Psa 120 | XteSC | STEP | Neda kange mun kange doupra kune taru neitamai yumadi, ‘Ne nai Allah Yahwehdi ne damai yana melipra lyepkamner’ tenen, “Ne nai bo kandi yana melipra lyepropneo,” pepra moronune. Nedi Allah tep morone taru yumada, gekepredi melimnerure.

Psalms 120

Dauddi, “Melipneo,” pepra moropu upu

1 Neda kange mun kange doupra kune taru neitamai yumadi, ‘Ne nai Allah Yahwehdi ne damai yana melipra lyepkamner’ tenen, “Ne nai bo kandi yana melipra lyepropneo,” pepra moronune. Nedi Allah tep morone taru yumada, gekepredi melimnerure.
2 Teka ne nai bo Allah Yahweh, “Kandi sun tali upu pertamnung neng cap, minina upu pertamnung neng yuma cap, sun akununga kan-kan neitamai di, ne lyepropneo,” pepra moropkene.
3 Uo, sun mok upu penge nesala wenemna tep, Allahdi, sun nong deikida ware ikin keca karepkamre do? Tonda erdi sun mok upu penge nesala tep, ‘Weika di ton cap tapakra wenepkamne,’ tenepyopda, ware keca deiki di sun tep, wenemna keca dopra, sun nong deiki deipkamre do?
4 Ne kangeda, erdi go kareprepa, yu nengdi mar takke lupra deipmengedi, ‘Sun mok upu penge nesala yuma popkamep’ tenen, mar dopmengopda, popkamsenge. Tonda, nimidi, gat co uku dongopmangepa, jepropmaredi, uku kalum yopu laramrenge dopra, sun aneng nong deiki deipkamsenge.
5 Uo, neda, bicau tenena gum di, pio yu kuprepa yuk neng tep potamnapu kunge nesala kankan kununa cadi, ne mali kange dounune. Ada sun yu weik nesala, Mesek mutu neng cap, Kedar mutu neng cap, utopu kupra kunge nesala neitamai kikiman kununa tep, ne mali kange doupra kunune.
6 Ne cap kikiman kunge nesalada, yuk nimi yuma tep, ‘Kikiman dipru dukdongopra bouna dipapu kunkamepe,’ tenepra pio men kununge. Sunda, ‘Yuk nesala yumada, nun songe,’ tenen, ponapu kununge.
Ayu nesala cap kikiman kuramsi taruda, keteng tamun weik kuramsa cadi, ne dabal weik kunerure. Atep, ne putanerur ngeda, ‘Sun yu kunge nesala cap, ne cap kikiman pio men kunkamepe,’ tenenune.
7 Ada nedi, “Yuk nesala cap, kikiman dipru dukdongopra kuna ngeda, telepe pua,” peramne taru yumada, ne cap kikiman kunge nesalada, yu weik nesala cadi, sundi, “Gume, yuk nesala cap, dipru dukdongopra bouna di kikiman kuna ngeda, nun songe.
Telep ngeda, nunda mar podanapu kunkamepe,” penunge. Atep nengeda, ne dabal weik kunerure. Dauddi pepu.