Psa 121 | XteSC | STEP | ‘Allah er si eremkamep’ tenen, Yerusalem mutu welerbarami taru perami mutda ake. Nedi mutu-mutu yuma dinmankapnedi, ‘Uo, ne melipkamner ngeboda, dan mutu di yaredi, melipkamner do?’ tenen, dinune.

Psalms 121

Allahdi Israel tep meliamnga tep, mut pepu upu

1 ‘Allah er si eremkamep’ tenen, Yerusalem mutu welerbarami taru perami mutda ake. Nedi mutu-mutu yuma dinmankapnedi, ‘Uo, ne melipkamner ngeboda, dan mutu di yaredi, melipkamner do?’ tenen, dinune.
2 Ne melimyakanerur ngeboda, ne nai Allah Yahweh kurure. Erda, im deiki cap, tuai mutu cap, ketekepra deipka deiyo ngeboda, Allah er tenpu kurure. Er dipapu melimkamnere.
3 Tonda, erdi nun tep men tapkamsere. Telep kupra kalekserepa, nun yan peda, ton ulaproprepa men ponkamsere. Allahdi nun Israel nesala tep, pio kalengserur ngeboda, ton pio men marure. Erdi tupa-tupa nun damai kuredi kalekra melimkamsere.
4 Tek sisi pepne, Allah er si Yahwehdi, nun Israel nesala tep melipra kalengkamsera cadi, erda udungna cap, mana cap utopu, men kunkamre.
5 Allah Yahwehdi, nun damai akuseredi, melipra dinkamsere. Tonda nun nai Allah Yahweh dipapu nun doprapseredi, nun dumsisi tarapu kalengkamsere.
Ada ukupmantoda, keteng deipre taru ila co tekamyai amutara kawai bungamenga utopu, Allah Yahwehdi erepra deiki tara kurepa, nunda er amutara kunkamepe.
6 Ukunkamsera tep nengeda, komuni taruda, keteng deipredi, nun nong deiki keteng pio men jenkamsere. Lukunda taru peda, war dirin kupre taruda, bule nun nong deiki men yakankamsere.
7 Allah Yahwehdi, nun yuma tep kalekra melimserya deiki di, nun popmanto keca yumada, nun damai ton pio men kunkamsere. Erdi telep kupra melimserepa, gampu kunkamepe.
8 Allah Yahwehdi nun ban taru pe, yakan taru peda, pio telep kupra kalengkamsere. Ada ukutaru di dipdongopra, yuk dortaru peda, pio tep kalengkamsere.