Psalms 122
Yerusalem mutu welerban taru tep, kange deipra mut perami upu
1Daud kange deipudi mut pepu.
Yuk nengdi upepnei. “Kan cap nun yuma, Allah Yahweh er si eremna ati kikiman benkupe,” pepneipa, ila kange deipsi.
2Ukutaru nun yumadi, Yerusalem mutu ati buplan dam yana yanipra, tekamepa tep, “Uo, Yerusalem mutu yanmape. Atep, kange deipkupe,” pepmepe.
3Uo, Yerusalem mutu ati dopi ngeda, yuma tenpu dukdongopra dopipa, akota neitamaida, ton mali kuna gum dipapu, pio urasin telep kupu.
4Amutuda, Israel nesala yala-yala yuma yakankamenge. Tonda, Allah er si Yahwehdi wepra deiamu neng, Israel yala nesala tep, “Ukupra kumumdi, sun yumada ne sipu eremkamnerume,” peiamutopu yakangedi, Allah tep telepe pepra, gispal doryakankamenge.
5Yerusalem mutu neitamaida, Daud er yala nengpu, nimi deiyo neng kepra kungedi, sun bungna telep keca deiki bukrapmengedi, Israel nesala yuma tep upu bongdinkamenge. Ada Daud er yala nengpu, apel talepra donkamenge.
6Tonda, sun Yerusalem mutu kunge nesalada, ware kupra kunung do? ‘Podana gum dipapu, kange deipdana telep kunkameng do?’ tenen, Allah moronkamepe. Atep, nundi aneng yuma tep kange deipra Allah moropmepepa, sun yuma tenpu kange doupra teleppu kunkamenge.
Ware nesala do yumadi, Yerusalem mutu kunung nesala tep, bicau tenenung nesalada, sun peda teleppu kunkamenge.
7Nun yumadi, Allah moropmepepa, Yerusalem mutu gel beilya ongopgenepra, wipya neitamai kunkameng nesalada, teleppu kunkamenge. Tonda, Allah moropmepepa, Yerusalem mutu neitamai talepra kunkamenga deiyo neng, sun yala neng yuma cap, sun bung yuma cap, teleppu kunkamenge.
8Ange tep nengeda, nun kayapu cap, nun weit yapu cap, nun du yapu cap yumadi, ‘Yerusalem mutu kunge nesala yuma kange deipdangedi, tenpu kange doupra, teleppu kunkameng’ tenen, Allah moronkamepe.
9Tonda, ‘Nun nai Allah Yahweh er si eremna atida, pio teleppu kunkamre’ tenen, Yerusalem mutu kunkameng nesala tep, Allah moropmepepa, sundi amutu telep kupra talepmengedi, kunkamenge. Dauddi pepu.
Copyright information for
XteSC