah ila mambul kurure’ tenen, kunge nesaladi ne tep epnengopda, kange derinkamenge.
75 Teka ne nai Allah Yahweh kandi, “Ange kunkamrume, angeda men kunkamrume,” pepra deiamsemum mem upu yumada, pio dumsisi upupu kurure. Angeda, konum kael keamsi.
Tonda, kandi ne tep, ‘Ne mi kurura cadi, mali kuramu dinin, pio men tapkamna cadi, telep kupra kunkamre,’ teneramnemumdi, bicau teneruma deiki di, ne wenemna tep ikin keca ne nong deiki deriramnemume. Ange peda ne kael kemnune.
76 Atep kandi ne tep bicau tenepra kange deipnememdi, pio tamna gum di, telep kupra kudinkamnerum ngeda, ikin kunere taru neitamai peda, ‘Ne dipru kwa dinkamnere’ tenen, moropkene.
Ada, ne kan amutara kunedi, kan pel don ngebo tep, ‘Kandi, “Ukupra telep kudinkamkene,” pepra pediramnemumtopu kupra kunkamnerum’ tenen, moropkene.
77 Ne nai Allah, ne gam kunkamne taru yumada, ne kange deipnedi kandi, “Ange kunkamrume, angeda men kunkamrume,” pepra deriserum mem upupu talepnedi, ne dipru kange yuma teleppu kuneredi, kange deipra aupu dombanune.
Atep nengeda, kandi ne tep bicau tenepra kunemempa, ne tupa pio telep kupra gam kunkamne.
78 Deiyo men kwapmar dipapu, ne tep, ‘Angeboda nun songe,’ tenengedi sun dipru erepra gemepra kunge nengdi, ne tep mali kudiramneidi, ikin keca ne nong deiki deriramnei.
Atep nengeda, ‘Kandi sun tep wenepmempa, ali dangkameng’ tenen, moropkene. Kandi sun aneng tep, wenepmempa ali dangkameng dinino, nepuda kandi, “Ange kunkamrume. Telep kunada ake,” pepra deriserum upu yumada, ‘Deiyo neitamainge dan do?’ tenen, nedi pio moupra tenepnedi talenapu kunkamne.
79 Tonda, sundi kan Allah tep, ‘Uo, nun nai Allahda ila mambul ngebo kurure,’ tenengedi, kan tep kwar kupmare nesala yumada, ka di tamupra ne damai yangedi, ‘Nun kabo akurure, tenenkamneng’ tenen, moropkene.
Ada, anesaladi, kandi pesemem upu yuma tep, gekepmengedi, ‘Aupuda er deiyo ake’ tenen, betapra kael kemnung nesalada, ‘Ne damai tamupra yakankamenga’ tenen, pepne.
80 Ne kange dipru yuma, kan deikipu deipnedi, kandi, “Ange kunkamrume. Telep kunada ake,” pepra derisemem upu yumada, ‘Moupra gekepnedi dumsisipu kunkamne’ tenen, moropkene.
Tonda, mali kun keca pio men kupnyopda, yuk nesala epnengedi, “Er mali kupu ngeda ake,” pepra, ‘Mali upu ne deiki men pepmanto kunkamenge’ tenen, moropkene. ‘Ukupra melipnetumpa, teleppu kutenyopda, nedi kware kunerepa, ali pio men dangkamne’ tenen, moropkene ne nai Allah.

“Ne ikin kunere taru, Allah er damai benyopda, erdi melipra lyepkamnere,” pepu upu

81 Uo, ‘Ne nai Allahdi ne damai yatudi, ne tep lyepropkamner taruda, dan taru di yana lyemdonkamner do?’ tenen, ne kange dipru neitamai pio putanerepa, ne puto bounpu konum kupmanere.
Dinino, kandi, “Ukunkamrume, telep kun kecada ake,” pepra pediramsemumtopu, ‘Aupu talepra kunedi kan amutarapu telep kupra kupbanyopda, aupu di telep kudinkamner’ tenen, teka tenenune.
82 Kandi, “Ukupkamkene,” pepra deipnemum upu tep, pio tupa-tupa tenenedi, ‘Uo, ne nai Allah pediramneu ngeda, dan taru di yana melipkamner do?’ tenen, kange deipra ne asuru di pio dinuna tep, ne asuru konum mali kupbanerure.
Tonda nedi kan tep pepkene, “Uo, kandi ne tep, dan taru yana melipra lyepnememdi, ne dipru kwa dinkamnerum do?” pepra morokenune.
83 Ukupmantoda, alen deiptapmengepa, dakuramreyanen, konum lyuprepa, nimi epmengedi, “Akalenda dakwapye, pio mali kupupa konum lyupka cadi, tapmepe,” peramengtopu, ne peda utopu kunune. Ada, ikin weik kuramneupa, ne nong bol yumada kopsakamnerpa, men kupmanto kunune.
Ukupra kunmaner dinino, kandi, “Ukupra kunkamrume. Telep kunada ake,” pepra deiamsemum upuda pio men lupronkamne. Ne dipru neitamai tupa akunkamnere.
84 Ne kan amutara kunedi, kan pel don ngebo kunun dinin, ‘Ne nai Allahdi dan taru di yana lyepkamner do?’ tenen, dinapu kunune. Ware kuprap taru ton cap dinapu kunkamne do?
Ada, sundi, ‘Angebo nun song’ tenen, ne nong deiki ikin keca weik derinenung nesala tep, ‘Allah dan taru di yana sun tep wenepredi, sun nong deiki ikin keca derinkamre do?’ tenen, dinapu kunune.
85 Ukupmantoda, nimidi, ‘Bura tara gam kure keca tu pumbon sakrepa, popkamepe’ tenen, tu palipra karu bon kepra deriramengtopu, mali nesaladi, ne tep, ikin keca weik ne nong deiki derinunge. Ada, sun dipru erepdangedi, gemepra embanung nengdi, ne nong deiki ikin keca weik derinenunge.
Ukupra kununga deiki di, Allah kandi, “Angeda ukunkamrume, angeda pio men kunkamrume,” pepra peiamsemum mem upu tep, yanitamnapu kununge.
86 Deiyo men kwapmarepapu, mali nengdi, ne nong deiki ikin keca weik derinunge. Atep nengeda, kan dipapu ne tep moupra melimkamnerume. Tonda, kandi, “Ukupra kunkamrume, angeda pio men kunkamrume. Telep kunada ake,” pepra deiamsemum upu yumada, tek sisi dumsisi upu kurura cadi, aupu yuma teka tenenupe. Aupu peseretopu kurure.
87 Sun mali nengdi ne tep, ‘Angebo popra gum kuiptepi,’ tenenmaneng dinino, kandi, “Ukupra kunkamrume. Telep kunada ake,” pepra deiamsemum upu yumada, moupra talenapu kunune. Pio men tamkamne.
88 Kandi ne tep, bicau tenenememdi, melimnerumnya deiki di, lyepra deipnememdi, telep kudinkamnerume. Lyepnememnyopda, kandi, “Ukupra kunkamrume, angeda pio men kunkamrume. Telep kunada ake,” pepra deiamsemum upu yumada, gekepnedi, aupu amutarapu moupra kunkamne.

Allah Yahwehdi, “Ukunkamrume,” peiamseu upuda, gum men kupmanto upu cadi, “Pio akunkamre,” pepu upu

89 Teka ne nai Allah Yahweh, kandi peiamsemum upu yumada, men gum kupmanto upu tep, pio akunkamre. Im deiki cap, im neitamai kure keca cap pio akunkamretopu, kandi peiamsemum upu peda, pio akunkamre. Kan upuda, men gum kupmanto kurure.
90 Kan pio telep kupra kumemnya deiki di, kandi pesememtopu, tamna gum di, tek sisi tupa-tupa kuserume. Nimidi nyape deipmengepa, dadeipdanen kupbankameng nesala peda, kandi anesala tep, bicau teneserumdi, telep kupra melimkamrume. Pio men tamkamserume.
Tonda, kandi tuai mutu yuma ketekepra deipmumpa, moupra taleruma deiki di, ukutaru peda tupa dimpepra kurure.
91 Kandi, “Angeda kunkamrume, angeda men kukamrume. Telep kunada ake,” pepra deiamsemum upu, ukutaru peda utopu pio tek upupu kurure. Deiyoda, ware keca do yuma, Allah kandi, ‘Ukunkamne,’ teneamumtopu, akure keca yuma kandi tenerumtopu angepu kurure. Ange tep ngeda kandi pesemem upu yumada pio tek sisi upupu kurure.
92 Tonda ne kange mun kange doupra kuramsi taru neitamai di, ikin di depmatene dinin, kan upu meliamneua tep men depsi. Deiyoda, gam kune taru yumada, ne kange deipnedi kandi, “Ange kunkamrume, angeda men kunkamrume. Telep kunada ake,” pepra, deriserum upu yuma talenedi, ne dipru kange yuma teleppu kudinerepa, kange deipra aupu dombanune.
93 Kandi, “Ange kunkamrume, angeda men kunkamrume. Telep kunada ake,” pepra deriserum upu yuma deiki di, melipra gam kemdinerumpa, ne tupa gam kunune. Ange tep nengeda, kandi pepra deiamsemum upu pio men lumdongonkame.
94 Kandi pepra deiamsemum upu yuma tep, ‘Deiyo dan do?’ tenen, piripra kael keamsa tep, ne nai Allah kandi ne tep lyepropkamnerume. Neda kan mi kunune.
95 Sun mali kunge nengdi ne tep, ‘Angeboda nun song cadi, popmetepe’ tenen, ketenepra dininunge. Dinino, nepuda Allah kandi, “Ukupra kunkamrume,” pepra derisemem upu tepapu, ‘Deiyo ake’ tenen, moupra kael kepbankamne.
96 Tonda, nedi dinepa akeca-keca yuma, pio telep kupra dumsisipu kure keca yuma peda, ton pio men dekperure. Yambulpu kurure, tonda amenda taru gum kupkamre.
Dinino, kandi pepra deriserum upupuda pio dekperedi, pio akunkamre. Apu pio telep kuryada, men nukmanto kuredi, men dimpepmanto kurure.

“Allahdi, ‘Ukunkamrume, angeda men kunkamrume,’ peiamseu upupu, kange deipra gekenune,” pepu upu

97 Tek sisi neda, Allah kandi, “Ukunkamrume, angeda men kunkamrume. Telep kunada ake,” peiamsemum upu tepapu, kange deipra kunune. Tumi-tumi yuma neitamai, aupu moupra tenepnedi kunune.
98 Neda Allah kandi peiamsemum upu moupra tenepnedi, tamna gum di pio talepra kununa cadi, adeiki di ila kael kemna deiyo keca weika di kunerure. Ne podan neng sundi aupu moupra tenena gum deiki mali kununge.
Sunda yambula di kael kemnung dinino, nedi kan upu kael kemnuna deiki di, ila kael kemna deiyo keca kunerure. Atep, pio moupra tenepnedi kunkamne.
99 Tek sisi neda, Allah kandi, “Ukunkamrume, angeda men kunkamrume. Telep kunada ake,” peiamsemum upu tepapu, kange deipra kunedi, tumi-tumi yuma neitamai, aupu moupra tenepnedi talenune.
Atep nengeda, ne betapra tenenun ngeda, weika di tenenun dinin, ne peteremna deiyo nengda, ‘Deiyo ake’ tenen, sun yambula dipu kael kemnunge. Sun tenerami utopu men tenenune. Neda pio weika di tenepra kael kemnune.
100 Ne mutu wisi nengdi, akeca-keca yuma tep, yambula di kael kemnunge. Neda, sun kurami utopu men kunune. Neda moupra dipetepnedi, deiyo neitamainge peda weika di kael kemnune.
Deiyoda ake. Ada, Allah kandi, “Ukunkamrume, angeda men kunkamrume. Telep kunada ake,” peiamsemum upu yuma gekepra talenedi dombanuna tep pepne.
101 Neda mali kun keca yala-yala yuma, ‘Mankau kange doupra mali kupnun’ tenen, amali kun keca damai di, kwarapra gopropnedi, kan peipmum upupu dukdongopra kunune. Ada, ‘Allah kandi peiamsemum upu moupra gekenkamne’ tenen, kunune.
102 Allah kandi, “Ukunkamrume, angeda men kunkamrume. Telep kunada ake,” peiamsemum upu yumada, kan dipu peteremamnemume. Atep nengeda, kan upu tenpunge pe ton men tamnune. Angepu moupra epnedi dumsisipu kunune. Ada tali tep gume. Allah kan dipapu peteremneruma tepa.
103 Allah kandi peiamsemum upu tep ngeda kange derinune. Ukupmantoda, nimidi mong me jepmengepa sipyal dam min-min telep peramre ngeda, yambul telep kurur dinin, kandi peiamsemum upuda, pio ila telep upu peipsemuma cadi, aupu tep ila di kange derinune. Mong me jepnepa yambul tau peramner dinin, kan upu gekepne taruda, ila di kange derinune.
104 Allah kandi, “Ukunkamrume, angeda men kunkamrume. Telep kunada ake,” peiamsemum upu yumada, moupra gekenuna deiki di betapra tenepnedi moupra keal kemnune.
Atep, kan upu peseretopu gum dinin, yuk lerekra mali bisipu embaramenge ngeda, ne songe. Yuk nesaladi, “Nun teleppu kunmapa,” peptapra, malinge kunung keca yuma tep nengeda, ne yu tenenune.

“Allahdi peiamseu upuda, pio telep kurya deiki di, nimi dipru neitamai dirin kemdiserure,” pepu upu

105 Allah kandi peserem upuda ne dipru neitamai dirin kemdinerura cadi, upna utopu kunerure. Atep, ne bisi embankunyaida kan dirine di diripnerepa embanune.
106 Nedi kan damai, “Angeda pio tek sisi kunkamne,” pepra pedina upu pepsi ngeda men tapkamne. Angepu kunkamne. Ada kandi peiamsemum upu yumada, pio tek sisi dumsisi upu cadi, angepu moupra gekepnedi, talepra benkamne.
107 Ne nai Allah Yahweh, neda pio ila kange mun deikipu kunun ngebo. Atep nengeda, Allah kandi melipra kalengkamnerume. Ada, ‘Pumun taru kandi ne tep, “Ukupra melipra kalengkenepa, gam kunkamrume,” pepra pediramnemumtopu kunkamnerum’ tenen, moropkene.
108 Ne nai Allah Yahweh, nedi kan tep, “Kanda pio telep kurume,” pepra pekenun upuda, gekenkamnerume. Tonda, Allah kandi, “Ange kunkamrume, angeda pio men kunkamrume. Telep kunada ake,” pepra deiamsemum upu yumada, ‘Pio moupra peterepnerume’ tenen, moropkene.
109 Tupa-tupa, yu neng cap, ikin keca cap di, ne nonge popmanto kunerure. Popmanto kunun dinino, Allah kandi, “Ange kunkamrume, angeda pio men kunkamrume. Telep kunada ake,” pepra deiamsemum upu yumada, nedi pio men lumdonongkamne.
110 Mali kuna nengdi ne tep, ‘Angebo nun song’ tenen, ne damai, ‘Pena peipmengepa youramre utopu kupkamre’ tenen, kalengnenunge dinino, Allah kandi peiamsemum upu yuma ton men tamnune. Angepu talepra kupbankamne.
111 Allah kandi, “Ange kunkamrume, angeda pio men kunkamrume,” pepra deiamsemum upuda, pio moupra talenkamne. Ada, pumun taru di kan upu karepnumumpa, angepu talepra kunedi aupuda pio tep akapkamre. Tonda kandi peserem upuda, ila mambul upu kurura cadi, adeiki neda pio kange tenepnedi, pingpinga kunerepa, teleppu kunkamne.
112 Ne kange dipru neitamai tupa pio tenenunada, ‘Kandi peiamsemum upupu moupra talepnedi, dukdongopra kunkamne,’ tenenune. Ukuramnyanen depnyapu tapkamne. Raja Dauddi pepu.
113 Sun kange dipru tenedangedi, kunge nesalada, ‘Allahdi peserur upuda, talepra kunkamne do, gum do?’ tenepra, pio tenimtonapu kunge nesalada, ne songe. Dinino, Allahdi, “Angeda kunkamrume, angeda pio men kunkamrume,” pepra deiamseu upu tep nengeda, nedi pio telep kange deipra kunune.
114 Neda, kandi peiamsemum upu, teka tenenedi, ange yuma moupra talenedi, pio talepra dombanune. ‘Aupu dipapu melipra kalengkamnere’ tenen, tupa tenenapu kunune.
Ange tep nengeda, kan Allah dipapu, ne tep, pio telep kupra melipra kalengnerume. ‘Ikin keca ne damai yana kupnerur’ tenen, kwareda pio kunenun taru yumada, dan damaipu yana inimnune.
Ange tep nengeda, kan Allah dipapu, ne tep, pio telep kupra melipra kalengnerume. ‘Ikin keca ne damai yana kupnerur’ tenen, kware kunerur taru yumada, kan damaipu yana inimnune.
Ukupmantoda, jen talena nengda, ‘Yuk nengdi mar dopmengepa, ne nong popnengepa depnun’ tenen, sun nong lelimna tep keca, er sida perisai dopra lelipmengedi baramengtopu, kanda ne kalengna deiyo ngebo kunerume. Tonda, ‘Kange mun keca ne damai yana mali kweipnerur’ tenen, telepai bena inimbaramengtopu, ne kware kunere taru yumada, kan damaipu bena inipra kunune.
115 Uo, sun mali kun kecapu talepra kurum nesala yumada, ne damai pio men yakankamrume. Deiyoda, ‘Neda, Allahdi, “Angeda kunkamrume, angeda pio men kunkamrume,” pepra deipsisi upu, ‘Pio moupra gekepnedi, angepu talepra kunkamne,’ tenenuna cadi, sun mali kurum nengda, ne damai pio men yakankamrume.
116 Ne nai Allah, ‘Ne telep kupra tupa gam kunkamne’ tenen, putapnera cadi, kandi, “Angeda kunkamrume, angeda pio men kunkamrume,” pepra, ‘Pedina upu deiki deiamsemum upu deiki di, ne tep pio melipra kalengkamnerum’ tenen, moropkene.
Tonda, nepuda, ‘Ne nai bo Allah, er dipapu lyepropkamnere,’ tenenedi, ne kange dipru yumada, kan deikipu derinuna cadi, kandi kalengkamnerume. Ukupnememnyopda, amenda taruda, ikin keca ne damai yatua peda, neda ali men dangkamne.
117 Ne nai Allah, ‘Kange mun keca ne damai yana mali kupnerur’ tenen, kan dipapu erepnememdi telepaipu deipkamnerume. Ukupra konum deipnememnyopda, neda teleppu kunkamne. Tonda, kandi peserum upu yumada, moupra gekepnedi, angepu pio talenkamne.
118 Ton nengda, kandi, “Angeda kunkamrume, angeda pio men kunkamrume,” pepra deiamsemum upuda, yanitamnapu kununge. Kan upu yanitamengedi, sun pe kange dipapu, ‘Inipmepedi, mali kun kecapu talepra kunkamepe. Ukupmepe nge yumada, yuk nengdi epra men kael kemkamsenge,’ tenenunge.
Utenepra kunung dinin, kanda Allahdi, sun anesala yuma tep, ‘Anengda ne dabale’ tenen, tamrume. Atep, sundi, ‘Angeda, ukunkamepe-ukunkamepe,’ tenenung keca yumada, nong pio men kupkamre.
119 Sun mali kun kecapu talepra kunge nesala cap, anengdi mali kunge keca yuma cap tep nengeda, Allah kandi, ‘Ange yumada ne dabale. Atep, aneng cap, sundi kunge keca cap yumada, nimidi tali bambama keca dopra, bura dokoterameng keca utopu kurure,’ tenerume.
Ange tep nengeda, kandi, “Angeda kunkamrume, angeda pio men kunkamrume,’ peserum upu yumada, ne pio telep kange derinune.
120 Tonda, kandi nimi tuai nesala yuma tep, moupra dipetepsememdi, nimi upu bokeipsememdi, wenepra menenga keca karepkamserema cadi, nedi kan tep, pio kware weik kunerepa, ne nong yumada, berber pepra moropsemnapu kunerure.

‘Ne pona tep nengdi poptapnenung’ tenen, “Lyepkamnerume,” pepra Allah tep moropu upu

121 Uo ne nai Allah, neda mali kuna gum dipapu, konum telep kupra kunedi, tek sisi dumsisi kun kecapu talepra kuramsa cadi, kandi dopra, ‘Ne nong deiki ikin keca derinenung neng sun buru deiki pio men deipkamnerum’ tenen, moropkene.
122 Neda, kan amutara kunedi, kan pelpu melipra donuna cadi, ‘Kandi melipnememdi, teleppu kudinkamnerum’ tenen, moropkene. Allah kandi ne tapnemempa, ne tep, ‘Erda nun songe,’ tenepra ne nong deiki ikin keca weik derinenung neng, ‘Sun dipru erepra gemepra embanung neng, sun damai pio men tamkamnerum’ tenen, moropkene.
123 Tonda kandi, ‘Ne tep melipra lyepkamner’ tenen, ketenepra dikenepane, kapul men yanmaruma cadi, ne asuru pu jepbanurure. Ada, kan pedina upu deiki di, “Lyepkenedi, telep kupra deipkamkene,” peiamnemumnge tep, ‘Uo, ware taru kupkamner do?’ tenen, ketenepra dinapu kunune.
124 Ne nai bo Allah, kandi, “Ukunkamrume, angeda men kunkamrume. Telep kunada ake,” pepra pediramsemum upu dopra ne tep peteremkanerume. Tonda, ne kan amutara kunedi, kan pelpu dona ngebo kununa cadi, ‘Kan ila di bicau tenenememnya deiki di, telep kupra melimkamnerum’ tenen, moropkene.
125 Neda kan amutara kunedi, kan pelpu dona ngebo kununa cadi, kandi, “Ukunkamrume, angeda men kunkamrume. Telep kunada ake,” pepra pediramsemum upu yumada, kael kemkamne. Kandi pedisemem upu nong pe, deiyo neitamainge peda, ‘Pio tek sisi betapra kael keptene’ tenen, putanerura tep, ‘Moupra kael kemna deiyo keca karenkamnerume’ tenen, moropkene naio.
126 Ne nai Allah Yahweh kandi, ‘Mali kunge nesala yuma bulupra deipnedi, wenepkamne,’ tenepmum tumi konum damai kupmare. Ada tali tep gume. Deiyoda, kandi, “Ukunkamrume, angeda men kunkamrume,” pepra peiamsemum mem upu yumada, pio mali kunge nesaladi aupu tali lupra yanitamnapu kununga cadi, ‘Ukutaru anesala tep wenepkamrum’ tenen, pepkene naio.
127 Kandi, “Ukupra kunkamrume, angeda pio men kunkamrume,” pepra deiamsemum upu tep, ila di kange deipra kunune. Urasin telep gat keca er sida emas, pio telep kunumna weik keca kurepa, akeca meteka di putanerur dinin, kandi peiamsemum upuda, pio telep kurura tep, aupuda ila di putanerure.
128 Ange tep ngeda ne gam kunkamne taru yumada, kandi, “Ukupra kunkamrume, angeda, pio men kunkamrume. Telep kunada ake,” pepra pedisememtopu ne peda, ‘Aupuda pio tek sisi telep upu,’ tenenedi, angepu talepra kunkamne.
Tonda mali kun keca yala-yala yuma cap, mali kunge nesaladi mali kununga cap tep, ‘Ne dabale,’ tenepra kunkamne.

Allah Yahwehdi, “Ange kunkamrume, angeda pio men kunkamrume,” pepra deiamu upu putapserepa, “Moupra tenepmepedi kunkamepe,” pepu upu

129 Allah kandi, “Angeda kunkamrume, angeda men kunkamrume. Ange yuma talepra kunkamrume,” pepra deiamsemum upuda, pio teleppu kurure. Aupuda tek sisinge tepapu pepra deiamsemume. Tali upu men pepra deiamsemume. Atep neda, Allah kandi pepra deiamsemum upupu dukdongopra talepnedi, moupra ne dipru neitamai deipnedi kunkamne.
130 Allah kandi peiamsemum upuda, pio inimna upu utopu kunerur dinin, kandi kael kemna deiyo keca karenememnya deiki di, kan dirineda ne dipru neitamai di katuai kupra derinerepa kael kemnune.
Men di men kael kepmanto kuramsi ngeda, kan upu deiki di dirine karenememnya deiki di, ‘Deiyo aca’ tenen, betapra kael kemnune. Tonda akeca-keca yuma men kael keami neng dakungedi, ‘Aupuda deiyo dan do?’ tenen, tupa wang-wang perur nesala tep nengeda, kan pesemem upu deiki di katuai kupra derimempa, kan inimna upu yumada sundi betapra kael kemkamenge.
131 Kandi pesemem upu ila di putanerura cadi, ne dipru neitamai aupu tep tenepetepnedi, ‘Uo aupuda weikanun ton kael keptene’ tenen, dipru pu jenerure. Ukupmantoda, kamda me putarepa, si akta kang-kang peramretopu kunune.
Ada tali tep gume. Ne nai Allah kandi, “Angeda kunkamrume, angeda men kunkamrume,” pepra deiamsemum upu yuma tep nengeda, ‘Aupu kael keptene’ tenen, pio putanerya deiki di kunune.
132 Kan si eremengedi, kan deikipu sun kange derinung nesala tep, menmena deremna gum dipapu, kandi bicau tenesememdi, pio telep kupra melimserume. Ange kael kepsa cadi, nedi Allah kan tep, ‘Ne nai bo’ tenen, ne kange kan deikipu derikenuna cadi, ‘Kandi ne tep bicau tenepnememdi melimkamnerum’ tenen, moropkene.
133 Tonda, ne nai Allah, ‘Ne mangkau di kan upu bisipra yaniptapnedi, mali kupnun’ tenen, kan pedina upu deiki di peiamsemumtopu, kalekra melimkamnerume.
Tonda, neda puto boun ngebo kununa cadi, ‘Mali kuna deiyo keca ne dipru gidoneredi, mali kun keca di ateng kouna utopu kupnerepa, mali weik kupnun’ tenen, ‘Naio, kandi kalekra melimnememdi, mali kuna neitamai di loptapnemempa, teleppu kunkamne’ tenen, moropkene. Atep ne nai Allah, ‘Kan puto di melipra kalengkamnerum’ tenen, moropkene.
134 Ange utopu, ne tep, ‘Erda tali ngebo,’ tenenengedi, ne nong deiki ikin keca weik derinenung nesalada, ‘Sun damai di dopra lyemdongonememdi, telep kupra derinkamnerum’ tenen, moropkene. Ada mesum tep gume.
Dinino, kandi lyepropnemempa, Allah kandi, “Ange kunkamrume, angeda men kunkamrume. Telep kunada ake,” pepra deiamsemum upupu, ‘Kandi melimnemempa, nedi aupu moupra talepnedi dukdongopra dumsisipu kunkamne’ tenen, moropkene naio.
135 Allah kan pio lengnapu kurum dirinda, ne deiki derinkamnerume. Tonda, ‘Ne putanere keca dimemdi, ne makuna tep melipra karenkamnerum’ tenen, moropkene.
Tonda, Allah kandi, “Angepu kunkamrume, angeda men kunkamrume. Telep kunada ake,” pepra deiamsemum upupu, ‘Moupra peteremnemempa, teleppu kunkamne’ tenen, moropkene.
136 Allah kandi, “Angepu kunkamrume, angeda men kunkamrume” pepra deiamsemum upu yumada, yuk nesala tapmengedi, yanipmenge pangeda, ne epnedi weika di engene taruda, ne asi meda, me bungna bukra embaramretopu kunerure.
Yuk nesaladi kan upu yaninunga cadi, engena weika di engenune. Ada, ‘Uo, ware keca deiyo tep Allah er pere upu yanitamnung do?’ tenen, engenune.

“Allahdi, ‘Ukunkamrume,’ pepra deiamseu upuda, pio dumsisi kuna upu pepra deiamsemume,” pepu upu

137 Ne nai Allah Yahweh, kanda mali kun keca tenpunge peda ton men kukerura cadi, tek sisi kanda pio telep ngebo kumemdi, dumsisi kun kecapu kurume. Tonda, kandi, “Ange kunkamrume, angeda men kunkamrume,” pepra deiamsemum upu deiki di, nimi tep telep kupra upu bongdiseruma cadi, kanda tek sisi pio telep ngebo kurume.
138 Allah kandi nun tep, pedina upu deiki di, “Ange kunkamrume, angeda men kunkamrume. Nedi pesenetopu kupra kupmumnyopda, nedi kalekra melimkamsene,” pepra deiamsemum pedina upuda, pio dumsisi upupu kurure.
Aupu yumada, nun tuai nesaladi pio pe deipra teka tenenkamepe. Kandi nun tep teneramsemumtopu, tenpunge peda men tapkamreme. Kandi teneramsemumtopu, ange yuma tek sisi tupa-tupa pel dopra kunkamsereme.
139 Ne nai Allah, nedi kan cap, kan upu cap tep, ‘Angeda pio teleppu kurure’ tenen, pio putanerepa, tenenapu kununa cadi, mali kunge nesala yumadi kan upu yaningedi, mali kun kecapu talepra kununga cadi, anesala tep ne yuda, ne damai uku bu jeramretopu kunerure.
Ada tali tep gume. Deiyoda, Allah kandi pepra deiamsemum upuda, ne podan nesala yuma, moupra men tenengedi, tali lumdongonapu kununga tep pepne.
140 Allah kandi, “Ukupkamsene,” pepra pedina upu deiki di peiamsemum ngeda, tek sisingepu pepra deiamuma cadi, aupupu moupra talepmepedi, angepu dombapyopda, nun kun keca yumada teleppu kunupe.
Ukupra kunupa deiki di kael kemnupe. Kan pepra deiamsemum ngepu, ‘Pio tek sisi teleppu kurure’ tenen, kael kemnupe. Atep nengeda, neda kan amutara kunedi, kan peiamsemum upupu talepra kunedi, kange deipra kunkamne.
141 Neda pio yambul mambul ngebo kunune. Tonda yuk nesaladi ne tep, ‘Erda tali ngebo kurure. Erda mambul gum tali ngebopu kurure,’ tenenenunge.
Neda mambul ngebo guma dinino, kandi, “Angeda kunkamrume, angeda men kunkamrume. Telep kunada ake,” pepra pediramsemum upuda pio men lumdongonune. Kan upuda pio tenenapu kunune.
142 Kandi nun tep, “Angeda kunkamrume, angeda pio men kunkamrume,” pepra pediramsemum upuda, pio dumsisi upupu kurure. Utopu, kan upu yumada tek sisi upupu kurure. Tonda, kan mali keca tenpunge peda men kukeretopu, pio dumsisipu kunkamrume.
Kanda dumsisi telep ngebo kurumtopu, pio telep kupra, dumsisipu pio kunkamrume. Kan dumsisipu kurum ngeda, pio men gum kupkamkere. Ukutaru dumsisipu kumemtopu, pio akunkamrume.
143 Tuai mutu neitamai kunkame taruda, pio kange mun keca ne damai yakankamnere. Dinino, ikin keca ne damai yakankamnera peda, kandi, “Angeda kunkamrume, angeda pio men kunkamrume,” pepra peiamsemum upu yuma tep nengeda, ne kange deipra kunune. Aupuda pio putanerure.
144 Kandi, “Ange kunkamrume, angeda men kunkamrume,” pepra peiamsemum upu yumada, pio dumsisipu akunkamre. Atep kandi kael kemna deiyo kecapu karenemempa, angepu talepra, kunkamne taruda, telep kupra gampu kunkamne.

‘Allah Yahwehdi melipra lyepkamner’ tenen, moropu upu

145 Ne kange dipru yumada kan deikipu deipnedi, ne nai Allah Yahweh kan tep, “Ne melipneo,” pepra morokenune. Teka ne nai Allah Yahweh kan tep pepkene, neda tek sisi kandi, “Ange kunkamrume, angeda pio men kunkamrume. Telep kunada ake,” pepra peiamsemum upupu talepra amutara kunedi gekepra dombankamne.
146 Neda kan amutarapu kupra kunkamne taruda, ne nai kan tep, mali pepra tupa moronapu kunkamkene. Ada, ne nai bo, ‘Kandi ne tep lyepkamnere’ tenen, moronkamkene. Tonda ne nai bo kandi, “Angeda ukuna meme, angeda ukuna telepe,” peiamsemungepu, ‘Nedi talepnedi kunkamne,’ tenenune.
147 Atep ne mapmanyane, berekure taru, ipna bukrone taru yumada, kan tepapu, “Melipneo,” pepra moronkamkene. Ada kandi pedisemem upu yuma tep pio, “Melipneo,” pepra moronkamkene. Ada kandi, “Ukupra melimkamsene,” peiamum upu tep, ‘Ukupkamner ja’ tenen, pio ketenepra dinapu kunkamne. Kandi pesemem upu deiki di ne kange derinune.
148 Ange utopu, ipmarepa lukunda neitamai nimidi mapmenge taru yuma peda, kandi nun tep, “Ukupra melipra telep kudinkamsene,” pepra pedina upu deiki peiamsemum upu tep, moupra nuknedi, ‘Deiyo dan do?’ tenen, pio tenenapu kunune.
149 Teka ne nai Allah Yahweh, kandi ne pekene upu yuma tep, kan gekepnememdi bicau tenepra melimkamnerume. Ada, kandi bicau tenesememnya deiki di, melimkamnerume.
Ange utopu ne telep kupra kunedi gampu kunkamna tep, kandi, “Ange kunkamrume, angeda pio men kunkamrume,” pepra peiamsemum upu kuretopu moupra kalengkamnerume.
150 Nimi mali kunge nengdi, kan kurum keca yuma tep, ‘Nun songe,’ tenepra kunung nengda, ne damai akunmange. Sun anengdi tenenge ngeda, ‘Nunda pio mali kun kecapu kupbatepe,’ tenengedi, kandi, “Ange kunkamrume, angeda pio men kunkamrume,” pepra deiamum upuda, anesaladi, ‘Nun songe,’ tenepra yanitamnapu kununge.
151 Sun anesalada ukunung dinino, teka ne nai Allah Yahweh, ne kunkamnaipuda kan akunkamreme. Tonda, kandi, “Ange kunkamrume, angeda pio men kunkamrume,” pepra deiamsemum upu yumada pio tek sisingepu kurure.
152 Kandi pepra deiamsemum upu kael keamsi taru neitamaida, pumun taru di dipdongopra aneitamai taru yuma kael keamsi. Ada, kandi, ‘Ne penkamsen upu yumada, keana keca tep men kurume. Nedi pepra derisenun upu yumada, pio akunkamre,’ teneamumdi, aupu pepra deipsemume. Angeda ne ton kael keamsi.

“Ne ikin kunere taru neitamaida, ne nai Allah melipneo,” pepra moropu upu

153 Ne nai Allah, kandi, “Ange kunkamrume, angeda pio men kunkamrume,” pepra deiamsemum upu yumada, men lumdongonuna cadi, ne kange mun kange doupra kunenge yumada, ‘Kandi dinememdi melipra lyemdonkamnerem’ tenen, moropkene.
154 Ne nai Allah, kandi, “Ukupra melipra telep kudinkamkene,” pepra pediramnemumtopu, ‘Kandi lyemdonkamnerum’ tenen, moropkene. Yuk nengdi, nimi tep upu bongdinunge taruda, “Erda mali kurure,” pepra luludinenung taruda, ne nai Allah, ‘Kandi ne damai yanememdi, “Angeboda, mali men kurure,” pepra melimkamnerum’ tenen, moropkene.
155 Nimi yuk nesala ton, yu tenena cap, ‘Mali kun kecapu kuptepe’ tenena cap, angepu kupbange nesala tep, kandi aneng lyepra men derinkamrume.
Deiyoda, kandi, “Ange kunkamrume, angeda pio men kunkamrume. Telep kunada ake,” pepra deiamsemum upu yumada, sundi, ‘Uo, aupu gekepra amutara kunkamepe,’ tenena gum di, kan upu tep, ‘Nun songe,’ tenepra tamnunga tep pepne.
156 Teka ne nai Allah Yahweh kandi ne tep tek sisi ila di bicau tenepra weika di melimnerum ngeda, men nukmanto kurure. Ne tep lyepra derinkamnereme. Ne nai Allah, kandi, “Ange kunkamrume, angeda pio men kunkamrume,” pepra deiamsemum upu akuretopu, ‘Kandi lyepra melimnemempa, tupa gam kunkamne’ tenen, moropkene.
157 Nimi weika di ne tep yu tenepra domembanenungdi, ne nong deiki ikin keca weik derinenung dinino, kandi, “Ange kunkamrume, telep kunada ake,” peiamsemum upu yumada nedi pio men tamkamne. Angepu talepra dombankamne.
158 Sun mali kun kecapu talepra kunge nesaladi kan tep teka tenena gum di, kan tep yanikenunge. Atep, anesala epnyopda, nedi sun tep, ‘Uo, amali kunge nesalada, ne pio dabale,’ tenen, kunune.
159 Teka ne nai Allah Yahweh, neda kandi, “Ange kunkamrume, angeda pio men kunkamrume. Telep kunada ake,” peiamsemum upu yuma tep, nedi pio kange derinune.
Ukupra kununada, kandi dinerume. ‘Kandi ne tep tek sisi ila di bicau tenenememdi, weika di lyepra melimnemempa, tupa gam kunkamne’ tenen, moropkene.
160 Kandi tek sisi upu karesurumnge yumada, pio dumsisi upupu kurure. Ange utopu kan upu neitamai di, mali kun keca pio men kupmarpa, kandi, “Ange kunkamrume, angeda pio men kunkamrume,” pepra deiamsemum upu yumada pio akunkamre. Aupu yuma men gum kupmanto kurure.

“Allah Yahweh kandi peiamsemum upu yumada, kange deipra gekenedi, pio talepra kunkamne,” pepu upu

161 Uo, ne nai Allah, sun amutu neitamai talepra kunge ila nimi deiyo nengdi, deiyo ton men kupmanerepapu, ne tep, ‘Erda mali ngebo,’ tenepra, ikin keca weik ne nong deiki deipmengedi, ne tep domembanenunge. Ukunung dinino, neda kandi, “Ukunkamrume,” pepra deiamsemum upu tepapu, ne kange dipru neitamai di, kware tenepra kunune.
162 Atep kandi ne tep, “Ukupra melipra telep kudinkamkene,” pepra pedina upu deiki deiamnemum upu yuma tep, ne pio kange derinune. Ukupmantoda, nimidi, ‘Bung keca weik doproptepe’ tenen, erteremenganen, epmengopda, ila kange deipra kuramengtopu, nedi kan pedinerem upu tep kange deipra kunune.
163 Neda, mok upu pena cap, mawa di pena cap, luludina upu cap yuma tep nengeda, nedi, ‘Angeda ne songe’ tenen, pio dabale kunerure. Dinino, ne nai Allah kandi, “Angeda ukuna telepe, angeda ukuna meme,” pepra deiamsemum upu tep, nedi pio kange derinune.
164 Tenpu tumi neitamai dinin, kange di ton cap, ue yoneitam bari deiki di, kan tepapu, “Uo, ne nai Allah, kandi peiamsemum upuda, pio teleppu kurure,” pepra kan si eremkenune. Kandi, “Ange kunkamrume, angeda pio men kunkamrume,” pepra deiamsemum upu neitamai yumada, mali upu tenpunge pe men kurura cadi, aupuda tek sisi pio dumsisi upupu kurure.
165 Tonda, ware nesala do yuma, kandi, “Angeda kunkamrume, angeda pio men kunkamrume,” pepra deiamsemum upu tep, kange deipra dombanung nesala yumada, mali kange douna gum dipapu, dimpepra bouna di kununge.
Sun adim pepra kunkameng nesalada, ikin keca weik akaptua peda, mali kuna gum dipapu, teleppu kupbanunge. Ukupmantoda, sun yan giso dungne gel ton bisi neitamai akapmarya peda, gel yan giso dukrepa men saka ponunge.
166 Ne nai bo Allah Yahweh, ‘Kanda nimi weika di lyemyankamrem tumida, ware tumi do?’ tenen, neda ketenepra dinapu kunune. Ukupra ketenepra dinapu kunkamne taru neitamaida, kandi, “Angeda kunkamrume, angeda pio men kunkamrume,” pepra deiamsemum upupu moupra tenepnedi, talepra kunkamne.
167 Allah kandi, “Angeda kunkamrume, angeda men kunkamrume. Telep kunada ake,” pepra deiamsemum upuda, pio teleppu kurure. Aupu yuma tep, ne kange derinune. Atep nengeda, neda Allah kandi pepra deiamsemum upupu amutara kunedi, aupupu talepnedi, moupra kunkamne.
168 Ne nai Allah, nedi kunun keca yala-yala yumada, kan dipapu epra kael kemnerume. Atep nengeda, kandi, “Angeda kunkamrume, angeda pio men kunkamrume,” pesemem upu cap, “Angeda telepe, angeda mali. Telep kuna tep ban bisida ace,” peiamsemum upupu talepra dombanune.

Allah tep, “Melipneo,” pepra moropu upu

169 Teka ne nai bo Allah Yahweh, nedi kan tep ne mali pepra morokenun nge yumada, ‘Gekepkunerum’ tenen, dopra, kan damaipu derikenune. Ada, kandi, “Ila kael kemna deiyo keca karepkenepa, ne upu moupra kael kemkamrume,” pepra pedina upu deiki pepnemumtopu, “Ne kael kemna tep karepnerume,” pepra moropkene.
170 Ange utopu, nedi kan tep mali pepra morokenun nge yumada, ‘Gekepkunerum’ tenen, dopra, kan damaipu derikenune. Ada, kandi “Ikin keca neitamai kunkamrum taru neitamai di, ne dipapu lyemdonkamkene,” pepra pedina upu deiki pepnemumtopu, “Kandi lyepropneo,” pepra moropkene.
171 Allah kanda pio akumemdi, kandi pesemem upu yuma ne tep peteremnerume. Atep nengeda, neda tumi-tumi yuma, “Uo, kanda pio telepe kurume,” pepra, kan sipu pio eremkamkene.
172 Ne nai Allah, kandi, “Angeda kunkamrume, angeda pio men kunkamrume,” pepra peiamsemum upu yuma neitamaida, mali upu tenpunge peda men kurure. Aupu yuma, pio dumsisi upupu kurure. Atep nengeda, nedi, “Uo, Allah er upuda pio teleppu kurure,” pepra kange lon mut deiki di pio penkamne.
173 Kandi, “Angeda kunkamrume, angeda pio men kunkamrume. Telep kunada ake,” pepra peiamsemum upu yuma, nedi, ‘Aupupu moupra kael kepnedi, angepu pio talepra kunkamne’ tenen, konum dopra dombanune. Atep, ‘Kanda dinememdi ketenepmemnya di ne tepapu pio bicau tenepra melimkamnerum’ tenen, moropkene.
174 Uo, ne nai Allah kandi nimi weika di lyepsememdi, talepra telep kudinkamserum ngeda, ‘Dan taru di lyepkamserum do?’ tenen, pio ketenepra dinapu kunune. Tonda, kandi, “Angeda kunkamrume, angeda pio men kunkamrume,” pepra peiamsemum mem upu yuma tep, ne kange dipru neitamai yumadi, ‘Aupuda pio telepe,’ tenenune.
175 Ne nai Allah kandi, “Angeda kunkamrume, angeda pio men kunkamrume,” pepra, peiamsemum mem upu yuma dopropnedi, talepra dombankamna deiki di, puto kemdinerepa, ne telep kupra gam kunkamne. Tonda, kandi melimnemempa, gam pio kunkamne taruda, tali men kunkamne. Nedi kan tepapu ila di kange deipnedi, “Kanda pio telepe kurume,” pepra kan sipu pio eremkamkene.
176 Uo, ne nai Allah, neda kan amutara kunedi, kan pelpu donun dinin, domba bisam tenpu wangamrepa, er peina deiyo ngebodi, ‘Ne domba bisam dan mutu kurur do?’ tenen, eramretopu, neda telep ban bisi wangapneupa, mali kange doupra kununa cadi, kandi eryankamnerume.
Ada tali tep gum dinin, kandi, “Angeda kunkamrume, angeda pio men kunkamrume,” pepra deiamsemum upu yuma men lupronune. Aupuda moupra tenenapu kunune. Atep melipra eryankamnerume naio.
Raja Dauddi Allah morona deiki di pepu.