Psa 12 | XteSC | STEP | Nimi deiyo ngebo Raja Dauddi aMazmur upu mut seku. Ada, Allah upu mut pena deiyo ngebo er karepkamnga tep seku. Tonda, amutda, yuk mut, er si Shemit lelim perameptopu deiki di, amut peda penkamrume.

Psalms 12

Israel mutu neitamaida, nimi yumadi mali weik kuramipa, Allah tep moropu upu

1 Nimi deiyo ngebo Raja Dauddi aMazmur upu mut seku. Ada, Allah upu mut pena deiyo ngebo er karepkamnga tep seku.
Tonda, amutda, yuk mut, er si Shemit lelim perameptopu deiki di, amut peda penkamrume.
2 Uo nun nai Allah Yahweh, Israel mutu neitamaida, ‘Allahdi pesere upu moupra gekepmepedi, angepu talepra teleppu kunkamep’ tenena nengda, tenpunge pe tupa men kununga cadi, naio kandi yana lyepropsetume.
Teka tuai mutu kunge nesala yala-yala neitamai yumada, tenpu ngebo peda, ‘Neda pio men tapkamne dinin, Allahdi pesere upupu, moupra talepnedi, dumsisipu kunkamne,’ men tenerure. Nimi yumadi kan upuda konum yanitamnunge.
3 Allahdi pesere upu pio men tenenung dinin, ton nengdi, sun kayapu neng yuma tep, tali-tali upupu pedanunge. Sundi, yuk neng tep, ‘E, kanda pio telep ngebo kurume,’ pepra, tali dipapu mok upu deiki di penung dinin, sun kange dipru neitamaida, pio yuk kecapu tenenunge.
4 Ange tep nengeda, nundi, kanda Yahwehdi, tali upupu penung nengda, sun sipyal bam bol sektapmemnyopda, ‘Mok upu ton tupa men penkamenge’ tenen, morokenupe.
Salnong-nong kamengedi, sun sipyal cap, lyemu cap deiki di, ila gemena upupu penunga tepa.
5 Tonda balila kange doupmengedi, sundi, “Nun ila kael upu di pepmepyopda, yuk nesala yuma tep, bisbisa kapkamepe. Sunda nun amutarapu kunkamenge,” pepra penunge.
Tonda, sun diprupu eremdangedi, “Nun kange dipapu tenenup upu yumada, tali lupra penkamepe. Ware ngebodi, ‘Kandi angeda kupkurume, angeda pio men kupkurume,’ pepra, upu bokeipsetu do? Gume, nun kange dipapu tenenuptopu kunupe,” pepra, salnong-nong kamengedi penunge.
6 Atep, nun nai Allah Yahwehdi tenepra pepserure. Ada yu nengdi, sun tali kan-kan nesala tep, yanitamnapu kununge. Ukungedi, ikin keca pio weika di dopra, sun nong deiki derinunga tep, sun tali kankan nesaladi, ngolokra engenunge.
Ange tep nengeda, ne Allah Yahweh, menmena teknedi, sun akankan nesala tep, melipra yankamne.
Sun tali kankan nesaladi, ‘Uo, nun nai Allah lyepsetudi, pio telepai deipsetupa, tali dim pepra kutepe’ pepra, ikin kange doupra, kungedi mororamneng utopu kupra, tek sisi sun damai yana lyepropsenedi, nimidi yana men popmantoipu dopra deipkamsen ja!
7 Ange tep nengeda, Yahwehdi, ‘Ukupkamsene,’ pepra, pedina upu deiki di pesere upu yumada, pio tek sisi upupu kurura cadi, erdi peseretopu tek sisi kupkamsere!
Ukupmantoda, nimidi kunumna weik keca, er si perak dopra, ue ngantan bari deiki di, uku dongopmengepa, uku di mali keca yuma jepropredi, perak pio telep ngepu katuai kuramretopu, Allahdi pesere upu neitamaida, tali upu tenpunge peda, pio men kurure. Tek sisi telep upupu peserure.
8 Atep nun konum kaele. Ukutaruda, pio mali nesala kankan neitamaipu kunup dinino, nun nai bo Allah Yahweh, kan dipapu, melipra kalengsememnya deiki di, teleppu kunkamepe.
Atep, kandi talepra kaleksemempa, ataru neitamai kunung yu nengdi, ton cap men popsetenge. Ataru di dipra, dorkunkamre taru yumada, kan dipapu pio moupra kalengsemempa, sundi ton cap mali men kweipkamsenge.
9 Ataru neitamaida, amutu kunge nesala bokra pio weik tara nesaladi, ‘Mali kun kecapu talepra kupmeko!’ pepra, dipru erepmengedi, gemenunga deiki di, mali pio weika di kununge.
Atep, nun dana-dana tara yumada, sundi, ‘Ware ngebo ton popra mali kweiptepe do?’ tenen, pio epra embanunge. Ukupmantoda, yu kamdi, ‘Ayam mada dan cei kunmatupa, popra jeptene do’ tenen, pio pe deipredi, epra embaramretopu kununge.